مشكلتي

[مشكلتي]

السلام عليكم
افهمو حالتي و نصحوني

صراحة واش ريحا نهدر يعتبر فضفضة اكثر من انها مشكلة نتمنى من المشرفين ينشروها
تخرجت من الجامعة في 2006 و عانيت البطالة حتى ان العمل في اطار ادماج متحصلتشعليه بالسهولة كما غيري اقصيت كم من مرة بدون وجه حق و بسيف باش تحصلت عليه في 2009و ملي دخلت نخدم و انا نخدم بنيتي و الله نخدم اكثر و احسن من الموظفين العادين و منضبطة اكثر من الكل بشهادت الجميع حتى المهبول لي فالطرق يشهدلي بهذا وهذا كلو ماشي لغاية في نفسي بل خوف من الله
المهم طول فترة لي خدمت فيها ولا مرة الادارة دارت مسابقة ومرة طلبت منهم باش يجيبلنا مناصب لاكن كلي كنت نتكلم مع الحيد ماشي مع لعبادوطول هذي الفترة وانا ندير في المسابقات دون ملل وديما نقول ذوك يفرج ربي و يعوضني على نيتي الصادقة في كلش رغم انو الكل يقلولي بلي عقليتي هذا متليقش مع الوقت لي رنا عيشين فيه و بلي يجي يوم منعرف هذي الحقيقة المرة وبلي المثالية لي عيشا بيها متصلحش و في عام 2012 جابو وين نخدم منصب 1 ب السنة 2 جامعي و 1 بالباك محبيتش نشار فيهم خاطر حبا نخدم بليسانس و الكل ضغطو عليا و نصحوني باش منضيعش الفرصة و في الاحير شاركت في 2
نجحت في تاع الباك رغم اني كنت مرشحة باش ننجح في تاع 2 جامعي ومهبيتش نطعن خاطر داه طفل قلت معليش هو طفل لاكن والله مافرت بهذا النجاحبصح تخيلو واش سرى بعد 3 اشهر من نجاحي برك المؤسسة وين نخدم طلبوا كثر من 20 منصب 7 مناصب بمستوى جامعي كي سمعت حسيت بلي راني مخنوقة و ريحا ننفجر تخيلو كيفاش كان موقفي كرهت روحي و كرهت حياتي و كرهت وين نخدم و كرهت لعباد
ممكن ميخليونيش نشارك في هذي المسابقة و ممكن حتى لو شاركت ريحين مينجحونيش بسبة اني عندي منصب و غيري معندوش
بصح لوكان مشركتش في المسابقة لي فاتت كنت ريحا ننجح مليون بالمئة خاطر معدلي 13 و تخرجت في 2006 و عندي خبرة حولي 4 سنوات و نصف
ثم عرفت بلي لي يمشي بالحيلة و خبث هو صح لي يقدر يعيش مع هذو لعباد و لي يمشي بالنية ديما هو خاسر
كي تقراو واش كتبت متقروهاش على اساس لي كتبتها طفلة اقروها على اساس انكم انتم لي سرات معكم هذا
يا ترى واش ريحين يكون موقفكم ارجوكم افهموني قبل و ثاني انصحوني ودعيولي باش ربي يريح بالي
انتم في مكاني واش ديرو واش ريح يكون شعوركم

[*نآدرة~]

أختي ربي يكون معاك،قصتك قاستني بزاف والله العظيم قريب بكاتني،حست بلي انت صح انسانة تمشي بنيتها،شوفي بلاك تحسي بالنقص ولا تقنطي وتيأسي هذا مكتوب عليك ومقدر هكذا ربي دارلك ولازم ترضاي بقدره،صدقيني أكيد فيها خير واش راه يصرالك ممكن هاذو المناصب توع الجامعة لا زم يدفعو فيهم رشوة ولا حرام بالصح ربي بغاك تتحصلي على منصب نقي وشريف بلا ما ديري حتى حاجة حرام
لي نوصيك عليها بقاي هكذا معليش يقولو عليك نية ومايقولوش خداعة وحيلية،ربي خير يا اختي اصبري واحتسبي،واذا عندك حق باش تشاركي في هذو المسابقات شاركي وماتترديش بلاك يكون منصب من بيناتهم من نصيبك
ربي يوفقك يااختي والله راني ندعيلك من قلبي
تفرج أكيد انت اصبري برك ورضاي
والله يعطيك على قد نيتك ويرزقك من حيث لا تحتسبين
تحية لقلبك الذي مازال طاهرا رغم تلوث المجتمع

[محمد جديدي التبسي]

