مشكلتي

[مشكلتي]

السلام عليكم ورحمة الله وبركاته

راح نحكي قصتي ونتمنى نلقى الي ساعدني.كنت مع علاقة بوحدة لأكثر من سنتين بغينا بعضنا وكانت علاقة صادقة وهدفها الزواج لكن كان عندي مشكل تاع خدمة .المهم البنت كانت متعلقا بيا بزاف وقالتلي مهما يصير نبقاو مع بعض وواحد مايسمح في الأخر وتواعدنا.المهم أنا حاولت نخطبها وفي داك الوقت أناكنت pré_emploi لكن أمها رفضت وقالتلها حتى يلقى خدمة تاع الصح يجي يخطب.فاتت أشهر وحنى نورمال حتى وحد النهار عيطتلي وقالتلي صاحب الوالد خطبني الولدو وبويا عطاهم الكلمة انا تقلقت وقلتلها هضري مع داركم وفهميهم انو نبغو بعضنا وقلتلها غدوا انجيب دارنا ونخطبك لكن صرات امور عرقلت وهي تقلقت وقالتلي مانيش عارفا كيفاه ندير ووووو انا حاولت نزيد نفهم لكن طفات التلفون .لكن بعد يوم واحد بعتتلي msg وقاتلي كلش بالمكتوب وصاي ربي ماكتبش بيناتنا .هنا انا مافهمت والوا وبقيت نبعث في les msg ونحاول فيها باش تزيد تخمم مليح ونفكر فيها بالوعود وحبها ليا وقلتلها ربي هو الرزاق وراني نحوس على خدمة واني جامعي وراح يجي وقت ونلقى خدمة تابية.وقلتلها اني نبغيها ونعشق فيها وحلفتلها اني باغي نزوج بيها حتى يجي نهار بعتث msg التالي الي شوكاني وقالتلي فيه ادا تبغيني صح خليني نعيش حياتي وانساني وكلش بالمكتوب ومهما يصير مراحش نوليلك...........نقولكم الصح بغيت نهبل وقلت كيفاش تبدلت 180% رغم الكل لكان بيناتنا وانا كنت راجل ودرتها باش نتزوج بيها .
نقولكم والله عانيت على جالها وليت كيلمهبول مرض ونقصت وكرهت حياتي حتى وصلت بكيت وبكيت على جالها ودرت كاع البوسيبل تاعي باش نكرها وننساها لأنها خدعتني لكن ديما بقيت نقول غير كدبت عليا باش نكرها لأنها كانت تبغيني بزاف.نقولكم بعد مرور عام و 8 أشهر مازلت نبغيها وكل يوم نخمم فيها ياترى نساتني وتزوجت ولا لا.
ياناس باغي نستشيركم وراح نتقبل منكم المهم ريحوني انا درك الحمد لله ربي فتح عليا بخدمة ومنصب شباب ودارنا جبدولي على الزواج واناقلبي وعقلي مازال متعلق بيها وماقديش نستخايل روحي مع بنت غيرها راني نخمم نحوس عليها ونشوف ادا مازالت ماتزوجتش نخطبها لانو أخبارها نقطعت عليا من أكثر من سنة لأني نسكن من ولاية بعيدة على ولايتهم وفي نفس الوقت نقول وكون نروح نحوس عليها ونلقاها تزوجت والله غير نخاف تصرى فيا حاجة لانو غير مرى نخمم ونقول في نفسي زعما تزوجت وراهي مع راجل غيري نتقلق ونحس بديقة ومرات نبكي .......ماعرفتش شاندير راني حيران وباغي نريح ملتفكير لأني والله غير تعبت بزاف بزاف

[بوسعده]

قال رسول الله صلى الله عليه وسلم:
"عجبا لأمر المؤمن، إن أمره كله خير، وليس ذلك إلا للمؤمن، إن أصابته سراء شكر فكان خيرا له، وإن أصابته ضراء صبر فكان خيرا له"
إن المؤمن أمره عجيب كما وصفه الرسول صلى الله عليه وسلم، فهو إن أصابه خير من مال أو ولد أو ظفر شكر الله تعالى بقلبه ولسانه وجوارحه، فلا يبخل بما آتاه الله ، لأنه يعلم أن هذه النعم هي من الله سبحانه وتعالى، وإن أصابته ضراء من فقر أو مرض أو نقص في أمر من أمور الدنيا صبر ولم يضرع ويضعف ، ولا يذهب قلبه حسرات ، بل يسعى في إبعاد هذه الأعراض
فإذا تسلط عليه عدو سعى في دفعه والنصر عليه ، وإن أصابه مرض أخذ الدواء ودعا الله بالشفاء و صبر، وهكذا يأخذ الحسنات وتكفر عنه السيئات كما جاء في الحديث (ما يصيب المؤمن من وصب ولا نصب حتى الهم يهمه إلا كفر به عن سيئاته)
المؤمن لا يضجر ولا يصيبه الملل والبلادة والكسل لأنه في شغل دائم بالعمل لله، وإنتاج لما يرضي الله.
أنظر إلى المستقبل أخي . أشغل نفسك بقصة نجاحك في الحياة. تخيل نفسك -بعد عمر طويل إن شاء الله- على فراش الموت ، ما هي الانججازات التي تود ان تكون قد حققتها. ضع تلك الانجازات نصب عينيك و اسعَ اليها.
و أعلم أن خير إنتقام هو النجاح الكاسح

