الورشة الثانيه سطايفية

[stayfiya]

اااااااالسلااااااام عليكموووو
وااااش راااكم
اااا دخلتو تجريو عمبالي بيكم
اني بطلت منيش رايحة نحط الروبة قلتولي ديري ورشة و رانا معاك نطبقو و درتها و مكاان حتى وحدة على وجه ربي فرحتني
هيا حاولوني اش نحطلكم الروبة :mh31:
:mh31:
:mh31:
:mh31:
:mh31:
:mh31:
:mh31:

:mh31:
:mh31:
عيشك عيشك يا السطايفية
:mh31:
:mh31:
:mh31:

خلاص خلاص راكم غضتوني بصح هااااهي عيني ماطبقوش

المهم اليوم راني دبرت فيها ابرونتي جديده مرت خويا الثاني ههههه
بصح شوفو ركزو ملييييح كتانها راه مخلط عندكو دوخو
على بركة الله
ام مريومة طيبيلنا شوي قهوة صارة او وليد ام مجد و باقي ابنات ركزو مليح معايا
الروبة نتاع الدار هدي المرة مودالها معروف على الساحة الوطنية ههه و شايعة وانا زدتلها تعديلات احححمم
هاهو الباترون و شنهي حنا بدلنا في المقاسات شوي على حساب لابرانتي خاطر بطبوطة
http://im31.gulfup.com/Qx03s.jpg
و هكذا كي طبقنا على الكتان
http://im31.gulfup.com/l0dT9.jpg
و الكتان راه مطبق على 4 و قصيناه يعني سيدتي سااااااهلة ماااااهلة
ماعليك غير تهزي لمقص و الاطاك ههههه
و ضك تسيباري الامام و الخلف و تبداي تقطعي الطرف نتاع الصدر
و من بعد نقولك باش تعوضيه
انا زدت ستعت جيهة لا بواترين و كل وحدة على حساب لاطاي نتاعها
http://im31.gulfup.com/iaVkL.jpg

و من بعد نديرو حساب لي بانس نتاوعنا يجيو تحت الصدر
http://im31.gulfup.com/GkPZc.jpg

انا هبطت ب 9 و نتوما ااااز يووو لااايك
http://im31.gulfup.com/HQbiR.jpg

http://im31.gulfup.com/eYah7.jpg

و ضك حطي الامام ابار و جيبي الخلف و قطعيلو بياسة الظهر راكي معايا
http://im31.gulfup.com/Ky5nn.jpg

وتحت الظهر ديري بانس حتى للتحت هذا نحب نديرو بارسكو ميخليش فراغ في فتحة الظهر و حنا هبطناها و منها جي لا فورم مليحة من لور


http://im31.gulfup.com/2Va5S.jpg

و نزيدو نفصلو المونش لابرانتي قاتلك ديرولي مراوح
http://im39.gulfup.com/v4B0u.jpg

خلصنا لفصالة اهداوني نشرب شوي قهيوة راسي راه يسطر ونكملو اوووكيييييييي

[stayfiya]

و بعد ما شربنا القهوة و تعشينا و صلينا و تكسسلنا نكملو موضوعنا ياخي مرقدتوووش ياااو صحصحو معاااياااااا
رانا وصانا للصح و اي غلطة راني نجيك للدار و نطرطقلك الخياطة سمعتي
باسم الله
اول حاجة نبداوها لي بانس نخيطوهم و نبداو بالامام
http://im40.gulfup.com/zoUeZ.jpg

http://im40.gulfup.com/A2CCp.jpg

و كي نخيطوهم شوفي كيفاش يجيو
http://im40.gulfup.com/DhmbE.jpg

و كي ديري لي بانس ديري الفيزلين من تحت الكتانو حديها باش تلصق ملي راكي تعرفي الكتان نتاع لابرانتي يتكسل من سطيف للاغواط هههه
و من الجهة الاخرى حطي التيلو و خيطي ساير جاير و قصي الزائد
http://im40.gulfup.com/OTkwE.jpg

http://im40.gulfup.com/MmcGp.jpg
وقبل ما تقلبي التيلو داخل الروبة لااااازم تكرونتي بالمقص وين كاين الواحد سم خارج لخياطة باش ميجيناش التكماش من برا اوووكيييي
http://im40.gulfup.com/CUsdQ.jpg

نجييييو لمربط الفرس الطرف الزايد لي يجي كروازي في الصدر حبينا يكون من لون مختلف و تحطيهم فوق الفتحة و تبداي تخدمي النقشات كيما راهو في الصورة
http://im40.gulfup.com/nJU7Q.jpg

و تحكميه بلي زيبانقل ولا برا و خيط و تخيطيه بالمشينة
http://im40.gulfup.com/DYF6w.jpg
انا خيطتو مقلب خاطر ماكنتش نقدر نشوف حدود الكتان على هاذيك ننصحكم خيطو بالبرا و الخيط احسن منها روبير و منها جي ساهلة في النقش
و بعد ما تخلصو قطعو الطرف الزايد
http://im32.gulfup.com/vi3UH.jpg

و تزيدي الطرف الثاني بنفس الطريقة
http://im32.gulfup.com/mMatG.jpg

http://im32.gulfup.com/xnMeJ.jpg

تحدي لخياطة نتاعك مليح و تركزي على لي فرونس

و ننتقلو للظهر نديرو نفس الخكوات بصح في بلاصة لبياسات راحين نركبو دي ريبون
نفصلوهم و 4سم عرض
http://im40.gulfup.com/YvCYC.jpg

http://im40.gulfup.com/Uix1C.jpg

و نركبوهم في الظهر بهاذي الطريقة
http://im32.gulfup.com/q7EC2.jpg

ضرك نركبو الامام و الخلف في بعضاهم
انا نحب نطبق طريقة تخلي لخياطة جي دخلاني و ما تجينيش في الرقبة و جي خياطة نظيفة
http://im32.gulfup.com/O6oyN.jpg
و تقطعي الطرف في الحاشية باش مجيكش مكربعة و خاطر كون مانقصوهاش جي خشينة و تتكسر لبرا في كثير من الاحيااان

http://im32.gulfup.com/wxA90.jpg

http://im32.gulfup.com/7lzX1.jpg


و هاكذ من برا جي خياطة شااابة ههههه
http://im32.gulfup.com/U0v1k.jpg

و بقالنا المونش نركبوه و من بعد نجملو الروبة من الجيهتين
http://www.up.djelfa.info/uploads/143631154205561.jpg


خلصنا لخياطة يويويوووووووي
اسناااو بقالنا التزييين ضكلابرانتي نيميرو2 قلبت الدنيا ملقاتش قالوبوقوص دزتلي لسطيف و حوست لقيت غير هذا لي يشبه شوي
http://www.up.djelfa.info/uploads/143631154212073.jpg

و ركباتولنا لابرانتي نيميرو 1 هههههه يعطيها الصحة
http://www.up.djelfa.info/uploads/14363128694541.jpg


