انا معقدة [الأرشيف] - منتديات الجلفة لكل الجزائريين و العرب

مشكلتي

2012-09-10, 14:03

مشكلتي هي حالتي النفسية المقعدة
انا وحدة معقدة بالدراجة ومفهمتكش علاش :confused:

مجبتش لباك وكنت نعرف في كلاصتي 3 بنات وهادو لبنات قاع جابوووووووووووه الزهر مكانش

مقدرتش لبارح ندخل واجلت الدخول المدرسي جاتني صعيييييييييييييييبة نروح في كلاصة منعرفهاش وهكدا تعقدت وحالتي راحت

كيفاش ندير !!!!!!!!!!!!!!! نحشم بزاف منقدرش نتخيل روحي في وسط بنات منعرفهمش ماش عارفة علاش جاتني صعيبة

amine9mm

2012-09-10, 16:07

اختى جزاك الله وعفاك ان الله من كترة محبته للعبد يبعد عنه الضر حتى ان كان لا يعرف انه ضر فخسارتك للباك شيء عادي اختي

اما عن هذا المشكل فهم بسيط حاولي التاقلم فقط انصحك بهذا فهو ليس بشئء كبير

ناشدة السؤدد

2012-09-10, 16:21

أنت أختي راهي غايضاتك كي ما جبتيش الباك و صديقاتك جابو أما أنك لا تعرفين أحد فهو عذر فقط

أختي شوفي بالاك نتي ما قريتيش كي ما يلزم يعني ما تعبتيش في الباك

مريتي بتجربة قولي الحمد لله ما كتبش ربي و هاذ العام اقراي مليح ماشي تقراي برك اقراي بزاف باش تديه مليح

ربما كون جبتيه هاذي السنة تجيبي 10 واش ديري بيها؟

نتي اقراي و كوني من الأوائل حتة و ان راكي معيدة ما فيها والو

أما اللي ما تعرفيهمش من البنات خيري صديقاتك الجدد من المتخلقات المتفوقات و سرن معا نحو النجاح

نوكلي على ربي و ادخلي تقراي ما تأجليش بزاف و ربي يوفقك

رحمة من المولى

2012-09-10, 16:35

عادي و مبعد تتأقلمي انا ثاني عاودت الباك و الدنيا انقلبت بيا ذوك الحمد راني استاذة في اللغة العربية اي مشكل في المادة راني هنا نعاونك
ايلا احتجتيني كتبيلي موضوع انا منعاودش نقرا الردود بصح دائما ابحث عن المشاركات الجديدة
بالتوفيييييييييييييييييق

الحطاب سهام

2012-09-10, 16:39

شوفي حنونة ديري في بالك انو هذي فرصة للدراسة قادر انسان اخر لم تتيح له لهذا استغليها وثابري حتى تدي الباك ويكون بمعدل شباب اكبر من نتاع صديقاتك
الباك لازملو تعب وكد هذا ماكان وليس بالامر الصعب اما انك تستحي فلا تستحي ان كنتي تفعلي فيشيء محرم اما انك تدرسي فلما الحياء وتاكدي هذا فقط في البداية من بعد رايحا تتاقلمي حطي فقط حاجة بين عينيك وهي فرحة ودموع والديك بيك يوم تنجحي وبعدل شباب وكلشي يهون

التوليب الجميلة

2012-09-10, 16:43

okhti normal mataklki rouhak ma walou machi ghir nti li 3awadtih ana wahda 3awadtou sah manakdabch 3lik m3a lawal jatni chwiya nwali nakra hchamt chwiya mais nhar lawal ki trouhi khlas yjik 3adi surtout la lkiti kach wahda t3arfiha .et bitawfiiiiiiiiiiik nchaaaaaaaaaalah.

