مشكلتي

[مشكلتي]

السلام عليكم ورحمة الله وبركاته.
قصتي هي حبيت بنت لدرجة عشقتها دامت علاقتنا سنتين تعرفت عليها في انترنت كانت تسكن في ولاية بعيدا عليا بزاف. كنا نتكلمو في نات تم الهاتف حتى سافرت و شوفتها و تلاقينا عدة مرات حاولت نخطبها لكن أمها رفضت لأني من غير ولايتهم و خدمتي ماشي تيتيلار رغم اني جامعي.مرات كان يحدث بيناتنا مشاكل وكنا نبقاو مدة مانهضروش.وحد نهار سافرت ليها وتلاقينا وتصالحنا وحكينا على المستقبل تاعنا وفوتنا نهار شباب ولغدوا أنا رجعت دارنا وفرحان وكانت ديما تعيطلي في تليفون وتسقسيني كيفاه وصلت لكن داك اليوم ماعيطتش.أنا تقلكت وعيطتلها ردت عليا وهي مقلقى وقالت كاين حاجة ماشي مليحة !!! قاتلي جا صاحب بابا وخطبني لوليدو ودارنا وافقو عليه. حاولت نزيد نفهم منها لكن بقاة تخلط فالهدرا وقالت راني خايفة قلتلها غدوا نجي نخطبك لكن قاتلي خليني نخمم وطفت تليفون بعد يوم واحد بعثت مساج وقالت صاي كلش خلاص بيناتنا و راهي وافقت باش تتزوج وقاتلي اذا تحبني خليني نعيش حياتي .حبيت نهبل ورديت عليها باش نتفاهمو لكن !!! يا ناس هذي البنت كانت تقولي غير انتا راجلي وراح نكون غير ليك وصلت حتى قالتلي ماتجيبلي والو وانا نعطيك دراهم لكن ماتسمحش فيا وخطبني كنا متواعدين واحد ما يسمح في الأخر مهمايصير. كنت نقولها لكان نتفارقو تبقى تبكي وتقولي مانقدرش نعيش بلا بيك و كنت نقولها موتي تموت. لكن البنت تبدلت 180 درجة و سمحت فيا لأول شخص خطبها رسمي .
السؤال لحد الأن مهبلني هو كيفاش دارت فيا هاك رغم اني كنت راجل معاها لأكبر درجة عامين معاها مازنيتش معاها ولا سلمت عليها.حافظت عليها كنت نحترمها بزاف ونخاف و نغير عليها كنت نشوف فيها زوجة المستقبل بنيت حياتي معها.للأني كنت نشوفها عاقلة ومربية وملتازمة .
حتى الدرك ماقدرتش ننساها ديما نفكر فيها و نستخايل فيها مع انوا فات عام كامل درت كل حاجة باش نكرها وننساها لكن مقدرتش. مرضت على جلها و صرى فيا العجب لأني كنت صادق معاها وهي خدعتني. وراه فيا وسواس حاب اهبلني وهو أنها درك راهي مع راجل غيري يهضر معاها و شوفها و يتلمسها..هذا الشيء أصابني بالجنون لأني حبيتها بزاف و عشقتها و حافضت علها ومنبعد داها غيري وراه يتمتع بيها. كرهت النساء و أصبحت لا أثق فيهم وحتى اني نخمم عمري ولا نتزوج .أجيبوني ماذا أفعل لأنساها

[ما فهمت والو]

السلام عليكم
يا اخي والله وكاني نقرا في قصتي لكن الفرق بيني و بينك اني حتى و ما نسيتش راني نتناسى لانو مكنش فرصة اني نرجع حتى و لو انها مازالت تقرا و مازال ما تزوجتش و مرة على مرة تعيط تحب ترجع لكن ما نرجعش
انا تاني كنت نحافظ عليها و ندير غير الشي اللي يرضيها كنت نشوف فيها الزوجة المستقبلية لكن فجاة تبدلت 180درجة
لكني تعلمت حاجة من التجربة هادي انو مابقاتش النية في البنات الطفلة اللي تكون معاها عمرك ما تعاملها بحنانة ولا تخمم فيها لانها راح تبدلك عند اول فرصة و اي كلمة تقولها حتى ولو كانت كلمة نحبك و نموت على جالك لازم تدير تحتها زوج خطوط و عمرك ما تصدقها ولا دير فيها النية
اخي الكريم ما هي راحت انت حاول تنساها امحيها من بالك شوف لمستقبلك و ما تخممش في البنات خلاص هي ولا غيرها لانهم كامل كيفكيف كاين امور اخرى احسن من البنات في الدنيا هادي
وكيما قلت لك اخي عمرك ما دير النية في البنات