و انتهيناااا و هاي ليك يا لابرانتي سيانس فوتو على ظهر السطايفية ههههه


http://www.up.djelfa.info/uploads/143631286949212.jpg
تقلشي و زيدي تقلشي اااااانعم


http://www.up.djelfa.info/uploads/143631286952723.jpg

http://www.up.djelfa.info/uploads/143631363596291.jpg
خلاصو صواردكم وانا طاحتلي الباتري و نعست و كيما وصيتكم انتلاو طبقو و ميشي شرط كيفها المهم تهزو افكار و خرجو واش كاين في الخشخاش يا عباقرة
هيا دمتم بخير و مزاااال و مزاااال مع السطايفية المرة الجاية كاين ماخير عريو على ذرعيكم برك
باش ماننساش نشكر كل من مر بالموضوع حتى و لوكان لمحوبرك و شكر خاص للابرانتي لولة والثانيه ربي يباركلهم في ديارهم و ولادهم اااااميييييين
سلاااااام

[بوعنينبة]

يسعدني اني اول وحدة ترد نقولك
بارك الله فيك ومشكورة على المجهودات وربي يكثر من امثالك

[stayfiya]

ههه ربي يخليييك لااازم لااازم تخلي البصمة نتاعك في مواضيعي شكراااااا شرفني مرورك

[ام مريم اسراء]

وااااااااااااااااااااااااااااااااااااااااااااااااا اااااااااااااااااااي طلت الحادقة

[ام مريم اسراء]

من عيوني تامري امر القهوة نطيبها و نزيد كشما نشري قاطو منيش لاتيا بالكوزينة راني كرهتها ههه راني حابة نزكككككككككز تبقاو عل خير يا مواعن العشاء لغدة لاحب ربي نغسلكم

[كنوزنبراس]

بلمتابعة...........

[غيداق]

وانا الثانية نهنيك بالورشة الرائعة والله يا السطايفية يا الزينة ربي يخليك لينا تفرحي قلوبنا وتمتعي عينينا بابداعاتك الرائعة تشعلي الحماس فينا وباذن الله انا رايحة نخيط هذا المودال لاني خيطت الورشة الاولى وجات تهبل انا اول مرة نخيط واول مرة بديتها معاك منين نقدر نصور تطبيقاتي راني نحطهملك باه تقيميني
والله قد ما نقول ما نقدرش نوفيلك حقك من الشكر والعرفان فبارك الله فيك حبيبتي

[ام مريم اسراء]

يا اختي متزعفيييش على خطر مطبقتش راني كون نطبق نفوتك و درك راني غير حشيشة طالبة .. وريشة اه معيشة باش نشفوك و تكثري الورشااااااااااات
........ دعاوي الخير خير ....... اما الكولور روعة عجبني واش نقلك ......

[om meriem]

والله رانى معاك وربي يعطيك صحتك

[Om hazar]

السلام عليييييييكم بارك الله فيكي يا اختي سطايفيه او في لبرونتي تعك ثانيه

[أم عبد الرحيم2]

مممممممممممممم روعة حبيبتي كملي كملي باش نشوف
بصح راكي سامباتيك خلاص ضحكتيني في الشرح
هيا قوليلي وقتاش نروحو لدار الايتام لهادوك لعرايس؟؟؟

[stayfiya]

ايييييوه يعطيك الصحة ام مريومة قهيييييوة و عليها لكلام واشمن ماركة هادي ,,,,,
http://upload.wikimedia.org/wikipedia/commons/4/45/A_small_cup_of_coffee.JPG

[نادية28]

ربي يعطيك ماتتمناي

[ميار صهيب]

لك الف شكر شكرااااااااااااااااااااااااااااااااااااااااااااااا ااااااااااااااااااااا

[stayfiya]

مممممممممممممم روعة حبيبتي كملي كملي باش نشوف
بصح راكي سامباتيك خلاص ضحكتيني في الشرح
هيا قوليلي وقتاش نروحو لدار الايتام لهادوك لعرايس؟؟؟
حبيبتي انا رحت و يعرفوني تري بيان و عرضوني للعرس عرضني المدير شخصيا ههههه :1:

[om meriem]

مدام عندك النات غدوا انحطلك مدال ناش تقولياي كفاشيتخيط وبارك الله فيك

[om meriem]

في الصباح ان شاء الله

[biba04]

ستايفية يعطيك الصحة لعزيزة انا قلتلك راح نطبقو الاول
ماكانش عندي وقت بصح اكيد نطبقو السمانة لجاية تلقايه واجد ومديلى العلامة والوسام نتاعك ههههه هاد القندورة
تاني تهبل كي نكمل الاخري ندير هادي ربي يحفضك لعزيزة

[stayfiya]

السلام عليييييييكم بارك الله فيكي يا اختي سطايفيه او في لبرونتي تعك ثانيه

اهلاااا لابرونت نتاعي الاولى علابالك نتي صاريلك كيما الطفل البكري عزيز و مدلل هههه ومانيش ناسية بلي نتي لي ركبتي القالون و قستيها و صورتك ههههه و مزال الخير لقدام

يا اختي متزعفيييش على خطر مطبقتش راني كون نطبق نفوتك و درك راني غير حشيشة طالبة .. وريشة اه معيشة باش نشفوك و تكثري الورشااااااااااات
........ دعاوي الخير خير ....... اما الكولور روعة عجبني واش نقلك ......
اخلايا لاكولور والله زرولتني و الورشات راهم كاينين ربي يخليلي لي زابرونتي و حييلي الجمهوور ههههه

وانا الثانية نهنيك بالورشة الرائعة والله يا السطايفية يا الزينة ربي يخليك لينا تفرحي قلوبنا وتمتعي عينينا بابداعاتك الرائعة تشعلي الحماس فينا وباذن الله انا رايحة نخيط هذا المودال لاني خيطت الورشة الاولى وجات تهبل انا اول مرة نخيط واول مرة بديتها معاك منين نقدر نصور تطبيقاتي راني نحطهملك باه تقيميني
والله قد ما نقول ما نقدرش نوفيلك حقك من الشكر والعرفان فبارك الله فيك حبيبتي
الحمد لله و الله نفرح كي نشوف واحد تعلم حاجة من عندي

[farachati]

:dj_17: :mh92:


الله يبارك عليك ,راكي top ,غير تدخلي للمتدى نهجمو عليك

علابالنا رانا رايحين نتعلمو بزاف معاك surtout المبتدئين كيما انا

سلامي لي لبرونتي على التعاون:mh31:

[marwa bac 2013]

واو يا أختي سطايفية شكرًا شكرًا راكي top تع top والله فرحفي من قلبي شكككككككككرررررررررررا و ما تنسايناش كتر لنا من أعمالك الفنية

[stayfiya]

ستايفية يعطيك الصحة لعزيزة انا قلتلك راح نطبقو الاول
ماكانش عندي وقت بصح اكيد نطبقو السمانة لجاية تلقايه واجد ومديلى العلامة والوسام نتاعك ههههه هاد القندورة
تاني تهبل كي نكمل الاخري ندير هادي ربي يحفضك لعزيزة

الله يبااارك صحيتي يا بيبا الفحلة نستعرف بيك من ضك ادي الوسام

واو يا أختي سطايفية شكرًا شكرًا راكي top تع top والله فرحفي من قلبي شكككككككككرررررررررررا و ما تنسايناش كتر لنا من أعمالك الفنية
يا بتي التاي بالباك و من بعد ساهل الحال ههههه انا نعطيك لا ليسانس ميش مشكل ههههه:1:

