التحضير لمناسبة الختان [الأرشيف] - منتديات الجلفة لكل الجزائريين و العرب

مشاهدة النسخة كاملة : التحضير لمناسبة الختان

ام نسمة

2013-04-21, 18:08

مرحبا صراحة ان حبيت نطرح هاذ الموضوع ليس لاستفيد منه وحدي صح انا راني الشهر الداخل راح نختن وليدي والكثير مقبلات على هذا الامر لذا فكرت لو نتبادل النصائح حتى نقلو على رواحنا التعب خصوصا اللي وحيدة كما انا ماعندي حتى واحد يعاوني لذا كل ما تكون عندي مناسبة نبد التحضيرات مبكرا باش نجهز كلشي على التمام ومانكونش شفاية للعديان .........ههههه راني نكتب في شعر جبتها بالقافية لذا انتظر اقتراحاتكم وقولو لي نصائح لتوفر علي التعب بزاف وحكولي نتوما واش اتديرو بالتفصيل كي تختنو اولادكم وفي الاخير اتمنى ان ينال الموضوع اكبر قدر من المدخلات حتى استفيد ويستفيد غيري

ام نسمة

2013-04-21, 22:03

........................................معقول ولا رد

الوهرانية 1

2013-04-21, 23:18

أم ماجد

2013-04-22, 10:16

رايحين نجاوبوك لكن جاوبي علي الاسئلة اولا
انا ختنت وليدي العام السابق وجات حفلة هايلة وبامكانيات بسيطة جدا والكل اعجبتهم

ام نسمة

2013-04-22, 10:22

حبيبتي اكيد فيه افكار كثيرة
لكن ارجو منكي منحي قليل من الوقت فقط
قوليلي اولا
متى الختان انشاء الله
ناوية تعرضي ولا الي سمع يجي يبارك
كم واحد رايحة تعرضي غادية اديري في دارك
وادا في الدار اوصفيلي الصالون ولا المكان الي تستقبلي فيه الضيوف
ساعدني في الاجابة على الاسئلة
ونعطيك افكار حبيبتي

صباح الخير عزيزتي حتى انا كنت بنتظار مداخلتك شوفي انا مازال ماجمعتش افكاري انا كي ولدت هذا وليدي نفست في رمضان وما درتله والو لا اسم لاوالو لذا فكرت اني نعمل ختان مع اسم يعني رايحة نذبح ان شاء الله واش رايك وزيد حنا لوكان نعرضو نعرضو نسا ورجال في وقتين مختلفين يعني اما رجال فطور ونسا عشا او لغدوة من ذاك عندي شقة لا استطيع عرضهم لوعد واحد وراني حايرة واش ندير طعام ولا ندير طواجين و ولدي كاين اللي قالولي مورا طهارته بيومين ولا ثلاثة باش ندير العرضة باش نتلهى معاه في الاول وبالنسبة للحلويات ماعرفتش ندير بزاف انواع ولا ندير غير المسمن او قريوش صالون تاعي يرفد 30 شخص وانا اصلا ماراحش نعرض اكثر من هاذ العدد وعندي غرف اضافية لكن ما نقدرش نشغلها كلها في نفس الوقت مثلا شمبرتي نحط فيها الحلويات و الديسار والغرفة الثانية نوجد فيها الطوابل والمواعين والغرفة الثالثة يبقو فيها الاطفال و النسا اذا جات كاش وحدة تعاوني اذا عندك اسئلة اخرى راني في الانتظار وتاني اذا نتي في عايلتك كانت عندكم مناسبة ختان واش افضل نختن وليدي بطريقة تقليدية احسن او نديه لعيادة خاصة احسن

ام تينة

2013-04-22, 10:28

ربي يباركلك مسبقا انصحك ان يكون الختان قبل الحفل بايام قليلة ومن الافضل في عيادة لان النظافة مهمة

