مشكلتي :مع شخص يريد الزواج بي

[مشكلتي]

السلام عليكم

انا فتاة عمري 16 سنة عندي فيس ببوك من ذو عامين او 3 أعوام تعرفت على شاب كان أكبر مني منذ عام أو عام ونصف أنا أتخذه كصديق لي وهو كذلك أتكلم مع في الفيس كثييراا لكن مشكلته أنه يريد أن يرى صورتي وهو أعطاني صوره وأرقام هواتفه ووضع فيا كل الثقة مع اني لم أقل له وتخصامنا على الصورة وتصالحنا ومنذ يومين حاكيته وقالي لي انني اصبحت أستاذ في الجامعة وفرحت كثييراا وبدأ يحكيلي كعادته عمى جرى له وعن أخباره وبعدها قالي لي اريد الزواج ( ليقلي نشوف كاش واحدا من الجامعة باش نتزوج) وقلت له الله يسهل وقالي لي بصح محال نلقا وحدة كيما عقليتك قتله ان شاء الله تلقى وحدة خير مني في كلشي وبعدها صارحني وقال لي أريدك للزواج فقلت له أنا صغيرة قالي لي سانتظرك حتى تكملين دراستك لكن طالبني بالصورة مرة ثانية واريد نصائكم ماذا أفعل معه ؟ هل أعطيه صورتي ؟ مع انه حلف لي انه سيحذفها أنا واثقة من كلامه .. وماذا عن فكرة الزواج ؟ هل أقول له انتظرني أم ماذا مع انه شاب ملتزم ويجيني عاقل انتظر ردوكم لكن بدوون تجريح أرجوكم ..

[123boutheina]

السلام عليكم
والله يا اختي اريد لك الخير احذفي هذا الحساب واهتمي بنفسك واستغلي نعمة النت بما يعود لك بالنفع ويكفي تعب راس وتعب قلب
يا اختي الا ترين التناقظ في افعاله فكيف بمن هو عاقل وملتزم ان يتاجر بمشاعر بنات الناس ! ايه والله قمة الالتزام
وما ادراك انه يحبكِ فمنذ متى اصبح الحب متجليا بكلمات معسولة وافعال قذرة وطلبات تنم عن انانية هذا الذي يدعي الحب هذا والله ما هو بحب
الحب اسمى واسمى من ما تمرين به للاسف ي اختي
ي اختي اتركي عنكِ العاطفة ولو لثواني وانظري بجانب عقلاني اضعف الايمان صوني الثقة الممنوحه لكِ

[أم معاذ أم معاذ]

قولو أبعثلي صورة أخواتك و صورة الوالدة و كل بنات العايلة باه نتعرف عليهم و بعدها درك نبعثلك صورتي


يا بنتي مكازالك صغيرة
ما تخليهش يلعبلك بعقلك
ماكان حتى حاجة تصدقيها 100 /100
في الدردشة

ماكن لاه نقولو حرام و نمدو أحكام شرعية لانو الأغلبية ما يعجبهمش الحال


ربي يسر لك كل خير

[*نآدرة~]

اسمحيلي ياختي،بالصح تحيرني الطفلة لي تصدق بسرعة،ياو صدقيني معظمهم يقولو هكذا،غير يشوف صورتك مع الاسف يبدا يحوس على صورة بنت واحدة أخرى،مانعرف شكيت كاين لي عندو هواية،انت مازالك صغيرة ونقولك الصح انا ماننصحكش تمديلو صورتك حتى ولو كان ناوي صح،ماذام عندك شحال من لي تعرفيه اعطيلو عنوان داركم وخليه يجي ويشوفك في الدار،نقولك الصح الدنيا ماهيش ترحم والانسان مالازمش يكون مغفل ونية بزاف ويصدق بالخف،لا لاوم يخدم عقله شوية،بلاك هدرتي ما تعجبش بالصح والله غير راني نقول فيها من قلبي خوفا عليك
انت حرة بالصح الاحسن ما ترميش نفسك للتهلكة ولو سقسيتي امك ولا اختك لي كبيرة عليك اكيد مارايحاش تنصحك باش تمدي صورتك

