نساء الاعمال في عائلتي

[~ No ONe]

السلام عليكم
اخوتي انا عضوة معاكم وعندي عامين وانا اترددعلى مواضيع العاملة والماكثة بالبيت
انا الان في سنة 3 طب اخترتها تحت رغبة مناهلي
ومازال 4 سنين وزيدولها عامين تاع التخصصوخلي الباقي
امي استاذة ثانوي (علوم شرعية)
والدي استاذ جامعي
اختي استاذة جامعية
اختي تدرس 1 صيدلة
خالتي ممرضة
بنت خالتي طبيبة نساء
عمتي تعمل في البريد والمواصلات
بنت عمي محامية
رجال العائلة ليس عندهم مانع بتاتا
باختصار
نساء عائلتي متحررات يعني عمل المراة هوالاهم والرجل زياده (كي تخلص خلاص يجي وحده)
العمل هو سلاحها على قول البعض لان لا امان للرجل
ولكم ان تتخيلوا طول عمري وانا في استماع دائم لهذه الاسطوانة
بل يعتبر الزواج في عائلتنا عيب ايه والله من اشد العيوب
الفتاة الي حابة تحبس قرايتها وتروح تتزوج تعتبر تافهة ولا فائدة ترجى منها حتى ان الجميع ميعبروهاش ويقاطعوها حتى انه بنت خالي بعد ما قرات عامين في الجامعة خطبها واحد وكان شرطه تقعد في الدار وبالفعل حبست وتزوجت وكان عرسها عبارة عن جنازة ومناحة من طرف نساء العائلة
**
انا الان خطبني واحد الجميع يشهد بدينه وخلقه واولهم ابي والله انهم ماتوا عليه وعلابالهم موش راح يلقاو مثله دين وخلق ونسب لكنهم رافضين فكرة اني اتزوج من اساس في الوقت الحالي فمابالك لو كان شرط هذا الخاطب التوقف عن الدراسة او العمل من اصله (هذاشرطه الوحيد)
تقولوا وش رايك ؟ نقولكم منيش باغية نخدم ولاباغية نقرى لاني تعبت بزاف
وراني مكمله في خاطر الوالدين ومنيش حابةنغضبهم
وسبق وجبتلهم السيرة بالتمسخير
امي بهدلتني كيفاش ضيعتي عمرك بالقرايةوتعبتي والشهادات هاذوا تديهم في الشورة مثلا وحابة تزوجي واش ديري بالراجل ومتخافيش اوك تزوجي وتكرهي من حياتك
اما اذا حبستي قرايتك فراكي لعبتي على عمرك الراجل يخليك و يبخل عليك وتقعدي اربي للفروطوار والتسياق والهم تاع الاولاد
ودايما محتاجة ومادة يدك لباباك
وكلام كثييييير اما بالنسبة لابي فهو اشد تعصب من الام لكن لو وقفت في وجه وقلت راني محبسة يغضب حوالي شهر ومبعد يعاملني على اساس نشافة (مثل بنت عمتي الاصغر مني)
وش رايكم يا اخوتي

[أمّ عبد الودود]

السلام عليكم
جميل أختي أنك تفكرين بهذه الطريقة
رغم الآراء التي تحيط بك
أولا سامح الله والدتك لو لم تكن أستاذة شريعة ماذا ستفعل ؟؟
لا أستطيع مناقشة العمل فلكل واحد ة ظروفها
لكنني أستطيع أن أقول لك اختاري الزوج عن الدراسة والعمل
لأنه كما قلت إنسان متدين ومتخلق
لا تلتفتي إلى أي كلام يثنيك عن هذا
لكن أريد منك أن تركزي فيما أقول لك
إذا صادفتك يوما ما مشكلة مع زوجك
أو وجدته عكس ما تظنين فلا تندمي أبدا على قرارك
فالقرار الصائب والذي نرجح فيه المصلحة لا نندم عليه أبدا
وإنما اعتبري ما قد يحدث إبتلاء لك
وفقك الله وأتمنى أن اكون أول من يبارك لك هذا الزواج
جعل الله ايامك في طاعته وطاعة زوجك وتربية أبنائك

[kaderkader1541]

المراة مكانها البيت
تبقى حالات خاصة كطبيبة لتطبيب النساء و خروجها بضوابط شرعية
و انت رأيك سليم لا غبار عليه
فخروج المراة الى العمل وسط الرجال و الاختلاط حراام شرعا
و المراة في بيتها تكون قريبة من الله
الدليل
قال عليه أفضل الصلاة و التسليم
ان المراة عورة فإذا خرجت استشرفها الشيطان و أقرب ما تكون من وجه ربها و هي في قعر بيتها
ضعي نقطة هنا و لا تعيري اهتمام لأي مخلوق كان حتى والديك
جميل ان يطيع المرء والديه لكن لا طاعة لمخلوق في معصية الخالق و الاختلاط جرم فوجب عليك عقلا و شرعا ان تبتعدي عن الاختلاط و العمل

[tarek1987]

ربي يصلح الحال والاحوال
حوالي التوفيق بين الامرين الزواج والدراسة لتحقيق رغبتك من جهة ولتفادي منغصات الطرف المعارض من جهة اخرى
والله اعلم