روان اسلام

2013-04-22, 10:53

مبروك عليه مسبقا انا ثانى عندى ختانة تاع وليدى ورانى نخمم

ام نسمة

2013-04-22, 11:42

شكرا لكن بما او ايضا توجد منكن من ستختن طفلها يلا نتعاونو حتى يفوت كل شي بتنظيم كبير ودون تعب انا اليوم رايحة للعيادة الخاصة لاسال عن الختان والسعر العم اللي زاد فيه ولدي ولدتو في عيادة خاصة وسالتهم عن ثمن الختان قالو لي 800 الف سنتيم والسنة معلاباليش شحال انا ولدي لالاول ختنتو في الدار ختان تقليدي وتعذب مسكين طول معاه الختان بزاف حتى دخلو عرق الموت وبالمناسبة مادرت لا حفل لا والو لانو كي زاد ذبحنا عليه زوج او ثلاثة لاني كنت في دار شيخي كبيرة بزاف وعندهم ناسهم بزاف عملت اسم وقصعة والزاوج ما درت والو كما قلتكم نفست في رمضان

robocop2

2013-04-22, 14:07

merciiiiiiiiiiiiiiiiiiiiiiiiiiiiiiiiiiiiiiiiiiiiii iiiiiiiiiii

دمعة اسى

2013-04-22, 15:22

ربي يتمم بخير انا تاني راني ناوية نختن وليدي هادا العام باذن الله مي مازلتش مارتبتش افكاري راني مشغولة مع عجوزتي رايحة تجي من العمرة هاد السمانة مالقري فوتتلي ختانة وليدي الكبير كحلة مي ماعليش عفا الله عما سلف مبعد نعاود نرجع للموضوع نشوف اراء البنات

رباب08

2013-04-22, 17:01

الله يتمم بخير

ام نسمة

2013-04-23, 22:18

مرحبا ......اين ا نتن انا بالانتظار

nabila222

2013-04-25, 11:18

انا ثاني يالبنات حابة افكار جديدة

sidali 2007

2013-04-25, 15:52

مبروك مسبق انا ثاني عندي ختانة ولدي في صيف مع دار جديدة وحايرة وش ندير
عادات اهل زوجي قبائلي مختلفة علي عاداتنا بسكرية نتمنى كاش وحدة دارت ختانة تنورنا
شكرا مسبقنا

issam2013

2013-04-28, 13:56

موضوع جميل

ام نسمة

2013-05-11, 17:47

ايوا الختانة هاد السمانة وانا ماراني موجدة والو راني تاكلة على ربي وعليكم هايا خياتي عاونوني

ام شرفو

2013-05-11, 19:11

http://www.djelfa.info/vb/showthread.php?t=943764

ام محمد منتصر

2013-05-11, 19:44

انا تاني باغية نختن وليدي وحابة افكار
لقيت مرة الوهرانية عاملة موضوع قصعة الحاج بالتفصيل الممل قلت نعملها للختانة بصح وين راه الموضوع هملتو

درك نحوس عليه ولي راهي شايفاته تحطلنا الرابط

ام محمد منتصر

2013-05-11, 19:48

راني لقيتها بالاك ترفدي منها افكار

انا الصراحة عجبتني
http://www.djelfa.info/vb/showthread.php?t=1145129&highlight=%DE%D5%DA%C9+%C7%E1%CD%C7%CC

ام نسمة

2013-05-11, 20:05

بارك الله فيك ام محمد منتصر

Hemal

2013-05-11, 22:58

والله ما علابالي واش انقول لكم يا لبنات المهم مبروك مسبقا أنا اوليدي العام لي فات حبط من فرانسا زعم فرحانة قلت انديرلوا عرس كبير بعد رمضان خطراش عندي غير طفل واحد هيا كانت داري مازالت ما كماتهاش الماصو تعطل مع رمضان هيا شخي و عجوز تي قالوا ديروه ليلة 27 ما بغيتش امبعد لعنت الشطان قلت معايش هدا هو حفيدها الأول ياختي كي ولينا فالقاطو و الطياب في آخر دقيقة خلاوني حاصلة المهم فوت الميزرية أو معادش انعاود و حمد الله لي بنيت الدار إلا حب ربي المرة القادمة واكم كامل معروضين ربي اعاونكم

