نصائحكم تهمني

[مشكلتي]

السلام عليكم
سأكون جد صريحة معكم لأني و الله بحاجة ماسة إلى النصيحة
أنا كنت مخطوبة لمدة عاميعني ماكاش حاجة رسمية أهل خطيبي جاو لعندنا شافوني و تفاهمنا هاد الربيع نديرو العقد الشرعي ,
لما لحق الربيع قلت لخطيبي قالي مانيش مقتنع بفكرة الزواج و راهي تبانلي تسرعت و راني حاب نحبس
المشكل أنو هادا الشخص كانت بيننا علاقة قبل الخطبة دامت 3 سنوات و بالرغم من كل هاذا تقبلت هاد القرار وقتلو ربي يسهل عليك لأني و الله مالقيت واش نقلوو طلبت منو هو يخبر دارهم و الوالد التاعي هكدا باش منزيدوش نضيعو الوقت
لكن هو ماقالش لدارهم و معيطش للوالد التاعي و مازال يعيطلي يعني و الله غير راه محيرني
أنا قلت لدارنا بأن الخطبة إنتهت و نحيتو من بالي و لم أعتب عليه أبدا هو حر .
البارح عيطتلي الوالدة التاعو تحكي معايا و تسقسي على حوالي .و قاتلي كي يكتب المكتوب رانا نجو نديرو الواجب .
أنا محبيتش نقلها راني حابة هو يقلهم
عيطتلو و قتلو ماماك عيطتلي و علاه متقلهمش قالي مازال مديتش القرار إذا نكمل معاك و لا نحبس
أرجوكم كيفاش نتصرف معاه راه حاسبني لعبة و قت مايحب يحبس و قت مايحب يكمل و الله غير كرهت

[°•°• همس الخواطر •°•°]

هههههههههه خطيبك لا يرد التوقف و لا هم يحزنون
خطيبك كل ما يريده هو ان يحسسك بأنك من الممكن أن تفقديه في أي لحظة و بما أنه خطبك لا يعني انه لا يمكن أن يتركك
و الدليل أنه مازال يتصل مثل السابق و لم يخبر أهله

[zeyar zeyar]

معناها راكي تستني في الرحمة نتاعه يا اختي الله ينعل الشيطان هذا الانسان يفتقر لمعاني الرجولة وين راهي الكلمة وين راه الوعد الرجل بالكلمة... انت غلطتي بهذه العلاقة ربي يسامحك ولا اريد ان اعطيك نصائح تربوية لاني سوف لا انتهي ....وسوف يألمني راسي .......من الموضوع...... غادي نكمل الموضوع برك ........هناك نوع من الرجال يؤخد من عاطفة المرأة نقطة ضعف هو يعلم انكي متعلقة بيه وتحبيه واعتدت وجوده في حياتك مدة 3 سنوات مشي ساهلة بدلا من ان يكون فحل قابلك بموضوع التردد ومازال يقول بكل وقاحة مزال متردد مازال مداش القرار ...معناها انت راكي تستني في الرحمة نتاعه ...اين انت من الموضوع يا اخت اين كرامتك ........اين كبرياءك لماذا تجعل بعض البنات انفسهن رهن اشارة اصدقاء باسم العاطفة ...اليوم راه متردد وغدوة لو تزوجتوا كيفاه تكون الحياة مع هذا النوع من الرجال ........روحي يا اختي لمي روحك قبل فواة الاوان استرجعي كرامتك وغيري رقمك وحتى لو اراد الصلح امتنعي عنه وتوبي الى ربك يا مخلوقة ونستري وادعي ربي يعوضك خير منه هذه نصيحة اخوك ........

[sali-sali]

حاولي تحكي معاه مليح وتتفاهمو على اخر حل..خير من هدا اللعب و الحيرة لي راه حاطك فيهم
ولانقولك ماترديشعليه كي يعيطلك....ادا باغيك يجي يكمل ي داركم و يخطبك نيشان

ربي يسهل اختي

[* الحلم سكر *]

لا اله الا الله ...
اختي طلبت نصيحة مانيش حابة نافقك حرت فيك اكثر منو ...واش معناتها قالك نحبسو قلتيلو بكل سهولة ربي يسهل ؟؟؟؟؟؟؟؟؟؟؟؟ و حاب يرجع تستني و تقولي ربي يسهل؟؟؟؟؟؟؟؟؟؟؟؟؟
انـــتي ويـــــــن ؟؟؟؟؟؟؟؟؟؟؟؟؟؟؟؟؟؟
اذا تزوجتو وقالك نهار ندمت حاب نرجعك ثاني راح تقوليلو حاضر و ربي يسهل ؟؟

5 سنين و مازال يخمم و ماشو مقتنع بالزواج علاه راه معاك و والدتو ربي يهديها تقولك كي يكتب المكتوب تسمي استني حتى يفرج ربي و يتكرمو عليك بخطبة رسمي