[أم وفاتي]

يا أختاه مهما وصلت المرأة الى أرقى المناصب فلا شيء يسعدها أكثر من أن تضم أولادها اليها حاولي أن تذكري أمك بهذا فهي أولا و أخيرا مرأة و أنت ابنتها كوني ذكية و حاولي ان تقنعي أهلك برأيك و لو بالحيلة لكن لا تفرطي في زوج خلوق و متدين
و ذكري أهلك أن هناك الكثير من الدكاترة و النساء اللواتي بلغن أرقى المناصب بعلمهن و لكن يتمنين لو يرجع بهن الزمان الى الوراء و يتخلين عن كل هذا مقابل لحظات يكن فيها قرب أزواجهن و يضممن فيها أولادهن و الأمثلة على ذلك كثيرة و أكيد شتجدين في محيطك من هن كذلك فاحساس الامومة هو أعظم احساس عند المرأة و تكذب كل من تقول أني لا أتمناه

[ملكة في بيتي]

صحيح ان الزواج مهم لكن الدراسة لا تقل اهمية عنه.ادا رايت ان هذا الخاطب مناسب حاولي اقناعه باكمال الدراسة وامكثي في البيت بعد ذلك.

[biologie2001]

دراستك هي سلاحك في هده الدنيا

[sali-sali]

قولي ليماك انتي علاه تزوجتي و جبتي اولاد و ماشاء الله كامل ناجحين في قرايتهم

انتي تاني من حقك تاسي عائلة ...وانتي لك الحرية في العمل او المكوث في البيت

وتقدري تقراي و تتزوجي

الله يجيب الخير

[مريم الصابرة]

السلام عليكم اختي
الصراحة إستغربت موقف اهلك رغم غنهم مثقفين وامك معلمة شريعة وتتكلم بالطريقة هذي وتفكر هكذا صراحة شيء غريب الزواج اللي حللو ربي واروادو رجعوه هوما مجرد لعبة تافهة إستغفر الله
اختي لا طاعة لمخلوق في معصية الله الزواج نصف الدين العمل راجع ليك وللراجل كان خلاك بينك وبينو كان ما خلاكش وإنتم وافقة عليه دارك اولى من الشارع رانا نشوفو في اجواء العمل واش راه صاري يها إلا من رحم ربي كاني عاملات ومحترمات ما نعممش والصراحة تقال كاين ما شاء الله متزوجات وعاملات والله محترمات جدا
إنت كان قابلة بالراجل هذا وخلوق وعلى دين شوفي اللي يحكي مع باباك نظن كلمة والدك هي الصح كان قبل خلاص أقبلي وخليك من الخدمة قريتي والقرايا سلاح وراكي مثقفة خلاص ديري دارك وربي اولادك الدنيا وما فيها موفقة

[محمد جديدي التبسي]

حقيقة أحيّيك على طريقة تفكيرك رغم الواقع الذي تعيشينه
حاولي أن تتمسكي بتلك القناعات وأن تعززيها بتعلم أمور دينك والتقرب إلى ربك وسيتضح لك أنك على حق وسيزداد يقينك وإيمانك..
أختي الصراحة هي المطلوبة في هكذا مواقف، عليك أن تقفي وقفة جادة وأن تدافعي عن أفكارك وأن تتحملي مسؤولية قرارك
والداك سيقفان في وجهك وسيغضبان منك وستعانين لكن احتسبي أجر كل ذلك
ربي يوفقك ويثبتك ويعينك ..

[غربة أهل السنّة]

السلام عليكم و رحمة الله و بركاته

قرارك سليم أختي
حاولي ان تقنعي والديك بالزّواج في هذه المرحلة -أي- و أنت تدرسين و بعد ذلك
أمكثي في البيت لأن ذلك يعتبر طاعة لله أولا ثم طاعة لزوجك الذي يصبح هو قواما عليك
و مادام قلت بان هذا الخاطب متدين و أن قلبك مرتاح له
فثقي بالله أنك ستعيشين معه سعيدة
فالسعادة الحقيقية يا أختي هي كونك وسط أولادك و زوجك
أما -الدّراسة و العمل- فستقضين حياتك منهمكة فيهما و عندما تشرفين على الخمسينات لن تجدي من يؤنس وحدتك سوى المئزر الأبيض و أدوات الطب

فأنصحك بان تتمسكي بقرارك فتلك هي الفطرة التي خلق الله عليها المرأة

وفقك الله

[~ No ONe]

الشكر موصول لكل من رد على موضوعي
والله اثلجتم صدري بكلماتكم

بانتظار البقية

وجزاكم الله خيرا

[ميمنة الجزائر]

كملي قرايتك قبل وانا مع يماك ماشي من اجل الزواج لاغير لكن مهنتك طبيبة ماشي

من جا ويديرها يعني كملي ومن بعد فكري واش تديري و لانو تخافي تندمي من مهنة الطب

ترجعي للبيدون والنشافة يعني صح هي حياتنا وانا معاك كون كي تكملي وتخلصي صح

مانيش كنتر انك تحبسي لكن كملي قرايتك احسن ومكتوبك كون يقبل تكملي ومن بعد تتزوجي يعني زيدي عامين وعامين عند زوجك تجي قدقد

