مشكلة مع مدرسة تعليم السياقة

[مشكلتي]

السلام عليكم ورحمة الله
انا طالب قمت بدفع ملف لدى مدرسة سياقة للحصول على رخصة السياقة منذ 6 اشهر ودفعت مبلغ 5000 وانتظرت لمدة شهرين من اجل الاختبار الخاص بالكود وبعد الحاح شديد وضعني في القائمة ولكن لم اوفق وبعد رمضان درست لمدة شهر ثم جربت الامتحان مرة اخرى ولم احصل عليه رغم ان اجاباتي كانت صحيحةقررت ان اتخلى عن رخصة لظروف خاصة اردت ان اسحب ملفي فرفض لمدرس ذلك وقال لي بانه يجب ان اكمل المبلغ المتبقب 15000بالرغم من اني لم ادرس اي حصة تطبيقية ثم قال لي يكفي ان تعطيني 5000 مع تنازل من البلدية في الحقيقة انا كرهته واريد ان اغير المدرسة وقررت ا ان لا اذهب اليه مرة اخرى وان اضع ملف جديد في مدرسة اخرى
فهل له حق في المبلغ المتبقي وهل توجد قوانين خاصة بذلك ارجوا ان تجيبوني وهل يوجد اي مشكل اذا ما سجلت في مدرسة اخرى دون سحب ملفي من الاولى

[z.abdo]

قم بتحويل ملفك من هذا المكتب إلى مكتب آخر


بالنسبة لسؤالك لا اعرف انه حقه أولا

[sarl02]

3 اشهر باش اجوز الكود وزيد ما اربحتوش ؟نورمالمو هو يعطيك دراهمك ودوسيك ويطلب منك السماح يا اخي هذا راه القاك نية راه حاب يبروفيتي فيك ...روح ليه للبيرو تاعو وقولو ارجعلك الدوسي واذا ما حبش اقلب عليه الطابلة واخرج وادز امعاهم ما عندو ما اديرلك ....هذا انسان حقار وانتهازي هذا ما ينفع معاه.

[krimo19918]

شوف خوي انا عندي بارمي كل شهر كنت نفوت انت شافك نية هذو ممليحش العقلية معاهم انا قعت 5 اشهر وديته بلا مدفعت رشوة بصح دابزت معاه 2 خطرات وزيرت روحي معاه ووحد الشيرات حشاهالهم قعدو عام ومدوهش انزيدلك خوي القائمة االناجحة ايديرها هو لانجنيار انا انصحك دير ترونسفار ومتعطيه والو ولا حق يديه زير روحك وعطيه الكلام يولي يخاف منك

[نورسين.داية]

انا الذي اعلمه كلما توز مرحلة تدفع قيمة مالية .......
و المشكل انك لم تدرس حتى معناه راك إستغلال في إستغلال ............ بالنسبة لي أنا خسرني الشرير مرتين أيا رحت تكلمت مع مدرسي و قتلو أهدر مع المهندس ....واش يحوس عندي ....قالي خلاص أسما ء هاذ المرة تجيبيها ....و فعلا نجحت

لكن صدقني هي مجرد لعبة يتقاسمون ربحها بالتسوية (أنتا خسرو...و حنا نتقاسمو....) الصراحة باينة

بالنسبة للحل ..مالك إلا سحب الملف من المكتب .....و لك ان تسأل في مكتب آخر حتى لا تكون هناك تبعات وفقك الله اخي


........................،ننننننننننننن............ ........................

[hamza touazi]

اخي كل مدارس الساقة هكا انا تان قريب عام نجوز فيه لاه غالب لظروف الخدمة والمشاكل وصرالي مشكل كبير مع لوتو ايكول راح ليه باباا زيرو شوي ونا زبطت وجهي المهم يقولك المثل الحس الكلب من فمو حتى تقظي صالحك اعلابالي كرهت منو مي لازم تكمل وتزير روحك معاه ومتفشلش انا اكبر متال قدامك قطعت لياس نججيبو مي حمد لله ليوم راني بسيارتي ولعقوبة لخويا كي ليوم جبتو اتحمل تاخدها مني نصيحة

[yacine-08]

لقد شاركت في اختبار الكود ودلك لانك عضو في مدرسته للسياقة ، فاعتقد من حقه ان يطالبك بكامل المبلغ لانك سجلت لديه و هو من اعطاك الفرصة لكي تجوز الاختبار بالرغم من عدم دراستك