[nouna l maghbouna]

قوليلوا باب دارنا مفتوح ارواح اخطب و شوفني
و ماتبعثيلوش الصورة
ربي يوفقك

[ayaamira666]

اختي ان كان صادق و يريدك للزواج حقا فهو لا يطلب صورتك و انما يقول لك سوف ات الى الثانوية او المتوسطة '''لست ادري اين تدرسين بالضبط''' و اراك من بعيد و من تم اذا كانت نيته للزواج يتقدملك للبيت
مع العلم او اني متأكدة ليس مئة بالمئة بل 1000 بالمئة بانه كاذب لان الذي ينوي الزواج لا يطلب الصورة

[sali-sali]

قوله نهار تنوي تخطب
ارواح شوفني في دارنا

[brahim 74]

السلام عليكم إخوتي ، و عليكِ اُختي السائلة ،
أنا من تونس و كباقي العباد اُصيب و اُخطأ ، اُذنب و أتوب و قصَّتي ستنفعكِ ؛
في زمن جاهليتي ، أي قبل الإقلاع عن معاكسة البنات ، تعرّفت على فتاة (جزائريَّة) و كنت كثير الكلام معها إلى أن تعلَّقت بها تعلق الإبن بأمِّه ، فقد أحببتها حقًّا و لم أرى غيرها تصلح لي ... و قادني هذا الحبّ إلى ما قاد "صديقك" لفعله و هو طلب صورتها بعد أن عرضت عليها الزواج (رغم أنّها تفوتني بسنة في العمر).
و أنا الآن نادم فلو كنت صالحًا ما كان لي أن طلب صورتها ! و لو كان "حبِّي لها في الله" ما كان لي أن أدعوها لمعصية ! و الآن أنا أتسائل هل أحببتها لذاتها أم كان فقط كلام لنيل صورتها !!
دردشتي معها معصية ، قادتني لمعصية اُخرى (و هي طلب صورتها) و الله أعلم إذا ما كبرت العلاقة ماذا ستكون العاقبة ...
ملخّص الكلام لو حقًّا أحبّكِ لما أنت عليه من خُلق و طيبة ما كان له أن يسألك صورة و لطلب منك تحديد وقت مع والدك لخطبتك كما يفعل عامة المسلمين.
و أنصحك بتحديد حدودٍ للدردشة معه و الإلتزام بالسؤال و الجواب فيما يرضي الله سبحانه.
و لك في القرآن نور ، إقرئيه و إسألي الله لك و لي و للمسلمين الهداية و الزوج الصالح.

....

الخبيثات للخبيثين والخبيثون للخبيثات والطيبات للطيبين والطيبون للطيبات أولئك مبرءون مما يقولون لهم مغفرة ورزق كريم
...

[mokhto01]

يا بنتى الصغر يغلط ادهى الناس لو كان ملتزم لا يضيع وقتو فى الدردشة التى ضاهرها حلال حسب العتقاد وباطنها حرام و ماسات


الح>ر ثم الح>ر

[~ ســارة ~]

شوفي حبسي هذا التمسخير........و مي دابوغ 16 عام و غاصبا على الزواااااج ؟؟؟؟؟؟؟؟؟؟؟ياخي حالة
نديرو بحال مديتيلو لافوتو و قالك اواه تخيلت جنيفر لوبز و خرجتيلي بختة و يقلك قاتلي ماما مزعوقة و انت راكي ملكة جمال غير باش يبريزيك و يولي جمل لافوتو 467000000 و يقول لصحابو شوفو لبنات مخلوعين فيا زوج كلايم جبتها في الشبكة
شغل كي كان يتعرف بيك ماماه كانت ماكاش و في الصح ولات كاينا ماماتو
ويلي نندب من لبنات هبلو
شوفي يا شعطوطة المشكل ماهوشي في لافوتو المشكل راهو في الذيب
نفرضو راهو متربي قوليلو اروتح شوفني عند بابا اذا قالك كيفاه مانشوفكش اعرفيه يتمسخر

[~ ســارة ~]