[stayfiya]

:dj_17: :mh92:


الله يبارك عليك ,راكي top ,غير تدخلي للمتدى نهجمو عليك

علابالنا رانا رايحين نتعلمو بزاف معاك surtout المبتدئين كيما انا


سلامي لي لبرونتي على التعاون:mh31:


بلا مزية شريكتي :19:
رااااني هنا وراكم وراكم :1:,,,,,,,,,,,,,,,,,,,,,,,,,,,,,,,,,,,,,,,,,,,,

[marwa bac 2013]

سلام أختي سطايفية حبيت نسألك كم تركتي بين Pince و كيف فصلتي الصدر و شكرًا مسبقا

[Afakmax]

يعطيك الصحة على المجهود خياطتك تهبل

[OMGHANO]

ههههه حكمتك عليك كنت نحوس انا نموت على الخياطة و ملقيتش وحدة تعلمني في الدار وجابك ربي انشاء الله تعلمني من قلبك وتربحي الاجر قوليلي وين نلقى الورشات تاوعك ورايحه نوريلك واش تعلمت منك ربي يجعلها في ميزان حسناتك نشكرك على كل شيء وراني متابعة وفية ليك

[stayfiya]

سلام أختي سطايفية حبيت نسألك كم تركتي بين pince و كيف فصلتي الصدر و شكرًا مسبقا
شوفي يا البابيشة حنا عادةً لي بانس اكتان و هو مطبق على زوج نحدو المنتصف نتاعو بيانسور في خط الخصر و نديروثم نقطة البانس نمشي ب1سم من و من و الطول على حساب الموديل

يعطيك الصحة على المجهود خياطتك تهبل
شكراً حبيبتي هذا من ذوقك

ههههه حكمتك عليك كنت نحوس انا نموت على الخياطة و ملقيتش وحدة تعلمني في الدار وجابك ربي انشاء الله تعلمني من قلبك وتربحي الاجر قوليلي وين نلقى الورشات تاوعك ورايحه نوريلك واش تعلمت منك ربي يجعلها في ميزان حسناتك نشكرك على كل شيء وراني متابعة وفية ليك
شوفي قلبي الصفحات رايحة تلقاي الورشة الاولى و مزال الخير وجدي روحك بر ك و كاينة ورشة دارتها ختي نيروز
اكيد تفيدك

[جيجلية]

شرح رائع

بارك الله فيك اختي stayfiya

الورشة الاولى ساهلة بلاك نقدر نجربها بصح هذه ما شكيتش

[om meriem]

تبارك الله هده يدين ولا بطل يعطيك الصحة جا يهبل

[Om Abdul Malik]

يعطيك الصحة وبارك الله فيك يا الفحلة أنا أن نتعلم في الخياطة ومواضيعك هدو كامل أني مسجلتهم عندي و كي تمشي يدي في الخياطة نطبقهم والله ورشتك فرحتني وهكي القاتو مع القهوة تستاهلي كترhttp://4.bp.blogspot.com/_2JV-SfPP-a0/S_6GXza081I/AAAAAAAABM4/lUwrHEVlkvw/s1600/1.jpg

[أم عائشة]

شكرا بارك الله فيك على الورشة المميزة

[om meriem]

تصلح كون نبدل الطرف الاسود بالبرودى عندي قماش احمر في الابيض و البرودى احمر والنوارة الي فيه بيضاء

[هديل نور]

ربي يبارك فيك و يعطيك ما تتمني

[فاطمة1987]

يعطيك الصحة متعتينا بكلامك الحلو الله يبارك

[ام امين2012]

ورشة مميزة و شرح جد رائع بارك الله فيك واصلي التالق دائما

[RAHMA MALAK]

ya3tik sa7a

[sakura be]

يعطيك الصحة سطايفية والله مانعرف نخيط لوكان نطبق راهو الشرح انتاعك يهبل اسمحيلي برك (ماتقوليش الشناوة مايعرفوش يخيطو ههههه)

[nadoouuch]

الله يبارك خرجت تهبل، بصح تخرج عليا خير واش رايك ديريني لابرونتي نتاعك:1:راني تاي مانس مانديلكش قماش بزاف ؟؟؟؟؟ واش قلتي ؟؟؟؟؟؟ هههههههههههههههههههههههههه

يعطيها الصحة لابرونتي نتاعك و الله راني غرت منها عندها سلفة الله يبارك.
في انتظار الورشة الثالثة راكي زهتي المنتدى يعطيك الصحة.

[dahby83]

ورشة مميزة و شرح جد رائع بارك الله فيك ياسطايفية واصلي التالق دائما

[terrou]

بارك الله فيكي يا اختي سطايفيه 444444444444444444444444444

[ندى قدور]

:19::19:يعطيك الصحة ورزقك ما تتمناي ورشاتك رائعة .وتعليقاتك زي العسل ....ان شاء الله نفرحوك بتطبيقاتنا ...............حبيت نسال علىالقطعة اللي في الصدر انا نحوسها الخياطة تكون للداخل ما نديرش القالون من برا....تجي ساهلة ولا صعيبة:sdf:

[ميار صهيب]

ربي اباركلهم
واباركلك
ويبارك لكل المومنين
وشكرا علي الجهد والافكار الرائعة واليد الذهبية

[janino]

بارك الله فيك يا بنت عامر فحلة و عندك الكلمة الله يعطيك من بابو الواسع دعوة مليحة ليلة الجمعة المباركة تستاهلي كثر متقوليش تعبي راح و مارهمش يطبقو مسألة وقت برك متخافيش راهو جاي الصيف وورشاتك راهي مرجعنا الأول و الأخير متسلكينا غير انتي محظوظين نساخوتك علىسلفة كيفك كثرت عليك بون نوي حبيبتي

[ام امجد و انفال]

بارك الله فيك ومشكورة على المجهودات وربي يكثر من امثالك
قولييلي يعيشك هداك الكتان بيزوبيزو وواش هما الستلزمات
ادا الكتان بيزو بيزو حنا مانشفوهش حتى في الاحلام مايجبوهليناش وين راني نسكن خسارة والله لروعة

[ard]

سلام عليكم اختي السطايفية انا اول مشاركة لي في هدا المنتدى وديما نشوف في ابداعاتك بدون رد لكن اليوم حبيت نرد على مشاركاتك الممتعة والمفيدة يعطيك الصحة ودوام العافية وربي يخليك ليىاولافكارك الحلوة متالقة دائماان شاء الله

[stayfiya]

يعطيك الصحة وبارك الله فيك يا الفحلة أنا أن نتعلم في الخياطة ومواضيعك هدو كامل أني مسجلتهم عندي و كي تمشي يدي في الخياطة نطبقهم والله ورشتك فرحتني وهكي القاتو مع القهوة تستاهلي كترhttp://4.bp.blogspot.com/_2jv-sfpp-a0/s_6gxza081i/aaaaaaaabm4/luwrhevlkvw/s1600/1.jpg
الله الله هذاك الطبسي الباهي راني كليت انا و نتاوع الدار و راهو عجبهم ههههه