[imi02i]

ربي يفرج عليك يا أخي هذا مانقدر نقول ...
ماكش راح تبقى حازن عليها طول عمرك لانك هي بنات حياتها مع آخر وخلاتك
النسيان بالاك يكون صعيب شوي ، لكن هذا أمر لازم
لأنو ربما وأنك تخمم في البنت وهي مش من حقك راح تظلمها وتظلم نفسك أكثر
حاول ابني حياتك من جديد وشوف بنت صالحة بعيدا عن العلاقات التي قبل الزواج والسبب راه واضح من معاناتك

[Malva]

أنا تقلكت وعيطتلها ردت عليا وهي مقلقى وقالت كاين حاجة ماشي مليحة !!! قاتلي جا صاحب بابا وخطبني لوليدو ودارنا وافقو عليه. حاولت نزيد نفهم منها لكن بقاة تخلط فالهدرا وقالت راني خايفة قلتلها غدوا نجي نخطبك لكن قاتلي خليني نخمم وطفت تليفون بعد يوم واحد بعثت مساج وقالت صاي كلش خلاص بيناتنا و راهي وافقت باش تتزوج وقاتلي اذا تحبني خليني نعيش حياتي .حبيت نهبل ورديت عليها باش نتفاهمو لكن !!! يا ناس هذي البنت كانت تقولي غير انتا راجلي وراح نكون غير ليك وصلت حتى قالتلي ماتجيبلي والو وانا نعطيك دراهم لكن ماتسمحش فيا وخطبني كنا متواعدين واحد ما يسمح في الأخر مهمايصير. كنت نقولها لكان نتفارقو تبقى تبكي وتقولي مانقدرش نعيش بلا بيك و كنت نقولها موتي تموت. لكن البنت تبدلت 180 درجة و سمحت فيا لأول شخص خطبها رسمي .
السؤال لحد الأن مهبلني هو كيفاش دارت فيا هاك رغم اني كنت راجل معاها لأكبر درجة عامين معاها مازنيتش معاها ولا سلمت عليها.حافظت عليها كنت نحترمها بزاف ونخاف و نغير عليها كنت نشوف فيها زوجة المستقبل بنيت حياتي معها.للأني كنت نشوفها عاقلة ومربية وملتازمة




للأسف لا أستطيع الاجابة عن سؤالك لأني أجهل كيف تفكر القلوب الخائنة*

*بغض النظر عن حكم الشرع على مثل هذه العلاقات

[imi02i]

السلام عليكم
لانهم كامل كيفكيف كاين امور اخرى احسن من البنات في الدنيا هادي
وكيما قلت لك اخي عمرك ما دير النية في البنات
نعم ، توجد أمور أخرى أحسن ... وانتم أدرى بها
لكن أن تجمع كل البنات فهذا خطأ ... لان من البنات من هي أمك وأختك وزوجتك إن كتب الله لك أيضا
ربي يهديني ويهديك ويهدي الجميع

[ما فهمت والو]

نعم ، توجد أمور أخرى أحسن ... وانتم أدرى بها
لكن أن تجمع كل البنات فهذا خطأ ... لان من البنات من هي أمك وأختك وزوجتك إن كتب الله لك أيضا
ربي يهديني ويهديك ويهدي الجميع
انا كي نجمع كامل البنات نقصد النسبة الكبيرة منهم و الكبيرة جدا
الهدرة هادي قديمة تاع امك و اختك و زوجتك جيبو الجديد الهدرة و تقولوها كرهتونا فيها احنا رانا نحكو على حاجة مالا مكان علاش تروحو لحاجة اخرى

[Golden Princess]