الإنسان لا يقول لو أني فعلت كذا كان كذا فإنه يفتح بابا للشيطان.
قال رسول الله صلى الله عليه وسلم:"المؤمن القوي خير وأحب إلى الله من المؤمن الضعيف . وفي كل خير . احرص على ما ينفعك واستعن بالله . ولا تعجز . وإن أصابك شيء فلا تقل : لو أني فعلت كان كذا وكذا . ولكن قل : قدر الله . وما شاء فعل . فإن لوتفتح عمل الشيطان" رواه مسلم
ثم انظري في حال من هم دونك بلا عمل والبطالة والمعاناة تنهش فيهم واحمدي الله
لا أدري مدى حاجتك للعمل، لكن في نهاية الأمر ستجدين من يعولك لكن ماذا يقول شاب في الثلاثين وربما أكثر -بلا زواج- ولم يحظى بمنصب عمل
في هذا السياق أذكر أحد الأصدقاء تخرج في 2006 وعمل في التعليم كمستخلف لسنوات ولم ينجح في أي من مسابقات التوظيف وكان يشارك في مسابقات دون مستواه وفي الأخير نجح في إحداها في 2011بمستوى باكلوريا وهاهو الآن يعمل ولا يتوانى في المشاركة في كل مسابقة يجدها تناسب شهادته الجامعية ... اصبري ولا تعجزي واشكري الله وربي يرزقنا وإياكم من واسع فضله ..

[ranou gigi]

يا اختي يا حبيبتي لا تكسري راسك لا والوا قلت انك نحجت بالباك احمدي ربي و اخدمي بنيتك و ربي موجود و عمروا ماراح اريحالك حقك
و نهار الي تسمعي بالمسابقات على اساس الشهادة روحي و شاركي بالليسانس مكانش حتى مشكل و انشاء تنجحي و تحكمي منصب يليق بيك
شوفي انا معاك عادي عند ليسانس و ماستار و لكن نجحت في مسابقة ب 2 جامعي و نقول الحمد لله لانه ربي كتبلي هذه الخدمة و انا راضية بها المهم لقمة الحلال
ماتفقدبش الامل و انشاء الله ربي راح يعطيك واش تتمني
بالتوفيق اختي

[zeyar zeyar]

مازال الحال اختي لما هذا التشاؤم ...فوتي المسابقات والمنصب لي راكي فيه الان يدخل في الخبرة المهنية ما حدث معك ربما سيزيد من عيزيمتك

[abdel02]

كنصيحة من أخ...
ولكي تقر نفسك بماكتبه الله لكي
شوفي لمن هو أدني منك...
وماتشوفيش للي هو خير منك.
والدنيا سويعات وستنقضي...
والله خلقنا للعمل لدار الأخرة
وفقط...أما مانقوم به نحن من
عمل دنيوي وبناءات وسيارات
ووثائق وتجارات ماهي إلا ألعاب صغار "عشة".

[محمد1482]

لا تنسي قوله سبحانه و تعالى و"عسى ان تحبو شيئ و هو شر لكم و عسى ان تكرهو شيئ و هو خير لكم"
كاين غير بزاف الى راهم يتمناو المكان الى راكي فيه انت

[الجليس الصلح]

العمل ومناصب العمل صارت صعبة جدا لكثرة روادها الكل يسعى للظفر بمنصب عمل يفتح لها أبواب السعادة
المهم أختي الكريمة لا تفكري فيما فات وشاركي فيما هو أت من مسابقات تستريحي فيها
موفقة باذن الله

[AMINA.Z]

مكتوب ربي يا اختي
و اذا حابا تزيدي تنجحي اتوكلي على ربي و زيدي اخدمي و اتعبي
حاجة ماتجي بالساهل

ربي يقدرك و يعينك

[الدر المكنون]

ي يمشي بالنية ديما هو خاسر


العكس تماما


كاين حاجة اسها قضاء وقدر والمؤمن بحق هو اللي يرضى بمكتوبو هاذو لعباد ماهم الا وسائل سخرهم ربي

انت قولي الحمد لله

[رعد السحاب]

الله يفتح عليك أخي
هذه المشاكل تهدد الشباب كل يوم

[sarl02]

احمدي ربي لانك راكي على الاقل حصلتي على منصب عمل قار ودائم ولو لم يكن يحقق طموحاتك ..وعندك الحق في مسابقات توظيف اخرى تتوافق مع شهادتك ..يا اختي انت محظوظة مقارنة بالالاف خريجي الجامعات وانا شخصيا كنت في لجنة انتقاء في احدى المسابقات على اساس الشهادة والله قابلت شباب ورجال متخرجون من 2001 و 2002 ولم يحصلو على اي فرصة لحد الان ..مالا ارضاي بما كتبه الله لك واسعاي في نفس الوقت لتحسين وضعيتك ووفقك الله.

[موح الحراشي]

قاعدة ،لي يمشي بالنية يربح،خاطر لي يخطط للكون هو رب العباد،و معندوش معريفة ولا بيستون،ولخير ما اختاره الله،
لي فاتك بتلك المناصب قضيتها دنانير معدودة فالخلاص بيناتكم،والمال حاجة نسبية،علاه متقوليش لي راهم يبكو على منصب كيما تاعك،و بالاك عندهم مؤهلات كثر منك،مهندسين و واكثر يخدمو فالتجارة و بطلو يستناو فالدولة الخ،اصربي دورة للسبيطارات و شوفي الناس تعاني،لا منصب لا والو،ترجعي تجري و تقولي الحمد لله،ربي يشفي المرضى و يقنعنا