أنا و خطيبتي

[مشكلتي]

السلام عليكم و رحمة الله
أنا شاب خاطب لفتاة ، نحب بعضنا كثيرا ، لكني في بعض المواقف أتنرفز فأجرحها كثيرا. و بعد مدة نرجع كأن شيئا لم يحدث
في المرة الأخيرة حدث بيننا مشكل، تنرفزت فجرحتها و أهنتها كثيرا ، و الآن هي لا تريد أن تكلمني، و أحيانا تقول لي انساني لا يوجد أي أمل في البقاء معا ، و تقول لي بأنها ملت من تصرفاتي، و أحيانا تقول لي أعطني بعض الوقت .صراحة في هذه المرة لم أستطع أن أراضيها.
ماذا أفعل الآن ، هل أتركها و شأنها و أفسخ الخطوبة رغم العلاقة الكبيرة التي بيننا ، أم أصبر عليها .
ماذا أفعل يا بنات ( أنتن أعلم ببعضكن

[MIMIDZ]

ربي يجيب الخير ان شاء الله

[ام ايمان16]

السؤال كان لازم يكون هل تصبر علي خطيبتي ؟ وليس هل اصبر عليها؟؟؟

لانها حسب ماذكرت هي لي صبرت عليك لانك انت لي تتنرفز وتجرحها وتهينها واش خليتلها حاجة تصبر بيها عليك
اذاكنتو مخطوبين وراك داير في خطيبتك هكذا مالا كي تتزوج بيها واش راح تدير
لانو مهما كانت المشاكل بينكم عمرها ماتنحل بالكلام الجارح او الاهانة...
بالعكس هاذ الامر يعقدها اكثر من لي يحلها

مالا شوف روحك قبل وحاول تنحي النرفزة هذي لي في طبيعتك اذا كانت فوق الحدود المعقولة والمبالغ فيها ...
باش تقدر تتحكم في روحك وماتقولش كلام تتوقف عليه حياتك. وتندم من بعد..
وربي يهنيكم ويصلح بينكم

بالتوفيق

[شقراء سوف]

اترك الهاتف وشانه وافسخ الهاتف من عقلك او على الاقل قللو من الاتصالات فترة خطوبة كون ميكونش فيها تفاهم وش تستنى بعد الزواج؟؟ تتضاربو ؟؟ الشئ الي يخليك تتنرفز هي تبطلو كونو صرحاء مع بعضاكم واي طبع فيكم يا يتغير قبل الزواج يا انكم ترضو بلي فيكم وربي يوفقكم

[sarah1424]

Ana nanshek ya khoya etalla fiha wa3ref kifeh t3amelha rak t9oul ana l najraha wt9oul nafsekh lkhotouba kima hakka rahi wahda matehmlek thinha wtajraha
ana n9olk badal men rohk madamk thebha etalla fiha wk tet9ala9 baddou matehkouch wmatjrhach

[المتيقنة بالله سارة]

انا مع اختي تفاحة كي قاتلك من المفروض تقول هل تصبر علي؟؟........ادا اردت النصيحة اخي عليك بمبادرة الصلح اولا والاعتذار عما بدر منك...........والشيء الثاني اكيد كاين اسبب تخليك تتنرفز لكن مكان حتى فتاة ترضى لنفسها بالاهانة من زوجها المستقبلي......حقيقة انا كون في بلاصتها نقول هذا ضرك راح يعيط ويبني مالا كي يديني لدارو يبهدلني قدام ماليه...........اذا حاول تعرف كيفاش تتصرف في مواقف الغضب وتتجنب تجرحها او تقول كلام تحسوا اي انثى انو انتقاص من كرامتها حتى ولو كنت تهيم بها حبا ماهيش سلطة تعطيك لحق تهينها.......المرا تحب تكون بقيمتها عند راجلها......ربي يصلح بيناتكم ويجعل بينكما المودة وارحمة

[7anine 87]