اذا مشكلتك شكون يقول كونك هانية لا انتي راح تقوليلهم لا هو ... حتى يخمم السيد مليح و يقرر بالاك يكمل معاك و يـحـن عليك بخطوة رسمي و بالاك يلق لي تقنعو بالزواج بين ليلة و نهار يكون خاطب و هو زارب على الزواج بالك حتى العرس يديرو في 5 ايام ماشي 5 سنين

ان شاء الله تكون واصلاتك الفكرة ........
فيقي لروحك و خمي بعقلك و ربي معاك

[salsila]

اختي اهدري معاه في المفيد وحدوا موعد العرس وليس فقط العقد الشرعي علاه مادامو اهدر هادي الهدرة قادرين ديرو العقد الشرعي ومبعد يفسخو وانا لوكان جيت فالبلاصتك نحكي لماما واش قالي واش راهو صاري وهي تقول لبابا والرجال يفكو هاد المشكل يايحددو موعد العرس وتكون كلمت الرجال ولاكل واحد ربي يسهلو
انا هادا راي ولوكان كنت مكانك هكدا ندير
ربي يسهلك

[تصفية وتربية]

قد يكون كلامي فيه بعض القسوة، لكن أوقات القسوة تأتي بثمارها
أولاً الخطأ كان من الأساس من ناحية العلاقة غير الشرعية التي كانت بينكما، ومعلوم لدى الخاص والعام أن الحرام لا يُثمر أبدًا ولا يأتي بنتائِج طيِّبة، فما بُنِيَ على باطل فهو باطل.
ثم لم ينتهِ الأمر عند هذه المخالفة بل أضفتم مخالفة شرعية أخرى وهي حديثكِ معه قبل العقد الشرعي، والمعلوم أن الخاطب أجنبي عن مخطوبته ولا يجوز له الكلام معها ولا الخلوة بها.
طول الفترة أدّى إلى اعتياد بعضكما على بعض وهذا ما أدّى إلى الفتور في العلاقة، والرجل معلوم عنه أن يمل بسرعة، وخصوصًا إن كان الأمر من غير ضوابط شرعية فهذا يُغذّي الملل أكثر فأكثر.
فالذي أنصحكِ به هو أن ترفعي الأمر إلى وليّ أمركِ وتتركيه يتصرّف مع هذا الشاب، لا تُكلميه أنتِ بل الواجب أن يُكلمه والدكِ ويسأله إن كان جادًا فليتقدم وإن تراجع عن قراره فليُعلنها صراحة. ولا تستمري في الذنب والخطأ الذي أنتِ عليه الآن.
إذا تم العقد بينكما فحينها كلميه أما الآن فهو أجنبي ..

والله الموفق

[محمد جديدي التبسي]

ما دامك مسبلة في روحك سبلي في التليفون وما تهدريش معاه لوجه الله وخلي إذا كان راجل يحلها .. ربي يفتح عليكم

[minamer]

السلام عليكم
ختي انا نقولك ما تخليهش يلعب بيك و انتي تاني زيري الحالة شوية لازم التمسخير اللي كان من قبل كامل تقطعيه
كان راو حابك تع الصح و ناويك يكمل واش بدا و الرزق على ربي سبحانه
و ايلا ماهوش مديسيدي كيما راو يقول اخطيه و خليه يديسيدي وحدوا و كي يخسرك تما يعرف ربي .
و انتي شوفي مكتويك من جهة اخرى بالاك ربي راو كاتبلك ما خير .
الزواج ماشي لعب و تمسخير و راو حاب يسييك و ...................................

ديري شوية لعقل و نحي les sentiments.على خاطر ما تطفر غير فيك .
خممي مليح ختي و ربي معاك .

[hyoucef32]

توفقي عن الرد عليه حتى يعتذر أو يقرر فسخ الخطبة رسميا وهذا افضل للجميع

[السلفية الجزائرية]

أختي قبل كل شيئ ...بادري بالتوبة من علاقة غير شرعية دامت خمس سنوات وما تعانيه ببساطة هو الجزاء من جنس العمل
و تضرعي لله عز وجل أن يفكّك مما أنت فيه ......ودع الأمور لوليّ أمرك يحلها الآن وأنصحك أختي بالتوقف عن مكالمة خطيبك فهو لحد الآن أجنبي عنك بأتم معنى الكلمة

[ايمان نور الجزائر]

وماذا يحسب نفسه؟؟ متى يريد يتزوج ومتى يرغب يترك
؟؟
عملتي مليح كي نحيتيه من بالك لانه شخص يتصرف بقلة مسؤولية
عليكي اخبارك والدك ووالدتك بما قال لك....بالحرف
وعليه عائلته لازم تعلم وتوقفو الخطوبة

[الدر المكنون]

اسمحيلي على كلامي لكن هذا ماشي راجل حاسب بنات الناس لعب هو ماشي اخ ماشي عم خال اب

افريها معاه وكللي باباك يحط النقاط على الحروف 5 سنين اللي دارت ماستر راهي كملت ولي زوجت جابت 3ولا 4 اولاد ولي دارت الطب على مشارف التخرج وخلي وخلي ..........

