استشارة عاجلة

[sersoura26]

انا فتاة ابلغ من العمر 28 سنة تقدم لخطبتي شاب فيه كل المواصفات التي تحلم بها اي فتاة فهو جامعي ميسور الحال وسيم الشكل لكن عند سؤالي عنه تبين انه كان كما يقال بالعامية مخلطها بزاف فقد كان يشرب الخمر نساء الخ والان توقف عن كل هذا منذ عامين ويريدالاستقرار وبناء اسرة فهو تعقد من البنات واصبح لا يثق فيهن لدا عندما قرر الزواج اراد بنت متربية عمرها لا مشات لكن انا رفضته هل تسرعت في قراري ام لا؟

[YouCefo_dz]

السلام عليكم
أختي في هذا الأمر العبرة بالدين والخلق ، تبقى أمور أخرى ارجعي فيها إلى مايطمئن إليه قلبك.
أما بخصوص هذا الرجل قالانسان غير معصوم مادام أنه تاب فالحمد لله ، لكن أنت حرة إذا لم يرتح قلبك فلا أظن أنك تسرعتي
فالله يرزقكما الزوج الصالح

[sersoura26]

شكرا اخي على الرد انا علا بالي بللي الخلق و الدين هما كلش هو بعتلي مع مرت صاحبو تخدم معايا وقاللها ناوي نخطبها تمدلي نومرو تاع التيليفون نهدر معاها على الاقل نعرفو بعضانا مي انا تسرعت ورحت سقسيت خويا عليه خطراش هو جارنا قاللي ما تقبليش راهو تاع الحوايج لي دكرتهم كي رحت انا رفضت قالتلي مرت صاحبو بللي صح فسدوه الدراهم وقت بصح درك او حبس كلش وانا راني حايرة شكون لي نصدق ؟

[sarl02]

اظن انك غير مقتنعة برفضك لهذا الشاب وراه عاجبك من عدة جوانب اخرى وهذا واضح من كلامك..يا اختي اذا راكي متاكدة بلي هذا الشخص اتغير للافضل فلا تركزي على ماضيه فرب العباد بقبل التوبة من عباده فما بالك بنحن وعموما كل شيء قسمة ونصيب في امر الزواج تحديدا وري اوفقك.

[محمد جديدي التبسي]

حلها عندك أنت أختي، أنا نظن خوك عندو حق مهما كان
لأنو لو كان تاب صح يعرف أنو ما فيهاش تعارف قبل الخطبة
ويبعث أهلو للخطبة ديراكت وكان الأولى به يحكي مع خوك ويبين حسن نيتو
والله أعلم لأنو حتى خوك لو حكى معاه قبل كان ينقص عليك انت كل هذا التفكير لأنو لو أقنع خوك وعرفو صح تريقل انت تجيك عادي والله أعلم
ربي يوفقك ..

[sersoura26]

يا اخي خويا هدا صغير شوية في عمرو 22 سنة برك وهدا الشاب في عمرو 30 سنة بالاك جاه صغير باه يخطبني منو طول بصح هو لمحلو منقبل والعبها زعما خوه الكبير قاعد ينصح فيه ويقولو اخطيك من التمصخير تاع البنات انا ندمت بزاف على التمسخيروقالو راني ندمت بزاف ودرك كي جيت نزوج ما لقيتش بنت الفاميليا راهم ناقصين

[nouna l maghbouna]

«كل ابن آدم خطاء، وخير الخطَّائين التوّابون »
اختي ديري صلاة استخارة و زيدي خمي مليح ماتتسرعيش
في هاذ المواضيع ماتدي راي حتي واحد
خمي بعقلك و ديري اسخارة و قولي لخوك يزيد يسال عليه ملييييييح
وفقك الله

[ketkouta]

اختي انا من رايي انك احسنت برفضك له
فالطيبون للطيبات و الخبيثون للخبيثات ، واخوك حتى لو كان عنده 22 سنة فقط الا انه هو ادرى بيه منك ومن"" زوجة صديقه""
ولكن حتى ترتاحي، صلي صلاة استخارة و اللي فيه الخير ربي يقدمهولك ان شاء الله
وانا لو كنت في بلاصتك كنت رفضت مباشرة وماعاودتش خممت في الموضوع مرة ثانية، هاذا رايي قدمتهولك بكل امانة
وربي يسهلك يا ختي لعزيزة وربي يوفقك لما يحبه ويرضاه

[sersoura26]

نشكركم جميعا على النصائح تاعكم بصح انل محتارة لانو خويا ما فهمتوش الخطرة الاولى لما قلتلو بلي مرت صاحبو قالتلي بلي حبس كلش وحاب يلقى بنت متربية قاللي ماكانش منها ومبعد عندها 3 ايام جا قال لاختي بللي قالو صاحبو عندو عامين مللي حبس يعني حسيت خويا ما هوش ناضج كفاية ولا حاب يرفضو وخلاص جاتو طيحة كيفاه حكالو على السوابق تاعو ومبعد جا يخطب اختو دبرو عليا كيفاه ندير

[محمد جديدي التبسي]

يعني أنت تريدين أن توصلي له معلومة بأنك قابلة بيه
ساهلة خبري زوجة صديقه أنك راجعت نفسك وهي تقول لزوجها يخبر صاحبنا بأن يتكلم مع وليّك مباشرة ويتقدم رسميا..