الوهرانية 1

2013-05-11, 23:23

راني معاك اختي الغالية
على بركة الله نبدو بالحريرة كنت مديتها لاخت طلبتها
نحتاج الى
2 كيلوالى 3كيلو لحم خروف مادابيك الضلوع لانها مشحمة وفيها البنة
15 حبة بطاطا
7 حبات بصل
15حبة جزر
10حبات لفت
10 حبات طماطم
كيلو حمص مشمخ
4 ربطات قزبر
ربطة كرافس
نعناع
طماطم مصبرة
التوابل
نحتاجو الى
ملح -فلفل اسود - فلفل احمر- كروية -راس الحانوت - سكنجبير -شوية قرفة -حبة حلاوة - زريعة البسباس - الحلبة
التحضير /
في قدر ديري اللحم والخضر مقطع والحشايش مقطعة والحمص ديري الزيت
والماء والتوبل كلها غلقي عليها وخليها تطيب
في هاد الاثناء حضري الفرينة والتشيشة
كل لتر ماء نحطوله 250 فرينة وشوية تشيشة حسب الرغبة طبعا التشيشة نشمخوها قبل
كي يطيب اللحم نوخروه والخضرة نطحنوها طبعا نكونو موجدين ماء ساخن نضيفه نخلوها تغلي وندوقوها وهننا نزيدو العطور الي تكون ناقصة
نوخرو شوية مرقة تخافي تعقد ليك بزاف الحريرة منين تضيفي الفرينة واستمري في التحراك
ملاحظات مهمة / تحضير خليط الفرينة
لتر ماء ب250 فرينة خلطيهم بالمكسور احسن باش متتكورش الفرينة قبل ماتضيفهم للمرق ديري شوية ملح كروية قزبر مقطع رقيق ونعناع مقطع رقيق لان الخليط ماء ومينفعش يكون سامط لانه يسمط ليك الحريرة
في ما يخص المقادير بدقة تابعي حبيبتي
قدر 8 لتر يدير ليك 22 غرفية
رطل لحم
فيه 4 بطاطا
4 جزر
3 بصل
2لفت
4 طماطم
250غ حمص مشمخ
ربطة قزبر
نصف ربطة كرفس
اعراش نعناع
ملعقة ملح كبيرة ممسوحة
نصف ملعقة فلفل اسود
نصف ملعقة راس الحانوت
راس ملعقة يعني ربع سكنجبير
ملعقة مملوءة كروية لانها هي تاع الحريرة
2ملاعق طماطم مصبرة
ربع ملعقة بسباس
ربع ملعقةحلبة
ربع ملعقة حبة حلاوة
ربع ملعة فلفل احمر
طبعا نفس الطريقة
كي تطحني زيدي الماء الساخن حتى تملئي القدر يعني 8 لتر
وكي تغلي نقصي شوية مرقة واضفي خليط الفرينة والتشيشة
لتر + 250غ فرينة + فنجان تشيشة مشمخمة قرصة ملح +ملقة قهوة كروية - قصبر ونعناع مقطعين رقاق مادابيك مهروسين بالمهراز
حطي الخليط على المرق وحركي خليها تطيب حوالي نصف ساعة
ادا جاتك ثقيلة زيدي المرق الي خليتيه
نتمنى اني افدتك
حبيبتي هاد المقادير تاع 22 غرفية حريرة ادا درتيها مرتين 44 انا ننصحك اديري مرتين ونصف الزايد خير من الناقص
مبرو ك عليكم المناسبة حبيبتي

الوهرانية 1

2013-05-11, 23:29

وشوفي هاد الرابط اختي وراني هنا اسالي ونساعدك
http://www.djelfa.info/vb/showthread.php?t=1219843

حرة انا

2013-05-12, 12:43

انا عندي 4 اولاد على سلامتهم والله ما درت حفلة الله الله حتى الواحد شيخي ما يحبش الحس والهرج نختنهم وحدي وانا اللي نديهم للطبيب ونجيبهم ونبقى قايمة بيهم حتى يبراو باقية في قلبي حرقة اللي ما فرحتش حتى بواحد منهم وليدي التالي في عمره عام ختنته وهو عمره 4 شهور الله يسهل اموركم وتختنوهم بصحة وسعادة ان شاء الله ويمن عليهم ربي بالشفاء العاجل وعندي مرهم تقليدي نعملوه للذراري يبراو بسرعة يتعمل من --الشيح وزبدة الغنم واللي يحب الطريقة نعطيهاله

