صراع عقلي بين خطيبي و حبيبي

[مشكلتي]

السلام عليكم هده مشكلتي انا شابة مقبلة على الزواج مخطوبة لابن عمتي بعد ان عرض علي الزواج و انا وافقت انتقاما من نفسي نعم فقد كانت تربطني علاقة بشاب و تواعدنا على الزواج لكن ضروف اهله هي التي منعته من خطبتي كانوا يبنوا في دارهم و امه كي قاللها اخطبيلي ما فهماتوش انها مسالة وقت و فقط سكتت و بهدا السكوت هو زعف منها و ما لقى حتى حل يجي يخطبني وحده ما تصلحش و بقينا على هده الحال لمدة و من بعد ما رحلو لدارهم الجديدة انا طلبت منه يجي يخطبني هدر مع امه قالت له اصبر خاطر عنده زوج خاوتو اكبر منه بلا زواج انا زعفت و ما هدرتش معاه في هده الفترة حب ولد عمتي يخطبني فاخبرت حبيبي زعف مني و حسبني نضفط عليه و ما هدرش معايا انا من هداك الزعاف قبلت بولد عمتي و من بعد فترة ندمت و حبيت نحبس لكن ولد عمتي دار المستحيل باش ما نبطلش في هدا الوقت جات ام حبيبي خطبتني و فهمتنا في وضعيتهم انا وليت نتهرب من ولد عمتي و نحاول نبطل باي سبب لكن توسلاته و شفقتي عليه و شوية دارنا خالاوني نشفق عليه و رجعت لولد عمتي و خلاص حبيبي راح و هو يبكي و انا نتمزق و فات الوقت و انا نقول ضرك ننساه و نخمم في المستقبل و درنا الفاتحة و لكن لم انسى حبيبي دائما نقارن بينه و بين خطيبي و كل مرة رانا في مشاكل و نقولو نبطل تقريبا اربعة مرات توصل للتبطال و نولي علاش لان امي تخاف من هدرت الناس اولا و العائلة تولي في جو مكهرب و خطيبي يبعت عمتي تترجى باش نرجع على قراري نولي نتراجع علاجال ماما و العائلة ميش علاجالو هو و انا في داخلي مانيش حابة نرجعلو حابة نبطل قرار نهائي علابالكم في وقت خممت نروح لطبيب نفساني نحكيلو و هو يقرر في بلاصتي عييت و الان راني في صراع كي نبقى وحدي نحب نكون مع حبيبي اللي راه مستعد في اي لحضة يتقدم لي و مرات نخمم اني نخدع في خطيبي لاني نخمم في انسان غيره و خايفة لاكان راني ضالماتو و اكيييييييد خايفة من ربي نتمنى منكم تجاوبوني لكن قبل دلك كل من يقرا يحط روحو في بلاصتي و واش يتصرف

[هدى الجيجلية]

السلام عليكم
اختي
هذا مكتوب ربي
وكل واحد بياخد نصيبه في هذه الدنيا
عزيزتي
كوني مع إبن عمتك
بمجرد التفكير
في حبيبك
يعتبر
خيانة
تضرعي
إلى الله سبحانه
لكي يزيح عنك
هذا التفكير
إن شاء الله ربي
أيفرج همك يارب

[ilosa23]

صل صلاة استخارة عدة مرات
واكثري من هذا الدعاء في السجود
قولــــــــــــــــــــــــــي :
اللهم بصرني بالامر
ولا تنسي ان تقدمي بين يدي الله صدقة في السر
وان شاء الله خير

[اسماء الشريفة]

لا حول ولاقوة الا بالله العظيم
هذه هي اسباب الخيانة وخراب البيوت
حبيبي وخطيبي هل وصلت بكم الدرجة الى هذا المستوى من التحلل والانحلال الاخلاقي الفاضح

[4shabab]

عجيب أمركن، حبيبي وخطيبي
الله يهدينا

[nouna l maghbouna]

اختي هدا حبيبك انا نقولك ماتقدرييش تنسايه هادي impossible
ايلا عدتي كي تبطلي راكي ضامنة بلي حبيبك يولي ليك غير بطلي
لانه راكي رايحة تعيشي في تعاااااسة
ميش انتي المراة الاولى و لا الاخيرة اللي تطلق
و ديري صلاة اسخارة و ماتوهميش روحك بلي تنسايه لانه هدي حاجة مستحيييييلة

[الدر المكنون]

لا حول ولا قوة الا بالله
حبيبي .........................؟

اصبح الزواج لعبة في ايدي .....


