زوجي ولعنة الفايسبوك

[مشكلتي]

بدون اطالة زوجي اصبح مدمن على الفايسبوك بعد ان كان ملتزما ويرى في الفايسبوك انه حرام ولا يستعمله الا المراهقون ولكم كانت صدمتي لا تنتسى وخاصة عندما قرات كتاباته مع النساء ومغازلته لهن بل حتى انه يطلب صورهن ووعد واحدة منهن بالزواج مع الاحتفاظ بصورها وحتى انه اعطاها رقم هاتفه واصبح يخرج من البيت لمحادثتها والsms مانحكيش انه لم يراعي حتى مشاعري ومشاعر ابنته واصبح لا يحدثنا ولا يجالسنا الا نادرا وما قراته في صفحته شل تفكيري ولم اعتقد ان هذا هو الانسان الذى عرفته بورعه وحيائه وخاصة من الجنس الانثوي الرجاء ممن قرا مشكلتي ان يعطيني الحل العاجل لانني راح نهبل علما ان اهلي سمحوا في لانني تزوجته وهو ليس من العائله ارجوكم ساعدوني لانني ارغب في الطلاق او الخلع لقد صدمني صدمني صدمني حسبي الله ونعم الوكيل

[alger1]

السلام عليكم اختي لا انصحك بالطلاق لانه آخر حل ادعي له ربي يهديه لان هذه التكنولوجيا والنساء افسدوا اخلاق الكثيرين ربي اعانك الله فقط ادعي واحتسبي وتوكلي على الله فانه لا يخيب احدا

[dadoua]

يا اختي ربي يكون معاك ويهديهلك ويرد ليك ردا جميلا.
تاكدي فقط ان مشكلتك هذه تعاني منها النساء اكثر مما تتخيلي اي انها اصبحت مشكلة لايكاد يخلوا منها بيت.
ربي يهديهم وهذه خطوة اجابية منك انك تطلبي المشورة قبل اتخاذ اي قرار مع اني انصحك بالابتعاد حاليا عن فكرة الطلاق.
وبما ان زوجك فيه بذرة التقى والورع اعملي على هذا الوتر وبينيلوا ان هذا الفعل عند الله هو حرام خيانة وزنا العين وزنا الاذن والفرج يصدق...................لعل الله يهديه ببضع محاولات منك ولك الاجر المحتسب حاولي كذلك الدخول الى الانترنت فهناك نصائح ومواعظ من بعض الدعاة في مثل مشكلتك خذي منها ما يناسبك وقد تاخذي منها بعض الافكار
استعيني بالدعاء وانتبهي الى نفسيتك كي تتغلبي على هذا الكرب المهم اختي كان الله في عونك وان شاء الله الفرج القريب .

[الصمت حكمة]

ربي يكون في عونك يا ختي، أول شيء لا تتسرعي في اتخاذ قرار الطلاق، خاصة و أنك عندك بنت، ثانيا تقريبا في وقتنا هذا 90 في المئة إذا مش أكثر من النساء تعيش تجربة الخيانة، كاين اللي تفيق و كاين اللي ما تفيقش، و كاين اللي تفيق بأمور تتعدى االإتصال بالهاتف بالصح و الله غير سرها ما يخرج، و تحاول تبين أنها أسعد إنسانة في الدنيا ما تغركش مظاهر النساء ، حاولي تكوني أقوى من هاذ البنات الحقيرات نتاع الشوارع اللي ما يهمش أنهم يبنوا سعادتهم على حساب تحطيم أسر و جرح ناس آخرين، حاولي ما تعطيهمش فرصة و شوفي انت كانش ماراكي منقصة و تداركي الوضع ، خاصة إذا كان إنسان يستاهل التضحية لأنها الغلطة تصرا، استعيني خاصة بالله و استخيري و حاولي تقومي الليل و لا تفرطي في الأذكار، و ما تفسديش حياتك بأنك كل مرة تجبدي هاذ الموضوع و تكوني امرأة نكدية خاطر هذاك الشي اللي يخليه يزيد يروح من جيهتهم باه ينحي على خاطرو معاهم، و كوني ذكية، و مهما تكوني مجروحة من الداخل و تبكي الدم حاولي دائما تفرحيه بالكلمة الطيبة و الإبتسامة و التزين مع أنك في قلبك تقولي مايستاهلش يجرحني و انا نسعدو، بالصح بلاك يتكاكا و يرجع غير ليك، اسمحيلي كثرت عليك الكلام، في الأخير نقلك ربي يهديه و يرده لك الرد الجميل أنت و كل أخت راها محنة من هاذ الموضوع و اصبري اللي يعيش في هاذ الدنيا قع يشوف................. سلام