ام نسمة

2013-05-12, 13:38

ام نسمة

2013-05-12, 13:45

شكرا عزيزتي الوهرانية شوفي انا عندي حوالي 25 شخص رجال راح نديرلهم عشا وحبيت ندير طبخ اذن اوكي باالنسبة للحريرة راني خذيت العبر دورك راني مابين ندير زيتون او جلبانة لانو مادام راح نذبح قلت الغنمي يوالم الجلبانة اكثر من الزيتون واش رايك وتاني بالنسبة للمقبلة واش تقترحي شوفي النسا ماراحش نعرض نخليهم يجو وحدهم وقت تاع قهوة لكن بيناتنا عندي جماعة نحشم منهم بزاف وطلبوني نعرضهم قلت نخلطهم مع دار شيخي ونفطرهم واش رايك وزيد بالنسبة للحلويات انا ما يجونيش ناس بزاف يعني ما نظنش راح نحتاج كمية كبيرة تاع حلويات واش تقترحي لاني راح نركز على لتاي لانو السخانة واكيد راح نحط قهوة حليب لكن راح نكتفي ليها غير بنوع واحد ولا زوج تاع حلوى وزيدي واش رايك بعد العشا تاع الرجال ندير الحليب والتمر والديسار ولا نحط السفوف انا بالانتظار

الوهرانية 1

2013-05-12, 14:02

شحال من امرة تحشمي منها وغادي تعرضيها قولي العدد

ام نسمة

2013-05-12, 14:06

حوالي خمسة بدون بيت شيخي يعني راح توصل الكل للعشرة

الوهرانية 1

2013-05-12, 14:17

اوكي حبيبة عندنا 25 راجل احنا نوصلهم 30 يعني 6 حطات
و10 نوصلوهم 15 يعني 3 حطات
تحصلنا على 9 حطات يعني 9 موائد باصحاب الدار 10
ادن نبدو على بركة الله نحضرو روحنا لعزيمة 10 موائد تعرفي تزيدي خير والي بقى الخير ماغاديش تندمي عليه كاين الكونجيلاتور هههه
قلنا الحريرة اوكي دري عبر تع 50 غرفية راهي موجودة في الرابط
المقبلات نقترح عليك بركات او كورني الديول حاجة جديدة طبعا انا من قبل نعمرو بالكفتة ولا الدجاج في المسابقة عمرتو بالماقرون
http://im40.gulfup.com/5GU8B.jpg (http://www.gulfup.com/?wjvk8N)
شوفي ادا خيرتي الكورنيات راهم اقتصادين تحتاجي 5 علب ديول دائرية الشكل واللحم راهو عندك اطحني طرف
انا نشوفهم ساهلين على الباركات
واش قلتي

ام نسمة

2013-05-12, 15:33

اوكي عزيزتي يعني كل طابلة نحط فيها خمس كورنيات كل واحد واحد وهادو نقدر نعمرهم بكري على جال الوقت راكي عارفة كي تتخلط نرجع ماراني عارفة والو

الوهرانية 1

2013-05-12, 15:38

اوكي عزيزتي يعني كل طابلة نحط فيها خمس كورنيات كل واحد واحد وهادو نقدر نعمرهم بكري على جال الوقت راكي عارفة كي تتخلط نرجع ماراني عارفة والو

تقدري تجهزيهم بليلة اسبق عادي عمريهم وحطيهم في الثلاجة وغطيهم
وميحتاجوش توقفي معاهم يعني ادهنيهم و ارمي في الفرن وخلاص
يلاه مبدئيا رانا سلكنا
الحريرة
كورنيات الديول المحشية
نمرو للسلطة كيفاه تحبيها

ام نسمة

2013-05-12, 15:48

نحب نعمل زوج انواع وحدة خضرا بالبصل والزيتون والخيار والطماطم و الثانية ماسيدوان ولا واش رايك نخلط الكل في طبق واحد

الوهرانية 1

2013-05-12, 16:21

كيما قلتي خير اديري زوج سلاطات
لكن انا في رائي لوكان صحن كبير ومنوع احسن وتقدري تبدعي اكثر في الديكور
اطراف جبن كاشير ورافقيها
بصحون صغيرة مايوناز ومخللات
يعطي حطة شابة
الا البصل لا حبيبتي لان مائدتنا فيها لحم اكثر وهو ينفع في عرضات السمك
واش قلتي
اما ادا درتي زوج نقترح
سلاطة خضرا مع طماطم وبيض رابي من فوق وزيتون اسود
وصحن اخر ارز ومايسس وطونة وكاشير قطع نخلطوهم بالمايوناز نخطوهم في الوسط وندورو عليهم بطراف وجزر مبشور وخيار وبطاطا مغلية قطع
ومتنسايش المعدنوس رقيق هو الصح في السلطة
واش قررتي