~ فَرْشِـي التُّـرَآبـْـ ~

2012-09-10, 16:43

توكلي على الله ختي وروحي تقراي
كيما صاحبتي لبنات صحاباتك اللولين من قبل تقدري تزيدي تصاحبي وحايد جدد خيري برك بنات عاقلات ومش تاع دخلات خرجات
رورحي اقراي عادي ماكش نتي اللولة ولى اللخرة الي ماداتش الباك وانساي الي فات وحاولي تبداي بداية جديدة وثقي كل الثقة بلي ربي معاك واحسني الظن به
وتاني قادرة كي تروحي للكلاصة تاعك تلقاي بنات تعرفيهم من قبل جاراتك بالاك ولى وحايد قريتي معاهم من قبل ماتدريش
وماعليش عام ويفوت بإذن ربي

ربي يوفقك وإن شاء الله تنجحي وبمعدل مليييح حطي راسك برك ختي
ربي ينجحك

السي محمد

2012-09-10, 16:46

انا ثاني عاودت الباك

و عاودت السنة النهائية

وعادي راني نقرا

و العام هذا ان شاء الله نتخرج ماستر

أسومة المتفائلة

2012-09-10, 16:50

اولا ربي يوفقة فى دراستك
اما باش تقولى صعيبة تدخلى ومتعرفيش البنات مش مشكل راح تتعرفى عليهم
المهم قرايتك انتى قراى ربي يجيب لي فيه الخير

اسعى لرضى الله

2012-09-10, 16:52

شوفي ننصحك اختي انا ثاني مديتش الباك 2 مرات بصح يا اختي لازم ديري الكوراج لنفسك لانو القراية مش عيب انا العام هدا راني راح نعاودو ونقرا ليكور وكلش واللي معجبوش الحال يخبط راسو في الحيط القراية جامي كانت لها عمر ولا حتى تتعقدي راهم يخدمو في دعاوين الشر مش معقدين انتي راح تقراي تتعقدي

لا راح تقعدي معقدة وتقولي هاي هديك دات وانا وانا دك تزيدي العام هدا متديش مالا روحي تقراي واعفسي على قلبك وعام ويفوت واقراي وجامي تحشمي ديري الحاجة اللي تريحك انتي واللي داوه مش خير منك

l'étoile

2012-09-10, 18:28

لا يا اختي انت لست معقدة لكن لست شجاعة
و ايضا انت لن تذهبي الى المدرسة للتعرف على اصدقاء جدد و انما لاعادة البكالوريا و هذا الاهم هذه هي الفكرة الاساسية التي يجب ان تدور في ذهنك و يجب عليك تحقيقها اما الباقي فهو عبارة عن تفاهات اذا منحت لها الفرصة ستضيع مستقبلك استغفري الله و توكلي عليه اعرف سيكون اليوم الاول صعب جدا لكن يجب عليك تخطي هذا الموقف
في الاخير حظ سعيد و ان شاء الله تجبي الباك هاد العام و تفرحي و تفرحي عايلتك هذا هو المهم

Amouna.DZ

2012-09-10, 18:41

علاش سميتي نفسك معقدة نورمال بشوي بشوي توالفي نحي فكرت أنك معيدة تخيلي نفسك دخلتي قسم جديد و لا دلتي مدرستك

aminahassiba

2012-09-10, 18:56

والله غي حسيت بيك علا جال جربتها واعرة في البداية درك هوما راهم فرحانين بلعام الدراسي الجديد ديالهم ما زال ما يعرفوا هو باك غي تبداووو الدروووس تما يولوا وحدهم يتقربوا ليك او يسقسوك او يحسوا بيك عادي ما جبتهش العام لي فات تديه السنة ما شي انت الاولى او ما شي الاخيرة انا والله غي جزت عليها او ما قدرتش نعبرلك العام يجوز بلخف ما تقلقيش روحك خمي نهار تخرج النتيجة او تفرحي والديك ما تخميش واش يجوزلك العام العام يجوز في رمشة عين ربي يوفقك

mhd

2012-09-10, 19:15

قضية يوم واحد
وانتهت المشكلة
والله الموفق
:19:

salma staifia

2012-09-10, 19:25

مام انا عاودت 3 متوسط
قتلتني الحشمة علابالك
بصح انا لي تههاونت
مي كي عاودتي تعاودي تجدي ثقتك بنفسك
هذا مكان
ماتتقلقي ماوالو
انا تاني طحت مع بنات منعرفهمش بصح دوكا تعارفنا وولينا عادي
سمانة زوج توالفي

هدايات26

2012-09-10, 20:04

توكلي على الله وابدئي من جديد واجعلي تجربتك هذه حافزا لك للنجاح....

