اردت خطبتها لكن .... ؟

[مشكلتي]

السلام عليكم ورحمة الله

وقعت عيني على فتاة فيها كل الصفات التي يتمناها اي رجل يريد الزواج والعفاف وتحصين النفس

وما جعلني اتعلق بها هو اخلاقها العالية وسيرتها الطيبة على لسان كل من يعرفها ولو من بعيد او في محيط عملها . ابلغتها اني اريد التقدم لخطبتها فقالت لي .. باب الدار تعرفو وخلاص

سقسيت عليها مليح مليح وما خصها والو والحمد لله

وكي نويت نروح لباباها . صحابي كامل عارضو الفكرة . هذا يدي في الهدرة ولاخر يجيب ؟؟؟ على جال واش انها تخدم فرملية ؟؟؟؟؟ فيها عيب اذا اديت وحدة فرملية ؟؟؟؟ انا عندي فيها ثقة اكثر حتى من نفسي وما عندي حتى مانع انها تخدم ولو في الليل طالما اني على يقين انها كي تكون في الخدمة ما عندها لا لف ولا دوران ؟ صحابي وللاسف عندهم سوء ظن غريب عجيب ؟؟؟؟ يعني الفرمليات وحتى الطبيبات اللي يخدمو في الليل كلهم سواسية ؟؟؟ الشاذ لا يقاس عليه ؟؟؟ وحتى اللي بغات تخون وادير المناكر اديرها في وضح النهار وفي دارها لو ارادت وهو قافل عليها البيبان ؟؟

هاذ الطفلة عندها عام ونص مللي بدات تخدم ؟ السبيطار كامل بالمليح بالقبيح يشهدلها بالاخلاق والعفة سواء في الليل ولا في النهار ؟؟ مي هدرة صحابي الجهلة قلقتني اخر وحلت في وجهي باب الشك ؟؟؟؟؟؟؟؟
واحد من صحابي قالي ... انا مانيش راح نقبل انو الزوجة انتاعي تبات في السبيطار وانا نشخر في الدار حتى ولو الثقة انتاعي كانت فيها عمياء ؟؟؟؟ وكأنوا هاذ البنت راح تبات في الشارع ولا في ملهى ؟؟؟؟؟؟؟؟؟؟؟؟؟


واش ندير يرحم والديكم

[عاشقة امي]

اخي مادامك انت داير فيها تقة بزاف وصحابك ماديرش عليهم المهم دير على عقلك واش راه يقلك والا درت على هدرت الناس مراكش رايح تتزوج من اصل هي البنت ماديرش ويقولوا دارت انت اغلق ودنيك من هدرته ودير واش تحب
وانشاء الله تخطبها وتبقى هادي التقة انشاء الله

[hichem.f]

ياخي فرملية وتعمل في الليل صعبة شوية اصحابك ليسو جهلين هذا الزمن البلاوي

كم من بنت فاملية تحرش بها وهي صامتة ولم تريد التحدث لكي لا تفضح نفسها وتقع في كارثة

لاختلاط يااخي حرام شرعا خاصة ان هذا العمل دائم لسنين

و اولاد الحرام كثر المشكل ليس فقط ثقة بل من من يحيط بها في العمل

[اسعى لرضى الله]

خويا نقولك من اللخر كي تكون بنت فاميليا وتخاف ربي كون تحطها معلاباليش وين مستحيل دير حاجة حرام

وزيد سوء الظن مشي مليح كيعاد راح يتعبك في حياتك

ان بعض الظن اثم

انت صلي صلاة الاستخارة واللي شاف فيها ربي خير هديك هيا


ونقولك لا راهي كما راك تحكي عليها قدم ومتشوفش لصحابك ياخي انت اللي راح تتزوج مشي هوما , وهوما بالاك من فعايلهم راهم يشكو في كلش

[la perle noir]

اخي ما دامك داير فيها الثقة توكل على ربي و روح اخطبها و لي فيه الخير ربي يجيبه
ثانيا اخي مديرش على هدرة صحابك .كيما قلت وحدة مين تحب تغلط في وضح النهار و تغلط. و صحابك ربما اقول ربما حسدوك فيها لما سمعو باخلاقها
و انا ثاني مرة سمعت باحدى قريباتي خطبت لوليدها فرملية و هدرو فيها و هدرو...... مي والله خرجت ما شاء الله عليها و لي هدرو فيها دوك مين يمرضو يعيطولها باش ديرلهم الابرة.
اخي ربي يرزقك الزوجة الصالحة و الذرية الطيبة .توكل على الله

[رُقية]

ربي يكون فالعون صلي صلاة الاستخارة وربي يوفقك اخي

[mohamed160]

الاخ استخارى الله . وكلام الناس ما اديرى اعله

[hfhgffgvf]