ام نسمة

2013-05-12, 16:39

اوكي احسن ما نكتر الطباسة على روحي ههههههههه زيدي نروحو للطاجين

الوهرانية 1

2013-05-12, 16:48

اوكي
الحريرة
كورنيات الديول المحشية
سلاطة متنوعة

بما انكي رايحة تدبحي انا نفضل المثوم
يلزملك 10 طراف فقط
واش قلتي انا راني غير نهدر مانيش عارفة الامكانيات ههههههههه
يلا خفي مازال ما بديناش في القاطو والبرتوكولات هههههههههه

ام نسمة

2013-05-12, 17:03

انا ماعنديش مشكل بالنسبة للمثوم لكن ماشكيتش زوجي يقبل هوما في منطقتهم يا يديرو المحمر بالكفتة يا يديرو طواجين صوا زيتون ولا جلبان او لوبيا خضر ا نخيرو غير من هادو باش راجلي ما يظلش يكسرلي في راسي راني عارفة ما يقبلش واحنا راكي عارفة سي السيد يملي على المرا ويخير وهي عليها اطيب لكن كي يكون الموني اللي نقترحو فيه من عاداتهم نظن راح يقبلو ويخليني ندبر راسي

الوهرانية 1

2013-05-12, 17:16

انا نفضل لويبا خضرة الجلبان راه الجو سخون
لوبيا خضرة بالطرف الغنمي وديكور بطاطا سوفلي
الزيتون صح مايكلفش راه رخيص وبيدو يقوم وليمتك
بصح لازم الجاج تقدري اديريه دوزيام بلا يعني طبق ثاني لازم لك دجاج محمر الصراحة في المناسبات نحب نشروه لانو يشد
الا قادرة على 10 جاجات طايبين

ام نسمة

2013-05-12, 17:37

لالا خلينا في اللوبيا خضرا احسن وبلاش 2 بلا ونحب اللوبيا بلي بول تاع الكفتة يلي اعطيني افكار بهذا الخصوص وماهي اسرارك باش تبنني الللوبيا يعني مديلي طريقتك

الوهرانية 1

2013-05-12, 17:48

نقلي اللحم مع كثير من البصل هي تحي البصل رابي بزاف مع شوية ثوه مهروس وملح وفلفل اسود نقليهم مليح انا ندير الملح والفلفل من الاول باش اللحم ما يطيبش سامط وكي نمرق هو يرمي العطور في المرق
المهم نقلي مليح ثم نضيف طماطم رابي ونخليها شوية من بعد ما ء سخون فيه وطماطم مصبرة وشوية كروية برك ماشي بزاف لانها تطلق المرورية
نفور اللوبيا بماح وفلفل منين يطيب اللحم نرميها في المرق
ونوجد تتبيلة معدنوس+ ثوم+كروية ونطحنهم في الروبو ولا في المهراز
ونحطهم في اللوبيا ونخليها تعقد
اما بالكفتة عادي طيبي الكفتة كي يطيب اللحم ومن الاحسن في الوليمة كرات كبار بعدد الافراد يعني خمسة حبات كيار في كل صحن
وننصحك كي تطيب اقلعيها
وفي مقلاة ديري الثوم والمعدنوس ملح وفلفل وحطي حبات الكفتة تتحمر الدوق هايل
وزينيها ببطاطا سوفلي راهي باشكال هايلة وخلي اللوبيا تتجمر على نار قليلة حتى تنشف
يلا واش قلتي
الحريرة
كورنيات الديول المحشية
سلطة متنوعة
طاجين اللوبيا خضرة محمرة بالكفتة
والحلو ما اديريهش

ام نسمة

2013-05-12, 18:03

اكيد ندير الحلو ونفضل البرقوق واحنا احيانا نحطو شحال من نوع تاع فواكه مجففة في طاجين واحد يعني برقوق مع مشمش او اناناس مي انا البرقوق عندي مهعاه مشكل انو كي نطيبو بكري شوية ومن بعد نسخن باش نحط البرقوق ييبس ويتكمش ويرجع قاسي بزاف وحابة نعملو ديكور بكويرات الكوكاو اريد طريقتك بالتفصيل في اعداد طاجين الحلو

