أريد خطبة بنت ولكن اهلها رفضوني رغم موافقتها

[مشكلتي]

السلام عليكم

أهلا بيكم ي جمآعة الخير

عييييييييييييت و ديقوووووووووتيت .. ما قدرت نزيد نفكر

عليها دخلت هنا نكتب و نفاجي على قلبي

و ان شاء الله نلقى عندكم رآي صحيح و لا حل بآهي


أنا الحمد لله رجل خدام .. و لآسيرآنس و كل شي تمام

في عمري 26 سنة .. حبيت نخطب وحدة

و على عامين يكون العرس ، هي و لله الحمد قابلة و لكن أهلها

لآلآ ..

علآه ؟ ضرك نقولكم

ثلاث أسباب : و هي

1 / أنا نسكن بعيد عليهم مي ماشي بزآف (ساعتين في طريق ) و الحمد السيارة عندي و البرمي ثاني
باختصار مشكل "البُــعد"ـــ

2 / أني أقـــل منها بـ عآميــــــن مي هي قابلة و مقتنعة "أهلـها لآ لآ و الله لا تربح عادات تع بلآدنا

يعني اذا عادت كثرمني حرآم نزوج بيها ؟

3 / سبب مانيش متأكد منو مي بالنسبة كبيرة داخل فـ اللعب "مريض بالسكري !و الله غالب ياك من عند ربي

ربي يحفظكم .. لي عندوا أي كلمة يقولها

و دعوآتكم

[lilou f lilou a]

ربي يسهلك أخي مدامك ناوي لحلالالالالالالالالالالالالالالالالالال

[sarl02]

هم الخاسرين ماشي انت ...

[حجام19]

صلي صلاة الاستخارة و اترك الامر للخ انشاء الله خير
]

[نور اليقين جيداء]

الا ربي كتبهالك تزوج بيها ان شاء الله و لا لا خيرها في غيرها بلاك تلقى و حدخرها صغيرة عليك و تبقل بيك خير و فالاخير هوما الخسرين كيما قال الاخ
ربي غوضك خير ان شاء الله و سمحلي

[ليندة ياسمين]

وعلاش تدعي على والديها واش دارولك
والديها خايفين على مستقبل بنتهم وانت مريض بمرض السكري والله يشفيك
لكن لازم تكون ناضج وتتفهم الامور وربما خايفين لانك مريض وربما لانها كبيرة عليك وتعرف العادات

[إكرام ملاك]

ربي يسهلك مع وحدة اخرى ان شاء الله ولي باعك بالقشور بيعوا بالفول

البنت اكيد ما تقدرش تتزوج بلا اهلها ماشي موافقين ماشي كيما الرجل

[sarah1424]

اكيد هده حياتها وان شاء الله تقدر تقنع والديها اذا كانت مقتنعة بيك اما كاين كلمة قلتها وهي انك مريض بالسكر يا خويا المرض ابتلاء من عند الله والي صابك قادر يصيبها ويصيب غيركم ونزيدك داء السكري هذا داء العصر ومهوش مرض خطير بكل انواعو ومهوش معدي نتمنى من الناس كونو اوعى من هكا ويعني كل الاسباب الي رفضوك عليها مهيش اسباب معيقة بعد المسافة ليس سبب هذه ارض الله واحد ما يدري وين يعيش المهم البيوت اسرار ربي يسهلك ويرزقك الزوجة الصالحة ونتمنى تنحي من بالك انك مريض لاني لا اعتبر السكر مرض يعيق الزواج والحياة وربي يشفيك ويهنيك

[*نآدرة~]

مانيش باغية نصدمك بالصح الحقيقة والمنطق يقول اذا رفضوا والديها محال تديها الا اذا كانت من مكتوبك صح،شحال من واحد خطب واحدة وتوفرت فيه كل الصفات ولانوا والديها رفضوا ما تمش هاذ الزواج حتى ولو هي كانت موافقة،الوالدين دايمن يقولو بلي مستحيل يبغوا الشر لاولادهم على هكذاك يوفضو وفي نظرهم اولادهم مايعرفوش وغير هم الي دايمن على حق،على هكذاك ننصحك تبحث من جهة اخرى واكيد ربي يرزقك على حساب قلبك ونيتك،ولا على المرض الله يشفيك ويعافي الجميع،مكاش انسان يقولك راني بخير قادر ربي يصيب الانسان من حيث لا يدري قد يصبح معافى ويمسي مريضا لا يستطيع الحراك،واش نقولك هما والديها غير سبب في تعطيل زواجك راني قتلك لا نكتوبك صح تعيا وتديها
ربي يهنيك ويشافيك ،استخر مرارا ولي فيها الخير يقدمها ربي

[nesma.sabah]

اعجبني اسلوبك اقول لك تستاهل كل خير ونقولك اذا كانت هي قابلة مكاش قوة في الدنيا تفرقكم الا اذا المكتوب الي الله غالب
و احمد دايما ربي لاني الخير فيما اعطى وفيما منع

[yasmina31]

ربي يسهلك أخي انت زيد استخير ربي و ادا هي مكتوبك راح تسهل عليك

[هدى الجيجلية]

إذا بتحبك
وحاباتك زوجها
صدقني
راح تقنع اهلها
ربي ايكتبهالك
ويشفيك يارب

[faty05]

اذا اهلها رافضين
حاول معاهم
و اذا واصلوا الرفض
تقبل قدرك
و حوس على وحدة من منطقتك

[AL AMINE]

و ما ذنبي في قلبِ تعلـقْ .

[الدر المكنون]

ربي يفرج عليك اذا كاتبهالك ربي رايح تديها ان شاء الله واذا ماكتبهاش الخيرة فيما اختاره الله

كيما قال احد الاخوة الافاضل اللي خلق وردة خلق فلة وياسمين

[{هبت رياح العاصفة }]

صلي صلاة الاستخارة و اترك الامر للخ انشاء الله خير
]
أخي الفاضل الصحيح أن تكتب (إن شاء الله)، و ليس (إنشاء الله) فإن لفظ: (إن شاء) في الاستثناء بكلمة: (إن شاء الله) يختلف عن لفظ (إنشاء) في الصورة والمعنى.
أما الصورة، فإن الأول منهما عبارة عن كلمتين: أداة الشرط (إن)، وفعل الشرط (شاء). والثاني منهما كلمة واحدة.
أما المعنى، فإن الأول منهما يؤتى به لتعليق أمر ما على مشيئة الله تعالى، والثاني منهما معناه الخلق ، فتبين بهذا أن الصحيح كتابتها (إن شاء الله)، وأنه من الخطأ الفادح كتابتها كلمة واحدة (إنشاء الله).