المهم كان لدي صديق حدث له نفس المشكل لقد تخاصم مع صاحب مدرسة السياقة و لكن كان دافع مبلغ الملف كاملا ، فدهب الى مدرسة سياقة اخرى ووافق صاحبها باستقبال ملفه و عمر ورقة و امضاها واعطاه مبلغ قيمة التحويل 2000 دج ، تم يقوم بصاحب هده مدرسة السياقة الجديدة بكل التعاملات من اجل جلب ملفك وهدا ما حدث

وانت زيد سقسي

[jirardo]

نفس المشكل عندي مع الحرايمية واشنوا كي تدفع دوسي تعطيه 10000
وكي تبدل يطلب عليك تكمل 5000 لي بقات
وكي تبدل خوا عن واحد آخر يطلب عليك 10000 من جديد

[كاميلا]

حاشاك راهم حرايية وكلاب هادو الا من رحم ربي لازمك تعرف كيفاش تتعامل معاه وحول الملف تاعك وزيد راك مقريتش الكرينو والسيركوي وزيد حطك هو من سي راسو في الكوطا اللي رح تعقب الكود لقنه درسا هاد البزانسي ماشي من حقه

[لؤي02]

السلام عليكم

أخي ليست بمشكلة وملفك ليس مع معلم رخصة السياقة بل هو عند مديرية النقل مادام إجتزت إمتحان الأول قانون المرور إذهب إلى مدرسة أخرى ترتاح لها وأطلب منه تحويل ملفك من عند القديم إلى الجديد حتى بدون إستشارة مدرستك القديمة أما بالنسبة للمبلغ المعطى لا أظنه سيرجع لك لأن سيقول لك قد دفعت عنك ضرائب في إمتحانك الأول

شيئ مهم إتفق جيدا مع المدرسة الجديدة قبل البدئ من الناحية المالية وقل له أنك سبق وأن دفعت لكي يخفض لك السعر
أجبتك عن تجربة مماثلة حدثت معي موفق بإذن الله

[بنوتة كيوت]

خويا متقلق ما والو ربي ورحمتو :sdf: والله أحمد ربي راه le probleme avec le moniteur ماشي مع l'injénieur لانو كارتة أنا صراتلي قريت الكود بالبيان وكان متهلي فيا المونيتور وكي رحت نجوز الكود خفت من التمساح تاع لانجينيور بهدلني وعيط عليا المهم دار فيا حالة كي جبت الباسبور في بلاسة لاكارت مكنتش خادمتها هداك الوقت مهم والله عقدني.مهم وش نقولك هاد الغبي الي راك تقرى عندو مادي بزااااااف انا قبل ما نبدى نقرى اديتلو دراهمو كاملين مليون و800 وكل مرة نروح نجوز ندي 100 الف.بصح خويا راك تقدر تبدل وين تحب بلا ما تكملو الدراهم هكا كنت نشوفهم يديرو.قبل ما تروح تجوز الكود قولي نحفظهولك دوكا راني بروفيسيونال :D:D:D:D:D:Dفيه.حط موضوع برك وبربي تجيبو.:1::1::19::19:

[amrane30]

خويا هذا المشكل صرا لصاحبي دفع فاللدوسي مليون ونص وكي حاب ايبدل مدرسة التعليم ردولو مليون برك يعني هاديك ال500 من حق المدرسة حتى ولو كنت فالكود وانا حاب نقولك كي دفعت الدوسي سنيت 10 ايام هذا مكان فوتت الكود وكل 15 يوم كنا نفوتو الامتحان

[Zakyy]

سلام....
والله يا خويا العزيز ماعندي مانقلك
مي حاب نقلك انا كيفاه جبت البارمي ههههههه
تصدق انهم هم من اتوا الي الى المنزل و اخذوا الملف,+لم احضر ابدا لدروس الكود و لم احضر ايضا لاي امتحان سواء امتحان الكود او السياقة,حتى انني لم ارى وجه المهندس بتاتا ههههههههههه
و مع هذا نجحت
++++++اخذت ال permie بعد يوم واحد من اخذ ال valable
و نسيت باه نقلك بلي البصر ديالي -5
هذا كله بفضل اخي و معارفه
يعني بالمختصر المفيد في هاذي البلاد با المعرفة يا الصوارد

الله الموفق

[بلسم غرام2018]

LA A3LAaaaaaaaaaaaaaaaaaaaM

[ريمة07]

يا خويا زيد حاول مرة اخرى في امتحان الكود بلاك تنجح ماتيئس و ماتحولش أحسن في رأيي

