مشكلتي مع حماتي [الأرشيف] - منتديات الجلفة لكل الجزائريين و العرب

Asmapharm47

2013-01-28, 14:52

سلام عليكم أتمنى من كل من يقرأ مشكلتي آن يعطيني رأي أو يساعدني بحل المهم أنا بدأت مشكلتي مع حماتي من اول يوم عقدت فيه لأنو في عادات ديالنا يوم العقد تأتي أم الزوج و تجيب معاها الطبق و في هذا اليوم الي هو يوم فرح لأي بنت أحسست بتغيير كبير في معاملة عجوز تي حيث أنها بدأت تقولي أنها إنسانية مسيطرة و واعرة و لازم أتحمل صراخها صدقوني خفت منها بزاف و اتصلت بزوجي قلتلو إذا أمك هكذا كيفاش نسكن معاها في دار وحدة المهم صبرني زوجي و قالي أنا معاك و حتى واحد مايزعفك و تزوجت و كان عرس كارثي و أخذني زوجي إلى شهر العسل و لما رجعنا بدأت غيرة عجوز تي تبان مشاكل بدون سبسب تسمعني كلام جارح حتى زوجي ماسلكش من جبروتها امرأة متسلطة بأتم معنى الكلمة حتى أنها صارت تهددني انو راح تطردني من بيت و دائماً كنت نسكت أنا و ماندافعش على روحي و لما صرت حامل ماتصكصيش عليا و كل ما يحب زوجي يكريلي دار تقولو لالا اسكن معايا ولا رح ندعي عليك و صدقوني دائماً تدعي على زوجي الي هو ابنها بدعوة الشر و في هاد الأيام توفى جدي و حبت تعرس لبنتها و قالتلي لازم تحضيري عرس بنتي قلتها كيفاش نحضر و جدي الي مات ماعندوش 15يوم من وفاتو قالتلي مايهمنيش لازم تحضيري باش ناس مايحكوش عليها المهم أنا ما تحملتش الوضع و حاولت نفهمها أني ما نكدرش ولكن ماحبتش تفهم و اسمعتنى هي و ابنتها كلام جارح و بدون أي مراعات لمشاعري و قالولي الي بيناتنا انتهى فقرر زوجي انو يأخذني إلى بيت أهل حتى يرى حل أو يستأجر لي بيت و أنا بصراحة مش قادرة نرجع نسكن مع عجوز تي و عن قريب سالد إنشاء الله أعطوني حل أو رأي لأنو زوجي غايضني بزاف كل يوم يسمع من أمو الصراخ و هاملا وليدها و مش حابا تخليه يستأجر بيت اعذروني على تعبيري الركيك انتظر ردودكم

دروب التابعين

2013-01-28, 15:00

لازم يعرف كيفاش يكسب قلبها منين ذاك يشريلها حاجة ويرضيها وان كانت مسيطرة فوق الحد حتى وان انفصلتي عنها بمنزل ماشتقطعوهاش ودايمن حاولو ترضوها بالمستطاع لعل قلبها يحن ويراف وتندم على قسوتها لعلها شديدة الغيرة على ابنها وعلى الابن ان يعدل بين امه وزوجته ولا ينسى ابدا امه ويبدا بامو هي اللولى ومن بعد زوجتو حتى ترضى عليه وتكف عن قسوتها

mira mira02

2013-01-28, 15:33

ربي يسامحها ان شاء الله والله حرام عليها واش راهي تعمل نفس قصة اختي
واش نقلك اصبري الصبر نفتاح الفرج

sali-sali

2013-01-28, 15:43

7ram 3liha hadh yemah wach dir

ida lhadra li goltiha sah kayen 7al wahed howa ydirlak darek wahdek

ydji nhar tendem 3la wach daret m3a wlidha

Asmapharm47

2013-01-28, 15:57

**مياس تسنيم**

2013-01-28, 19:52

راكي خوفتيني انا ثاني رايحة نتزوج عن قريب
والله معلابالي مي نقولك مدام راجلك معاك وحاس بيك اصبري في خاطرو شوي

الحنان المفقود

2013-01-28, 20:55

أنا خاااااااااااااااااااااااااااااااااااااايفة

oum anas 69

2013-01-28, 23:18

rabi m3ak okhti lazam tasaoknou ahadkom rabi yahdiha w yahdina

mounia 85

2013-01-29, 11:06

افففففففف والله مرض مع الحموات هادو ..يزوجوا ولادهم منبعد يكرهولهم حياتهم
والله كاين حموات ماتليق معاهم غير العين الحمرة مالغري تحترميها وتقدريها وتعطيلها من لحمك ماتحبكش وماتشتيلكش الخير

ربي معاك اختي وربي يفك صراحك و تديري دارك وتتهناي

touta2010

2013-01-29, 11:22

اختي اعزيزة ربي يكون في عونك ننصحك باش تسكني وحدك وكيما يقلو القرب يجيب الكلام والبعد يجيب السلام وقلتي بلي تدعي على زجوك لكن في الباطل مشي كل الدعوات مجابة الله راه يشوف وداري بكلش