الاولى بك ترجعي لطريق ربي وتستغفريه راكي دايرة علاقة غير شرعيييييييييييييييية يعني حرام مع الاول وربي سترك بولد عمتك باش تتهناي من الحرام

وانت مازلت تحكي على حبيبك والله غير حشمت انتاع الصح وانا نكتب فيها

نصيحة كملي مع ولد عمتك وانساي الاول وربي يهنينا ويهنيك

[AKIS]

درتو الفاتحة أي بمعنى جاء الإمام وأقام العقد الشرعي بمعناه أنك صرت زوجة شرعا لإبن عمتك ولا تزالين تنسجين علاقات مع حبيبك القديم
ربي يهديك للحق ويهدينا أجمعين

[نورسين.داية]

السلام عليكم

حبيبي و خطيبي ..........................؟؟؟ .............غريب امرك .............

الضحية الوحيد في الموقف هو الخطيب الفعلي الذي طرق باب منزلك ....صدقيني و أقولها بكل صراحة لا تستحقينه ......ماتوعفيش لكن ضعي نفسك مكانه ..........................لما قبلتي به من الأول ثم تعاملينه بهذه الطريقة

بالنسبة لمشكلتك ................يظهر لي أن تتستخيري و اوقفي مهزلة ....خطيبي و حبيبي

وفقكي الله أختي

[imi02i]

رب يسرلك أمرك
كوني رزينة وفكري بعقلك
متفكريش بقلبك وتخلي العاطفة تسيطر عليك
أنت الآن في موقف جدي جدا ولازم تعرفي الطريق اللي راكي رايحة ليها
بالنسبة لخطيبك جاك بطريقة شرعية وواضحة علاه تحاولي تفسدي على روحك الحال وتدخلي بيناتكم مسلسل تركي
يا أختي من المفروض تعتبري من نتائج العلاقات الغرامية اللي وصلت الى مالا تحمد عقباه وان كانت تنتهي بالزواج فبعده مشاكل كثيرة
انت متأثرة بحبيبك نعم، لكن ليس لدرجة أنك متقدريش تنسايه
حاولي ومتيأسيش من رحمة الله وخلي عنوان مشكلتك صراع وهمي

[lalib40]

عسى ان تكرهو شيئا وهو خير لكم

[mira mira02]

والله قصتك قاسية كثير

[ايمان نور الجزائر]

السلام عليكم
ما مضى يا اخت قد مضى
لا تحتاجين لا الى طبيب نفساني او غيره
حكمي اخلاقك ودينك الاسلامي
انتي في عصمة رجل ...في رقبتك شرفه وعرضه
فكيف تسمحين لنفسك بالتفكير بمثل هذه الطريقة
ابن عمتك...هو حبيبك وخطيبك وسيكون زوجك
اقنعي نفسكي به ....وابعدي الرجل الاخر من فكرك
ما مضى قد مضى

[soumeya_cons]

الحل راهو في يدك تقربي من الله و أكثري من الصلاة و الدعاء و اكيد اللي فيه الخير رايح يجيبو ربي سبحانه

[Algerianomina]

li tehabih lokane toga3di 3joza matansayahech
tabkay dima tkarni rajlek bih
sali salat istikhara w katri menha

[leila ben]