Hemal

2013-05-12, 21:39

mabrouk alikom

ام نسمة

2013-05-12, 22:01

mabrouk alikom

يبارك فيك عزيزتي عقوبة لدوام افراحكم يارب

ام نسمة

2013-05-13, 17:02

مرحبا اختي الوهرانية اذا راكي فارغة نكملو

ام نسمة

2013-05-14, 12:50

http://www.djelfa.info/vb/showthread.php129331t=3 ?

http://www.djelfa.info/vb/showthread.php?t=1253830

[URL="http://www.djelfa.info/vb/showthread.php?t=1240709"]http://www.djelfa.info/vb/showthread.php?t=1240709[/URL

http://www.djelfa.info/vb/showthread.php?t=1264598

راني نجمع في الروابط تاع الحلويات باش تخيرو معايا وما زال راني نبحث الوهرانية حطيلي روابط حلوياتك خاصة القريوش

ام عبودة

2013-05-14, 18:15

بالبركة يا وردة
حنا في بلاد راجلي. يديرو ليلة الحنة ويعرضو الجيران يديرو الطواجن ومن غدوة يديرو الخيالة يعني الطبل والخيل ترقص والزغاريد والبارود ونديرو قهوة والتاي ويدو الطفل للطهارة والعشاء ولغدوة شخشوخة بسكرية ونحط الطفل في غرفة والناس تبارك كل واحد ومقدورو
انا واحدة من الناس عجبتني عاداتهم. تشوفي النية والطيبة في الناس
اما عادات والديا ليلة الحنة نعرضو العائلة ومن غدوة عرضة للرجال والطهارة ومن بعد قهوة للنساء

melissa lola

2013-05-14, 18:52

ام نسمة

2013-05-14, 19:19

ام عبودة نورتي عزيزتي واش البارود والزغاريد والخيل والله احنا نديرو هكا في الوعادي والاعراس لكن حفلات الطهارة تكون ماشي كبيرة بزاف ان شاء الله واش قلتي في عرسو وزيد بيناتنا تامني لو كان نقولك ما نعرفش نزغرد جامي عملتها وقيلا نجيبك تزهي الحالة هههههههههه مرحبا بيك يا الغالية

ام نسمة

2013-05-14, 19:28

السلام أختي مجرد رأي بما انك راح تذبحي علاه ماديريش شطيطحة لحم مع شربة فريك ولحم حلو وسلاطة خضراء بالبيطراف و الزرودية و الطماطم و التون و الزيتون و البيض ولا سلاطة فلفل حلو مشوي مع الطماطم بما اننا في الصيف و الزيتون وطبعا المايونيز وايلا قدرتي بوراك توجديه من قبل وتكونجليه نهار العرضة تجبديه بكري وتقليه المهم يقدم ساخنا أختي معاندكش غاشي بزاف كبش يكفيك وتديري بالطبع بالبركة عليه وتشوفيه عريس انشاء الله بالنسبة للحلويات نقترح عليك بقلاوة ولا مقروط تقدري توجد يهم اسبوع قبل الختانة ويوالمو مع لاتاي وشكرا

مرحبا شكرا ميليسا ارجعي للردود الاقدم راني حطيت قائمة الاكل انا واختي الوهرانية تناقشنا فيها ومازال الحلويات ما اتفقناش والبقلاوة راها واردة في القائمة اذا كانت عندك كاش افكار اخرى افيديني بها مش شرط غير قائمة الاكل اقتراحات التقديم مثلا او من هذا القبيل سا كون جد ممنونة

sali-sali

2013-05-15, 11:20

مبروووووووك حبيبتي
راني نجي نحضر بلا عرضة ههههه

ام محمد منتصر

2013-05-15, 12:00

ايه راني وليتلك اختي بالافكار
عطاوني بزاف بنات افكار
قلت نصدر لولاد مع ولدي مع اني عندي البسة تقليدية نلبس قاع فميلتي ونعمل لبناتي الشدة التلمسانية
واش رايك تخرج تحفة
وندير الحلويات في علب خاصة بهده المناسبة على شكل طربوش درك نحوس عليهم في الاسواق لاني مشفتهمش

ارجو اني افدتك

فتـ حييةـاة

2013-05-15, 14:48

...........وسالتهم عن ثمن الختان قالو لي 800 الف سنتيم ....................

800 الف بزاااااف يااختي علاش احنا عندنا طبيب عام يختنهم ب 120 الف برك

مبروك عليه عقبال نفرحي نهار عرسو ياارب