اخي حابة ننصحك نصيحة لوجه الله اخطيك من ريان صحابك هادو و قلهم ماشي قاع الناس كيفكيف و انا بحكم عملي في نفس وضع هاد البنت و عارفة محيط العمل في المستشفى صدقني والله الناس راهم ضالمين هاد الفئة من العاملات و الله تلقاهم اشرف من الشرف و نعرف بنات يعملو في الليل محترمات و فارضين احترامهم على بقية الزملاء و ما نحكيلكش على تربيتهم و اخلاقهم و انت مادامك شايف هاد البنت بنت ناس و متربية و خلوقة تاكد كن تحطها في وسط الف راجل و في الليل رايحة تصون نفسها و تصونك انت قبل المهم تعطيها الثقة التامة باه تعيش هاني في راسك و الاهم من دلك ما ديرش على هدرت الناس و تضيع هاد البنت من اليدك و ربما من بعد ما تلقاش وحدة كيفها و تندم في الاخير نتمنى انك تخمم مليح و الي تخرج عليك انت وحدك ديرها

[مسلمة 345]

ما دام قالت لك اذهب للبيت فهذه علامة جيدة استخير وتوكل على الله وان لم يتيسر لك فلعله خير لك ولا تستمع للاصدقاء كثيرا خاصة العزاب فهم ينظرون فقط

[بسمة العمر]

اخطيك من صحابك.........و عمل الليل تقدر تخلص دراهم و يخدمولها لي معاها.........تقدلر حتى وحدها وحدها تبطل الخدمة المهم بنت فاميلية....الشعب الجزائري حاشا البعض ...دايمن يخصرو النية للواحد فاي حاجة

[ايمان نور الجزائر]

السلام عليكم ورحمة الله
مادام يا اخي انك سقسيت عليها وعرفت اخلاقها وكل شيء فذلك يسهل لك الامر
اما بالنسبة لعملها ....فهو طبيعته العمل في الليل والسهر على المرضى
وليس هناك من حرج يا اخي
من رايي ما تديرش خلاص على صحابك.....لانو بنات الحلال باينين
ولي يبغو الحرام النهار طويل
افراد عائلتي غالبيتهم متزوجين من ممرضان وعايشن الحمد لله
توكل على الله وما تسمع ل حتى واحد

[mohamed miloudi]

زيد سقسي عليها اكثر خويا ودير عليها نظرة في الليل باه تقطع الشك الي قاعد يدور في راسك

[محب السلف الصالح]

توكل على الله

[وفية زاد]

سلام
اخي ما دام الكل يشهد باخلاق هذه البنت و انت واثق فيها. خليك من كلام صحابك
انا عندي صديقات يشتغلن ممرضات في الليل في المستشفى .. يعني نفس الحالة
و يكون في علمك كاين حراس امن ساهرين على حمايتهم
و زيد على هذا الممرضات يغلقو الباب عليهم في المصلحة اللي يشتغلو فيها
يعني ما عندها وين تروح
راها تخدم في خدمتها و هذه الخدمة شريفة و ما فيها حتى عيب
و كيما قلت انت اللي تخدم العيب ما يهمهاش لا صباح و لا ليل
توكل على الله و بالتوفيق

[مريم الصابرة]

السلام عليكم خويا
راك تناقض في روحك واش دخل صحابك فالوسط كي راك راضي عليها لو تديها من مكة وبالستار الناس تهدر إنت سقسيت وعرفتها وسقيت ناس عليها روح إتقدم وكاين طبيبات يخدمو فالليل ومتزجات وامهات ويباتو فالسبيطار وإنت قلتها اللي تحب الحرام ديرو في دارهم المرا حاجة ما تشدها إلا خوفها من ربي وعفتها ولو جا فسوق الناس عن طريق اللي تبات فالليل خدامة لو كامل حبسو الخدمة يا اخي كل وحدة وتربيتها انا صح ضد فكرة العمل لكن مادامك غنت اضي بها خلاص خليك من صحابك وعلاه أصلا تشورهم هذي ما فهمتهاش المهم اخي خليك من الناس والطفلة هذي لو تعرفك متردد على جال اصحابك محال تقبل بيك شكرا

[اكرامو26]

انا نقولك خويا ماكانش كيما ربي استخر وخليها على ربي اذا كاتبة تجي حتى لعند رجليك واذا ماشي كاتبة خيرها في غيرها ماتدي غير واش كاتبلك

[ام ايمان16]

اذا كنت تقدر تتحمل مسؤولية زواجك منها ماديا وحدك قوللها كي تتزوجو حبسي الخدمة لانك ماترتاحش كي عادت خدمتها في الليل وفي النهار
قوللها كون جات خدمتك في النهار برك معليش لكن المشكلة ان عملك في الليل والنهار
(اضن لاتمانع عمل زوجتك فاذا كنت تمانع عمل زوجتك اصلا قل لها انك لاتريد ان تواصل العمل بعد الزواج وبعدها شوف واش يخرج عليك)