اخى الكريم ربي يهدينا ويهديك نقولهالك بصراحة راك غالط من راسك حتى ساسك انا لو كان جيت ف بلاصة خطيبتك نقولك باى باى من اول مرة تهينى فيها لانو كرماتى اهم عندى من كلش وكيما يقول المثل الاحترام يسبق الحب يعنى مستحيل تحب انسان وفى نفس الوقت تهينوا وماتقوليش لحظة غضب ضبر راسك اتحكم فى نفسك انتى خطبتها باش تكون رفيقة دربك ومرتك وباش تحطها تاج فوق راسك مش باش كول دورة تجرحها ولا كى تغشش تصب غشك عليها هى صبرت بزاف بصح فاض بيه الكاس يعنى انت المشكلة فيك ياداوى روحك ياشوفلك وحدة اخرى تقدر تستحملك

[aniim]

ربي يجبلك الخير

[اسعى لرضى الله]

يا اخي شوف نصيحة

المرا مهما كانت راهي ضعيفة وكي تزوج راها تحوس على الامان مع الراجل تحوس على الدلال تحوس على راجل يحترمها ويقدرها مشاعرها مشي كل ما يقلق يجرحها وميخليها ما يبقيلها

دك لا انت والطفلة هدي تشتيو بعضاكم وهي تشتيك كون اكيد راها تسنا منك في جاست وتبينلها بلي هي كلش في حياتك يعني سايسها واقعد عقابها حتان ترضى كيعاد صدقني اقسم بالله لا قعدت تراضي فيها والله ماراح تنقص رجولتك ولا راح تقول في نفسها بلي مهوش راجل بالعكس راح تعود تشوف فيك سيد الرجال وتتاكد بلي تحبها بصح لا رحت فسخت الخطوبة راح ديرلها عقدة في حياتهاكيعاد هي ناكدلك بلي مش قاصدة واش هدرت مي راها تسنا تشوف واش تسوى عندك وتسنا في جاست مليح . انت صح دك من غدوة تعاود تخطب وتزوج عادي بصح هي اي تقعدلها عقدة يعني هز مسؤوليتك وكون راجل معاها وخليك من الكبرياء كي تكون معاها كيعاد راح تكون مرتك وبين الزوج والزوجة مكانش حاجة يسميوها كبرياء او انك تنقص من روحك

[الدكتور سام]

اسمع يا اخينا.استغفر الله و تب اليه فاهانة المسلمين و المسلمات ليس من ديننا و اعلم ان المراة نعمة من الله و شكر النعمة لا يكون بالسب و الشتم و احدر من سخط الله و انزع من راسك تلك الفكرة التي تعتقد فيها ان الفتيات سلعة تبدلها كيف ما تشاء لانه لست انت من تسير الامور كيفما تريد و انما يسيرها الجبار من فوق سبع سماوات و الله تعالى ادا انعم على عبد بنعمة و لكنه جحدها و لم يشكرها فقد ياخدها منه الى الابد فالله يمهل و لا يهمل و لاحظ ما اوصانا به نبينا محمد صلى الله عليه و سلم
استوصوا بالنساء خيرا
ادن في الاخير انصحك بان لا تجرح و لا تهين احدا مهما حصل فان لم يعجبك امر حصل منها فانصحها او اطلق سراحها و لكن باسلوب اخلاقي

[titsso]

Aimer c'est souffrir mais pardonner c'est aimer plus fort
كل حاجة عندها وقت خاص بها انصحك بعدم ازعاجها لمدة معينة و استخر الله قبل اتخاذ قرارات صبيانية هذا كله من وسوسة الشيطان ليبغض الحلال

[مريم الصابرة]

السلام عليكم اخي
فالحقيقة كيما قالو كامل إنت الغالط وهي اللي صبرت عليك بزاف لكن معليش يا اخي إنت علاه تهينها الدين ماشي زوج ركعات وزربية وعباية الدين تحترم وهذي المرا ربي والرسول وصاو عليها شريكة حياتك وراحا تكون زوجتك وام أولادك وهي راني متأكدة تعامل فيك بالنليح خاصة قلت تحبو بعضاكم بزاف علاه تهينها وتجرحها هذي إنسان تحس وتتألم وقد ما تحبك كرامتها اولى ولما تشوفك ديرلها هكذاك تخمم إنك ما تحبهاش وتفضل الإنفصال ولا العيش معاك في ذل
المشكل ماشي لو تبدلها التبدال عندكم ساهل تقول رايح تبدلك حوايجك لالا ما تخممش هكذا المشكل راه فيك يعني ايضا تعامل الثانية بالطريقة نفسها يعني العيب فيك إنت ما ٍاي روح حوالها وأطلب السماح منها ووعدها ما تعاودهاش وهذي خطيبتك وإنت إخترتها عن قناعة رضيها ولما تتقلق من الاحسن تكوبي تلفون وخلي لم تتكالما وعيط ونقص الأتصال حتى تتفاداو المشاكل موفق

