حاب ننساها

[مشكلتي]

السلام عليكم ورحمة الله وبركاته
انا صاحب القصة لحبيت وحدة وعشقتها وجاو خطبوها وقبلت وتبدلت عليا 180% وقتلكم حاب ننساها ونكرها.الحاجةأولى نشكر كل لرد عليا ونصحني لكن ياناس والله كانت أول بنت حبيتها وخرجت معاها وحاط في راسي أنها زوجتي المستقبلية 100/100 قلت هذي أولى و الأخيرة رغم عندي 28 سنة لأني خاطيني العلاقات مع لبنات,ويشهد علياربي أني حبيتهافي الحلال أما الأم تاعها مكانتش رافضتني 100/100 رغم أنها كانت متخوفا لأني نسكن ولاية بعيدة عليهم لكن قالتلها حتى يلقى خدمة ثابتة ونشوفو.ومين قلتلكم بعثت مساج وقالت راح نتزوج بعد مهضرنا وقالت جاو خطبوني أنا بعد أيام اتصلت بأختها كان عندي رقمها وحاولت نفهم قاتلي هضرو مع بابا وراه مدلهم الكلمى وقتلها يهمني رايها قتلي وافقت وختها قاتلي كلام ضرني بزاف قاتلي نعرف بلي تحبو بعضكم لكن كون في بلستها راه جاها واحد واجد وبخدمتو وانت مازلت تحوس على خدمة أنا مقطعتش لياس و بقيت نبعتلها في email وقتلها زيدي صبري عليا وحاولتها باش متتقلقش لأنو كانت ديما تقولي نخاف مانتزوجوش ونندم عليك طول حياتي لأني ماراحش نلقى واحد كيفك ومنقدرش نعيش مع واحد ونبقى نحب فيك.هذا بعد شهر من فراقنا وماحبيتش نعرف ادا تفاهمو على الزواج ولا واش صرى من بعد لأني مقدرش نتقبل أن المرأة لداير نتزوج بيها تتزوج وتخليني وتعيش مع غيري الله غالب لأني كنت طامع تعاود تعيطلي ولا تحوس عليا رغم أني حلفت بلي مانروحش عندها لأني حسيت خدعتني وكذبت عليا وماضحاتش على جالي.وزدت طمعت لأنو بعد شهور بقاو يعيطو appel masqué قلت هي راهي تعيط لأنو حسيت بيها في عبد ميلادي عيطو ويبقاو يسمعو ومرات عديدة فرحت وقلت راح توليلي ونسيت كل لصرى فياعى جالها ومنبعت خممت بعقلي وقلت هذي البنت طيحت بيا وخدعتني ومنكذبش عليكم تمنيتها تندم ومتعيش حياتها مليح و وصلت دعيت عليها وعلى الأم تاعها لأنهم جرحوني بزاف.
واش نقولكم حاب ننساها ونكرها رغم أني في هذا رمضان كنت نسمع لشيخ يحكي على الشخص اذا جرحوه وضلموه وخدعوه ورغم ذالك يسمح قال ربي راح يعوضه منداك اليوم رغم كل شيء قلت ربي يسامحهم ودعيت ربي يسهللها ودعيت ربي يعوضني خير منها انشاء الله.بقى عندي مشكل هو نسيانها والثقة في النساء وأنا نعرف روحي مليح رغم أني نعرف مازل كاين بنات الحلال لكن عمري ولا راح نثيق في بنت وعمري ولا نحب ولا نحوس على علاقة حتى ربي يكتبلي ونتزوج وراح ندير مقدوري باش نعاشرها ونحبها كزوجة وبس اذا تستاهل أما الحب صاي قلبي مات لأن والله غير كلش لكان عندي عطيته للبنت لسمحت فيا ودرك مهما نشوف بنات والله قلبي مايتحرك !!!! هل أنا على حق في تفكيري وشعوري أم ..........

