مخبز يابس

[nnaima]

من فضلكم الي عندها خبرة بالمخبز تخبرني انا اليوم درت مخبز وخرجلي يابس كي الحجر مع اني اتبعت الوصفة بالحرف الواحد
راه حشمني :sdf::sdf::sdf:

[kakinova]

عسليه

دريلو عسل خفيف سخون و اغطسيه فيه شوية و من بعد قطريه و اذا لقيتيه مازال يابس زيدي عسليه

ممكن كثرتي السكر او الفرن كان سخون


او طولتيلو الطبخ

ممكن تقوليلي كيفاش درتيه باه نعرفو الخطأ و المقادير لي استعملتي

[nnaima]

2 كيلة لوز
1 كيلة سكر ناعم
قشور حبة ليمون
4بياض بيض
فانيلا
هده هي الوصفة لكن ماعسلتوش

[kakinova]

شوفي اختي

السكر بزاف

انا نكره المخبز الحلو بزاف لانك رح تزيدي ديريلو القلاساج حلو

المفروض ديري 3 كيلات بكيلة ماش معمرة سكر باه ما يجيكش يابس

انا نستعمل 3 كيلات مع 4 مغارف فقط سكر

و ثاني حاجة انك ما استعملتيش الزبدة و الزبدة تخلي المخبز طري

و انا نستعمل البيضة كاملة الصفار فيه نسبة من الدسم يخلي القاطو اطرى

شوفي اختي نعطيك وصفتي جربي شوية اذا عجباتك اعملي كمية كبيرة

نصف كغ لوز او كوكاو مرحي رقيق
2 مغارف كبار مش معمرين بزاف زبدة ذائبة
ملعقة صغيرة زاست ليمون
ملعقة عصير ليمون
ملعقة ماء زهر
رشة خميرة الحلوى
و البيض حتى تتجمع ممكن بيضة واحدة تكفي

خلطي البيضة مع الزاست و ملعقة القارص و ملعقة ماء الزهر و الزبدة الذائبة خلطيهم مليح ثم شيحي باللوز او الكوكاو لازم العجينة تكون طرية

خليها ساعة غطيها و خليها رح تتماسك مليح

حليها و شكليها كيما تحبي و اطبعي

و حطيها في صينية مرشوشة فرينة و خليها ربع ساعة و شعلي الفرن 150° حتى يسخن و دخليها للرف الفوقاني حتى يتغير لونها و تشهاب شوية يعني نشفت

ماشي حتى تنشف بزاف المهم حتى البيض يقيسو الحرارة و يتعقم و تجف شوية

ممكن تزيديلو دقيقة من فوق و خرجيه يبرد مليييييييييح


هاداك المخبز لي جاك يابس

غطسيه فالعسل يطرا و قطريه و ارحيه فالميكسور و خلطي معاه حلوة الترك و قاطو بيمو مرحي و اجمعي بشوية زبدة ذائبة و عسل

اعملي كويرات و من فوق اعملي وردة بعجينة التزييين و خليه ينشف

و المخبز نتاعك لما يبرد مليح اعمليلو قلاساج بالفوندون

في الميكسور خلطي بياض بيض مع قطرات خل و ملعقة ليمون او اثنين و رشة ملح و خلطي ملييييييييييييييييييييييييييح حتى يبيض البياض و دائما فالميكسور ضيفي فنجال ماء زهر و اذا حبيتي عصير ليمون اكثر ضيفي و سكر رطب كل مرة بالشوية حتى تتحصلي على السمك لي تحبيه ضفيلو فنجال او 2 فندون مذوب في حمام مائي و خلطي للمرة الاخير و جربي في حبة اذا كان مليح اخدمي بيه سائل ضيفي سكر قاسي ضيفي ماء زهر او ليمون

[kakinova]

http://www.djelfa.info/vb/showthread.php?t=1087882


شوفي في هاد الرابط تشوفي صور المخبز نتاعي

[nnaima]

اوكي ختي راح نجرب الطريقة تاعك وغدا باذن الله نردلك الخبر وسمحيلي حنونة تعبتك معايا ربي يعطيك ماتتمني

[kakinova]

لا لا لا تعب لا والو

ان شاء الله يعجبك و يحمرلك وجهك

و هداك لي جاك يابس ديري بيه قاطو ما يطيبش ما ترميهش

[nnaima]

شوفي ختي يلا كان عندي غدوة الوقت نخدمهم في زوج ونصورهم ونحطهم تشوفيهم
ربي يحفظك حبيبة

[kakinova]

ان شاء الله

المهم عجينة المخبز نتاعك ما تجريهاش و ما تيبسيهاش بزاف لازم تكون متماسكة و طرية

لانو رح يمتص الكوكاو الزبدة و السوائل و بفعل الحرارة الزبدة تطريه

راني فالانتظار

[لينا11]

2 كيلة لوز
1 كيلة سكر ناعم
قشور حبة ليمون
4بياض بيض
فانيلا
هده هي الوصفة لكن ماعسلتوش

عسولة جاك يابس خاطرش درتي بياض بيض بزاف

هو يستعمل فيه بيضة لا متلمش زيدي صفار برك هو الي يطريهولك :1:

[nnaima]

شوفي حبيبة راني عاودت المخبز اليابس بطريقة البيمو الي قلتيلي عليها وخرج هايل اما المخبز مكانش عندي الوقت اليوم باش نخدمو ونهار نخدمو راني نصورو ونوريهولك المهم نحيتي عليا تبهديلة القاطو اليابس

http://img01.arabsh.com/uploads/image/2013/03/06/0d3e474a6cfa02.jpg
http://img01.arabsh.com/uploads/image/2013/03/06/0d3e474a6cfa0c.jpg