[sali-sali]

لازم تحاول تغير من تصرفاتك اتجاهها و هيا راهي صبرت عليك دليل على انها تحبك
لكن انت احبيتش تفهم روحك ،الصبر نتاعها ممكن راك تشوف فيه ضعف

حاول تراضيها و تغير من سلوكك اتجاهها،وكدلك المناقشة و الاحوار بيناتكم يفيدكم

ربي يكمل بيناتكم

[الدر المكنون]

اصلح نفسك ربي يصلح احوالك

[نبض الفؤاد]

هذه مساوئ فترة الخطوبة قبل ما نقول اصلح نفسك والا الفتاة تصلح روحها ورانا عارفين كل الناس عندها عيوب (بتفاوت طبعا )
امالا لي ما يصلحش روحو يعني واحد ما يتزوج لا لا ويبقاو الناس يخيرو من واحد لواحد
انا معاك تحسن من سلوكياتك ولكن خويا اغصب وتوكل على الله على خاطر هي ثاني عندها سلبيات وتغاضاووا على بعضاكم
والله يسهل.

[hfhgffgvf]

انا من رايي عجل من الزواج و متخليش فترة الخطوبة تزيد طول لانو كل ما زادت فترة الخطوبة زادو المشاكل و تكسار الراس و انت طبيعتك منرفز هي اكيد مش رح طول على هاد الحالة و رايحة تطلب الانفصال تاكد من هاد الشي و لاني فتاة بحالها راني نقولك هكا ممكن تخلي هاد الامور و المشاكل تتراكم حتى ينفد صبرها و على حاجة تافهة تتفركت العشرة نصيحتي حاول تقلل من نرفزة تاعك و حاول تحترمها اكثر و لازم تتزوجو في اقرب وقت ممكن

[wafaa26]

تصرفاتك اخي ذكرتني بتصرفات زوج صديقتي عندما كانو مخطوبين كان كثير النرفزة و كان عندما يحدث بينهما شجار يهينها كثيرا و كنت دائما انصحها بان تكون صارمة معه و تطلب منه التغير و لا تتركه الا انها كانت متساهلة و تسامحه بمجرد رجوعه اليها لكنها الان بعد الزواج جد نادمة على زواجها منه لانها لم تستطع تغييره و لم تستطع التاقلم معه و حتى الطلاق غير ممكن بوجود الاولاد ............لذا انصحك اخي بان ترجع حساباتك لانها في هذه الفترة اكيد تحاول اتخاذ القرار الصحيح فساعدها بان لا تختار الانفصال عنك و ذلك بالتكلم معها و يجب ان تعدها بانك سوف تتخلص من هذه العادة السيئة و لكن الاهم انك تفي بالوعد لكي لا تحول حياتك و حياتها الى جحيم

[منهاج]

السلام عليكم

الله يصلح الحال بيناتكم

[فاطمة1418]

ربي يوفقكم

[أكوام الورد]

أخي المشكل راه فيك أنت خاصك تصيب حل للإنفعال نتاعك و تصيب الحل الأمثل لمشكلتك مع نفسك عاد تخمم تصالح خطيبتك على خاطر حتى يلا صالحاتك قبل تحل مشكلتك كيلي مدرت والو يعاود يتكرر النزاع بيناتكم و ربي يوفقك

[عطر الدنيا]

السلام عليكم
والله خويا ذرك راك قاعد تحول في الحب الي بيناتكم لكره و بطبايعك هاذي ريا اما تمرضها ب السكر ولا بارتفاع الضغط
اذا حاب تحافظ على قلبها المحب وما تكرهاش فيك حاول تبدل من طبايعك هاذي
نقلك حاجه روح اشريلها كادو شباب ولا كاش خاتم (ياريت يكون تاع ذهب ههه)وروح رضي المخلوقه
ربي يصلح رايكم انشاالله