ساعيدوني

[مشكلتي]

السلام عليكم ورحمة الله تعالى وبركاته

قصتي كالأتي:

منذ مدة يععني حوالي شهر ونصف تعرفت على شاب من منطقتي ولكنه يعمل في عاصمة حاليا المهم كانت اول علاقتنا مجرد صداقة وفقط ولكن بمرور الأيام تعلق بي علما أنه كان ذو اخلاق عالية
كنا دائما نتكلم مع بعض يعني عبر الرسائل في فيس بوك وبعد مرور فترة طلب مني رقم الهاتف لكي نتعرف اكثر رفضت في بادئ الأمر و بعد مرور ايام طلب مني مرة تانية مديتلوا بصراحة شخصيتو جد رائعة وشخص رزين جدا ويفهمني كثيرا ونرتاحو لبعضانا ياسر لدرجة انو ولا يوم منقدروش نفوتوه بلا بعض .ولكن هنا تبدا مشكلتي قبل عيد الفطر بيوم كان راح يرجع لمنطقتنا الي راني ساكنة فيها والي ساكن فيها هو تاني كي جاء سقسى عليا يعني انا حكيتلوا على معلوماتي وكلش شيء مخبيت عليه والوا وانا نقول ربي يهدي ناس هدا مكان يقذفوا في بنات الناس من دون تاكد ولا شيئ مهم قالولو هدرة مش مليحة يعني طعنوني في شرفي وبطبيعة الحال كلام مهوش صحيح لانو من بعد تاكد من صح مهم لما تاكد من برائتي وانهو شخص لي سقساه عليا مهوش في مستوى قالي نفروخا بيناتنا انا حقرتوا لانو جرحني بلكلام لي قالهولي كي كان معصب ومتقتلق مني رغم كل كلام التجريح لي قالوا رديت عليه غير بالجملة هادي ربي يهدي ولا حولة ولا قوة الا بالله يا ولد ناس روح تيقن من هاد هدرة وارجع احكي معايا

لما تاكد رجع يعتذرلي ومهم كان يحوس غير على رضاي انو نسامحموا ونرجعوا كيما كنا
قبلت وسامحتوا والله يعجبني ياااسر ونشوفو ديما بنظرة احترام ولو يكبتو ربي ليا يكون ليا نعم الزوج الصالح

مي خايفة والله الا نزيد نكمل معاه ونتعلق بيه اكثر وميكونش ليا
وزيد على دلك حبيت نجربوا مدة هادي اخيرة قتلوا راهم جاو يخطبوا فيا وماما وافقت قالي والله فرحتلك انا تقلقت منو قتلوا وش بيه دممك بارد هكا يعني امري ما يهمك قالي لا نورمال بالعكس كي تجيك حاجة نتاع خير نفرحلك وقوليلي وقتاه لفيونساي انا زدت هبلت حسيتو يستهزأ بيا ولا منعرف وش بيه
خلاني نخاف منو بصراحة ردة فعلوا كانت غير لي كنت متوقعتها المهم كي شافني تقلقت قالي وين حابة توصلي كي حكيتيلي هكا قتلوا نعرف انا وشنو بالنسبة ليك قالي آآآآوي قالي انى راكي وصلتي لدرجة عالية عندي انا فرحت قتلوا وش هي قالي أختي ههه هم يبمي وهم يضحك انا معدت فاهمة والوا تقلقت وكوبيت عليه هادا بارح ولحد ساعة مكلمنيش ولا سقسى عليا

درك فهموني وش نفهم من تصرفوا هدا ؟؟؟:mad::mad::mad:
عذرا على إطالة حكيتلكم هكا باه تفهموني مليح برك
أنيروني من فضلكم

[الدكتور سام]

السلام عليكم اختي.اختي هده واضحة وضوح الشمس.هو يريد قضاء وقت فقط معك لانه صارحك بدلك و انك بالنسبه له مجرد اخت.و ترك لك حرية الاختيار و لدى انصحك بالابتعاد و رب يرزقك الزوج الصالح

[محمد1482]

هذه علاقة غير شرعية ابتعدي عنها احسن و لو كان يريد الحلال لتقدم لكي بعد ان سال عنك

[youssou barça]

ختي ما تعمريش راسك بيه هو باين ناوي علاقة عابرة و كون جا حاب يوصل معاك لبعيد مون ردة الفعل نتاعو كانت زي خلاف و اش نقولك رب يهديه و يهدينا كامل

[مَجْنُوْنَةٌ أَنَاْ]

السلام عليكم و رحمة الله تعالى و بركاته
اختي راهو قالهالك ديراكت ، كيما أختوو ،
و زيد بزيادة كيما قلتيلو على الفيونساي فرحلك !! وش معناتها هادي ؟؟!!
ننصحك تبعدي عليه و كون تصيبي بدلي النيميروو تاعك بش ما يزيدش يغرك الشيطان
نيميرو جديد و توبة نصووحة و ان شاء الله بداية جديدة
و اذا كان هو مكتوبك ( مع ان المعطيات تدل على انه غير مهتم البتة لكن الله اعلم ) راكي تديه بلا هادو المقدمات اللي مامنهم حتى فااايدة
العكس تدي منهم خير الذنووووب وتكسار الرااااس
و موفقة