تصلح كون نبدل الطرف الاسود بالبرودى عندي قماش احمر في الابيض و البرودى احمر والنوارة الي فيه بيضاء

ياختي اكيد يجي مليح غير طبقي برك و لكام ماعجباتكش مديهالي ههههه

يعطيك الصحة سطايفية والله مانعرف نخيط لوكان نطبق راهو الشرح انتاعك يهبل اسمحيلي برك (ماتقوليش الشناوة مايعرفوش يخيطو ههههه)
هههههه هونغ شينغ ياو تعرفي تعرفي راني شفت موضوعك في الكروشي ههه واعرة يالشينوية واااعرة

الله يبارك خرجت تهبل، بصح تخرج عليا خير واش رايك ديريني لابرونتي نتاعك:1:راني تاي مانس مانديلكش قماش بزاف ؟؟؟؟؟ واش قلتي ؟؟؟؟؟؟ هههههههههههههههههههههههههه

يعطيها الصحة لابرونتي نتاعك و الله راني غرت منها عندها سلفة الله يبارك.
في انتظار الورشة الثالثة راكي زهتي المنتدى يعطيك الصحة.

ههههه ياو اليوم ضليت مع لابرونتي رقم 3 هاذي خادمة لاطاي نتاعها. قريب نحطلكم روبتها

:19::19:يعطيك الصحة ورزقك ما تتمناي ورشاتك رائعة .وتعليقاتك زي العسل ....ان شاء الله نفرحوك بتطبيقاتنا ...............حبيت نسال علىالقطعة اللي في الصدر انا نحوسها الخياطة تكون للداخل ما نديرش القالون من برا....تجي ساهلة ولا صعيبة:sdf:
ساهلة وشنهي نتي كفي الكتان و ابلاسي الطراف من دخل و كي تخلصي عقبي على زوائد الكتان بالبيي باش جيك خياطة نظيفة اووكييي

ربي اباركلهم
واباركلك
ويبارك لكل المومنين
وشكرا علي الجهد والافكار الرائعة واليد الذهبية
شكرااااا ميااار

بارك الله فيك يا بنت عامر فحلة و عندك الكلمة الله يعطيك من بابو الواسع دعوة مليحة ليلة الجمعة المباركة تستاهلي كثر متقوليش تعبي راح و مارهمش يطبقو مسألة وقت برك متخافيش راهو جاي الصيف وورشاتك راهي مرجعنا الأول و الأخير متسلكينا غير انتي محظوظين نساخوتك علىسلفة كيفك كثرت عليك بون نوي حبيبتي
مشكورة حبيبتي و بارك الله فيك
بارك الله فيك ومشكورة على المجهودات وربي يكثر من امثالك
قولييلي يعيشك هداك الكتان بيزوبيزو وواش هما الستلزمات
ادا الكتان بيزو بيزو حنا مانشفوهش حتى في الاحلام مايجبوهليناش وين راني نسكن خسارة والله لروعة

سلام عليكم اختي السطايفية انا اول مشاركة لي في هدا المنتدى وديما نشوف في ابداعاتك بدون رد لكن اليوم حبيت نرد على مشاركاتك الممتعة والمفيدة يعطيك الصحة ودوام العافية وربي يخليك ليىاولافكارك الحلوة متالقة دائماان شاء الله

نشالله ماتكونش الاخيرة و ننصحك حبيبتي كي تعجبك حاجة معليش ادخلي و شجعي مولات الموضوع خاطر اكيد راح يفرحها مرورك و يشجعها تمد اكثر مشكووورة

[chafia82]

يا اختي كون كل خياطه كما انت كون لي متعرفش تولي تعرف بصح امثال السطافيه قلال رني يخليك لينا ياحبيبتي

[botate]

ظلك خفيف جدا ييييا اسطيفية يعطيك الصحة وربي يجااااااازيك من خير حسناته وبااارك الله فيك يا الفحلة يوم سعيد لك و لكل الاعضاء .

[ام محمد تقي الدين]

يعطيك الصحة وربي يسلم هذوك اليدين

[وليد مولودية]

وااااااااااااااااو يا العمرية جبة تهبل انت تلبسي و مخلية اخيتك تشوف بالعين هههههههههه

[الكروان الجريح]

ما شاء الله جعلها الله في ميزان حسانتك و رزقك الزوج الصالح و افرحك بذرية صالحة مثلما افرحتي الكثير منا

[ريونة04]

الله يعطيك الصحة ياحنونة ومشكورة على المجهودات نتاعك المنتدى بلا بيك........................اكي علبالك منحبش نقول باه مايزعفوش باقي الاخوات وينحوني من المنتدى هه الله يخليك لينا

[ام ملوكة]

يعطيك الصحة

[كنوزنبراس]

صحيتي لفحلة تستاهلي أعلى تقييم وخمس نجوم ليك زين

[مرام سيرين]

شكراااااااااا بارك الله فيك وجزاك الله كل خير على الافادة وننتظر المزيد من تحفك الله يبعد عنك العين

[برائة انسانة]

يعطيك الصحة اختي العزيزة نتمنى نولي خياطة شاطرة كيفك ......... ربي يعطيك ما تتمناي ويعطيك صحتك باه تزيدي تفيدينا كتر وكتر

[sarabone]

الف الف شكر بارك الله فيك

[الدر المكنون 7]

الله يبارك مودال شباب ،يعطيك الصحة على الورشة

[الواثقة بالله]

والله يا ختي سطايفية عجبتيني بزاف،تنعتي بالتفصيل تخلي لفهامة تخش لراس بالسيف.
ربي يبارك فيك ويعطيك على قد نيتك.

[akatsuki-rv]

بارك الله فيكي يا اختي لك الف شكر

[butterfly34]

ya3tk saha ya staifiya lhora 3la had l model rabi yjazik kol khir

[مونيا غنية]

44444444444444444444444444444444444444444

[loudjeine2000]

شوفي يا حبيبتي راني رايحة نطبق معاك يا جابت راس يا جابت كرعين ههههههههههههههه عندي طرف قماش فيزكوز قاعدة نشوف معاه مش كيما نتاعك باهي بصح يوفي بالغرض والله كلمة الشكر قليلة عليك ربي يعطيك ما تتمناي يا شطورة برك عندي سؤال ليك تعلمتي في التكوين ام وحدك باش ندير الكوراج و نتعلم انا عندي ماشينة و حابة نشري وحدا من الكبار باش تعوني في الخدمة واش تنصحيني و وين بيعو الماشينات في العلمة خاطرش رايحة نشري تم المتريال باش نفتح ورشة كان سهل ربي ارجو نكون ما كترتش عليك

[francealger]

Salam alakom
je pense que tu es la premiere dans ce site baraka allah fiki

[ام مريم اسراء]

روعة تلبسيييييييييييها بالصحة و العافية ربي يهنيك اختي السطايفية فعلا ابداعاتك ما شاء الله لا حدود لها

[ام امجد و انفال]

وين راها التفصال الي قلتيلي
قوليلي ماركيش تاجرة في القماش ارجوكيي جاوبيني راه خسني قماش