[aihemsara]

مرات نقول لازم نعتزل هاذ القسم من المنتدى لانو اصبح حكرا على هادا النوع من القصص
مع احترامات ليك طبعا لكن انت لي رحت برجليك و انت لي حبيت دااك الشيء و انت لي خيرت
و لي محيرني اكتر انو عندك 28 سنة و ولا مرة دخلت في علاقة مع طفلة غير هادي !!
صبر تاع 28 سنة ضيعتو بالجملة و على دفعة وحدة,, علاش ما صبرتش حتى خطبت وحدة و تزوجت من بعد حبيت !!
علاش !! واش نقولك ربي يهديك برك و يعوضك بالحلال و الا على النسيان ا تخافش راهو نعمة من عند ربي يجي نهار لي تنسى عادي

[doudou belle]

تأكد خويا رح تنساها بالاك تطول و تجوز عليك ايامات واعرة و ليل كامل مع السهرات و نهار تفكير و مانيش نخلع فيك بصح هذا كامل لأنك حبيتي من قلبك و اتخدعتي خويا لعزيز بصح مهما يطولو هاذ ليام يجي نهار يعطيك ربي الصبر و النسيان تأكد من هاذ الشي و ربي يعينك على واش راه يفوت عليك و يعطيك ما خير منها و بالنسبة للثقة لالا موش حل اننا نفقدو الثقة كليا هكا رايح تظلم روحك و تظلم ناس ممكن يكونو ملاح بعثهملك ربي .لازم تعاون روحك و تتفكر انو كاين ربي و الحياة عمرها ما تتوقف عند شخص لكن تستمربحلوها و مرها و قلبي معاك اخي ربي ينحي عليك و يرزقك بما هو أحسن و أخير لك.

[zalamite]

لى عمرو ما حب ماعندوش الحق يعلق على موضوع الاخ.

[بنت الرّحّل]

تحية طيبة وبعد :

أنا أعتقد أنك مازلت في سكرة العشق تعمه :rolleyes:
وكأنك تستعذب الحديث عنها ... وهذا دأب المحبين دائما ...

وأنت تسأل هل تفكيرك حق وشعورك ...
وأنا أسألك هل كانت علاقتك بها حق ...

اندم يا أخي على ما فرطت في جنب الله ولا تندم على أن فاتك محبوب كنت على علم من الأول أنه لا يحل لك ..!

حسنًا ... قد تقول ليس وقتا للموعظة ... وأنا سأكتفي بما ذكرت

ولكني سأقول لك شيئا إن حالك كحال المنتحر الذي يئس من الحياة بسبب جزء منها أتعبه

فبدل أن يصلح هذا الجزء أو يحذفه فكّر في حذف حياته كلها:confused:

وأنت مثله عرفت واحدة من دون النساء فجعلت حياتك وفكرك مرتبط بها فلما لم تكن من نصيبك شطبت جميع النساء من قلبك

ثم أنت تفكر في شيء لم يحدث بعد ولم يحن ...

كأني بك تصنع فيلما في مخيلتك وأنك حين تتزوج بامرأة أخرى فإنك لن تحبها .... ويحي... أتتحدث عن شيء لم يحن بعد ولم تعرفه !
إن هذا لشيء عجاب ...

أنصحك يا أخي الكريم
أن تشغل نفسك بما يفيدك وأن ترتبط بربك ولا تشتغل بالنساء كثيرا وبالفكر بهن فإنك ستتعب لا بل ستضيع

ويوم تفكر في بناء الأسرة جديا فخذ بعين الاعتبار المرأة التي تصون عرضك وتربي أولادك

أما أن تحبها وتحبك فهذا لا يكون إلا بعد الزواج

وحين تتزوج ستعرف ما معنى الزواج ذلك الرباط المقدس وأنه شيء أكبر من أن يختزل في حرفين( الحب) الذي عرفته طبعا
وستعرف ما هو الحب الحقيقي الشريف والفرق بينه وبين ما كنت فيه
ولا تحكم على شيء لم تعرفه بشيء لم تر فيه سوى سرابات ولذات محرّمة حرمت منها

و أنا متأكدة كل من لا يعرف الجنة وحور العين فيها فإنه لا يشتاق لهما ولا يرى أن سعادته الأبدية فيهما لذلك ينشغل بنساء الدنيا عن نساء الجنة وبلذات الدنيا عن نعيم الجنة وما فيها

وكذلك من لا يعرف الزواج حقيقة و نعمة المرأة الصالحة فإنه لا يشتاق إليهما ولا يرى سعادته مرتبطة بهما

هدى الله قلبك ويسر أمرك

أتمنى لك التوفيق

[بلسم غرام2018]