السلام عليكم إخوتي ، و عليكِ اُختي السائلة ،
أنا من تونس و كباقي العباد اُصيب و اُخطأ ، اُذنب و أتوب و قصَّتي ستنفعكِ ؛
في زمن جاهليتي ، أي قبل الإقلاع عن معاكسة البنات ، تعرّفت على فتاة (جزائريَّة) و كنت كثير الكلام معها إلى أن تعلَّقت بها تعلق الإبن بأمِّه ، فقد أحببتها حقًّا و لم أرى غيرها تصلح لي ... و قادني هذا الحبّ إلى ما قاد "صديقك" لفعله و هو طلب صورتها بعد أن عرضت عليها الزواج (رغم أنّها تفوتني بسنة في العمر).
و أنا الآن نادم فلو كنت صالحًا ما كان لي أن طلب صورتها ! و لو كان "حبِّي لها في الله" ما كان لي أن أدعوها لمعصية ! و الآن أنا أتسائل هل أحببتها لذاتها أم كان فقط كلام لنيل صورتها !!
دردشتي معها معصية ، قادتني لمعصية اُخرى (و هي طلب صورتها) و الله أعلم إذا ما كبرت العلاقة ماذا ستكون العاقبة ...
ملخّص الكلام لو حقًّا أحبّكِ لما أنت عليه من خُلق و طيبة ما كان له أن يسألك صورة و لطلب منك تحديد وقت مع والدك لخطبتك كما يفعل عامة المسلمين.
و أنصحك بتحديد حدودٍ للدردشة معه و الإلتزام بالسؤال و الجواب فيما يرضي الله سبحانه.
و لك في القرآن نور ، إقرئيه و إسألي الله لك و لي و للمسلمين الهداية و الزوج الصالح.

....

الخبيثات للخبيثين والخبيثون للخبيثات والطيبات للطيبين والطيبون للطيبات أولئك مبرءون مما يقولون لهم مغفرة ورزق كريم
...


ايعطيك الصحة يا خوو انصحها تبعدو ماهيش تقلل الدردشات.......

[أم عبد الرحيم2]

انا اقول كلمة حق و لازم تتقبليها و الله غالب هذه هي الحقيقة ربما كاين اللي ميعجبهمش الحال
حراااااااااااااااااااااام الدردشة بين ذكر و انثى مهما كانت الا مع المحارم اللي يحرمو عليك تتزوجي بيهم خافي الله تعالى و لا تغضبيه لامر تافه
حذااااااااااااااااااااااااري من انك تبعثي صورتك رايح يهددك بيها تلقايه حاب يلعب بيك و من بعد يطيشك و هو يختار البنت اللي ما شافها حتى واحد
مازلت صغيييييييييرة و هو يبروفيتي بطفلة قد بنتو
خليك منو و حبسي الحساب تاعك و اخطيك من الفيسبوك كلام فارغ حاشا اللي يدعيو للاسلام
الانترنت سلاح ذو حدين استعملي الحد اليجابي اختي
عمرك ما تتأكدي من شخص من النت مستحييييييييييييييييييييييييييييل

[أم عبد الرحيم2]

انا اقول كلمة حق و لازم تتقبليها و الله غالب هذه هي الحقيقة ربما كاين اللي ميعجبهمش الحال
حراااااااااااااااااااااام الدردشة بين ذكر و انثى مهما كانت الا مع المحارم اللي يحرمو عليك تتزوجي بيهم خافي الله تعالى و لا تغضبيه لامر تافه
حذااااااااااااااااااااااااري من انك تبعثي صورتك رايح يهددك بيها تلقايه حاب يلعب بيك و من بعد يطيشك و هو يختار البنت اللي ما شافها حتى واحد
مازلت صغيييييييييرة و هو يبروفيتي بطفلة قد بنتو
خليك منو و حبسي الحساب تاعك و اخطيك من الفيسبوك كلام فارغ حاشا اللي يدعيو للاسلام
الانترنت سلاح ذو حدين استعملي الحد اليجابي اختي
عمرك ما تتأكدي من شخص من النت مستحييييييييييييييييييييييييييييل

[doba]

إحذري أختي العزيزة

[halla halla]