[OM RITA]

يسلموا اختي السطايفيه ويعطيك الصحه على العمل والاتقان
تسلم يديك يا العمريه يخي هكدا يقولولكم العمريات صح

[باسم وبيسان]

:dj_17:ربي يعطيك على قد نيتك على خاطر فى الوقت هادا ماكانش لي ينصح وينعت الخياطة لي تسقسيها ماتعطيكش كلشى باقى تقلك سر المهنى المهم انتى صح تنعتى بنيتك بصح الحاجة اللى مليحة لى فيك تاع الصح انك ضلك خفيف وخفيفة على القلب والروووووووووووح راكى فوووور تاع الصح وهدى ماشى مجاملةربى يكملك ويحفضك فى فعل الخير :19:

[dina mi]

بارك الله فيك وشكرا جزيلا على المجهودات

[nadarym]

شكرا يعطيك الصحة

[stayfiya]

ظلك خفيف جدا ييييا اسطيفية يعطيك الصحة وربي يجااااااازيك من خير حسناته وبااارك الله فيك يا الفحلة يوم سعيد لك و لكل الاعضاء .
هههه لحقت رو طار ليلة سعيدة ختي

وااااااااااااااااو يا العمرية جبة تهبل انت تلبسي و مخلية اخيتك تشوف بالعين هههههههههه
ههههههه والله نتاع ماليهم انا ما نلبسش خلااااص هاذ الروب اصلاً مايجيونيش ملاح ههههه مانيش معمرة هههههه


يعطيك الصحة اختي العزيزة نتمنى نولي خياطة شاطرة كيفك ......... ربي يعطيك ما تتمناي ويعطيك صحتك باه تزيدي تفيدينا كتر وكتر

نشالله لما لا بصح مانيش خياطة شاطرة مزالني نتعلم

شوفي يا حبيبتي راني رايحة نطبق معاك يا جابت راس يا جابت كرعين ههههههههههههههه عندي طرف قماش فيزكوز قاعدة نشوف معاه مش كيما نتاعك باهي بصح يوفي بالغرض والله كلمة الشكر قليلة عليك ربي يعطيك ما تتمناي يا شطورة برك عندي سؤال ليك تعلمتي في التكوين ام وحدك باش ندير الكوراج و نتعلم انا عندي ماشينة و حابة نشري وحدا من الكبار باش تعوني في الخدمة واش تنصحيني و وين بيعو الماشينات في العلمة خاطرش رايحة نشري تم المتريال باش نفتح ورشة كان سهل ربي ارجو نكون ما كترتش عليك
جيب الرااااسراني عمبالي بيك فحلة معليش اي كتان يصلح انا تعلمت في جمعية و ما كملتش مليح بصح لكثير تعلمت وحدي ابروفيتي مدامك عندك لونفي نتاع التعلم. من بعد يروحلك و تطفر ننصحك ب سانجار انا نتاعي شريتها منا من سطيف ربي يعاونك و يسرلك امورك و لي في بالك يحققهالك رب العالمين انوي برك ختي لجين

روعة تلبسيييييييييييها بالصحة و العافية ربي يهنيك اختي السطايفية فعلا ابداعاتك ما شاء الله لا حدود لها
اهلا ب حبيبتي الغالية ياو انا والله نلبس غير البيجامات وااالو روب ولا تقولي قفاطن ولا بينوارااات خيتك نحب نكون اااليييز

وين راها التفصال الي قلتيلي
قوليلي ماركيش تاجرة في القماش ارجوكيي جاوبيني راه خسني قماش
و الله راكي في بالي بصح والله ما كنت في الدار اليوم كومبلي ههههههه و مانيش تاجرة في الكتان هههه والله ضحك ايماجينيت روحي نبيع الكتان ههههه

يسلموا اختي السطايفيه ويعطيك الصحه على العمل والاتقان
تسلم يديك يا العمريه يخي هكدا يقولولكم العمريات صح

اييييوا العمرية ونص و خمسة و عشرييين هههههه

:dj_17:ربي يعطيك على قد نيتك على خاطر فى الوقت هادا ماكانش لي ينصح وينعت الخياطة لي تسقسيها ماتعطيكش كلشى باقى تقلك سر المهنى المهم انتى صح تنعتى بنيتك بصح الحاجة اللى مليحة لى فيك تاع الصح انك ضلك خفيف وخفيفة على القلب والروووووووووووح راكى فوووور تاع الصح وهدى ماشى مجاملةربى يكملك ويحفضك فى فعل الخير :19:


ربي يخليك خيتي انا كريمة و نتوما تستاهلو ههههههه

[أمة الله 12]

روعة, الله يبارك

يعطيك الصحة اختي

[lotus flora]

فنانة كعادتك يعطيك الصحة

[sarra5]

يعطيييك الصحة


انا اللول مازال مادوزنتوش في راسي ههههه


كلشي يجيني وااعر


و زيد لاالماشينة جاها الصعار كيفاه نديرلها تاكلي الخيط و تقطعو وما تحبش تخيطلي

بالرغم انها ماركة برادر بصح قديمة

عاونيني ختي حاصلة معاها

قوليلي واش من ماركة ماشينة تاعك باه نتعاند عليك ههههه

[ام ظافر]

يعطيك الصحة على هذي الخدمة المتقونة
شكرا لك جزيلا

[HADIL2044]

مرسيييييييييييييييي

[hayat-48]

yaatik essaha djazaki allahou kol elkhir

[om meriem]

http://http://im41.gulfup.com/8i1B7.jpgشوفى يا اختى راني طبقت لكن انا غيرت شوياhttp://http://im41.gulfup.com/kanQO.jpghttp://http://im41.gulfup.com/8i1B7.jpg

[om meriem]

اين الصور لما لم تظهر

[om meriem]

كيف يمكننى وظع الصور مباشرة

[stayfiya]

http://http://im41.gulfup.com/8i1b7.jpgشوفى يا اختى راني طبقت لكن انا غيرت شوياhttp://http://im41.gulfup.com/kanqo.jpghttp://http://im41.gulfup.com/8i1b7.jpg

مابان والو ياختي ؟؟؟؟؟!!!!!