Raby ysabrk

[حضنية28]

يا اخي علاش مرحتش خطبتها من الاول شفتها عجباتك اخطبها متتصرفش تصرفات خاطئة واول خطأ درتو بانك مشيت معاها كيما قلت وهاذي اكبر غلطةدرتها المفروض ملي تعجبك طفلة تروح تخطبها يا اخي وحتى هي ثاني مهيش رايحة تستنا بزاف لان اول فرصة تجيها راح تقبل وان شاءالله ربي يعوضك خير منها

[soheib+206]

الله يصبرك خويا

أنا من رأيي الشخصي أنك تشوف بنت جميلة

مؤدبة بنت ناس و تخطبها

وهي اللي رايحة تنسيك في هاديك الخداعة

أما البنات ماهومش كامل كيف كيف كاين و كاين

مكالاه تفقد الثقة و تولي موسوس ...لالا

ربي خلق المرض و خلقلو الدواء

كاين بنات الفاميليا شوف وحدة و أخطبها

[ما فهمت والو]

خويا راك تهدر هكدا في الاول برك من بعد تلقا بنت الحلال اللي تحبها و تنسيك فيها نحكيلك هدا عن تجربة و انا مريت بنفس حالتك و ربما اكثر

[السي محمد]

كلمة من شخص بمثل سنك

عاش نفس التربة مثلك

مع اختلاف بسيط في التفاصيل


كي تدبّر خدمة و سُكنى و سيارة ======> تقدر تحب وتخمم في الحب و الزواج

=====================

[شهد حنان]

هو صعب ما تمر به وليس بالسهل النسيان لكن عندما تتذكر انها لم تحبك فسيسهل عليك ذلك
فلو احبتك فعلا لبقت معك ولما تركتك فانت تقدمت لخطبتها ..واردتها للحلال حاول ان تركز على مساوؤها وتفكر فييهم كثيرا ....
تذكرا انها لا تستحقك ولا تستحق ان تحزن لاجلها ...
ابني حياتك من جديد ..في الحلال مع فتاة اخرى تقدرك وتمنحك الحب ...وتعيش معك كزوجة لك ..
وفي الاخير ...ان الله هو الذي اراد هذا فلا تعترض على ذلك

[faty05]

لا الومك و لن الومك
لكن لا تخف اشتغل بالبحث عن العمل و تستقر و ابحث عن الحلال سترى كيف ستسهل امورك
ربي يعوضك خير منها
اكثر من الدعاء

[♥' سندس الفردوس ♥"]

الله يصبرك يا رب

[قاتلة الصهاينة]

والله يااخي وش نقلك ممكن تكون حشمت من باباها ترفض الخاطب لي جاها بويسك مكانش عذر.راك قلتها راجل واجد
واكييد مع الزمن تنساها لان البعيد على العين بعيد على القلب
وإذا راك حاسب قلبك مات على الحب راك غاااالط 100/100
صدقني دوك يجيبلك ربي نصيبك وتحبها حب مصرااش
مكانش مثل حب الزوجين لبعض فيه حلاااوة ومودة جامي شفتهم في اي علاقة اخرى وزيد راهو في الحلال
وراني نحكي من تجربة
ربي ينسيك ويجيبلك بنت حلال

[الحطاب سهام]

يا خويا ويا خويا انت راه قلبك محروق وتحوسها تحس بالندم ..وانا يا سيدي ناكدلك بلي ندمت وندبت حنوكها وبكات عليك وتفكرات نهار عيد الميلاد ......بصح ومن بعذ؟؟؟؟يا خويا ذكا راهي في عنق راجل وانت راك تقتل في روحك عليها ....حرام عليك ذكا راهي خلاص مرت راجل ولايحل لك التحدث عليها
اما انك تكره قاع النساء على جالها ...هذا يدل انك انسان ضعيف ....ايا شاوالا هذا؟؟؟اضرب صدرك ونوض...انت راجل وسيد الرجال وبركاك ماتبكي كي النساء...ايا اخدم وازدم ودير التاوين واستقم في حياتك ذكا ربي يجيبلك بنت الفاميلا الي تديرك في مومو العين وتنسيك حتى في اسمك