يا أختي الفاضلة ابن عمك جاك من الباب يعني حب الحلال مباشرة ماشي كيما اللي راكي تقولي حبيبك اللي قعد يلف ويدور وكي شافك رايحة تتزوجي حب يدير المستحيل على جالك تصوري تطلقي درك من بعد تستناي حبيبك ومايجيش ولا يبدل رايو مكانش لمان دخلت باش ننصحك نصيحة أخت لأختها وماتديريش اللي درتو أنا تركت الخاطب اللي تحلم بيه أي بنت على جال شخص أوهمني أنو في مشاكل مع أهلو اللي رفضو يخطبوني قلت منتخلاش عليه خاصة لما تشاجر على جالي مع أهلو لكن بمجرد رفضي للخاطب لم يظهر له أثر مع العلم أنو انسان صالح وكنا نخطط للزواج في أسرع وقت ويبكي كي أرفض الخطاب لكي يأتي لخطبتي وأنا الأن أجر ألام الندم والحسرة
ربي يسهلك أمورك أتكلي على ربي وتزوجي ماشي مقياس أنك كي تتزوجي بشخص تحبيه يعني رايحة تعيشي السعادة ربما سعادتك مع ابن عمك والعراقيل اللي حالت بينكم باش يسلكك ربي من أشياء تجهلينها
استخيري الله ربي يطمن قلبك ويرضيك بنصيبك

[جمال الدين الأفغاني]

السلام عليكم

ردود كان بعضها قاسي نوعا ما ولكن لابد منها

لان أحيانا الكلام القاسي وإن كان جارحا فلربما يهز من أحساسينا

فنتفطن لما نحن فيه من أخطاء فالأخت انت المسؤولة الأولى والاخيرة لما انتي فيه

وتصرفك كان من الاول على غير هدى فقد أقمت علاقة بشاب اجنبي عنك

والمفروض إما الخطبة امام الله والناس ولتحبيه بعدها كما تشائين

او لا وجود لحب أو اي نوع من علاقة دون خطبة او عقد شرعي

ولذلك انت دخلت في متاهة العشاق الغير شرعيين ولطالما كانت هذه المتاهة

مقبرة لهلاء والمشكل أنهم لا يتعلمون من تجارب من سبقهم فكل ضحايا جدد

الا ويعلمون العاقبة ولكنهم يصرون على خوضها والله المستعان

لذلك اختي الكريمة الآن لا يكفي اللوم عليك فقد حصل ما حصل الآن حان وقت الاصلاح

وقولك أنك تسألين طبيب نفسي ليقرر عنك يدل أنك ضائعة فعلا ولا تعرفين ما تفعلين

لذلك أنصحك أن لا تزيدي على نفسك الضياع أكثر فأكثر فيحدث ما لا يحمد عقباه

لازال امامك فرصة لتدارك الامور واولها المصارحة ولا اقصد ابن عمك فانت في عصمته الآن

صارحي الشاب الذي بدأت معه المشكل وكان سببا في ضياعك لحد الآن فلو لم يظهر هذا الشاب

في حياتك لكنت الآن سعيدة ومسرورة بابن عمك لذلك القرار الذي انصحك به ان تقومي

بارسال رسالة وداع لمن سميته "حبيبك" (ربي يهدينا ولا يبلينا )

تصارحيه انك الآن في عصمة رجل وما بينكما قد انتهى وإن أصر اعلمي انه ليس فيه خير

فمن فيه خير ان عرف ان من اراها للزاوج في عصمة رجل آخر سيحترم عرضه وشرفه

فعندما يعرف انك صرت لرجل آخر لو كان فيه خير وكان رجلا حقا هو من سيفارقك

ولن يرضى ان يبقى معك في اتصال ولذلك انت اخبريه واعلميه واعيلو ربي يعوضو على قد نيتو

المهم اختي الكريمة استهدي بالله ولا تضيعي نفسك اكثر مما ضاع وربي يجيب اللي فيه الخير

للجمـــــــــــــــيع

[تصفية وتربية]

السلام عليكم
القرار الذي انصحك به ان تقومي
بارسال رسالة وداع لمن سميته "حبيبك" (ربي يهدينا ولا يبلينا )
تصارحيه انك الآن في عصمة رجل وما بينكما قد انتهى وإن أصر اعلمي انه ليس فيه خير
فمن فيه خير ان عرف ان من اراها للزاوج في عصمة رجل آخر سيحترم عرضه وشرفه
فعندما يعرف انك صرت لرجل آخر لو كان فيه خير وكان رجلا حقا هو من سيفارقك
ولن يرضى ان يبقى معك في اتصال ولذلك انت اخبريه واعلميه واعيلو ربي يعوضو على قد نيتو
المهم اختي الكريمة استهدي بالله ولا تضيعي نفسك اكثر مما ضاع وربي يجيب اللي فيه الخير
للجمـــــــــــــــيع