[مشطوب]

يا أخي لا تبحث عليها

ولا شيء آخر

أضف أنها متزوجة

فعن ماذا تبحث يا هذا ؟؟؟؟؟

أتق الله ؟؟؟؟؟؟

أبحث على زوجة غيرها

[محبة عبد الرحمان]

اخي لا عليك وعسو ان تكرهو شيئا و هو خير له حاول تدير كل المستحيلات باش تنساها لانها هي نساتك و تزوجت و نصيحة مني ما تتزوجش الل اذا نحيت الطفلة هاذي من بالك تماما و ربي يفرج عليك و يرزقكك ببنت الحلال اللي تنسيك فيها

[ايمان نور الجزائر]

السلام عليكم يا أخي
قدر الله وماشاء الله فعل...انه قضاء الله وقدره
وهيا ربي جابلها مكتوبها ممكن باش تصلح حوالها
ونتا فتح ربي عليك بعمل ...حاول تنساها وما تفكرش تحوس عليها والا تروح ليها
لانو الخطبة على الثانية لا تجوز وايضا ممكن تكون متزوجة
ابحث عن بنت حلال وتجوزجها وسترى كيف تنس الاخرى

[imane-2020]

ربي يكون معاك وربي يسرلك ويسهل لك
شوف خويا اذا كاين انسان تثق فيه وين تسكن هي تقدر تقولو يسقسيلك عليها حاول تسأل وتستفسر من بعيد لبعيد ودير في بالك اذا راهي كاتبتلك واحد ما يديها غير واذا كان لالا فكل شيء مكتوب ولي مكتوب في الجبين ما تمحيه اليدين وما تدير والوا في بالك اذا كان تزوجت تفكر وعسى ان تكرهو شيء وهو خير لكم ديري في بالك ان ممكن كانت تصرى حاجات ماشي مليحة لوكان ديتها المهم خلي ايمانك بالله كبير وربي يكون معاك ويسمعك خبر الخير لي تستناه ونستناو اخبارك وربي يفتحلك ابواب الخير وتكون من نصيبك

[nouna l maghbouna]

زيد سقسي عليها
و ايلا تزوجت انت ثاني اتزوج مع الوقت تنساها
كلش بالمكتوب

[ome iyen]

السلام عليكم
لازم اخي تكون قوي لانو هي راهي تزوجت بلاك دارهم سيفو عليها و لازم ترضي والديها ...الله غالب عليها
شوف خويا راك تحبها ادعيلها يالخير و تقرب من الله ادعي وصلي و انشاء الله ربي يفرج عليك

[Hamza touazi05521763]

ستنساها اخي صبرا فقط نتا كنت راجل معاها متقلقش روحك صرالي مام بروبلام مي الحمد لله على كل شيئ انساها والحمدلله ربي عطانا نعمة النسيان

[mira mira02]

صباح الخير اخي
علاش تلوم الطفلة ياك بباها هو لي زوجها ربما ماقدرتش تهدر معاه وتقهعو و الله امر صعيب ان الطفلة تهدر مع اهلها
انساها و تمنالها غير الخير وان شاء الله ربي يعوضك باخرى
راهي زوجة راجل
وانت لازم تعيش حياتك تتزوج تكون اسرة اولاد
هدي سنة الحياة
ماشي اي شي نتمناوه و نحبوه يكون لينا
كل شي بالمكتوب

[sali-sali]

هي تزوجت ونساتك و انت اقعد ابكي على الاطلال
يا خويا انا لي يبدلني مانزيدش نسمع بيه..نكرهه بسيف على قلبي
خمم بعقلك وبالاك كون تزوجتهاتصرا مشاكل وماعلاباليش (عسى ان تحبوا شيئا وهو شر لك)

راك لاباس عليك وبخدمتك والحمد لله الف وحدة تتمناك و احسن منها
خمم مليح و انساها
ربي يعوضك خير

[soha1987]

