دبروا عليا واش ندير

[مشكلتي]

السلام عليكم
انا تعرفت على شخص و بعد عام تقريبا جا لبابا و خطبني و لكن بعدها بدات تجي المشاكل و ماحبتش تحبس
المشاكل من ناحية اهلو ..في الاول باش يجيب يماه قعدوا تقريبا 7 شهور لانها كانت مريضة و فوتت ايام صعيبة بزاف لانو والديا تقلقوا و هدا من حقهم و انا ماكان بيدي حتى حاجة نديرها .بعدها جات يماه و زادوا خمس شهور اخرين
و باش يرجعوا تاني بسيييييف و بعد مشاكل كبار لانو كان باغي يرجع هو و يماه برك بحجة باباه خدام
و لكن والديا ماحبوش و بعد اخد و رد جا باباه اخيرا و اتفقوا باش يرجعوا يديرولي لخاتم ..عيطوا و قالوا في هاد العطلة نجوا بصح فاتت العطلة و مابان والوا و انا كل مانسقسيه يقولي الظروف المالية نتاع بابا و للعلم هو مازال يقرا و باباه هو لي راح يتكفل بزواجو ...انا درك بقيت في النص و ماعرفتش واش ندير من جيهة راني نحس بالذنب تجاه والديا لي حطيتهم في هاد الموقف و من جيهة اخرى راني عارفة بلي خطيبي راه شاريني و راهي فوق يدو لحكاية ..مرات نقوله والديك مارهمش حابين بالاك. يحلفلي و يقولي و الله ظروف برك ..راني حابة تشوروا عليا و تقولولي واش ندير لاني قريب غادي نهبل و تعبت من التخمام راني قريب عام و انا في نفس المشكل

[mar moura]

كيفاش اصلا رايحة تنوجي مع واحد ماهوش قادر علي المسؤولية اسمعي انا من راي تزيدي تخممي شوية في الموضوع لان الزواج ماهوش عرس و فرات الزواج هو تحمل للمسؤولية من طرف الزوج

[pseudoname]

غريب امرك انت.انت قبلتي بواحد ماهوش خدام.غدوة يحاوزو باباه من دار كيفاش تدير.الراجل تاع الصح يبان بخدمتو و يجيب المهر تاعو بعرق جبينو
رب يسهل

[امحمد بن صالح]

يابنت الناس الواجب أن والدك يستدعي والده وبعض من حضر الخطبة ويحدد معه كل شيئ من جديد ويركز على تحديد تاريخ العقد .ويوم الزفاف. والله أعلم.

[محمد جديدي التبسي]

هذا الشخص ما زال أجنبيا عنك ولا يمكنك محادثته هكذا لا تتساهلي في الأمر
إن كان رجلا بحق سيُقدّم كل ما يُوضّح حسن نيته أنت ما عليك إلا أن تنتظري ولا تكلميه أكثر فأنت طلبت منه أن يتقدم رسميا وهذا اللي عليك لا تتنازلي وطيحي بقيمتك واصبري حتى يحكم الله ..

[khadidja1988]

استخيري وربي ايجيب لي فيه الخير ليك

[sengra]

السلام عليكم
هذا الشاب مدعي بدعوة الخير لقى باباه يزوجو و متهني من مشاكل العرس
و زيد لقى طفلة تقبل تزوج بيه على هذه الحالة
صراحة راه محظوظ
و انتي أختي الكريمة ححدوا الاهداف و الوقت و ثانيا أنصحي خطيبك بالعمل و عدم الاتكال على بيو
أحنا توفر كل شيء و تتعب باش تلقى الخدمة و اذا لقيت الطفلة تعمرك بالشروط
و مع هذا الحمد لله
وفقك الله

[تصفية وتربية]

حقيقة أحتار لما لا تترك الفتاة الأمر في يد وليّ أمرها وتتصرف هي وتتناقش مع الرجل مع أنه أجنبي عنها ولا يحل لها مُحادثته ولا لقاءه؟؟!!!
يا أختي دعي وليّ أمركِ يتصرّف وتوقفي عن هذا الذنب الذي أنتِ فيه.
هذا الشاب أجنبي عنكِ لا يحل لكِ الكلام معه ولا لقاءه.
تعسّر الأمور سببه هذا الذنب الذي أنتم فيه، فالمرء يُحرم الرّزق بالذّنب يُصيبه.
أتركي والدكِ يتكلّم معه واسألي الله التيسير
والله المستعان

[knives55]

ولد بابا ميصلحش لزواج اخطيك منوا هذ موش تاع مسؤولية

[sorour93]

لي فيها الخير ربي يجيبها بصح العام يبان على خريفه هذا غادي غير يعييك برك ازواج بنتي مسؤولية كبيرة خليه حتى يعتمد على نفسه وربي يوفق ان شاء الله

[chic.lady]

أولا الشاب هادا راه يتكل على باباه هو اللي يعيشكم
أنا وحدة ما نقدرش نغامر بحياتي مع واحد ماشي قد المسؤولية
و زيد يبانو كي هلال رمضان
الناس تجي يماهم لدار العروسة باش يشوفو كيفاش دايرين و يعرفوهم مليح و و و ماشي من العام للعام باش يبانو
هاذا مجرد رأي و نتمنا ما تزعفيش مني لأنني متشددة في بعض النقاط (مرات نحس عندي عقلية تاع عجايز يعني هههه)
و ربي يجيب اللي فيها خير