[crono]

كيف يمكننى وظع الصور مباشرة

akhadmi bihad rabate
http://www.gulfup.com/goo.php?X-Progress-ID=9e2931b94eddf2a01c6b914f9a3a8f56

[crono]

rani tabto
bache akhwati
yastafdo mano

[لبرايجية]

بارك الله فيك

[karimamasous]

c'est bien explique un grand merci a vous 4444444444444444444444444444444

[om meriem]

شوفي رانى طبقت لكن رانى غيرت شويا انا وزهلرى مع الصورhttp://http://im36.gulfup.com/ug5zV.jpghttp://http://im36.gulfup.com/mflng.jpghttp://http://im36.gulfup.com/MsARZ.jpg

[om meriem]

رانى عملت كيما قلتولى لكن الصور لم تظهرعلاش

[om meriem]

http://http://im36.gulfup.com/ug5zV.jpg (http://www.gulfup.com/?yLi3Y1)http://http://im36.gulfup.com/mflng.jpg (http://www.gulfup.com/?QyTB3D)

[kawoo]

ya3tik saha ya madam :mh31:

[om meriem]

http://up.top4top.net/uploads/2013/05/12/top4top_af8bb2e7611.jpg

[ام رضاالله]

مودال رائع وانت الاروع بارك الله فيك

[stayfiya]

صحيتي ام مريم بارك الله فيك بصح يا ختي الموديل راه في الشرق و روبتك في الغرب ههههه ماااعليش المهم تحركتي و درتي شوي سبور هههههه

[stayfiya]

ya3tik saha ya madam :mh31:

هههه مااازماااازيييييل

[lalynabila]

شكرااااااااااااا

[souheila dz]

يعطيك الصحة اختي حاجة شابة واصلي

[ام عبودة]

يعطيك الصحة مودال يهبل

[رحيق القلوب 29]

هاااااااااااااايلة شكرااااااا

[ابو يحي السوفي]

ربي يعطيك ماتتمناي

[سرور الروح]

يعطيك الصحة حنونتي

[ندى قدور]

عذرا اختي ..كيفاش جاتك الدايرة انتاع الصدر متحوفة قد مولاتها ممكن القياسات كيفاه دورتي وبقداش نزلتي راني فزدت القماش...............اعذريني على كثرة الاسئلة

[سَلْسَبِيّلْ]

الله يبارك جاتك متقونة خسارة معنديش السلعة كون جربتها

[غيداق]

سطايفية يا ختي راني راكبني واحد الخوف شوفي راني شريت 2.5م قماش نتاع كوبرا وحبيت نحط فيه اليد وخايفة نفزدو يمالا لوكان تقدري حبيبتي عاوديلي هذوك القياسات الي في الباترون وكشما تزيديلي خرين يبانولك مهمين لوحدة مبتدئة كيما حالتي ربي يعيشك راني نستنا في الرد

[nanou blastro]

يعطيك الصحة

[stayfiya]

عذرا اختي ..كيفاش جاتك الدايرة انتاع الصدر متحوفة قد مولاتها ممكن القياسات كيفاه دورتي وبقداش نزلتي راني فزدت القماش...............اعذريني على كثرة الاسئلة

شوفي نتي قيسي من اعلى الكتف نتاعك حتى مع حاشية لا بواترين بصح ما تحدريش للتحت خلاص و بالنسبة للدورة راني تبعت من الكتف و هبطت مع لا فورم نتاع المونش و دورت للصد ر و عاودت طلعت نتي تبعي لا فورم نتاع لا بواترين نتاعك
يعني مانقدرش نمدلك مقاسات قدقد خاطر كل وحدة و لاطاي نتاعها حتى نعطيك قياس ممكن تبعيه و جيك طالعة ولا هابطة على حساب الصدر

الله يبارك جاتك متقونة خسارة معنديش السلعة كون جربتها
يا ختي الكتان نتاع الفيبران يدير 18 نلف يعني 36 الف تكفيك و قالون اي نوع يفي بالغرض معناها بالعجب 450 تخرجيها تحفة كيما لي سبقتها ياو طبقي و ماتخليهاش في قلبك ههههه

سطايفية يا ختي راني راكبني واحد الخوف شوفي راني شريت 2.5م قماش نتاع كوبرا وحبيت نحط فيه اليد وخايفة نفزدو يمالا لوكان تقدري حبيبتي عاوديلي هذوك القياسات الي في الباترون وكشما تزيديلي خرين يبانولك مهمين لوحدة مبتدئة كيما حالتي ربي يعيشك راني نستنا في الرد

هههه يخي ميش رايحة تعدي الباك هههه ياو ساااهلة و عمبالي بيك ديريها و تخرجيها بوبية هههه و راني شرحت كيفاش تقيسي حبيبتي ل ندى هاهي فوقك بتعليق بالتوفيق

[kamili1]

ماشاء الله
بارك الله فيك ويعطيك الصحة

[zahra30]

واش راح انقولك ياختي سطايفية نشوف ونضحك كي المهبولة وقلبي يفرفر من الفرحة واخيراااا فهمت كيفاش نفصلو هذا الستيل ....ربي يفرحك كيما فرحتيني اليوم ان شاء الله اذا تسقمو لحوال نخيط وحدة ونحطها تشوفيها ... بارك الله فيك وربي يحفظك ويحفظلك كل عزيز عندك يارب

[ام اكرم31]

يا اختي سطايفية والله الشرح روعة وتعرفي راني حاااااااااااااااابة نخيط و كي شفت شرحك عجبني بزااااف بالصح المشكل انو معنديش مشينة للاسف
نشري وحدة ان شاء الله ونطبق كونت حابة نخيط بيدي بصح على حساب ماني نشوف منقدرش نخرجها

[waterdrop]

:dj_17:ربي يعطيك على قد نيتك على خاطر فى الوقت هادا ماكانش لي ينصح وينعت الخياطة لي تسقسيها ماتعطيكش كلشى باقى تقلك سر المهنى المهم انتى صح تنعتى بنيتك بصح الحاجة اللى مليحة لى فيك تاع الصح انك ضلك خفيف وخفيفة على القلب والروووووووووووح راكى فوووور تاع الصح وهدى ماشى مجاملةربى يكملك ويحفضك فى فعل الخير :19:


والله غير صح خياطة تعرفيها وماتساعدكش ,,,الله يجعله في ميزان حسناتك وارجوك وريلنا باترونلت اخري :19:

[أم عبد الرحيم2]

حبيبتي انا رحت و يعرفوني تري بيان و عرضوني للعرس عرضني المدير شخصيا ههههه :1:

منيش حابة نحضر للعرس حابة نروح برك و نحشم وحدي منقدرش

[**د لا ل**]

ربي يجااازيك بالجنة اختي

يعطيك الصحة

[anarouaa]

Meeeeeeeeeerrrrrrrrciiiiiiiiii

[iness jojo]

ما اروعك ...........مفهمتش حاجة خياطتكم حلوة ولا انتوما لي احلى ؟؟؟؟؟؟؟؟؟؟؟؟؟؟؟؟؟لازم ورشة سبيسيال وتفهمينا

[حسناء اليمامة]

الف شكر ليك بارك الله فيك وفي صحتك

[اولادي احبائي]

برافو برافو برافو ...شرفتينا يالالا سطايفية

[saroura27]

يعطيك الصحة ربي يكملك ماراكي متمنية ان شاء الله

[sarra5]

stayfia mafhamtch wech lfayda ta3 l tiloo


w 3lah nhotoph fo9 l ketan

heka yban w yetghata lketan!!!!!!!!!!

sttp fahamnii bechuiaa ranii chuia habsa

[سوسو95]

ههه ربي يخليييك لااازم لااازم تخلي البصمة نتاعك في مواضيعي شكراااااا شرفني مرورك

اختي سطايفية ممكن توضحي ليا اكثر وين نعملو لي بانس بالضبط وكيف نعملوهم سيرتو انتاع الخلف بليييييييييييييييييييييييز راني نستنا

[stayfiya]

stayfia mafhamtch wech lfayda ta3 l tiloo


w 3lah nhotoph fo9 l ketan

heka yban w yetghata lketan!!!!!!!!!!