كيف تخطبها و هي مخطوبة ؟؟ الا تعرف ان خطبة المسلم على اخيه المسلم حرام؟؟

علاقتك من الاول كانت خطأ و هذه النهاية ماهي الا دليل

انصحك بالتقرب من الله و الاكثار من الاستغفار و قراءة القران ...... و الله يشافيك

لا تجعل هذا يؤثر عليك سلبا بل اجعله درسا مفيدا لك .... و المرة القادمة ادخل من اوسع الابواب .... ان وجدت فتاة مناسبة اسأل عنها و تقدم لخطبتها من اهلها و كفى

علاقات محرمة لا نهاية لها.......

و لا تقل انك كرهت النساء و فقدت الثقة فيهن لأنك مسؤول عما جرى لك ....فنهاية العلاقة بهذا الشكل ما هو الا دليل على انها كانت خطأ من البداية

[imi02i]

انا كي نجمع كامل البنات نقصد النسبة الكبيرة منهم و الكبيرة جدا
الهدرة هادي قديمة تاع امك و اختك و زوجتك جيبو الجديد الهدرة و تقولوها كرهتونا فيها احنا رانا نحكو على حاجة مالا مكان علاش تروحو لحاجة اخرى

لا داعي للتعصب ،
ربما كلام قديم لكن الصح يبقى خالد دائما وأبدا
على كل حال ، أنا فهمت سوء وماوصلتش الفكرة
وأنتم أدرى منا وأفهم وأعرف وأحق و.............إلخ
أعتذر
السلام عليكم

[♥' سندس الفردوس ♥"]

الله يفرج عليك يا رب

و يرزقك بزوجة الصالحة يا رب

[الجواهر]

لا تعرف الظروف التي اجبرتها على القبول خاصة اذا كانت الام رافضة لعلاقتكما و انت ادرى بمكانة الام في تحديد مصير البنت و اختيار الزوج
قد تكون مخطئا فالفتاة تبقى ضعيفة امام رفض الاسرة

[حزن بحر]

ربي يفرج عليك اخي
شوف للامام ولازم تنسى
حتى انا صحبتي حبها واحد وقالها ماتخلينيش راني نموت بلا بيكي
وكان معها راجل وكانت معاه مراة
وفجاة ماعيط ماهز وفاتها بردراهي كي المهبولة
هذي ماشي عقلية بنت او رجل
هذي عقلية الخائن والكذاب

[Malva]

لا تعرف الظروف التي اجبرتها على القبول خاصة اذا كانت الام رافضة لعلاقتكما و انت ادرى بمكانة الام في تحديد مصير البنت و اختيار الزوج
قد تكون مخطئا فالفتاة تبقى ضعيفة امام رفض الاسرة
لا هي ضعيفة ولا هم يحزنون من الواضح أنها أعجبت بالخاطب ولم تكن تحب صاحب المشكلة بالقدر الذي كانت توهمه اياه..لو كانت تحبه فعلا لما أقفلت الهاتف وطلبت منه مهلة للتفكير حينما عرض عليها الخطبة والتي تحب باخلاص لاتقول لمن أحبته دعني أعيش حياتي..خصوصا وأن هذا الشخص لم يفرط فيها وطلبها في الحلال.

[ما فهمت والو]

لا داعي للتعصب ،
ربما كلام قديم لكن الصح يبقى خالد دائما وأبدا
على كل حال ، أنا فهمت سوء وماوصلتش الفكرة
وأنتم أدرى منا وأفهم وأعرف وأحق و.............إلخ
أعتذر
السلام عليكم
وعليكم سلام
اختي لا تعصب لا والو رانا غير نتناقشو مكان والو

[marryangelina]

متظلمهاش يا خويا متدريش بالاك ماليها اجبروها انها تتزوج هدا الراجل انا في بالي حاجة انو لي يحب عمرو ما يفكر بلي لي يحبو يقدر يبعد عليه بارادتو كاينين ظروف تجبرو

[نور الملاك]