وصدقيني منذ سنوات حدث معي نفس الشى لكنني لم اجد من يواسيني ولامن ينصحني

لانه لم تكن هناك انترنيت وصداقاتنا كانت قليلة.....بكيت لعدم نجاحي في البكالوريا

وقررت اني مانرجعش اصلا للقراية لاني كنت معقدة على حد تعبيرك....لكن صدقيني دفعت

ثمن قراري ذلك غاليا. وحطمت مستقبلي.... والان عزائي في ذلك تفوق بناتي.....لانني اقسمت

انني لن اتركهن حتى يصلن الى اعلى المراتب.وهاانا اهديك نصيحتي كواحدة من بناتي

حطمي الياس ولا تدعيه يحطمك

منهاج

2012-09-10, 20:08

السلام عليكم

ما تتعقدي ما والو حتى أنا خسرت الباك وعاودته ودخلت جامعة وتخرجت وراني ندور على خدمة عقوبة ليك هي الصراحة جيك

صعيبة باش تعاودي الباك وتغيضك كي صحاباتك يروحو يسجلو جامعة ونتي عادا تعاودي وكل هاد الامور فاتت علي بصح هكدا

وتغلبت ودخلت مع كلاصة ما نعرفهمش مع الوقت وليت صديقة ونساعد كل الصديقات لي ما يفهموش شي دروس بحكم انا

معاودة يا اختي هي البدية واعرة بصح زيري على روحك وتوكلي على الله وانشاء الله تنجحي

عذراء الجبل18

2012-09-10, 20:30

السلام عليكم ورحمة الله
اختي حكايتك نفسها حكايتي بصح لازم نصبرو ونكملو هذا العام راو يفوت الشهر الاول نتأقلمو متقلقيش روحك
ربي يوفقنا

redonne

2012-09-10, 20:50

تبانلك برك روحي تقري خيرلك
رايح تلقاي صحابات جدد
^^
و راح اتكوني الزعيمة نتاعهم
:cool:

lilou f lilou a

2012-09-10, 20:57

يا أختي لالالا تقولي مثل هذا الكلام الحمج الله راك إنسانة عندك عقل نشالله هذا العام تجيبيه
وربي يسهلك

Pure HearT Dz

2012-09-11, 13:22

اختي متقلقيش روحك اكثر من اللزوم ..

انت في احسن حال و لست معقدة وليس هناك امر يدعي لذالك

فعلا شي صعب ان الانسان يفشل في مرحلة تهائية
وقد يكون زملائه نجحو وهو بقى وحده ..

لكن هناك شيئ اسمه عزيمة هناك شيئ اسمه ارادة هناك شيئ اسمه الصبر والانطلاق نحو الاعادة

لا تيئسي واجعلي ثقتك في الله كبيرة .. ارفعي رأسك عاليا واجعليه شامخا ..
ليس تكبرا وانما ثقة بالنفس لتري ماهي عليه الحياة وكفاك نظرا للأسفل
لأن ذالك لايجدي لك نفعا

لاتخافي من الاعادة ولا تتشاءمي من الدراسة بقسم لا تعرفين به احدا لأنه حتما يسكون هناك تكيف وتداخل وترابط بين اعظاء القسم الواحد لا محال فقط
تذكري انك بالبداية

..أخيرا .. ( تفاءلي خيرا تجديه ^_^

عروبتي

2012-09-11, 13:31

اختي هادي حاجة نورمال وديري في بالك بلي ماكيش غير انتي لي دوبلتي راكي تلقايا لي مدوبلين ولي عاودو اكثر من مرة انا ثاني صراتلي وانا كنت من الجماعة القراية مي الزهر ماديتوش في عامي وجاني نفس احساسك مي كي رجعت لقيت بعض من زملائي لي كانو يقراو معايا ومع الوقت راحلي هداك الاحساس والحمدلله اليوم راني متخرجة ونخدم والحمدلله
لعقوبة ليك ان شاء الله ولعام راح يفوت ثم ثم