sttp fahamnii bechuiaa ranii chuia habsa
يا بنتي التيلو كي نديروه يتخيط من فوق و تعاودي تقلبيه منو يدرق لخياطة و منو يمتنها مليييح و كي شغل دوبلييير فهمتي وو بالنسبة لسؤالك نتاع قياسات راهم لوجييييك ميش اساسي مثل وحدة رقيقة نهبطولها في ليمونش ب 20 مثلاا اما السمينة اكيييد هذا المقاس ما يكفيهاش تسما نحاولو نزيدو في فتحة الذراع حتى ل 27 سم ونفس الشيئ بالنسبة لعرض الكتف يخي نتي تحكمي المقاسات و طبقيهو انا ما نقجرش نمدلكم مقاسات كل وحدة ندير ماقاساتي و نتوما كل وحدة تقيس على حسابها المهم لا ميتود نتاع الخدمة تكون اوكي فهمتي حبيبتي ؟؟؟؟

اختي سطايفية ممكن توضحي ليا اكثر وين نعملو لي بانس بالضبط وكيف نعملوهم سيرتو انتاع الخلف بليييييييييييييييييييييييز راني نستنا
لي بانس تحكمي الطرف الامامي و تقيسي قداش فيه على مستوى الخصر و تقسمي الحاصل على 4 و وتحسبي مثال لقيتي 40 /4 =10 حطي الميطرة نتاعك على لاطاي و كل 10 \يري نقطة من حاشية الكتان يمين و يسار و النقط هادو يتشكل فيهم البانس و بالنسبة للظهر طبقي الظهر على 2 وفي المنتصف اطراسي البانس من فوق للتحت و يعراض البانس عن\ خط الخصر فقط

[sarra5]

يا بنتي التيلو كي نديروه يتخيط من فوق و تعاودي تقلبيه منو يدرق لخياطة و منو يمتنها مليييح و كي شغل دوبلييير فهمتي وو بالنسبة لسؤالك نتاع قياسات راهم لوجييييك ميش اساسي مثل وحدة رقيقة نهبطولها في ليمونش ب 20 مثلاا اما السمينة اكيييد هذا المقاس ما يكفيهاش تسما نحاولو نزيدو في فتحة الذراع حتى ل 27 سم ونفس الشيئ بالنسبة لعرض الكتف يخي نتي تحكمي المقاسات و طبقيهو انا ما نقجرش نمدلكم مقاسات كل وحدة ندير ماقاساتي و نتوما كل وحدة تقيس على حسابها المهم لا ميتود نتاع الخدمة تكون اوكي فهمتي حبيبتي ؟؟؟؟
[/COLOR]لي بانس تحكمي الطرف الامامي و تقيسي قداش فيه على مستوى الخصر و تقسمي الحاصل على 4 و وتحسبي مثال لقيتي 40 /4 =10 حطي الميطرة نتاعك على لاطاي و كل 10 \يري نقطة من حاشية الكتان يمين و يسار و النقط هادو يتشكل فيهم البانس و بالنسبة للظهر طبقي الظهر على 2 وفي المنتصف اطراسي البانس من فوق للتحت و يعراض البانس عن\ خط الخصر فقط
aaah fhamt dacc ouii 9rina 3lih
hna n9ololo lsjaf

merciiiiiiii

[هالة الغربية]

4444444444444444444444444444444444444

[سوسو95]

يا بنتي التيلو كي نديروه يتخيط من فوق و تعاودي تقلبيه منو يدرق لخياطة و منو يمتنها مليييح و كي شغل دوبلييير فهمتي وو بالنسبة لسؤالك نتاع قياسات راهم لوجييييك ميش اساسي مثل وحدة رقيقة نهبطولها في ليمونش ب 20 مثلاا اما السمينة اكيييد هذا المقاس ما يكفيهاش تسما نحاولو نزيدو في فتحة الذراع حتى ل 27 سم ونفس الشيئ بالنسبة لعرض الكتف يخي نتي تحكمي المقاسات و طبقيهو انا ما نقجرش نمدلكم مقاسات كل وحدة ندير ماقاساتي و نتوما كل وحدة تقيس على حسابها المهم لا ميتود نتاع الخدمة تكون اوكي فهمتي حبيبتي ؟؟؟؟


لي بانس تحكمي الطرف الامامي و تقيسي قداش فيه على مستوى الخصر و تقسمي الحاصل على 4 و وتحسبي مثال لقيتي 40 /4 =10 حطي الميطرة نتاعك على لاطاي و كل 10 \يري نقطة من حاشية الكتان يمين و يسار و النقط هادو يتشكل فيهم البانس و بالنسبة للظهر طبقي الظهر على 2 وفي المنتصف اطراسي البانس من فوق للتحت و يعراض البانس عن\ خط الخصر فقط

اختي راني فهمت انتاع الامام هاديك 20 سم المتبقية في الوسط هو عرض البنسة

بصح انتاع الخلف ما فهمتهاش يعني عرضها عرض الخصر /2 وطولها طول القندورة والبنسة تكون مزدوجة او عادية ياريت اذا تقدري توريني كيفاش نرسمعا برسم تخطيطي انا مانعرف غي البنسة الي على شكل معين

سمحيلي تعبت معايا

[دعاء المحبوبة]

يعطيك الصحة
وبارك الله فيك

[سامية حكيم]

شكرا اختي انا من المتتبعات لكل ورشاتك بذات هاذي الروبة اختي عجبتها الفصالة بصح ماعرفتش ان شاء الله نطبق كيفها وربي يجازيك خير ويشدلك في صحتك

[liela ben]

http://im38.gulfup.com/752O6.jpg (http://www.gulfup.com/?owuTPu)

[خديجة جزائر]

عزيزتي سطايفية انا مالفة ندير السفاج من نفس قماش القندورة لكن انت درتي التيلو لمادا

[**افنان**]

شكرا لك وبارك الله فيك راني خيطتها خرجتلي مليحة

[badreatika]

الله يجازيك كل خير على كل الاعمال اللي قدمتيهالنا وكلها استفدنا منها

[ام امـــــــنــــــة]

ما شاء الله رووووووووووووووعة

[sarra5]

يستحق الرفع

[bfbba]

:19:اعطيك الصحة يا سطايفية رانا استفدنا منك بزاف جزاك الله خيرا

[تسنيم مسلمة]

بارك الله فيك

[آمِيْرَتُه]

الله يبارك ما شاء الله يعطيك الصحة

[rahike]

الله يعطيك الصحة

[ايلول20]

الله يعطيك ألف عافية

[زينب31]

ربي يحففظك

[Oum alea]

عمل ممتاز وورشة رائعة رغم أني دخلت متاخرة لكني تعلمت الكثير

[NanOushKa]

4444444444444444444444

[منى العلم نور]

يعطيك الصحة

[نوال البرج]

يعطيك الصحة جات فور

[RaN!mE]

Machkooora okhti baraka allaho fikkk ......ana 7aba nt3alam lkhya taaaaaaaaaaaaaa nchalah ki nt3alam ntaba9hom kamel wnwalihomlek nchalah ...