يا حوجي ويا حوجي على الرجالكي رجعوا !!!!!!jتبكي وتندب على خاطر وحدا؟؟؟؟راحت تزوجت ...ايا ومن بعد؟؟؟خلات الجزائر من النساء؟؟؟؟
ربي يجيبلك ماخير منها ويجيبلك لالات لبنات ان شاء الله...راك سجنت روحك في الماضي لهذا عمرك ماتحس بحلاوة الحاضر .....خلاص عام من عمرك راح خصارة ...ايا شا استفدت من النواح؟؟؟
كونك راجل مالك؟؟؟قسح قلبك واخرج للدنيا ....اخرج روح اخدم وروح للجامع واخرج حوس ونحي على بالك ...ماتنساش بلي راك راجل واذا فراق بنت دار فيك هكا!!!!!!امالا غدوا كي تدخل للحياة الفعلية وتشوف المشاكل نتاع الصح شا يصرالك؟؟؟؟
خويا الصراحة ماراكش صغير راك 27 عام يسما راك ماجور ماكش مراهق باه يغلبك فراق وحدا ...اجمد يا بن عمي ...اجمد

[نهال الجزائرية]

خسارة لوكان حباتك صح تضـــــــــحي ونت نيتك كانت صفية لكن إعلم أن الله سيعوضك بأحسن منها عليك بالصبر وتفائل أخي تأثرت بقصتك كثيرااااااااااا ليس كل نساء مثل بعــــــــــــــــــــــض كاين بنات فملية وتلقى إن شاء الله عن قريب ....... تحياتي

[nadji84]

لا تحزن بل بالعكس افرح
ربي هناك منها ,,,,,,لانها ما تستاهلش قلب يحب بصدق

[الماسة*ميمي*الزرقاء]

قال تعالى-وعسى ان تكرهوا شيئا وهو خير لكم-
انتبه لحياتك الدينية لا الدنيوية وستنسى هموم الحياة
جد لنفسك عملا شريفا و زوجة صالحة وانسى تلك الفتاة وكانها ليست موجودة اصلا

[نورسين.داية]

اعدرك في كل لكلمة كتبتها أخي .........................فرج الله همك .........

[بسمة العمر]

اخطيك برك من الاغاني الرومنسية و العزلة لانها راه تزيد عليك
ارمي عليك كل الذكريات الي تفكرك بيها اي هدية منها........
بدل كلش في حياتك حتى الطريق لي كنت تمشي منها بدلها .......
راه تلقى راحتك شوية....و تفاءل و ادعي ربي هو لي ينسيك و يبعتلك بنت الحلال انشاء الله

[مريم الصابرة]

السلام عليكم خويا
والله فالحقيقة انا شاركت فيموضوعك الاول وقصتك قاستني بزاف انا ما نقولكش حلال وحرام او علاه لا على العكس نقولك ‘نت شاب نادر في وقت صعيب لزاف واش نقولك خويا ممكن تلانلك خلاص ولو ربي متكبهالك تديها غير هي وإذا كان ربي ما كتبش خلاص لازم ترضة بواقعك شوف راح تنضر وتتوجع ويفوتو عليك يمات صعاب لكن فالأخير تنسى لازمك الصبر نقوك لما مثلا تنحرق نهارات الأاولين تتوجه بزاف طبعا الحرق صعيب بزاف ولكن مع الأايام يروح كل شي ويبقى الأثر يفكرك بالحرق هذاك وتبقى خايف من النار طول حياتك لكن خويا لوما النار ما تاكلش لوما النار ما تدفاش فهمتني الطفلة هذي ما نعرفوش ظروفها او اهلها او اي حاجة صرات خلاص هذا ما يعنيش كامل لبنات كيفكيف هي راني معاك ما تزيد دير حتى علاقة ما تزيدش الذنزب على العكس ربي يفرج عليط وتخدم وتخطب ومد كل حبك لخطيبتك اللي راحا تشاركك حياتك وصدقني ربي يعوضك إنت تقرب من ربي وربي راح يبعد عليك الهم وينسيك وتلقى وحدة ممكن نقولك خير منها المهم إنت في هذا الوقت تقرب من ربي بزاف وتشوف النتيجة موفق اخي ما تقلقش روحك ولا يجرحك كلام ختها ربي يفرج وتخدم وتولي لاباس عليك وصدقني تتمناك اي طفلة بالتوفيق