وعليكم السّلام ورحمة الله وبركاته
بارك الله فيكم
فقط أردتُ التعقيب على هذه النقطة
هذا ليس بحل، ولما تُراسله من الأساس؟؟!!! ولما تفتح على نفسها باب ءاخر من الشُبهات والشهوات؟؟!!
بل الأصح أن لا تُراسله ولا تلتفت إليه أصلاً .. الله ستر عليها فلتستتر بستر الله ولتحمد الله على هذه النعمة العظيمة، ولتتب إلى الله مما وقعت فيه.
ولتحفظ عِرض زوجها
ولتكن ممن مدحهن الله تبارك وتعالى وقال فيهن: (فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّه ) وقال فيهن رسول الله -صلى الله عليه وسلم-: (خَيْرُ النِّسَاءِ امْرَأَةٌ إِذَا نَظَرْتَ إِلَيْهَا سَرَّتْكَ، وَإِذَا أَمَرْتَهَا أَطَاعَتْكَ، وَإِذَا غِبْتَ عَنْهَا حَفِظَتْكَ فِي نَفْسِهَا وَمَالِهَا)
اتقِ الله يا أختنــــا .. اِلجئي إلى ربّكِ ولا تتبعي خطوات الشيطان ونزغاتـه
واحفظي عِرض زوجكِ

[عمار الكوسفي]

انت لاتصلح ان تكون اصلا للحبيب ولا لابن العم

[meryem hyd]

اختي ابقاي مع راجلك ماديريش حاجة تندمي عليها و كون جا حبيبك السابق يحبك تاع الصح كي شافك تزوجتي مكانش يجي عندك
على خااطر اللي يحب يتمنى الخير للانسان اللي يحبو ماشي يدمرو
و زيد واش ضمنك بلي يديك
و اذا داك راح تكون مشاكل كبيرة و راح تخلصي النية اللي دارها معاك ولد عمتك لانك ظلمتيه

[انانيس]

السلام عليكم
فعلا مشكلة اختي احملك انتي السبب فيما حصل لك لانك انت حاولت التهرب من مشكل فوقعت في مشكل اكبر منه
الان فات اوان هذا الكلام او العتاب لوكنت مكانك ان تاكدت من مشاعري تجاه الحبيب تيقنت تماما انه لازال على العهد باق ولازال يريد التقدم للخطبة ورجل مثالي اقصد من ناحية الدين والاخلاق فافسخ خطبتي لاقبل بالحبيب اتعلمين لما لانك لن تنسيه وستضلين في حالة المقارنة دوما بين حبيبك وبين زوجك اقصد ابن عمتك لذا اجتنبي هذا هذا ري ايضا صلي صلاة الاستخارة فسوف ترتاحين باذن الله وتتوفقين الى القرار الصائب
فرج الله همك [/center]

[سجل أنا جزائري]

سهلة ماهلة قوليلو لولد عمتك عندك حبيب كيما راكي تقولينا ما ما تقوليلش ما نقدرش ربي ما حشمتيش منو و خطيبك تحشمي منو ؟؟

تحملي مسؤولية تع الأفعال تاعك انت واحد ما سيف عليك ديري حبيب كيما عشتي ايامات حلوة معاه في اطار غير شرعي او جاك نهار تحصدي وش زرعني الا اذا كان ولد عمك عللابالو بليلي عندك حبيب و مصر عليك هنا نقولك هو اللي مش راجل !