[rosa allia]

من حقك تتزوجي وتكوني أسرة أنت ثاني
لكن حرت فلي دارولها مندبة نهار عرسها علاه مسكينة رايحة تموت حتى يديرولها هك؟
إذا الراجل مليح و ولد فاميليا أقبلي وتفاهمي مع أمك خاصة
وما تنسايش بلي الطبيبات هوما اللي ديما يقعدو غير مع قرايتهم حتى يفوتهم العمر

[أمة الله 12]

السلام عليكم

خير الامور اوسطها, انا ضد فكرة انو الفتاة تحبس قرايتها على جال الزواج, الانسان ما يضمنش الدنيا هاذي,

فيما يخص العمل, فهو مسالة نسبية’ كل واحد كيفاه يشوف فيها و تتحل بالتفاهم بينك و بين شريك حياتك, لا عير لانها حياتكم وحدكم,

لكن على اتمام دراستك , و نحكيليك قصة واقعية لأستاذة قرتني قبل ف الثانوية مفادها

أستاذتي هاذي كبيرة ف السن, حكتلي على تجربتها الشخصية,

حيث بعد زواجها و انجابها لستة اولاد .أغمارهم متقاربة, توفى زوجها

و ما كانش عندهم اي معيل خاصة ماديا.

بما انو عندها شهادة قدرت تتحصل على عمل شريف كاستاذة في الثانوية,

و الحمد لله بتوفيق من الله سبحانو, ربت ولادها و كبرتهم,

تخيلي الانسانة هاذي كون ما جتش متعلمة و عندها دبلوم كيفاه كانت دير و منين راح تعيش ولادها؟؟؟؟؟؟؟

كما يقول المثل الجزائري "أقروا لزمان عقوبة" و اذا راني غالطة قولولي,

[محمد جديدي التبسي]

تخيلي الانسانة هاذي كون ما جتش متعلمة و عندها دبلوم كيفاه كانت دير و منين راح تعيش ولادها؟؟؟؟؟؟؟

كما يقول المثل الجزائري "أقروا لزمان عقوبة" و اذا راني غالطة قولولي,
ايه غالطة
عمرها ما كانت الشهادة ضمان لإيجاد عمل
لازم يكون عندنا يقين بربي واللي خلق ما يضيع من توكل عليه حق توكله

[أمة الله 12]

يا اخي ما تخبيش الشمس بالغربال, طبعا اولا و قبل كلشي الفضل لربي سبحانو, لولا الشهادة اللي عندها ما كانتش راح تكون استاذة

و الحديث معروف "اعقلها و توكل"

[محمد جديدي التبسي]

أصلا علاه نحسبو غير للشر يعني الشهادة سلاح وضمانة للحياة؟!!!
علاه ما نشوفش للمستقبل بتفاؤل
يعني اي امرأة راح تتزوج لازم تكون دايرة حسابها انو ممكن زوجها يموت ولا كاشما يصرالو وبالضرورة لازم تخرج تخدم!!! ما عندهاش ابناء ما عندهاش معاش زوجها ما عندهاش ربي فوق الناس كل!!
لازم الانسان يحسن الظن بربّه ويسعى لارضائه والفتاة إذا جاءها زوج كفء ورأت فيه الصلاح تقبل بيه ما دير حتى حسابات ...

[أمة الله 12]

عندك الحق في هاذي, لكن احيانا بسبب ضغوط الوالدين الفتاة ما تقدرش تخمم ببساطة هكا

[maramelmess]

الدنيا هاذي الضامن ربي ما تقدريش تعرفي الراجل حتى تعاشريه
الزواج صح سترة للمرأة مبصح ما تتلقيش قرايتك نتي ماراكي خاسرة والو
كملي العام اتزوجي و شوفي
و مبعد احكمي

[منهاج]

السلام عليكم

اختي بلوكي لعام وتزوجي اذا كان فيها الخيرة باش تكملي كملي واذا لا دارك وزوجك اولى بيك تخيلي كيما قلتي باقيلك 4 سنوات

قراية وسنوات اخرى للتخصص وبعدها وبعدها تلاقي قطار الامومة فاتك مشي الزواج لانو فيه رجال يبغو المراة العالمة

[ريم الفلى]

رايك سليم وربي شاهد لكنني لو انا مكانك اكمل دراستي اولا ثم اتزوج وابقى في البيت لانني والله العظيم حرام ان اترك دراستي في هاد المستوى خاصة انو مش لازم تديري سبيسياليتي يعني تقدري تقعدي جنراليست هادا ماكان وهكدا متجوعي الذيب ما تغضبي الراعي وتاني متقعديش نص في قرايتك واذا كان هدا السيد من مكتوبك يديك يديك واذا لالا بالاك راكي تشوفي فيه هو الميور لكن بعد ما يطيح الفاس في الراس وتتزوجي تلقاي العكس حياة بالاك متقدريلهاش خاصة وانك متعودة على عالم اخر