Asmapharm47

2013-01-29, 12:08

شكرًا أخواتي ربي الي عالم شحال خففتو عليا

ماريا205

2013-01-29, 13:15

السلام عليكم ورحمة الله
اختي وش ننصحك عليك بالصبر اولا لوجه الله راح يجازيك عليه ثانيا على وجه زوجك
وعليك بالدعاء فهو يصنع المعجزات وعن تجربة كثري الدعاء ربي معاك

لمياء كوكو

2013-01-30, 11:31

ربي يهديها يارب اصبري برك أختي ماعندك ماديري الله غالب ماكانش حل اخر

ام البنوتة

2013-01-30, 12:29

اختي انفصلي عنهم بدار و لهنا و لا لغنى...ما تكتريش الهدرة لمنع التاويلات خليهم يتواحشو كلمة زايدة منك.
المهم راجلك راهو علابالو واش صاري و هذا هو المهم.
السكن المنفرد من حق الزوجة و كاين عقوق الابناء للاباء و كاين عقوق الاباء للابناء و نظن راجلك راهو في النوع الثاني..
كامل رانا متزوجين و عايشين هاذي المواقف...اصبري مع راجلك راهو بين نارين

Asmapharm47

2013-01-30, 13:18

شكرًا أختي و لكن هل قصدك نصبر أني نرجع نعيش مع أمو في دار واحدة و ننس ماحدث أو نقعد عند أهلي حتى يستأجر لي دار

sali-sali

2013-01-30, 14:37

شكرًا أختي و لكن هل قصدك نصبر أني نرجع نعيش مع أمو في دار واحدة و ننس ماحدث أو نقعد عند أهلي حتى يستأجر لي دار

ادا كان يقدر في هدا الوقت يستاجر اكيد في اقصى سرعة قوموا بدلك

ان لم يستطع فاصبري

مواطنة

2013-01-30, 16:34

السلام عليكم ورحمة الله وبركاته
اختي الكريمة في الاول نقولك تهلاي في صحتك و في البيبي وما تكثريش من الزعاف يعتي هوني عليك الامر المشاكل في كل دار
الله يحفضلك زوجك باين بلي يهتم فيك وفي مشاعرك وحقاني وهذي لوحدها نعمة من الله تعالى و الحين هو بين نارين الاولى امو و الثانية انت شكون لازم يرضي انا نصحك كي اختي اذا شفتي بلي ماتقدريش تستحملي البقاء في بيت حماتك و مشاكل لا تطاق و تخافي على صحتك ابقاي في داركم لكن حاولي تبقاي على اتصال بناس دارك و ساعدي لوستك في توجاد عرسها هذا اقل شي تعمليه باش تنقصي المشاحنات والا يقوا عليك الملام اما بالنسبة لحضور الزفاف جدك الله يرحمو و انت عندك حياة لازم تعيشيها كوني معاهم ماشي مشروط طبلي و تغني لا لا كوني مع لوستك عاونيها اذا حبت او ادخلي للكوزينة عاوني في اي شيء المهم ما تقوليش مازال الربعين و الحزن لانو هذا اصلا في الدين ماكاش فوق 3 ايام الا الزوجة على زوجها يا اختي الايام تفوت من بعد تولو ملاح و تندمي لي ما حضرتيش اختي العزيزة ما تخليش الضغط يتحكم في قراراتك وزوجك اذا قلتيلو بلي رايحة تحضري اكيد يفرح و تكبري في عينو لان هذوك اهلو كيما يديرو يحبهم
واذا شفت بلي اجراءات الكراءتخلاص في وقت قصير ابقاي عند لعجوزة حتى تفريها وحاولو تسكنو قدامها افضل ليك و لابنها
واخرشي ديرييه ببالك زوجك لازمو ما يبينش محبتو قدام امولازم يتعامل باحترام وخلاص لانها اكيد تغير و هذا طبيعي جدا اصبري واحتسبي وافرحي بقدوم قرة عينك و باذن الله المولود الجديد سيحدث تغيرات لصالحك

Asmapharm47

2013-01-30, 20:34

hadjira195

2013-02-01, 13:40

والله راني خائفة ليوم قالي زوجي انو لا يستطيع انو يوفر لي سكن خاص لأنو أمو منعاتو و قالتو رح ندعي عليك و زوجي قالي لازم ترجعي تعيشي مع أهلي والله أنا مش قادرة نسكن مع فرعونه أشيروا عليا ماذا افعل؟؟؟؟؟؟؟؟؟؟؟؟؟؟؟؟؟؟؟؟؟؟؟

ya okhti araj3i wassabri et jamais ma tkouni enti saba fi les probleme khali rajlek ichouf b 3aynih ... lazem 7ata houa yakrah et iwali houa 7ab sa7 yokhroj yeskoun Wa7dou