[ketkouta]

يبدو انك ندمتي انك تسرعتي ورفضتيه وتحوسي على طريقة تسحبي من خلالها قرارك الاول ..
الاخ محمد جديدي التبسي كفا ووفا وعطاك الحل الامثل
اتوكلي على ربي

[abdel02]

مادام أنك رفضتيه في الأول فلا تنظري خلفك
حسبما حكيتي عليه...لو تبعثيلو سيكون الرد
قاسيا شوية...لا أوصيك بالمحاولة...وأنت ملكة نفسك.

[مسلمة انا]

اختي الان انتي رفصتي وخلص لا تتدققي كثيرا لانك ستتعبي

في رايي انك احسنت في رفضه لان فكرة انه عرف نساء من قيل وريما عمل ماعمل معاهم ستعذيك كثيرا وكل وقت تخافي يرجع لعادتو

ان شاء الله ربي يرسلك ولد الحلال اللي تقر به عينك صافي نقي عمرو ماعرف بنات ولا شري ولا اي شيئ

[sersoura26]

نحترم ردودكم كامل بصح نتوما فهمتوني غلط انا ماقلتش انا حابة نلقى طريقة تخليه يرجع يخطبني انا كل الموضوع فتحتلكم قلبي وقاعدة نحكيلكم تفاصيل القضية خطراش حسيت بلي ما سقسيتش عليه مليح نتمنى تعاونوني اسكو تسرعت في الحكم عليه ولا لا

[محمد جديدي التبسي]

لا أنت اخترت مبدأ السلامة وهو أفضل شيء لا تلومي نفسك مازال مكتوبك ما وصلش ربي يهنيك ويرزقك الزوج الصالح الذي يسعدك ..

[أم معاذ أم معاذ]

أختي أنا تبانلي أنت ما كنتيش كيفو و خلطتي ياسر
إذا راكي تستاهلي ما خير منو و ربي يعوضك بأحسن منه

إنسان طيب كي حالتك

و خوك عندو حق كي يرفض
لانو يحبلك الأفضل دائما و شايف أختو تستاهل كل خير

[zenou84]

أختي مافيها لاتسرعتي لا والو تأكدي بلي من شب على شئ شاب عليه حتى لوكان هذا السيد تاب وكلش رايح في يوم من الأيام وفي لحظت ضعف أو غضب يولي كي بكري
أنافي عمري 30 وعايش في هذا لونتوراج وعلبالي واش كاين
ونتي باين بنت فاميليا مالا أصبري حتى يجيك مكتوبك

لن يصيبنا إلا ماكتب الله لنا

[* الحلم سكر *]

السلام عليكم
شوفي اختي باختصار و عن تجربة تبعي راي خوك الرجال يعرفو بعضاهم .
اخطيك من كلام مرت صاحبو و نأكدلك خوك يعرفو يعني اسمعي لرايو وحطي نقطة
_(و انا نظن اللي شادك ليه رغبة بالاستقرار بالصح اختي الاستقرار يحتاج حسن اختيار خمي فيها مليح)
و ربي يرزقك باللي يخاف ربي عن قريب يا رب

[imane-2020]

اختي انتي الآن خلاص عطيتي كلمتك ورفضتي خلاص ما تحوسيش اذا كان تاب ولالا
اختي ديري الاستخارة وادعي ربي يسرلك امورك فاذا كان فيه خير راح يرجع ويعاود طلبو وهذاك الوقت خذي وقتك في التفكير والسؤال عليه
واذا كان لا ربي راح يرزقك بالزوج لي تستاهليه ربي يسرلك ويفرج عليك

[sersoura26]

اخوتي والله ريحتوني بزاف والله لوكان جاني وانا في عمري 22 سنة راني ما نخممش خلاص ونرفضو بصح راني كبرت مانيش صغيرة وما ولاوش الناس يجيو يخطبو كيما بكري يعني والله ما خصني والو ماش قاعدة نشكر في روحي بصح والله وضعيتي تحير انا جامعية وجميلة ومتربية بشهادة الناس كامل والله جامي لا خرجت مع واحد وجامي هدرت في التيليفون مع واحد وش خصني حتى نوصل نخمم في واحد كيما هك والله قلبي معمر سامحوني

[محمد جديدي التبسي]

28 سنة مازال الوقت أمامك فاصبري وسيرزقك الله زوجا يكون أهلا للأخلاق التي لديك، ثم عليكِ أن تثقي أن الزواج رزق وسيأتيك إن شاء الله ربي يهنيك ويصبرك ويسعدك ..