[منهاج]

السلام عليكم

نفترض انك رفضتي ولد عمتك وتزوجتي بحبيبك راح ما ينسهالكش طول عمره اي شيء يولي يشك ففيك وما يوثقش فيك

يبقة دايما يفكرك بلي فات

[assia81]

السلام عليكم ورحمة الله وبركاته
اختي ماكنت فيه اولا كان علاقة غير شرعية فعليك ان تتبوبي الى الله وتلجاي اليه فان احسستي انك تشعرين بالارتياح اختاري بعدها ومادمتي لم تجدي مايجعلك تتخلي عن زوجك والاولى ان ترضي به وتحبيه طاعة لله وعليك ان تنسي الاول لانه ليس لك ويقول الله تعالى ولامتخذات اخذان وشكرا

[mariyalara]

اللهم اغفري لي و لجميع المسلمين يارب

الاخت طلبت المشورة و ليس التبهدايل و عندما نرجع لدين الزواج اساسو القبول و الرضا و انت يا اختي حالتك النفسية ما تسمحلكش تقرري قرار سليم اعطي لنفسك الوقت و ابتعدى بنفسك عن كلا الطرفين و اختلي بيها عللك ترين حلا لانه ما يحس بالجمرة غير الي عافس عليها ولا تنسي اولا واخيرا هذا مكتوب و لازم تقبلي بيها فالحياة لا تقف عند شخص ما سوف تستمر
اتمني لك السعادة من كل قلبي ;)

[manal01]

واش نقول ليك اختي راني قريت موضوعك بصح بالخيرة واكثري من صلاة الاستخارة دا واش نقول ليك
وعن حبيبك داك موش حب ممكن انتي راكي تخيلي امور وارضي بنصيبك فقط
صح نفرضوا بطلتي من ولد عمتك وبعدها تقدم ليك خطيبك شكون راح يضمن ليك انك تعيشي هانية معاه قولي لي
واش نقول ليك استخيري ثم استخيري وخليك رزينة وشادة في الله
نتمنى تتقبلي هاد الكلام ,,,,,,,,,,,,,,وان شاء الله ربي يفرجها اليوم ليلة مباركة قومي الليل وادعي مولانا يسهل ليك امورك
مع السلامة

[ABDOU ELE]

انا هو الطبيب النفسي وبعد الاطلاع على المشكل انصح بما يلي :
_اخطات بالتواصل مع اجنبي(ماتسمينه علاعة غير شرعية) لهدا يجب ان تتوبي الى الله.
_الدراسات تثبت وبدون شك انك تستطعين نسيان ما يسمى ......ح ب ي ب ك ............
_يجب ان تنسي ما يسمى ....ح ب ي ب ك....
_اقبلي بابن عمتك وتمسكي به بدون هوادة.

قيمة التعاب : دعاوي الخير

[dahbi01]

أختي الكريمة نسأل الله لك الهداية
وانت غالطة مع ربي كي كنت تحبي وتحكي مع حبيبك كما تسمينه.
ولد عمتك الي هو خطيبك مسكين.
- حبيب نعم حبيب لأنه لايوجد حبيب في الشرع لكن في عالم الإجرام يوجد حبيب.
- خطيب نعم خطيب يوجد إسم خطيب في الشرع.
إذن ليكن في علمك انكم قمتم بشئ حرام ما هو؟
هو أن حبيبك لم يخطبك ظروفه لم تسمح و خطيبك ولد عمتك خطبك معناه خلاص ...........من بعد جات ام حبيبك وخطبت........كيفاش 02 خطبات.
حرام حرام لما جاء في معنى حديث الرسول صلى الله عليه وسلم (( المسلم لايخطب على خطبة أخيه)) و الخطبة على الخطبة حرام

واقول لك : من أحب غير الله عذب به

[نورسين سوف]

صل صلاة استخارة عدة مرات

[قطرة شكولا]