[karima_tiziri]

yakhti rabbi ybakki 3lik esster wach had echtara li 3andek macha allah rabbi ya3tik shihtak

[موجو جوجو]

بارك الله فيكي يا اختي سطايفيه

[mirichi]

انعم يا بنت الحرمة والنيف راكي كفيتي ووفيتي ربي يعطيك ما تتمناي ويجزيك عنا 1000 خير

[صرخة الحرية]

ربي يعطيك ماتتمناي

[oum mira]

merci beaucoup

[صرخة الحرية]

بارك الله فيك ومشكورة على المجهودات وربي يكثر من امثالك

[labed93]

سلام عليكم و رحمة الله
بغيت نشري ماشينة طرز الكتروني بصح مش علابالي كيفاش نخيرها
ممكن اللي تعرف كاش معلومة عليهم تقلي
مثلا السعرو الماركة و المميزات
يعطيك ربي ما تتمناي

[افكار خياطة]

بارك الله فيك

[فاطمة23]

بارك الله فيك ومشكورة على هذا المجهود الرائع
وفعلا بديت نتعلم شوية لكن خياطة الكتف بهذه النظافة مافهمتهاش ماتنسيش راني مبتدئة
وراني فعلا فرحانة اني فهمت شوية لخياطة الله يجازيك كل خير وربي يكثر من امثالك

[R I A D]

بارك الله فيك حبوبتي السطايفية

[sara mess]

ya3tik el sa7a ya okhtiiiii
wlh ana men achad el mo3jabat bik
koon tsibi 7eli atelier nji net3alem 3andek plz hhhh
rabi ywaf9ek nchalah

[خالد عنابي]

ماشاء الله هذا القسم من انشط اقسام المنتدى

[كاميلياس]

بارك الله فيك كل اعمال روعة ربي يوفقك

[أم شعيب]

4444444444444444444444 بارك الله فيك

[sara mess]

بارك الله فيك

[sara mess]

tbanli karahtek f ro7i hhhhhhhh
win troo7i telgayni
rani ntae3 fi warachatek kamel hh
7aba nsa9sik brk el keffa ta3 lektaf kifeh dertiha ki jmalti les 2 cotés ensembles ?? mafhamtech mli7 , , bah tji khyata met9ouna ??

[djama]

بارك الله فيك والله يعطيك ويرضيك

[djama]

واش نقولك يا سطايفية راك في القمة

[djama]

الله يجعل هدا العمل فى ميزان حسانتك لكن الصور الى فى الاخير ما بنوش لى

[hak4]

يعطيك الصحه والله غير سفهتيني في لخياطه:o:19:

[linalolo]

44444444444444444444 يعطيك الصحة

[radoda]

ممتازة عجبتني يعطيك الصحة :19:

[assil2]

الله يباركلك في صحتك اختي سطايفية

[wawawawa]

الفا الف شكرااااااااااااااااااااااااااااااااااااااااااااااا ااااااااالك

[همس الحروف]

الله يعطيك الصحة لكن معضم الصور م ظهروش للاسف

[ZahiiaBer]

مرحباً stayfiya
انا زهية من سطيف من فضلك قوليلي لاكان تعلمي الخياطة و وين و شكرًا

[عاشقة الخياطة73]

يعطيك الف الف عافية وصحة

[derrar k]

:mh92::mh92::mh92::mh92::1::1::1::1::1:بارك الله فيك يعطيك الصحة

[derrar k]

الله يبارك .......... يعطيك الصحة يا الفحلة

[سماح2013]

شكرا عزيزتي على روبة الهيلا

[mouna_m49]

merci beaucoup

[mouna_m49]

بعطيك الصحة

[mouna_m49]

بارك الله فيك كل الأعمال روعة

[أم عبد الرحيم1]

للأسف اختى مابانوليش الصور وشكرا على الشرح

[احلام حورية]

44444444444444444
http://uploads.sedty.com/imagehosting/159500_1304084398.gif

[fayssal031]

يعطيك الصحة أختي ولكن أين الصور لم أفهم شيء مع العلم أني مبتدئة في الخياطة تمنيت لو كان هذا الشرح فيديو

[maryem bilal]

السلام عليكم انا راني نحوس على لي فوطو مكانش

[nadiatlemcenia]

للاسف لا يوجد الصور

[ouadah zohra]

شكرا اختي علي هدا الموضوع

[لينا البرايجية]

الصور مش يبانولي علاه

[yahyaybdj]

يا اختي السطايفيه الصور ماتخرجليش وعلاش?؟؟؟

[stayfiya]

تم استرجاع الصور الحمد لله

[rimoumi]

ربي يعطيك الجنة ان شاء الله على كل مجهوداتك والله نحبك وليت ندخل غير باه نشوف واش حطيتي

[aya33]

الف الف شكر اختي سطايفية وربي يعوضلك في تعبك
ان شاء الله

[wissam princess]

ألف شكر كان عندك فيسبوك قوليلي واش اسمو باش نتواصل معاك و نسقسيك هنا منعرفش نحط الصور

[wissam princess]

سلام واش يعني لي فرونس

[zwina31]

allah yberek rabi yesotrek mel 3ayn rabi yafta7ha 3lik

[ام سيرين لجين]

هايلة ما شاء الله ان شاء الله نجربها

[ghani39]

[يعطيك الصحة روعةsize="7"][/size]

[ghani39]

تسلم يدك:dj_17::mh92: ابداع رائع

[aya ayouya doudou]

444444444444444444444444444444444444

[saravet]

يعطيك الصحة اخت بصح ماراكيش تحطي الشرح تاع شكل الصدر كيفاه تخثلتي عليه ولا الظهر والقياسات

[meriemcons]

الله يبارك

[صمت القمر]

الله الله عليييييييييييييييييييييييييييييييييييييييييييييييي يك شكرا وجزاك الله كل خير

[sandybelle1]

سلام عليكم انا اليوم خلصت القندورة نتاع الورشة الاولى وجات هايلة بالنسبة لواحدة مبتدئة كيفي راني فرحانة بزاااف يعطيك الصحة يا سطايفية يجعلها في ميزان حسناتك كل الدعوات الطيبة لك

[Mahira777]

يعطيك الصحة [rightعندي سؤال ممكن اي كتان تجي هده الخياطة
[/right]

[روعة القمر~]

[[Ihttp://www10.0zz0.com/2010/07/07/01/683183734.gif

[خديجة ك]

هايلة عجبتني لكن صور الباترون ماخرجتش

[ام طارق :)]

الله اعليك ياختي ربي يعطيك الصحة والعافية انشاء الله انكون عند حسن ظنك ياختي الصور مهيش تظهرلي واش نخدم باش انحط تطبيقاتي وتشوفيها

[oumziadhiba]

رائع ماشاء الله

[hanine4379]

بارك الله فيك .عرفتك متأخرة يا ريت نقدر نشوف كل اعمالك. ربي يفرحك

[T.HANANE]

شكرا يا اختي

[سندس سمسم]

ربي يجازيك

[عبده ونتيك]

شكرا جزيلا مزيدا من الباترونات

[عالم حواء للجمال]

ربي يخليييك