وانت مزالت تستناي في واحد بيبي يتخذ قرارو وواش من قرار رهو يراوغ باش يليكيديك وحابك انت لي تفسخي باش العيب يكون منك هكذا كيفاش يديرو اشباه الرجال اتعاملي مع الموقف بصرامة واخطيك من الرحمة والشفقة هذا اللي خلاه يشوف روحو عليك ( اللي خلقو خلق غيرو واذا مزوجتيش اختي ماركيش رايحة تموتي ))

اخيرا الغلطة منك انت اللي خليتيه يعرف نقاط الضعف انتاعك وكثرة المكالمات لي وصلاتك لهذا الشئ ما بني على باطل فهو باطل

توبي الى الله

[انغام المنى]

الله لا يردو اتحسبي عليه برك هذا يتمصخر ماشي راجل حاط بنات الناس لعبة

[faty05]

خبري والديك في الحين ووقوليلهم بالحرف وش رآه يقولك
ووالدك لازم يتصل بخطيبك ووالده و يجتمع بيهم
خليها عل الرجال اشوفي كيفاه يفروها
و نتي ما تزيديش تحكي معاه حتى يبركا من اللعب تاعو و يجعل كل شئ رسمي بينكم

[dahmane42]

ربي اسهل اعليه كما كاين الرجال كاين لبنات ربي ايجيبلك اوليد لحلال هذا باين كان شاد يدو بيك ايجيب الوقت

[chic.lady]

لازم توضعو النقاط على الحروف
اهدري معاه مليح إذا كان حاب يكمل اللهم بارك و إلا الله يسهل عليه و انت ربي يجيبلك ما خير منو
ملاحظة: أكره هذا النوع من الرجال :(

[mostariyaya]

نصيحتي أن تضعي النقاط على الحروف فالعمر يمضي

[kimotechgirl]

راك انت مجنونة شوفي انت تحبي تحبسي ولا تكملي وديري واش تحبي خطيبك اصلا باين فيه عيل سيس

[أكوام الورد]

خممي مليح أختي هادا غادي يولي زوجك و يولي جزء من حياتك يلا دروك راه يلعب بيك غدوة آسم يدير ديري العز على روحك و وقفيه عند حده
أسمحيلي أختي على كلامي غادي نفتح قوس نتمني قاع البنات يستافدو منه العلاقة نتاع 3 سنين هي اللي وصلتك لهاد الموقف لوكان ملول كي شافك و عجبتيه جا لداركم و خطبك ما يوصلش يذلك بهاد الطريقة بصح ما عليش مازال مافات الحال صلحي غلطتك ليوم قبل غدوة ربي يوفقك و يجيب مافيه خير ليك

[marazf]

wellah dowekhtini khouna mazal ykhamem lakane yetkarem w yedik wela la katar khirou
fi had 5 snine wech kan ydir
ana ngolek matzidich tahki m3ah bnat elnas mahomch le3ba
wkhalih yhelha howa lakan fhal
hafdi 3la karamtek w karamat ahlek
salam

[سهيلة2013]

يا اختي نقولك هاد الدنيا فيها واه ولا لا راه باغيك مايهدرش هاد الهدرة 05 سنين ضيعتيها معاه مشي يجي دورك يقولك راني متردد وقوليله ادا مراهش باغيك مايعيطلكش وادا منهاش هو هد الامر هديده باه انت لي تخبري هنا تعرفي ادا راه باغيك ولا لا
معرفتش الرجال تاع دورك تخمام تاعهم وين

[نبيلة المهبولة]

اختي سامحيني لازم نحط هدا الموضوع هنا موضوع الانشاء محبش ينشالي موضوع سااعدوني لازم نحط مشكلتي

[نبيلة المهبولة]

سلام اخواتي راني في مشكل راني قريب نهبل نحوس نسمن ومعرفتش كيفاش ندير لينشريها لازم نقص فيها انا عندي17سنة ولطاي نتاعي 40كيلو كل وحدة واش تقلي قالولي سيرو هيبتاجين ينسي خفت لنشربو وقالولي اشربي لكاشيات ماما محبتش وانا لحلبة عفتها مقدرتش نشربها واش هو الحل لازم تمدولي وصفات اخيى وهل الكاشيات غير مضرة راني انتظر

[السيدة كرمين]

قلتي كنت مخطوبة سأفترض أن الخطوبة انتهت من جانبك فالأفضل
أن تقطعي اي نوع من الاتصال به وبعائلته والا خلي والدك يتصل بيهم ويبلغهم
بكل ضراحة أن ابنهم غير جاهز لتحمل المسؤولية فمزال في مرحلة التفكير

أما انتي يكفي ما قاله الأعضاء الخطأ خطئك وحدك فقط
احفظي كرامتك على الأقل بينك وبين نفسك