[ندرومة49]

الفيس بوك أو النت بصفة عامة
هدّم العديد من الأسر
أختي أنت لست الوحيدة
ما عليك إلا بالصبر
والتضرع لله أن يهد زوجك
ثقي ثقة كبيييييييييييييييييييييييييييييييييييييييييييييييي يييييييييييييييييييييييييرة في الله
وادع ولا تملي ولا تتوقفي

ووالله وبالله وتالله سيهد قلب زوجك ويعود إليك أكثر مما كان عليه قبل الفيس بوك

المهم الدعاء سلاح فتاك ولا تتعجلي فقط في الإجابة

دعاء+ معاملة من عندك معاملة تكون نعم معاملة الزوجة للزوج

صدقيني أختي ستتفاجئين بعودته

أسأل الله لك التوفيق

أما عن الخلع والطلاق فهو في المرحلة الآخيييييييييييييييييييييييييييييييييييييييييييييي يييرة إذا كانت سلوكاته لا تشرف بأن يكون زوجا

[* الحلم سكر *]

شوفي اختي ربي يكون في عونك خيانة الراجل و تغيرو تجرح و تدمي القلب فعلا بصح ماشي النهاية ... راح تتعبي بالصح ان شاء الله راح توصلي هو كــان انـسان ملتزم و فاهم اللي هادي أمور مراهقين ابـــداي من هـــنا انــصحيه بــطريقة غير مباشرة على خاطر نظن هوما في المرحلة هادي ما يحبوش النصيحة المباشرة راح يعكسوها
انــتي دايــما فــكريــه بـــروحــو بالــمرحلة السابقة - قبل الانزلاق في الهم نتاع ف.ب -
حـــاولي كــأنك تحــكيـلو على شــخص آخـــر اجــبديــلو مـــواصفاتو و طــريقة تفــكيرو قبل ببــسمة و بنــوع من الاعـجاب * صعيبة لكن لازم تعفسي على قلبك* و اكيد بلا ما تلوميه و تقوليلو هاك تغيرت خليه وحدو يفيق احــكيلو على روحــو كــنا هــكذا وهـكذا خلـــيه يـــرجـع يحـب روحــو سابقا هــو راه مـــاشي في طريــق حـسب كلامك كان بعيد عليها بالاك لوكلن يتذكر الشخص اللي داخلو قبل يحتقر الحالي مع الوقت و حتى لو تهـرب مرة ما تمليش
أختي بعـدي عليك فكرة انا بعت اهلي علا جالو و هو واش راهو يدير .. لا راح تدمرك اكثر و راح ما تعرفيش تتصرفي و انتي صدقيني بمرحلة محتاجةة تخمي بعقلك اكثر من العاطفة مادام ضحيتي و تمسكتي بيه أكيد فيه حاجة تستاهل حــوالي تحـييـها و كونك أقوى من المغريات اللي قدامو
و أكــــيد كيــما قالــولك الـــدعاء و ربـــي كـــريم كوني واثــقـة
و نأكدلك راح ندعيلك ربي يفرج همك و يهدي زوجك سبحان من اذا قال للشيء كن فيكون
ربـــي مــــعاك أخـــتي

[طيب القلب]