Ida kounti dayrra nya raki tokhorji 3la khir et surtt matfartiche fi rajlek et matguadbiche bezaf fi darkom diri rayek wenti ka3da fi darek par ce que loukan teguodbi bezaf yakarhak enti wa yefaret fik enti

wa ad3i ad3i ad3i jours et nuit rabi yefta7 3lik belkhir balak ta3kal et yahdiha rabi

Aba3thilo message et kolilo narja3 3la jalek kima jit nhar loual lik enta bark et inchallah jamais manfarat fik et stp thalla fya par ce que bdit n7ass b thole

Asmapharm47

2013-02-01, 21:21

ya okhti araj3i wassabri et jamais ma tkouni enti saba fi les probleme khali rajlek ichouf b 3aynih ... Lazem 7ata houa yakrah et iwali houa 7ab sa7 yokhroj yeskoun wa7dou

ida kounti dayrra nya raki tokhorji 3la khir et surtt matfartiche fi rajlek et matguadbiche bezaf fi darkom diri rayek wenti ka3da fi darek par ce que loukan teguodbi bezaf yakarhak enti wa yefaret fik enti

wa ad3i ad3i ad3i jours et nuit rabi yefta7 3lik belkhir balak ta3kal et yahdiha rabi

aba3thilo message et kolilo narja3 3la jalek kima jit nhar loual lik enta bark et inchallah jamais manfarat fik et stp thalla fya par ce que bdit n7ass b thole
مشكورة أختي والله أنا محتارة من جهة مش قادرة نفرط في زوجي الي متأكدة من حبو ليا و من جهة ثانية مش قادرة نسكن مع أمو الي مش حابه ترضى و لكن راح أخذ بنصيحتك و نرجع لراجلي و ربي حنين كريم مش قادرة نخسرو

مينو2006

2013-02-03, 10:49

شوف ختي ربي يفك كربك انا ننصحك تخرجي بدارك احسن لانه ما كانش قد راحت البال انا مع اني ساكنة في بيت العايلة وراهم ناس ملاح لكن كاين حوايج بزاف العبد متقلق منهم دايما دارنا محلولة قولي كوري هدا داخل هذا خارج العفس و دايما سلافي متواجدين ملمومين على طابلة الاكل كلي ماعندهومش ديارهم نسخف نرتب كوزينتي كيما نحب ولاصالوني نشوف بالعين و نسكت مع اني عندي دار وكاريتها لانه المشكل في زوجي هو لمحبش يخرج على اهلو

hadjira195

2013-02-11, 14:05

rabi iwafkak inchallah

ام فريال لينة

2013-02-11, 20:48

انا انصحك ارجعي لدار راجلك وكلما بطيتي في داركم راهي تجيك صعيبة باش تولي لدارك وعفسي على قلبك واصبري ان الله مع الصابرين اما بالنسبة للعرس احضريه عادي راهم فاتو 15 وفالدين الحزن غير 3ايام وعاوني لوستك وكوني معاها واشي اوبلجي عليك تروحي تشطحي ولا تغني اخدمي معاهم الشغل فالكوزينة وانشاء الله يحن قلب عجوزتك وما تبينيش بلي حظرتي العرس فوق قلبك باش مايزيدوش المشاكل وفرحي راجلك راه باين يحبك بزاف باذن الله مور العرس تتهدن الاوضاع وربي ينوضك على خير اما داء عجزتك على راجلك اكيد ماشي من قلبها مكان حتى ام تدعي على وليدها بشر

torkia18

2013-02-13, 14:35

السلام عليك
صبرك الله اختي .ارجعي لدار حماتك واحضري العرس وحاولي تنساي المشاكل نتاع حماتك راهي تدير هكدا من الغيرة الشديدة ابنها كان ليها حتى جات وحدا وداتو منها ربما راجلك يمدح فيك قدام امو ويشفق عليك اكثر منها فهي تغار او يهديك ويفضلك امامها حاولو انكم ماتبينولهاش الامور هادي على الاقل قدامها اكيد هي تحب بنها لكن الغيرة منك تخليها تدير هاكدا عامليها على اساس انها مريضة وربي يصبرك.

jojo39

2013-02-17, 09:32

ربي يهديها وربي يصبرك من الحماة

mammeri saad

2013-02-17, 15:29

اختى صبرى الصبر مفتاح الفرج واحتسبى امورك لله سبحانه وتعالى وطاعتك لام زوجك هى طاعة لزوجك ومساعدة له على بر امه وسوف يجازيك عليها الله خيرا بادن الله

Asmapharm47

2013-02-24, 13:16

شكرًا أخواتي على ردودكم و تفاعلكم انا رجعت لبيت زوجي و حطيت لعجوز تي نقاط على الحروف و الحمد لله في الوقت الحالي رآها محترمتني و الله هو المعين و زوجي مايستاهلش واش صرالو و انا لازم نوقف معاه في الحلو و مرة و هادي أمو الي لازم يصبر عليها