اخي واش نقولك متحكمش على الناس قبل ما تعرف واش صاري يمكن هدا الطفلة ظروف اقوى منها خلاتها تبعد عليك انا مرانيش ندافع مي الواحد قبل ما يقرا الحاجة لي ماهيش مليحة يقرا قبلها لمليحة انت ضرك جمعت بلي لبنات كامل خاينين ومافيهمش ثيقة لالا يا اخى كاين بنات فاميليا ومزال فيهم الخير كاين راجال يطيحو في بنات خاينين وكاين بنات خاينين يطيحو في رجال نتاع الصح هادي هيا الدنيا واش نديرو

[linda lolo]

شوفو يا شبيبة اياكم انكم تحكمو على البنات كامل كيف كيف راكم غالطين الله غالب صابكم ربي بهذا البنات الي تخلو عليكم بصح كاين افظل منهم واحسن منهم واصدق منهم مادمروش حياتكم على بنات خلوكم بالعكس نهار الي تخمو تتزوجو راح تصيبو الي كاتبلكم وتفرحو بيه بزاف بصح اياكم انكم دمرو حياتكم على جال ناس ماتستاهلش احنا كامل مجروحين لكن كل حاجة بمكتوبها الله يفرج على كل انسان ان شاء الله

[غليزاني 26 سنة]

اخي واش نقولك متحكمش على الناس قبل ما تعرف واش صاري يمكن هدا الطفلة ظروف اقوى منها خلاتها تبعد عليك انا مرانيش ندافع مي الواحد قبل ما يقرا الحاجة لي ماهيش مليحة يقرا قبلها لمليحة انت ضرك جمعت بلي لبنات كامل خاينين ومافيهمش ثيقة لالا يا اخى كاين بنات فاميليا ومزال فيهم الخير كاين راجال يطيحو في بنات خاينين وكاين بنات خاينين يطيحو في رجال نتاع الصح هادي هيا الدنيا واش نديرو

+1000000000000000000000000000000000000000000

[faty05]

انسى انسى
ماهيش مكتوبك
ياك امها مش موافقة يعني مستحيل تكونو مع بعض ... كنت حطيت هذ النقطة في راسك من الاول و نهيت كل شي من الاول
واعلم ان الطفلة حابة الاستقرار يعني مهما احبتك صح صح و نوات تكون معاك لكن لما رفضوا اهلها راح تسماطلها يعني ماكاش مستقبل معاك
اخي خمم هكا و انساها ماكاش بيناتكم مكتوب ما تخممش ذركا في مرت راجل اخر
دير مستقبل تاعك مليح و ادعي ربي ينزع حبها من قلبك و اتكل على ربي و اخطب وحد اخري
و اخطيك من النت و التلفون
كي تعجبك وحدة روح احكي مع باباها و شوفها في دارها و احكي معاها في دارها
هكا تحافظ على قلبك ما تمرض و لا تكسار الراس ,, حتى ربي سبحانو يباركلك و يسهلك في امورك
ربي يعوضك خير منها

[دكتورة بإذن الله]

السلام عليكم و رحمة الله و بركاته
اخي الكريم بالمختصر المفيد ما كتبش المكتوب بيناتكم و الزمن كفيل بنسيانها
لكن اود ان اقول لك يا اخي هاته هي الحياة تلتقي الطيب و الخبيث و تلتقي الصالح و الطالح و تقابل الخير و الشرير ..و...و...
لكن لا يجب ان نعمم و نقول ان كل الناس شريرون لمجرد اننا إلتقينا مع شخص ربما شرير و ربما العكس ..
لذلك لا تعمم و تقول كل البنات سواء فشتان بين بنت الاصل و بنت الفرع ..
و صدقني دائما حين تصدق النية و تلتقي بشخص و تتعامل معه بنزاهة و بعدها يخذلك سواءا له اسباب ام لا
و تفوض امرك لله ..سيبعث الله لك شخص يُكن لك الوفاء و الاحترام و المودة و ينسيك فيمن خيب ظنك
فلاداعي ان تعمم و تضلم النساء لمجرد انك صدمت بواحدة !!و تجعل لك عقدة من النساء تعيق حياتك بل استخلص من تجربتك
ان من تستحق قلبك في المرة القادمة هي زوجتك لا غير فلا تسلمه الا لمن تُتوجها ملكة لبيتك و اُم
اولادك ولمن تجعلك تاج رأسها فذاك هو الحب الحقيقي الدائم الحلال الذي لن يؤول للزوال ..
و اخيرا فلا تيأس اخي لعل في ذلك خير و الخير فيما اختاره الله لك فاسال الله ان يعوضك بأحسن منها ..
هذا ما اعتقده و الله ادرى و اعلم