ربي يكون معاك
انت سقسي عليها هاكا تريح ضميرك بلاك بطلت لاتدري انت ابحث وسقسي مليح ولازم تكون قوي حط كل الاحتمالات في بالك هاكا متتصدمش واصبر ماهادا الا بلاء يااخي واسال الله ان يفرج كربك واخير ا لاتبكي على امراة انت رجل كون قوي الشخصية وصدقني مع الوقت تنسى ربي يفرج عيلك

[ايمان نور الجزائر]

اعتذر عن التدخل مرة اخرى
لكن يا اخواني لا يجب نصحه بالسؤال عن الفتاة لانها اصبحت في ذمة رجل اخر
وهذا لا يجوز شرعا وزرع امل خاطيء في النفس قد يزيدها الما
بل عليه الاستمرار في محاولة النسيان والبحث عن زوجة مناسبة

[rosa allia]

رأيي من رأي الأخوة والأخوات ننصحك أنك تنساها وتفكر في مستقبلك لأنها الآن صارت جزء من الماضي وراهي عايشة حياتها وأنت مازالك متمسك بيها راك حاكم في الريح، دير القلب وأنساها لأنها ممكن تكون راهي بولادها وكل شئ بالمكتوب، حاول أنك تفكر في وضعيتك وتزيد تحسن منها وتقتنع بلي راهي راحت غلى غير عودة.
وفي الوقت الحالي أعدل أمورك مليح خاصة معنويا ومن بعد أتزوج على خاطر حرام عليك إذا تزوجت أخرى وأنت مازال تحب وحدة حتى ربي مايحبش الظلم، ونزيد نقول لأخي إذا راك ميسور روح دير عمرة وصفي نيتك ونفسك وبإذن الله ترتاح.

[bina]

انا تقولك احمد ربي الليل مع النهار لانو خلصك منها و من شرها تعرف لوكان جات خير ليك كان سهلك ربي فيها بصح باينة مشي خير عليك ربي ادرا منك و منا وزيد يجي نهار وين تندم عليك انا كون جيت في بلاصتك نشفق عليها بزاااااااااااف بزااااااااف لانها خصرت جوهرة كما انت اصلا هي خسرانة واحد كما انت حبها في زمان مبقاش الي يحبو من قلبهم و اوفياء المهم الشفقة قليلة عليها انت راجل و نص و الرجال قلائل لانك كنت وفي وقد كلمتك كراجل و كعاشق من قلبو ربي يعوضك على كل الم و دمعة و حزن المهم ربي هو دواك و الصبر و حد ما يقدر اعاونك خير نفسك عاونها هي بنات حياتها انت متحطمهاش ابنبها كما هي كاين جرح اهدم و جرح يبني وانت خير الي يبني و قوي قلبك

[منهاج]

السلام عليكم

البنت ما تحكمش في روحا احتمال يكون بوها مزوجها ما تقدرش ترفض وكلشي باالمكتوب خلاصة لقول الشيرة مشي مكتوبالك

[ريمة14]

خويا كون كانت باغياتك كون درات المستحيل باش تبقى معاك
غير انساها وبدا من جديد مع امرأة اخرى لانو تأكد بلي كانت خيرة ليك والله
وربي ما يظلمش عبدو يديرنا غير المليحة لازم ترضى وتحمد ربي
وان شاء الله الي رايح تزوج بيها تعوضك عن لي فات وراح تكون احسن منها بألف مرة غير توكل على الله

[lachiche]

خويا ربي يفرج عليك و لبنات راهم كي الحجر
انت متتزوجش كيما قال الأخ حتان تنساها و تأكد بمرور الوقت تنساها و خيرها في غيرها

[sengra]

السلام عليكم
أخي الكريم أنصحك و ان كان غير لائق أن تقرعج:confused: عن أخبارها اذا ماكنش زوجت تقدم الى اهلها و اذا تزوجت فانسى الامرمن أساسه لانها في عصمة رجل و لايحق لك حتى التفكير فيها.رغم انه أمرصعب لكنه يجب تقبله و تبقى الدنيا أمال للجميع.
و من جهة أخرى أنعم الله عليك بالعمل في وقت هي ابتعدت عنك فتأمل في هذه المفارقة. يعني هناك علامات و الله أعلم.
وفقك الله

[TOKYO]

يا خويا خلاص انسي
ربي يرزقك بالبنت حلال و تجبيب اطفال يعمرولك البيت و تنساها
و خيرها في غيرها و مش من مكتوب ليك هيا راهي الزوجة و الام و عايشه حياتها انت تاني بدء العيش حياتك وشوف البنت فامليه وتوكل على ربي
ربي يرزقك بالبنت حلال تنسيك فيها و تربح عليها و تسترك وتسترها

[yousra14]

خذ عطلة وسافر فان في السفر عدة فوائد منها انك تجد بديلا عن الذي فارقته