السلام عليكم
نصيحة يا اختاه كيما قالوا الاخوات و الاخوان ولد عمتك جاك من الباب و قصده شريف مي حبيبك طول فيها راهمو بزاف لي صرالهم كيما انتي رفص 1000 انسان قصدو الحلال ومن بعد بقاو في بيوت اهلهم لازوج ولاراعي خاصة عند وفاة الوالدين بقو في ذل اخوتهم
الحبيب كي يشوف بلي حبيبتو تخطبت تبانلوا عليها وين كان قبل يحسب بلي واحد مراح يشوف ليك لكان جا يحب صح كان يقنع اموا و يجي غير يمد كلمة للرجال هو لا
و اذا كان يحبك صح كي سمع درتي الفاتحة كان يقولك وحدوا ربي يهنيك ربي مكتبكش ليا ميش رايح جاي
وانتي راكي ملزومة تحترمي زوجك مبقاش نقلك ولد عمتك ونزيدك الحب يجي من ورا الزواج ويكون حب حقيقي وحب محترم ربي وراك الطريق اللي راح تمشيه وانتي تقلقي في روحك نهار تتزوجي وتجيبي اولاد و تعاشري زوجك مليح ثم تعرفي قيمة واش عطاك ربي اكي ضرك تشوفي في روحك متحبيهش يولي هو كل حياتك وهو الانسان اللي تشوفي غير ليه يولي امك وبباك وخوك وصحبتك وحبيبك وكل شىء في الدنيا و بربي تعيشي اسعد وحدة مدام يحبك ومتمسك بيك
ونزيدك حاجة صلي ودعي ربي وهو ميخيبكش وابتعدي عن الاشياء التي تذكرك بالغريب عنك حاولي دائما ان تملئي فراغك
واتمنى ان يسعدك الله و ان تجدي ضالتك

[jass mina]

لابي يكون معاك و يوريلك الصح

[زينوبة ام سامي]

شوفي حنونة ننصحك كاخت ليك
اخطيك ما كاش منها حبيبي
خلي هاد الكلمة محصورة للرجل الي حيكون زوجك
ادا ابن عمتك او اخر

ثاني شىء القبول و الرفض يكون من الاول و هاد الشيء واحد ما يجبرك عليه

لوكان قلتي دارنا جبروني نديه و نقبل بيه نقول ايه مسكينة و لكن انت الي قبلتي

ما خطرش في بالك انو هاد الامر ماشي لعبة لمن تنتقمي لنفسك هاد الكلام ما عندو حتى اساس من الصحة

و الان ما بقى حتى وقت للنصيحة ادا تبطلي ولا لالا

خلاص راكي زوجتو شرعا ضركا تقوليلو زوجي ماشي خطيبي

اخزي الشيطان ربي راح سترك و بعثلك ولد حلال ما تخليش الشيطان يخرب حياتك هو ضرك مزينلك العلاقة الي كنتي فيها مع هداك الشاب و لكن فكري شوية شون يضمنلك بلي غير تحبسي ثاني يوم يجي حبيبك كيما قلتي و يطلبك للزواج

ارجعي لعقلك

صلي استغفري و استخيري
ربي يوفقك و يزين سعدك

[loulou02]

الإخوة كفاو و وفاو ، أختي هذا غيرالشيطان راه يوسوس لك ، إرضي بالأمر الواقع راكي الآن مرت راجل ،و بعد الدخول نأكدلك راح تنسي نهائيا صديقك السابق لأن ربي يطرح بين الأزواج المودة والرحمة والسكن ، غيرإثقالي شوي و ما تخربيش حياتك بيدك .

[mitrochka]

بسم الله و الحمد لله و الصلاة والسلام على سيدنا محمد رسول الله
اللهم ارنا الحق حقا و ارزقنا اتباعه
و أرنا الباطل باطلا و جنبنا اتباعه

يا اختي ماذا تفعل زوجة رجل مع رجل آخر
بالله عليك هل أنت راضية عن و ضعك
كلنا نخطأ لكن الاصوب هو تصحيح أي مما قد نرتكبه
توكلي على الله تعالى و اكثري الدعاء و الزمي صلاة الإستخارة
و اتمي زواجك
و الله المستعان

[imene12]

اذا ضامنة ان حبيبك راح يجي يخطبك ارجعيلو " مع أنه الضامن ربي كيمانقولو"
و زيد نقلك الزواااااج راه ماشي عرس و خلاص راه عمر كاااااااامل اذا شايفة انك ماكش قابلة خطييبك و ماكش راح تقبليه ننصحك يا اختي ما تغبنيش عمرك و تغبنيه.... من بعد راح تندمي وقت لاينفع الندم