أختي أنت مازلت صغير ة شكون ضمنلك صح هديك صورته و واش قالك صحيح أنا تاخدي راي احذفي الفيسبوك هذا وحلي واحد آخر فيه غير لي تعرفيهم وخطيك من الدردشة مع ناس متعرفيهمش

[halla halla]

ختي ويم علابالك هذا واحد يعرفك كي تمديلوا صورك يروح يمدها لباباك ويقلوا شوف بنتك راهي تساربي في صورها
ختي لازم ديري كل الاحتمالات في راسك نتي وين علابالك بلي راه يقلك الصح و هذيك صح صورته

[halla halla]

ختي ويم علابالك هذا واحد يعرفك كي تمديلوا صورك يروح يمدها لباباك ويقلوا شوف بنتك راهي تساربي في صورها
ختي لازم ديري كل الاحتمالات في راسك نتي وين علابالك بلي راه يقلك الصح و هذيك صح صورته

[منهاج]

السلام عليكم

هو رطبلك الطريق حتى توثقي فيه والرجال يعرفو كي يقولو للشيرة نخطبك ونزوجك يجيبو راسها ايا هو باش يشوف صورتك

دارك موال كبير انو رايح يخطيب وعجباتو عقليتك من بعد قالك نخطبك وبعدها طلب الصورة لانو يعرف كون طلب الصورة

ديراكت ترفظي ايا سقد الطريق بلا ماتحسي بطريقة غير مباشرة ورجع طلب يشوفك بلاكي بلاكي

[faty05]

اختي راكي قلتيها مازلكي صغيرة و عندك الحق
لا تبعثي له بصورتك ابدا ابدا
هذا يبقى اجنبي عليك و ما ادراكي بصدقه و انه سيحذفها لاحقا ام يحتفظ بها
اختي التهاي بقرايتك راكي بنوتة صغيرة هذا وين قلتي باسم الله
احذفي حسابك و مليحتلو يروح يشوف وحدا قدو في عمره
ما ديريش غلطة تندمي عليها فيما بعد
سلام

[سراب06]

السلام عليكم

لست مفتية لاكن اسمعيها حراااااااااااام الدردشة بين

الجنسين حبيتي ولا كرهتي واليوم راكي اصبحت مكلفة

على كل كبيرة وصغيرة اذن اوقفي هذه المهزلة

واستغفري الله وكل من نصحك بذلك يحبلك الخير

الشيئ الذي مازلت مدهوشة منه وهو بالرغم من

الاصوات التي تنادي يوميا في منتديات الجلفة وتنبه

لحرمة الدردشة الا انه لاااا يمر يوما الا وفيه قصة مشابهة فيهب الجميع للتفهيم الظاهر ان اصحاب هذه

المشاكل لايقرأون الا مايخصهم

الذكي يا اخواني هو من يتعض من مشاكل الاخرين ولا

ينتظرحتى تقع له ورب يغفرلي ويغفر لك

[brahim 74]

إلى من حرَّم الدردشة : هل ما نفعله الآن حرآآم !!!!

هناك من الدردشة بين الجنسين ما هو مباح ;
كالتناصح و الإرشاد و الأمر بالمعروف و النهي عن المنكر :
فلو وجدت فتاة تنشر في صور متبرّجات أنكر عليها الفعل و امُرها بالمعروف ...
و إذا سألتك فتاة في الدِّين ، فأجِبها إن كان لك علم ..

فلا تحرِّموا و تُحلُّوا بأهوائكم !!
و من له دليل على تحريم الدردشة كلِّيًّا فليحاجِجنا .