الله يهديه نحن في زمن الفتن قطع الليل المظلم يصبح الرجل مؤمنا ويمسي كافرا هذه الفتن لا تترك عابدا زاهدا ولا شاب نشأ في طاعة الله ولا زوج و أب أولاد ورع وتقي حاولي أن تقفي مع زوجك في محنته واصبري عليه ذكريه بخطورة مايفعله واصبري عليه و إن شاء الله وحدة وحدة يرجع لجادة الصواب وفي الأخير نسأل أن يلهمنا رشاد أمر نا ونعوذ بالله من شرور أنفسنا

[نيروز الجزائرية]

ساطلب منك شيئ ممكن هو صعب مقارناة مع خداعه لك وهو ان تعامليه بالحسنى وان تقومي بواجباتك ولا تتجادلي معه في الموضوع خليه على اساس انت ما فقتيلوش معنيلو قوليلو تقدر تعيش بلا بيا قوليلو انت كل حاجة في حياتي انت تعرفي كيفاش تعبري خليه يخمم في الطريق اللي راهو يمشي فيه حسب راي هده نزوة وجايزة عليك بالصبر ومتخميش في ابغض الحلال واحنا ندعيو في ظهر الغيب ربي يهديه ومرة على مرة قولينا الجديد ديالك خلينا اخبارك راهو يكتشف ويجي النهار ويمل

[محمد جديدي التبسي]

أختي نصيحتي لك ان تتقربي منه وتجعليه يحس بقيمته عندك ويشعر بخطئو
كما يمكنك وضع دروس ومحاضرات في سطح المكتب في الجهاز تبيّن خطر الانترنت والخيانة الزوجية وأكثري من الدعاء أن يهديه وأبعدي عنك فكرة الطلاق الآن فلديكم ابنة تحتاج لكما مجتمعين .. ربي يهديه ويوفقكم لما فيه الخير

[آمال شعب]

يا أختي كان الله في عونك لكن اقتراحي هو ان تحملي برنامج anti-porn او safety filter وتضعي
رابط الموقع الفايسبوك ضمن المواقع الممنوعة

[***nina***]

واش نقولك ربي يلهمك الصبر وحاولي تلقاي حل سلمي لهدا المشكل مثلا اهدري معاه في هدا الموضوع و حاولي تقنعيه

[انانيس]

ربي يهديه ان شاء الله فعلا مشكل يعاني منه الكثيرون للاسف هذا ماجنيناه من وسائل الاتصال وخاصة اقصد النوع الذي يستخدمها في جانبها السلبي ماعليك اختاه الا ان تدعي الله حاولي كسبه من جديد من خلال الكلمة الطيبة والتصرف الحسن كذلك تزيني له ليرق قلبه وتاكدي اخختاه انه سيعود لان ذلك النوع من الفتيات لن يجد معهن طعم السعادة .

[أبو معاذ محمد رضا]

لعلك تستعينين بهذه النصائح:
http://men360.net/2012/03/11/%D9%83%D9%8A%D9%81-%D8%AA%D8%AA%D8%AE%D9%84%D8%B5-%D9%85%D9%86-%D8%A7%D9%84%D8%A5%D8%AF%D9%85%D8%A7%D9%86-%D8%B9%D9%84%D9%89-%D9%81%D9%8A%D8%B3-%D8%A8%D9%88%D9%83/
وهذه
http://www.traidnt.net/vb/traidnt1760200/

[sengra]

السلا م عليكم
من المفروض أنه انسان متزوج و ملتزم يحترم هذا العقد الغليظ و لا يتيه في الانترنت و الفيس بوك و غيره.ليبحث عن شيء مفقود
أنصحك بالتفكير عن الشيء الذي يبحث عنه و لم يجده عندك وجده عندهن رغم ان هذا ليس عذر يجعله يهدم الرابطة الزوجية و يقع في الممنوعات.
لا تقدمي و لاتفكري في الطلاق نهائيا سواء كانت هناك بنت أو لا.بعد ان تجربي كل الوسائل المتاحة المباشرة و غير المباشرة بالتلميح او التذكير بما كان عليه من الالتزام و ان لم يفهم فصارحيه في جلسة هادئة.
ادعوا الله لكما و لنا بالهداية و الفرج
شكراااااا