[سهام1]

اختي لوكان بغاك كون جاء خطبك اقطعي علاقتك به ومن ترك شيء لله عوضه الله خيرا

[lilou f lilou a]

اختي لوكان بغاك كون جاء خطبك اقطعي علاقتك به
وربي يسهلك تستاهلي خير منواااااااا

[دكتورة بإذن الله]

السلام عليكم و رحمة الله و بركاته
اختي الكريمة السائلة بخصوص فهم تصرفه هذا يعلمه الله
لكن كتحليل لكلامك
انصحك بترك العلاقة هاته فهي في الضلام و انت تغضبين الله كونك تحدثين اجنبي
فلا تكوني ممن يتخذن الخذن
لذلك توبي لله توبة نصوح و كما فصلت خط الهاتف افصلي عاطفتك عنه و اياكي تزيدي حرف معاه
لانه حين يجد الفراغ قد حل به سيرجع وسيقول لك كنت امزح و انت لا تقبلين المزاح
او يجد لك حجة ..كي يرطب قلبك فاحذري اختي
و من يريدك زوجة ياتي لبيتكم فانت لك اهل و عائلة و معلوماتك عنده و يعرف بيتكم فماذا ينتظر !!
صدقيني قلتها مرارا و تكرارا و اغلب المشاكل هنا تتكرر و دائما نكرر لكم الرد
من يريدك زوجة ياتي لبيتكم و يخطب كالرجال و يدخل من الباب و يخاف الله في بنات الناس
و اعراضهم و لا يغضب الله باي علاقة ضبابية ..
أما من يريدك خليلة و صديقة...سيضل على النافذة كي يستمتع بك و يُسمعك زقزقة العصافير
و حين تقولين له متى ؟و ماذا ؟ سيتحجج و يتماطل و يسمعك قصص الف ليلة و ليله ....( يعني يعقب بيك الوقت )
اترضين ان تكوني فتاة منتهية الصلاحية ؟!!
او فتاة في قائمة الاحتياط ؟!!
اترضين هذا لنفسك!!!

[loulou02]

أنا تبان لي على حساب ما فهمت و الله أعلم أنه كيراح سقسى عليك و قالولو كلام قبيح عليك بدل رايو من جيهتك ، يا أختي إحتسبي أمرك للله هو يكفيك شر عباده ، كاين شي جيران يا لطيف يحوسو غير يكحلو صورة البنات ، ربي يأخد فيهم الحق .

[manels]

السلام عليكم اختي

راني حاسة بيك ودك تقولي من الردود انو كيفاش يطلبو نقطع العلاقة مش ساهل الحال لاني تعلقت بيه صح كاينة منها بصح الحياه مواقف يعني لازم ديري موقف وطبقيه في لمج البصر لانو اكيد كون ماطبقيهش رايحة تتراجعي


يا اختي هذا كان ممكن ناويك لكن كي سقسا وش قال ايا مكانتك طاحت رغم انو قلتي تاكد لكن التوسويس بقالو في راسو ايا قال خلي نعقب ايامات ومن بعد بالسلامة


اخطيك يا اختي ديري موقف واقطعي العلاقة واذا ناويك راهو يبان لانو يعرف معلوماتك


تحياتي

[fatix]

slm okhti hada mahouch nawi 3la l7lal ghir khalik menou w d3i rabi yeb3athlek ben l7lel eli yestahlek

[محمد...عبد النور]

حين تستحكم منا العاطفة فوداعا أيها العقل...........هههههههههه
راه صرحلك مباشرة و نتي قلتيها : حبيتي تجربيه ، راكي جربتيه و خبرك
واش تنتظري منه
لو ناوي على الزواج ، راه يجي ليك و يبدى بالخطبة ...لكن السيد قالك راني كي خوك
لو جا يعرفك كي خته على الاقل يحفظ هيبتك و كرامتك ..بمعنى انه لو قلتي له انخطبت يعرف انك لغيره فينسحب انسحاب الرجل الشهم
لكن نتي راي تأملين في أمر لا امل منه
ربي يفرحك و يرزقك زوج صالح و الافضل لكي ان لا تتعلقي به و تبني امورك على سراب
ســـــــــــــــــــــــــــــــــــــلام

[abdel02]

ردة فعلوا عادية لأنو ناويك وانت تجربي فيه
هذا اكبر مفسدة،أقطعي علاقتك بيه وخليه
يدخل من الباب،وربي يسهل.