نعرف بزاف ناس ماربحوش الكود شحال من مرة و هوما يحاولو و مبعد نجحوا

ثلاث بنات كانو معايا في اوتو ايكول ماربحوش الكود 3 مرات و هوما يحاولو و مبعد المرة الرابعة ربحوا و مبعد زادو ربحوا لكرينوا من اول امتحان و ذرك راهم قريب يديوا البرمي


المشكل ماشي في صاحب البيرو ، المشكل في المهندس هو الي ينجح و يخسر على كيفوا

لازم ما تربحش العيب مع صاحب البيرو و ربي يوفقك


انا حطيت 10000 د ج قبل ما ندير امتحان الكود و ذرك زدت كملت الباقي ، لازم عليك تكمل المبلغ بصح ماتخرجش من المدرسة حتى تدي برميك

زيد حاول و ان شاء الله تنجح هذي المرة ادعي ربي برك

و كيما تربح فرحنا أوكي ؟؟

[ابو الحارث مهدي]

السلام عليكم أخي ليست بمشكلة وملفك ليس مع معلم رخصة السياقة بل هو عند مديرية النقل مادام إجتزت إمتحان الأول قانون المرور إذهب إلى مدرسة أخرى ترتاح لها وأطلب منه تحويل ملفك من عند القديم إلى الجديد حتى بدون إستشارة مدرستك القديمة أما بالنسبة للمبلغ المعطى لا أظنه سيرجع لك لأن سيقول لك قد دفعت عنك ضرائب في إمتحانك الأول


شيئ مهم إتفق جيدا مع المدرسة الجديدة قبل البدئ من الناحية المالية وقل له أنك سبق وأن دفعت لكي يخفض لك السعر
أجبتك عن تجربة مماثلة حدثت معي موفق بإذن الله









وعليكم السلام ورحمة الله وبركاته

أحسنت الجواب أخي " لؤي"



لا أريد الإدلاء برأيي في حل هذه المشكلة وإنما أردتُ ذكر محاورة وقعت بيني وبين معلم السياقة في أثناء التعلم
للحصول على رخصة السياقة [الشاحنة وبعدها الحافلة] وقد حصلت عليهما والحمد لله عام=(2004)




قلتُ له : بلغني عنك أنك تطلب الرشوة من المتعلمين، هل هذا صحيح ؟
فقال بعد ابتسامة صفراء : لا ... يكذبون عليَّ !!
إنما هم الذين يعطون المال للحصول على رخصة السياقة !! أنا لا أطلبها منهم .
ثم زاد على ذلك ؛ وقال : أما سكان الصحراء فيأتوني بالخروف بشحمه ولحمه ؟
ثم عقب مردفاً لجوابه : أما أصحاب بولحية !! رانا نخافوا منهم، راك ناجح في كل الإمتحانات ( =examens ) ما تقلقش رُوحَكْ




كان هذا جوابه بكل وقاحة وبكل صراحة وقد يجتمان .....وكثيراً ما يفترقان




فَاللَّهُمَّ أَقِنَا شَرَّ خَلْقِكْ

[@fatima@]

انا نقولك اذا خلصت droit d'examain و الدوسي معنده ما يسالك و اذا كانت اجاباتك صحيحة و لم تنجح فالمشكلة ليست فيك بل في صاحب مدرسة السياقة و لانجنيور هما المتفقان على خسارة الممتحن لانو يا تدفع رشوة يا تقعد تما تعاود فيه حتى تكره
اما بالنسبة لتحويل ملفك تستطيع ذلك فقط اختر مدرسة تعليم السياقة التي تريد التحويل اليها و قم بالتكلم مع مديرها و قل له بلي راك باغي دير ترونسفار و هو يقول لك المبلغ المطلوب و ممبعد هو يتكفل بالاوراق تاعك يجيبهم من اوتو ايكول اللي كنت عنده و ناكدلك انو اوتو ايكول لي كنت عنده فور سماعه الخبر سيصدم كما حصل معي و يندم لانه خسرك بصح حذاري تمشي دير ترونسفار عند واحد من اصحابه لانو راك غادي تخلصها دوبل و يخلف فيك واش دار فيك اوتو ايكول الاول لذلك انصحك تبدل قاع الولاية لي انت فيها

[hamadilak]

أخي تقدر تسحب الملف انتاعك وبدون انفعال لانه من حقك اختيار المدرسة الى تساعدك وشكــــــــــــرا

[farah16]

ماممكن قوله أن كل المدارس ليست متشابهة
لا أدري إن كان بالإمكان تغير الملف أو لا ، ما أستطيع قوله فقط أن هناك مدرسة بباب الزوار أمام مقر نجمة يسيروها شباب من المعاملة إلى الطريقة في التعليم ماشاء الله
لا تتخلى عن التعلم في أي شيء كان بسبب المعاملة السيئة
تمنياتي لك بالتوفيق