[chic.lady]

أبغض الحلال الطلاق
و ماشي عند أي مشكلة نروحو نجرو للطلاق
حاولي تلفتي انتباهو و لهيه على النت، مثلا اقترحي عليه تخرجو أو تزورو العائلة أو أي شيء يلهيه على الانترنت
و حاولي تجنب المشاكل قدر المستطاع
و ربي معاك ختي

[يااارا]

الله يهديه و يرجعو لعقلو و ما تظلموش النساء مهمش قاع كيف كيف ربي يهدي نساء الظالات و يهدي الرجال اللي خلاوهم يولو هاك

[mostariyaya]

الحقيقة أن الغلطة غلطتكي فالرجل يحب ان تهتم به زوجته في كل الاوقات فاذا أهملته بحث عما يعوضه من حب وحنان نصيحتي حاولي أن تجذبيه أليك بكل الطرق والوسائل ولا تهدمي بيتك بيدك ارجو ان تأخذي بنصيحتي والله الموفق

[radouche]

المشكل صعب جدا وانا ضد راى الشخص اللى قال انا الغلطة منك نتيجة لاهمالك كاين رجال حتا لو كنت انيقة وحنونة 24ساعة الا ما يحب يشوف البرا والفيسبوك عدو كبير يعنى انت ماكش رايح تنافس فتاة واحدة بالعكش شلة كاملة وعلى كل نوع لان باب النت واسع ... ومافيش حدود ولا اخلاق ربى يعيينك مشكل صعب جدا نشاء الله يهديه ربى .........................

[mostariyaya]

;والله كل له رأي مع او ضد والله الموفق:confused:

[hope987]

السلام عليكم و رحمة الله
سيدتي المحترمة أقترح عليك أن تصارحيه بالأمر و تضعي النقاط على الحروف ... مثل هكذا مخالفات تستحق الردع و ليس التظاهر بعدم المعرفة.. في هذه اللحظات هذا الشخص غارق في العسل يجب عليك ان تتحركي “الآن”و قبل فوات الأوان
سيحاول تبرير أفعاله بالكذب لا تستلمي وذكريه بوضعه العائلي و بأولاده و مصطلحات الحشمة و ما يشابهه من مصطلحات
و كان الله في عونك

[kimotechgirl]

لاتفكري لا في الطلاق ولا هم يحزنون

[ميمنة الجزائر]

الله يهديه وانتي ادعي ربي انو يولي للطريق

خليه يقعد معاك خاصة كي يعود الشيخ محمد حسان او المشايخ في التلفاز او حطيلو لايك للمشايخ في صفحتو

وربي يهديه وانتي بالاكي تفرطي في زوجك يعني طيشتي عايلتك علجالو ودركا حابة تخليه وين تروحي وبنتك

فكري مليح وديري ربي في قلبك هو الفرج ولربما هي محنة حتى تشوفي روحك وربي يهدي زوجك ياااارب ويصلح حالو وحال الازواج تاع

دركا الا من رحم ربك

[مشكلتي]

آسفة لكنكم اغلقتم الموضوع قبل ردي مع العلم انه لم يكن مغلق عندما فتحته

راني حابة نعاون الاخت الفاضلة و نقول رايي لأنه و بكــــــــــل صراحة ردود البعض بتشجيعها على الطلاق امر خاطئ

ففي الاخير زوجها مريض بالادمان و لكل مرض حل..........




السلام عليكم أختي العزيزة:

موضوعك مشكلة حقيقية ......كبيرة ....صح
لكن ........................لازملك تتخدي التدابير اللازمة و بسرعة قبل ما تكبر اكثر.....
انا ايضا أؤيد حل المواجهة الآلآلآلآلآلآلآلآلآلآلآلآلآلآلآن ....قبل فوات الألألألألألألألألألألألألألألألألألألأوان
أختي العزيزة كيما شفتي كاين آراء حكيمة للغاية كتبوها الأعضاء بارك الله فيهم ..................