[عميروش الحر]

انت سألت عن الحل ...
انا ارى ان الحل .. في قطع العلاقة نهائيا وان ارادك له فهو يعرف باب البيت يجي يخطب .. والا فكل الكلام في الريح
ربي يسهل

[راجية الفردوس الأعلى]

نقولك جميع هدا الشي اللي تخممي فيه راهو حرام وفكر خاطئ
وش تتصوري تكون نصيحتنا غير اننا نقولولك بعدي عليه وعلى جميع الناس اللي كيفو
ومكان لاه تعمري راسك بيه والاوهام

[YARMORACEN]

بساطة : خدعة راهم جاو يخطبوني أصبحت مكشوفة و قديمة ، و أنصح البنات بالتخلي عنها

هداك الشاب يعرف بلي تبغيه و راكي تحوسي تصيديه برك

كي فرحلك و قالك أختي راه يضحك عليك لخطر يعرف بلي ماركيش صادقة

ما نقولكش بلي يحبك و لا لا ؟ و ما نقولكش قطعي العلاقة و لالا ؟

في هد الحالة لزمك تتعاملي معه على أساس أنه شخص عادي و هو راح يحس بالفرق .

الله يسهل أختي ، حاسس بيك الحب الصعيب ، و مش ساهل باه ننسو أو نقطعو العلاقة

[مبروكة الصحراء]

يوقت بيك و أنا راني حاسة بلي حتى الهدرة لي قالك قالوهالو عليك ماكانش منها
راه يحوس على السبة لي تخليه غير ملتزم من جيهتك
و هذا هو السبب لي خلاه يفرح كي قولتيلو تخطبت
يا أختي صدقيني راهم خاوتو بزاف يحبوك كي تهدري معاهم في التلفون و يموتو عليك بصح إذا جات للزواج يصيبولك ألف سبة و يقولك الله غالب من فوق جهدي باه يبان قدامك خاطيه ملائكة
انسيييييييييه و بلاك تعيطيلو و لا تحوسي عليه بلاااااااااااااااااااااااااااااك
و ربي يعوضك خير منو

[Golden Princess]

السلام عليكم

يا اختي ماتعفلينه خطأ فادح عليك بقطع علاقتك به و الابتعاد عنه فورا........ و انتي واش يضمنلك بلي غير انتي الي راه يهدر معاك ......نقولك حاجة ديريها في بالك كيما طلب رقمك طلب رقم المئات قبلك و كيما راه يهدر معاك راه يهدر مع غير ....
اخطيك منو و هذا مهما يكن راه أجنبي عليك...يعني محرم عليكي ...
و تاني ردة فعله كي قلتيلي بلي خطبوك ما بينتلك والو؟؟ كلشي راه باين فلا تحاولي اهفاء الشمس بالغربال
اقطعي علاقتك به و توبي الى الله .... و الله يرزقك الزوج الصالح و يهديك

[assala BaC2012]

يا بنات استعيذوا بالله وابتعدوا على هاد الحوايج لي ميوصلوا لوالو غير معصية الله كل وحدة مكتوبها في هاد الدنيا ومخلوق ميقدر يبدل هاد الحقيقة انا نوصيك عودي الى وعيك و رشدك وتوووووبــي

[انانيس]

السيد باين يتمسخر خطيك ايلا حبك صح يتقدم لداركم مادام يعرف عليك كلش بالتوفيق اختي

[تفـღـآؤل ツ وردٍ✿]

درك فهموني وش نفهم من تصرفوا هدا ؟؟؟



هَذَآأ وآضِحٌ جدّآ ، هذَآ الرّجل [ يعدِّي بيكْ الوقتْ ] ~

اقْطَعِي كلّ علآقةٍ معــهْ *

كَـآأن الله فٍ عونِكِ

[أم محمد و آيه]

راكي تسقسي وقاع ....مدامك قالك نفرحلك في هاد الخطبة غير غسلي يديك منو باسكو هدا مراهش ناوي للخير ...

خطيك من هاد الرجال وقارعي لمكتوبك يجي حتى لداركم

ربي يهنيك ان شاء الله

[نبراس الصداقة]

السلام عليكم
أسمحيلي اختي راها باينة تعيط
راه يقولك بكل اللغات أنه قاعد يجوز في الوقت
مش محتاجة فهم كبير
ولا تحليل اخر
وزيد يا أختي اسمحيلي
الي ناوي الحلال يقصد الحلال
والي ناوي الحرام يكمل يلعب بنات الناس
فماكانش حلال يجي بالحرام
وماتركبش
خليك منو و اربحي عمرك و قدرك
خير
الي ناوينك صح عمرو مايرضالك تغضبي ربك منك
ولا تخوني أهلك لأجلو
الي يحب أنسان يتمناه يكون مرتاح و تكون علاقته بيه في الضوء قدام ربي و عبادو
وعمرو مايرضالو الغلط و لا يفسد علاقته بأهله
أرجعي كيما كنت من قبل يا أختي
تربحي دنيا و اخرة
لان أهلك الي حطو ثقتهم فيك
مايستاهلوش تبيعيهم علاجال شخص ماقدرش و عمرو ماراح يقدر وش تديري علاجالو
وربي يسترك و يسترنا في الدنيا و الاخرة يا أختي
اسمحيلي اذا قسيت بكلامي
لكن هذي هي الحقيقة المرة الي لازم تشوفيها باش تقدري تفيقي من وهم
أسمه للأسف الحب