[sersoura26]

شكرا لك اخي بصح الناس هوما لي يزيدو عليا كيفاه واحدة كيما انتي وما خطبوهاش بزاف وغيرها من الهدرات لي يطيحو المورال في السابق ما كنتش نقلق بصح درك وليت نتسائل علاه

[حميد.ص]

كل بني آدم خطاء وخير الخطائين التوابون ...........ان كان من نصيبك فربي يجمع بيناتكم في الدنيا و في الجنة ان شاء الله

[sersoura26]

نشكركم بزاف على النصائح الغالية انا حابة نعرف كي نصليو صلاة الاستخارة كيفاه تظهر اثارها

[zenou84]

أختي صلاة الاستخرة ماعندهاش آثار ولكن إذا كان هذا الشخص صالح ربي سبحانوا رايح يهيألك الظروف ويسهلك باش تقبلي بيه والعكس صحيح
مع أني مازلت مصر على راي أنك متقبليش بيه لأنك مازلتي صغيرة في السن المشكلة أنكم نتوما لبنات ماكمش فاهمين عقليتنا مع أنو مشي كامل الرجال كيفكيف إلى أنو كاين شباب وهم كثر بأن يرتبط بمرأة ناضجة تقدر الحياة الزوجية وأبسط مثال هو أنا في عمري 30 وخطبة وحدة في 27 وجامعية ومتخرجة , صح يقولو بنت 18 وردة مفتحة ولكن قليل وين تصيب وردة بدون أشواك مع إحترمي ليهم بصح بيناتنا بنت 18 في وقتنا ماهيش نتاع دار والدليل في أرض الواقع ومدام راكي جامعية أكيد علبالك واش راه يصرى .
والقرار يعود إليك
بالتوفيق

[شخصية نرجسية]

لأا لم تتسرعي ابدا يا حبيبتي و من حقك تتزوجي رجل تقي نقي مثلك لو تزوجت به لعشت الجحيم فهو لن يستطيع أبدا الوثوق بك رغم نقائك لأنه عرف الأسوأ لو كان حقا يريد التوبة لستر فتاة ضيع منها عرضها

[شخصية نرجسية]

اخوتي والله ريحتوني بزاف والله لوكان جاني وانا في عمري 22 سنة راني ما نخممش خلاص ونرفضو بصح راني كبرت مانيش صغيرة وما ولاوش الناس يجيو يخطبو كيما بكري يعني والله ما خصني والو ماش قاعدة نشكر في روحي بصح والله وضعيتي تحير انا جامعية وجميلة ومتربية بشهادة الناس كامل والله جامي لا خرجت مع واحد وجامي هدرت في التيليفون مع واحد وش خصني حتى نوصل نخمم في واحد كيما هك والله قلبي معمر سامحوني
أختي اصبري البقاء عازبة لحد يجب المكتوب أحسن أن تتلوثي مع شاب منافق لو كان حق تائب لستر تائبة مثله

[أم معاذ أم معاذ]

أختي ماتندمي ما والو
رزقك يجيك و زوجو في سن أكثر منك و بخيرة الرجال

و لا تطبقي المثل اللي يقول صام صام و فطر على جرانا
مع دعاءنا لهذا الشخص أنو يتوب عليه ربي
و يقبل توبته و يثبت عليها

[sersoura26]

شكرا اخوتي على النصائح تاعكم وربي يرزقني بالزوج الصالح ان شاء الله ويعطيلكم ما تتمناو

[ابراهيم داود]

مول الطبع ما ينطبع

[sersoura26]

صح خويا عندك حق مول الطبع ما ينطبع ادعيولي ربي يرزقني الزوج الصالح ان شاء الله

[zenou84]

نشاء الله ربي يجيبلك وليد لحلال

[yacine-08]

انا السيد مانعرفهش و لا اعرف الظروف ولا يمكنني الخكم من بعييييد

لكن ادا ارادك يجي يخطبك

هادي هي تما يبان الصح

داركم يسالوا عليييييه جيدا .

[sersoura26]

خويا شكرا ليك بصح انا ما فهمتكش كيفاه يجي يخطبني ومبعد نسقسيو عليه

[sersoura26]

شكرا لكل من نصحني ولو بكلمة ارجو من المشرفين حذف الموضوع رجاء