وحاجة اخرى هي ماتسمعش بزاف لهدرت الناس لانو الناس تهدر في كل حاجة وتخرجلها الف عيب
عندك عقل توزن بيه امورك وعندك عينين تشوف بيهم وتشوف الحل لي يناسبك

بالتوفيق

[شاملة لينة]

الأخلاق والخوف من الله لا علاقة له بالعمل أو لمكان العمل.......
عندنا واحدة في الحي ممرضة صدقني الرجال يخافو من الهدرة معاها كلش بالحساب لانها هي محترمة ولا تتكلم معهم إلا في مواضيع العمل.
أنت فكر جيدا ولا تتقدم لها إلا إذا كنت واثق في قرارك. أنت لا أصحابك.
ل،ه كما يفال الكلام في الأذن أشد من السحر.
وفقك الله

[العهد الرائع]

اخي اولا البنت اخلاقها عالية و باين عليك مقتنع بيها

ثانيا انا نسالك سوال

الممرضة وشنو عملها ؟ الا ترى انه شغل شريف و نبيل و مليء بالاجر
في الابتدائي قرينا نص و لا شعر لا اذكر جيدا على نبالة هته المهنة

توكل على الله يا اخي

[faty05]

الحمد لله كاين راجل كيما انت
اخي الزواج يبنى على الثقة و اذا تحقق هذا الامر فتقدم لها
و صحابك شياطين الإنس ما تزيدش تحكي معاهم في أمرها
آري الغيرة نالت منهم
و نزيد نقولك صل صلاه الاستخارة
و بإذن الله ربي يقدملك بين يديك الخير
وفقك الله
تحية خالصة

[بنت الرّحّل]

وعليكم السلام ورحمة الله وبركاته
يا أخي مبيت المرأة في الليل خارج منزلها مهما سُوغ له فهو مشبوه شئنا أم أبينا!
ثم هي تعمل مع رجال بشر وليس ملائكة ...وليسو معصومين
وسواء أنت أو هي عليكما أن تعرفا أن التهاون بمثل هذه الأمور ليس من العقل في شيء
وأذكرك أن الرسول صلى الله عليه وسلم نهى أن تسافر المرأة بدون محرم . فبينك وبين نفسك وجود المحرم مع المرأة حين تسافر لا يعني أنه لا يثق فيها:confused: ..
فمهما كانت الثقة موجودة -وهذا شيء محمود وجيد- لكن لا يلغي الأخذ ببعض أسباب الحماية والاحتياط واعتبار أهم أسس الحياة الزوجية الإسلامية والعربية

أتصور أنك مقتنع جدا وغريب وضعك للمشكلة إذا كنت تصف أصحابك بالجهلة ... !
هم نصحوك بالخير لكنهم لم يحسنوا أن يوصلوه لك ... يا رجل الغيرة على المرأة مطلوبة من الرجل حتى ولو كان يثق بها
هؤلاء الذين في المستشفى مرضى وأطباء بشر يتعرضون لكل ما يتعرض له إنسان
فكيف ترضى أن تعرض عرضك للخطر .. هذا عرض وشرف المطلوب حمايته وليس التهاون فيه... ولا بد أن يكون موقفك حازما في هذا الشأن
وأذّكرك أن الغيرة من أهم مظاهر الرجولة فإن نقصت وتضاءلت بدأت تقتحم حدود الدياثة
لذلك أنصحك بالتفكير مليّا في مسألة المبيت بعيدا عن العاطفة والحب والإعجاب .. وأذّكرك أن الثقة لا تلغي وجوب الغيرة ووجوب أخذ الحذر والحيطة
كما أن الغيرة وأخذ الحيطة والحذر لا يعني عدم الثقة...فتنبّه !
وعليه تقدّم لها رسميا وحاورها في الموضوع و حاول أن تقنعها بالتخلي عن العمل لأنه يضر بسمعتها ولو كانت مستشفياتنا نسائية لقلنا ربما لكن مختلطة لا وألف لا يا أخي الكريم
هذه نصيحتي لك أتمنى لك التوفيق

[nibrasse76]

انت خايف من اصحابك ولا من ربي ؟؟؟ ....الشرع يحرم اختلاط المراة بالغرباء ...وانت الواضح ما عندكش مشكل في مقابلة واجتماع زوجتك مع البرانية والهدرة معاهم ...من قال لك ان الزنا بالمراة فقط حرام ؟؟ يعني عادي عندك حرمتك تحكي وتخالط الرجال ؟؟ لا حول ولا قوة الا بالله ...نقولك حاجة انا اصحابي لي يفكروا هكذا محيتهم من قائمة معارفي بلا رجعة ...وندمت اني كنت نعرفهم اساسا ..خلي عليك ناس خيخه ..

[الزبرجد]

إن كانت على خلق و وووووو مثلما قلت فتأكد أنها سترفضك إن لم تؤكد عليها عدم مواصلة العمل

[منهاج]

السلام عليكم

مدامك متيقن توكل على الله ربي ما يخيب عبده