1- حاولي انت تلهيه على الانترنت شيئا فشيئا......مرة ناديه يشرب قهيوة ........مرة قوليلو كاين فيلم شباب ارواح نتفرجو.......مرة يلا نروحو شوي نحوسو.........مرة يلا معايا حابة نشري كذا .......المهم حاولي تبعديه قدر المستطاع على الانترنت......لكن حذاري تكرهيه لاثاني يولي يخرج برا للسيبار و يولي معظم وقتو برا......المهم حاولي دايمن تبعديه علي الانترنت حتى و لو رفض طلباتك هذاك احسن على الاقل تستشهدي بهذي الاحداث مرة اخرى...

2- إذا شفتيه ينافيقي في الفيسبوك احكميه وحاولي تفهميه انو كل وقتو على الفيس بوك علاش ماشي معاك ولا في حاجة مفيدة
3- واجهيه بالحقيقة و انك شفتي وش كاين في صفحتو و ديري روحك زعفانة بزاف و ابكي و قوليلو راكي متفاجئة بزاف فيه و انك كنت دايراتو واحد راكز .....و مكلاه باش نقولك ( اعمليه دراما قد ما تقدري و اهدري هدرة مقيوسة ما تسبيهش و لكن اعملي روحك مصدومة للغاية .....)
4- خبريه انو مريض بالأدمان على الفيسبوك وانو عندو حل و احكيلو ان البقاء قدام الانترنت يخليه غايب على العالم الواقعي ...مثلا ما تخبريهش على كاش وقائع ( مهمة لكن ماشي مصيرية) و احكيهملو بعد زمان ....و الا قالك علاش معلاباليش استشهديلو بانك حذرتيه من الانترنت و انها خلاتو يكون غايب على الاحداث .....و تذكري ان تراكم الاحداث و تراكم الوقائع اللي تصرى بلى ما بعرف و تراكم قولك ليه انو اصبح غايب على العالم الواقعي مع ضحكات استهزاء صغيرة منك عليه .....تجعلك تلعبين بأفكارو و يصدقك بسهولة.....
5- اعملي بنصائح الأخ اللي نزل روابط نتاع كيف تتخلص من الادمان على الفيسبوك .....يعطيه الصحة....حقا فيها فائدة كبيرة.......
6- ماتنسايش كل مرة ديري قاطو مليح اكلة محببة ليه .... لطفي الجو باش يعرف قيمة الإجتماع مع العايلة
7- راكي عارفة كي ما ينفع والو واجهيه مواجهة ثانية و قوليلو يحشم شوي لوكان يعرفو الناس رايحين يديروه ضحك و ان هذوك اللي على الفيسبوك مراهم اكثرهم الا مراهقين ومراهقات ......و راهم يفوتو في الوقت بيه لا غير ...


والا مانفع والـــــــــــــــــــــــــــــــو يا الاخت الفاضلة انا نقول :

و الله اعلم اذا كانت فكرة مليحة لأنه و بكل صراحة فيها نوع من الخداع

افتحي صفحة على الفيس بوك و إلا صفحات باش تكون العملية مليحةو ناجحة و ديري هجـــــــــــــوم كـــــــــــاسح على صفحتو و فسديهالو و ديريه تمسخير لكن بلا ما يعرف انك زوجتو طبعا يعني ديري روحك وحدة اخرى او حتى واحد......
وخليه يكره الفيس بوك هو و ناسو.......

ربي يعينك و يهديه ......لا اعتقد ان الطلاق فكرة سديدة

ادعي ربي في صلاتك سبحانو ما يردش عبادو...

الا كاش ما خرجتي بنتيجة ما تنسايش تخبرينا سلالالالالالالالالالالالالالام