ماهو سرلمرارة تاع لملوخية

[samasem 2]

ربي يعيشكم كامل لي غديتولي والله شجعتوني الليلة درت روز لوصفة هزيتها من لمنتدى مع دجاج محمر وغدوى نشاء الله قررت ندير دوبارة بسكرية وحبيت تنصحوني واش نزيد معاها وزيد حبيت نديرلو حاجة حلوة راني حابة نبين روحي تعيشوا عاونوني و حبيت نعرف كيفاه نطيب لملوخية وما تجيش مرة أنا وين نطيبها تجيني مرة مع أني نستعمل الذواقة لأني منعرفش هذيك تاع الميزان إذا مليحة ولا ميش مليحة

[*أم كوثر*]

الملوخية كي تتحرق تجي مرة
هي تطيب على نار قليييييلة
وتدوم حوالي ساعتين ونصف مع التحريك مرة على مرة

[ام رنا]

كيما قالت ام كوثر ماتخليهاش تتحرق او تلصق والذواقة هي النوع الممتاز نتاع الميزان مش مليحة بالنسبة لي طبعاالناس اذواق

[mina80]

المرارة دجي على حسب نوع الملوخية اشري الذواقة نتع تونس ماشي الذواقة نتع الجزائر نتع تونس دجي خضراء والشكارة نتعها لونها اخضر عكس نتع الجزائر لونها اخضر باهت وشكارتها ايضا لونها اخضر باهت بالنسبةنتع الميزان كاين الحلوة او كاين المرة انت وزهرك

[ام شرفو]

كان عندي نفس المشكل لكن حسب رايي هاهم الاسباب


الثوم المكون الرئيسي كثري منو والا قبل ما طفي بربع ساعة رابي 2سنينات ثوم


الملوخية تحب اللحم وخاصة البقري ساعات انجيب لعظومة تاع لكراوع والا جامبو بقر باه الطعم يتحسن كذلك التوابل]
و كيما قالو الاخوات طيبيها على نار قليلة

[samasem 2]

ربي يعيشكم كامل والله نستعمل الذواقة تاع تونس ونطيبها باللحم وديما تجيني مرة إذا سمحتوا ممكن تشرحولي كيفاه طيبوها بالتفصيل ممكن تكون عندي غلطة

[المعتزة بالاسلام]

السلام عليكم ورحمة الله
ننصحك ديري فيها طماطم المصبرة كي تقلي تجي بنينة ومتجيش مرة خلاص انا هادي طريقتي وتجي هايلة لانو كثير من الناس يطيبوا الملوخية بلا طماطم مصبرة وتجي مرة

[hous_sam12]

قلي حبة بصل مع الحم والتوابل في الزيت زيدي الطماطم والهريسة انزعيها من النار وخلطي الملوخية والسر انك تهبطيها من النار وانت تحطي في الملوخية ثم تضيفي كمية كبيرة تاع ماء وتخليها تطيب على نار قليلة انا ننصبلها على 8 تطيبلي على 12

[ام ملاك.]

انا تعلمتها على صاحبتي ربي يخليها من قالنة كي كنا نقراو في الجامعة درك نعطيك طريقتي تخرج هايلة وبنينة ماتتشبعش حتى بلا لحم
تشدي راس بصل تقطعيه رقيق ديري من الافضل البصل الابيض خاطرش الاحمر يمد المرارة من داك
والثوم ديري راس ثوم كبير ولا 2 صغار رابيهم قع ولا ارحيهم ديري نص الكمية مع البصل وخليه يتقلى بشوية زيت وملح ماتكثريش بزاف خاطرش رايحة تنقص وماتنسايش بللي تديري جومبو اللي حبيتيه وديري مغرفة طماطم وكروية برك واذا حبيتي الحار ديري هريسة ولا فلفل احمر حار كي يتقلاو مرقي ديري قدرة كبيرة شوية خاطرش تطلع نورمالمون تعرفي هاد التفاصيل
وهذاك الوقت حللي شوية ملوخية في الزيت وفرغيها واقعدي فير خلطي ماتحبسيش وكي تبدل تغلي القدرة نقصي مليح عليها النار وخلطي خاطرش تطلع بزاف وتفيضلك
المهم راكي تعرفي كيفاش تطيب وكي تكوني بقاتلك 5 دقايق باه تطفي عليها كملي البقية نتاع الثوم اللي خليتيه وخلطي مليح وبالصحة والهنا امممممممممم
فكرتيني غيها تشهيتها هادي مدة ماكليتهاش

[ANNA LEULMI]

شوفي احنا التباسة مشهورين بالملوخية و نديرو فيها سر صغير تجي روعة شوفي المرة الاولى حطي اللحم انا ساعات ندير الدجاج و الا الدوارة و طحطيها مع راس بصل و ملح وشوية برك زيت يعني 4 مغارف وتخليهم يتقلو شوية و مبعد تزيدي راس ثوم و الفاح مشكل يعني راس الحانوت وتزيدي نصف مغرفة اكل طماطم مصبرة وحبة طماطم مربية اذا عندك ومبعد ما يتقلو زيدي فنجان كبير زيت و هاذي المكونات نتاع 4 مغارف ملاية نتاع اكل ملوخية على نار هادية ابدي حلي في الملوخية و حركي و هنا يجي المكون السري هوووووووووووووو السكر انعم السكر ديري مغرفة نتاع القهوة ماشي مليانة سكر وعلى هادي ما تجيش مرة ولا قارصة من الطماطم ومبعد ديري شوية ماء غالي و حركي شوية ومبعد زيدي عينك ميزانك و شوية وحركيها وخلاها حتى تشوفي الزيت طلع الفوق ومبعد ذوقي و رديلنا الخبر و الله تجيك روعة مي طول شوية في الطياب و نسيت نقلك اذا عندك الرند طيشي فيها ورقة و ادعيلي اختي دعوت خير