[مريم الصابرة]

السلام عليكم اخي
اولا انا نشكرك راك من نوع الشباب المفقود بكل صراحة ربي يوفقك فالدنيا والآخرة
بلنسبة ليه إنت تعرف اكثر منا إنها تحبك وعامين ماشي ساهلين باه تجي وتقول خائنة لا وين راك عارف واش صار خاصة كل شي جا على غفلة
كيفاه تتزوج بلخف بلا اي سبب وفالنهار اللي تلاقيتو فيه يصرا الشي هذا
انا نظن ممكن شافوكم أي واحد يعرف اهلها راه صرالها مشكل وزوجوها ماكانش تفسير آخر وماكانش منها رقدت وناضت خدعاتك وماشي حيانة هذي إسمحلي راك تقول انها رفضاتك يعني الفلة ما عندهاش القرار في يدها واش حبيتها دير تهرب معاك وتحطم روحها وتحمك معاها كون واقعي
الهربة تضرها وتضرك وتضر ولادكم مستقبلا
المهم هي ضرك تزوجت وإنت ما تخممش راهي مع آخر وواش راهي دير معاه راه زوجها حلالها وإنت قول ربي ما كتبناش وإستغفر ربي وحاول تبدا حياتك مع اخرى تزوج وما تعرف الخير وين راه على الاقل الزوجة تنسيك والاولاد وثم تعرف هدرتنا هذه المكتوب ربي ما كتبش
هي واعرة وتجربة نتاعكم شابة وإ نت خرجت راجل هذا هو المهم موفق

[7anine 87]

ربي معاك ولكن اقول لك كن جميلا وعسى ان تحبو شئيا

[الحطاب سهام]

والله مافهمت والو وكان هاذو القصص راهو يندارو فوتو كوبي ويتقسمو على الناس باه يعيشو نفس القصص
يا اخي اقسملك بالله ان هناك فتاة عاشت مثل ما عشت وقبلت بالشاب رغم ظروفه ورغم بعد المسافة وقالتله مثل ما قالتلك الفتاة ندير كلشي من عندي غير اتقدم برك ودامت علاقتهم عام ونصف وكانو خلاص متفاهمين وكانو في قمة السعادة وفجاة ومن دون سابق انذار يرسللها الشاب ميساج ويقوللها سامحيني كنت نحبك وحدث امر ولازم نبعد عليك ونتمنى تنسايني وتعيشي حياتك سامحيني سامحيني وبدل هاذا الشاب لابيس نتاعه وخلا المخلوقة في صدمة بين يوم وليلة راح اختفى والمصيبة انها اخبرت اهلها وكان يتحدث مع اختها وتحدث مع والدتها باه يتفاهم معاها ويحدد يوم الخطوبة .....ايا ذكا قولي شكون الخائن المراة ام الرجل؟؟؟على الاقل انت رجل وقادر تتحمل ...وهذي المسكينة ....كي يصرلالها؟؟؟؟صدقوني اذا بقيتو تتبعو في الحب عن طريف الهاتف وعن طريق المنتديات والانتارنات رايحين تشوفو العجب العجاب.......لازم نعيشي الواقع ونهربو من العالم الافتراضي
خويا ذكا الطفلة راهي مرت راجل وحرام عليك تخمم فيها ....بلاك كون تزوجتها كون راكم تفارقتوا ????اذا راك مقتدر اخي روح حوسلك على بنت الفاميلا الي تعمر عليك الدار وتنسيك في اللغبينة وجيبلك دراري صدقني رايحين يعوضوك بشقاوتهم على كل الهموم وكي تشوف ابتسامتهم تنسى حتى اسمك
هي راهي مع زوجتها وانت خويا راك تقتل في روحك ...دير انت تاني امراة وشوف حياتك ..الزواج مكتوب خويا وماتدي غير مكتوبك