[loufa]

ماكان لاه نقول حلال وحرام انتي ما زالك صغيرة غير احسبيها بالعقل عندك16عام مازال قدامك لقراية والخدمة وتوجدي روحك ووو هاذاك الوقت اللي تضيعيه بالدردشة معاه أدرسي فيه أحسن وخليك من هاذ الحوايج مزالك صغيرة راح تتالمي فالبداية شوية لتعوك الكلام وتضياع الوقت معاه لكن توالفي زيد انتي متعرفيش ظروفو صح واش كان يحكي وإلا يكذب وأعلاه تربطي روحك بواحد هكذا كوني حرة في حياتك بلاك ربي يرزقك بواحد أحسن منو
بلاك ردودنا مايعجبوكش وتبغي غير اللي يشجعك هاذي مرحلة مراهقة وكلنا مرينا بيها يجي نهار وتضحكي علا روحك
روحي ربي يسترك ويحفظك يا بنتي وينجحك ويبعد عليك الوساوس

[bibicha]

شوفي اختي راكي مولات 16 ما جبتي باك ما دخلتي للجامعة ما شفتي دنيا راكي مزال صغيرة 16 سنة انا كنت مازلت نلعب ا بنتي كيفاش تخمي في الزواج؟و نقولو هاذ الراجل يستناك شحال؟ 5 سنين؟ 6؟ و يخدم فالجامعة و كل من درس في الجامعة يعرف واش فيها و بلا ما نكثر الحديث
اول حاجة ما خممتيش كون يدير يصورتك حاجة و ينشرها فالنت؟ضرك الفوتوشوب راه داير حالة و نضن هاذي حاجة تعرفيها؟ما خممتيش كون يقدر يخرج تصويرتك و يتلاقا ب خوك او والدك و يقولو انا كنت نعرف بنتك و الدليل هاي الصورة و يجبد حكايات من راسو و والدك يصدقو لانو عندو دليل
و لي حاب يتزوج بيك يجي لداركم بلا ما يشوفك لانو اصلا عام و هو يحكي معاك فالنت و عجباتو عقليتك مايستحقش يشوفك اصلا
اختي قبل ما تلعبي بروحك نوصيك خمي في حياتك في والديك في مستقبلك راهي هاذ الغلطة قادرة دمرك و تولي فالموحال عليها و تخسري كل حاجة راني عارفة كلامي ما يعجبكش لاني ما شجعتكش لكن صدقيني مانيش حابة تندمي يوم لا ينفع الندم انا في حياتي ما ندمت على والو لاني قريت و وصلت للدوكتورا و خدمت و زوجت و الحمد لله اللهم لك الحمد و الشكر و بزاف لي كانو يقولولي نتي حابسة ما خرجتي ما صاحبتي و كانت تغيضني عمري لكن ديما نتفكر والديا و ثيقتهم فيا و في اخر المطاف جميع بنت كانت من هذاك النوع مادارت والو في حياتها و اغلبهم مستقبلهم راح
ما تضيعيش حياتك بيدك خمي في مستقبلك في قرايتك خمي باش ديري للزمان عقوبة و نفهمك حاجة في وقتنا المرأة لي ماشي قارية و معندهاش مستوى ماعندهاش قيمة و اسمحيلي اذا طولت عليك و الله ينور طريقك

[mitrochka]

أختي
جمعت لك هذا على الأقل إقرئى و لو خمس دقائق لكل موضوع

يمكنك البحث أيضا في قسمي مشكلتي و قسم المشاكل الإجتماعية
سترين العجب



وفقك الله تعالى

http://www.djelfa.info/vb/showthread.php?t=1149836

http://www.djelfa.info/vb/showthread.php?t=1151771

[نيل المنى]

أياك أن تضعي صورتك في الأنترنت تحت أي داع،فأنت لا تعرفين ما حصل للكثيرات بسبب هذه الثقة العمياء،و يا أختي تأكدي من أنه لو كان يريدك لجاء ليراك في منزلك العائلي مع عائلته و عائلتك لا أن يطلب منك صورتك في الفايس بوك.

[fafouchee]

ساجيبك بكل صراحة
ديريها في بالك مليح
الصياد اذا صيد السمكة مستحيل يمدلها الطعم مرة مرة ثانية
هكداك نتي اذا اخذ صورتك مستحيل ينويك للزواج
انا عن تجربة مررت بنفس تجربتك لاكن نهاتها انه كان مركز على الصورة كي دا الصورة نط لحاجة اخرى لاكن الحمد لله كنت قد استفقت و وضعت حدودا لمشاعري و الحمد لله انا متزوجة الان بشخص اخر لان اصحاب الفيس والصور لا مستقبل معهم
مازلت صغيرة لا تخطئي