[flash_122]

lala, enta khelli le dossier dialek 3endou yechrebou, wenta ebda dossier jdid 3end wa7ed autoécole mli7 w rebbi y3awdek
ana sratli w dert kima hakda malgré kont dit el code mé makanch serieu m3aya, yetmeskher bennass, ermitlou l maa w inscrit 3end wa7doukhel welyoum l7amdoullah rani bel permis ta3i

[Cherif 12]

باسم الله الرحمان الرحيم.... السلام عليكم اخواني أخواتي في الله

سأقص عليكم تجربتي مع مدرسة السياقة عام 2012
كان عمري 20 سنة..أرسلني أحد معارفي إلى مدير مدرسة سياقة في بئر العاتر-ولاية تبسة.. و تفاهمنا على كلي شيئ و طلب منى 10000 دينار كدفعة أولى..المهم دفعت 9000 دج..كل ما أملك و أعطاني كتيب قانون المرور..ولم يدرسني..و بعد حوالي 10 أيام شاركت في امتحان الكود في المضمار خرجت لأحضر قهوة لاني لم أفطر ههه و تعبت من الإنتضار.و لما عدت لقيت المدرس قالب عليا الدنيا.. و الانجنيور مسموم يقتل و حكاولي عليه صعيب طاحلي المورال كي لقيتو هو سلام سلام.. قالي واش جيت تجوز نتا قتلو الصنف ب جبد معايا عرفو قبل ما نرجع النفس جاوبت و فالاخير قالي الاولوية هنا لشكون يجوز قتلو كدا..قالي مانيش نحكي على هادي راني قتلك هادي جيت نتكلم قالي السلام أحبط..و مبعدا 10 ايام و انا نتصل بالمونيتور كل خطرة كدبة راني في ألجي راني كدا {اني راح نشري سيارة كدا..كدا.. حتان حكمتو فالمكتب قتلو باينة ما نجحتش قالي نعم.. و قالي خلصني فالامتحان قتلو شحال قالي 3000دج.. يعني بالرشوة هذا يقص عيناني ..قتلو ما تفاهمناش هكدا و منا و منا قتلو رجعلي دراهمي ما حبش..لقيت طفلة عندها معاه 9 اشهر ما جوزتش حتى الكود و ناس بزاف يحوسو عليه و هو ديما هارب من المكتب يخلي في واحد الطفل تماك يستكلف بالغاشي.. حتى لقيت وليد عمي قالي ما ديرش هنا هذا تاع سحت و رشوة و انسان فاسد..الخ عاودت دخلت عندو قتلو غدوة نجي ندي 9000دج تاعي قالي لا ما فيهاش قوتلو بصحتك..غدوة منداك جيت أنا و صاحبي و رانا في زوج قباري ماشاء الله لاطاي..دخلت قتلو اجبد دراهم يا عمي قالي خلص و كمل عندي ولا ما نعطيك والو..درت لصاحبي قتلو هبط الريدو تاع البيرو تماك حشاكم خرى على روحو قالي استنى ما دير والو جبد عطاني 10000دج حسبتهم و رجعتلو 100 ألف قتلو خاطيني عطيتك 900 الف برك.. و ربي عالم ما كنتش راح ندربو بسكو كبير قد بابا حبيت نخلعو برك بش نرجع حقي..و قالي دير طلب و اسحب الملف من الدائرة قتلو حشاكم امسح بيه نتا و الجمهورية الجزائرية اللي خلات لي زيسكرو يحكمونا...المهم دركا رانا في 2015 سجلت عند انسان طيب الوحيد في المدينة ما يخدمش بالرشوة و هادي 5 ايام من ربحت الكود على المرة الأولى..مام الانجنيور هذا باتني قالي ما نقبلش الباسبور و لازم لا كارت بسكو كان مودرة فالشومبرة ما لقيتهاش حكيت معاه بضرافة سمحلي نجوز و جوبت كلش قالي مبروك عليك يكثر خيرو على كل حال..و اليوم المونيتور علمني فالكرينو ماشي كيما لاخور الاول سيارة تاعو ماتكحلش تركب فيها و يعلمك..انسان طيب ربي يكثر من أمثالو و ما يخدمش بالرشوة.. و الباقي تقريب 15 واحد طلبو عليا الرشوة يستقاملي عندهم كل ب 3ملايين ونص..مع هذا السيد دفعت 2ملايين و 450 ألف برك.. و سهل ربي وراني مقبل على الكرينو الحمد لله