لا اعرف ان كان يحبني ام تمضية وقت

[مشكلتي]

السلام عليكم يا اخوتي ترددت كتيرا و اخيرا قررت ان الجا اليكم لمساعدتي في حل مشكلتي و هي انني منذ مدة انتبهت لشخص كان يلحقني باستمرار اراه في كل مكان حتى صرت اخاف منه و شاء القدر انني اصطدمت به قرب سيارة و عندما رايت وجهه اندهشت فقلت له اسفة اما هو ابتسم و اصبح يحدق بي حتى انني اندهشت المهم مرت الايام و في كل مكان اجد دلك الشخص لكنني اصبحت لا اخاف منه و اصبح يعجبني كتيرا جماله اخلاقه كل شيء فيه رائع حتى انني قلت لامي انني معجبة به و كانت اول مرة اخبر بها امي بشخص اعجبني صار يعجبني كتيرا و صرت احبه و سالت عنه لكي اعرفه جيدا لكن يا ليتني ما سالت لانني قالوا لي ان خاطب بنت يعني راح يتزوج عن قريب انا ما صدقتش لان هو بنفسه قال لصديقتي قوليها نحبك تاع صح قوليلها نموت عليك انا وليت نحبه خاصة انه كل يوم نتلاقاه مين نروح نقرى كل صباح نشوفه اطلب مني رقم الهاتف لكن ما عطيتهش لان تقتي نزلت شوي مين عرفت بلي خاطب بنت لكن و الله انه كل ما يشوفني يطلب الرقم و ما يملش رغم انني عدة مرات تجاهلته لكن لم يمل ابدا سالت اخاه و قال لي بلي راح يتزوج لذا قررت ان انساه لكن و الله ما قدرت خاصة مين نشوفه نحب نهبل و الله كل ما نشوفه يقعد يبتسم يطلب رقم الهاتف ما يملش ابدا و رغم انه عرف بلي انا عرفت بلي راه خاطب لكن ما قطعش الامل حتى ان نهار لي خرجت نتائج البيام جا هو تاني و استنى النتائج معاي يعني و الله ما عرفت واش ندير ساعدوني كي ندير ننساه حتى انني عرفت بلي شاب متخلق لكن الله اعلم وليت نشك بلي راه خاطب لكن حابة ننساه

[/زهرة عصفور الجنة/]

يا ابنتي هو يمضي الوقت وتلاعب بمشاعركي ذئاب بشرية همهما نهش أعراض البنات لي يحبك يجي لبيت أهلك .وعلى حسب ما فهمت سنكي لا يتجاوز 16سنة يعني مشاعر مراهقة سرعان ما تنسينها دوائكي أن تصديه وأن لا تعيري له إهتماما إهتمي بدراستكي فقط

[YARMORACEN]

الحب لراكي تحكي عليه ، ماكينش منه ، الحب من أول نظرة ، لا وجود له ، ممكن هو معجب بيك ، لكن محال يحبك غير هكدا بلا ما يحكي معاك بلا ما يعاشرك و يشوف تصارفاتك ، نقولك هدا مستحيل .

الحب = تضحية ، الشخص لي يحبك صح مستعد يضحي بحياته من أجلك .

[**د لا ل**]

اختي انت تدرسين في المتوسطة

والرجل على الاغلب يقرب الثلاثين ان لم يكن قد تجاوزها

وراهو داير المراة تاع الدار كيما نقولوا

وباقي له الثانية بااش يتسلى بيها ويجوز الوقت حتى بعد زواجه وان لم تكوني انتِ فهناك غيركِ

فاااااااحترسي عزيزتي منه وصديه دائما مهما حاول وضعيه عند حده لان امثاله يبحثون عن الصغيرات في مثل سنكِ لجهلهن بعواقب الامور ولانهن ضعيفات اتجاه هاته الامور

اتمنى تكوني فهمتيني اختي

[aihemsara]

هههههههههههههههههههههههه يخي حالة يخي,,, ياااو راكي صغيييييييييييييييرة
الحاجة لي عجزت نفهمها و حبستلي مخي صح
واش قالتلك ماماكي؟

[karimblida]

ما قولتيناش ماماك كيفاش دارت معاك

[ولد حمد الباتني]

نتي مازلتي صغيرة تقراي بيام يعني 15 سنة تقريبا وهوا على الأقل 27 يعني كثر منك ب 12 وخاطب راح يتزوج
راهو يلعب بيك وحاب يطيحك في الفخة ويستغلك ووووووو

[الهـ ع ـاشمي]

آآآآآآآآآآه يا الحب وين كنت من لي كنا صغــار ؟؟؟

:34:



ويقولك مازال الدنيا بخير

واش من خير يا لاخر؟؟ الجيل تاع اليوم راه يطير

:d

[عميروش الحر]

الله اعلم هاد لاكسيون شفتها في مسلسل هندي ...
خلوني نبكي خلوني نندب خلوني نشكي خاطاك قلبي تعذب ....
اخخخخخخخخخخخ
اين نحن سائرون
يا بنتي كملي قرايتك وجيبي الباك واقري فالجامعة وكي تكملي تصرالك عفسة كيما هادي اعطيلو لادريس ديراكت وقوليلو ارواح تخطب ...
اما ضرك اخطيك من المسلسلات الهندية والتركية والميكسيكة
راكي صغيرة
علابالك لوكان يماك جات عندها عقلية تع ناس زمان تقوليلها عجبني واحد تدخلك للبيت و تزرقك بالضرب وقادرة حتى تحبسك ما تقريش ههههههه
ربي يهديك بنتي

[رجاها 22]

يا اختي الامر واضح وضوح الشمس علاه راكي تعييي وتعدبي في روحك
هد الشاب همه الوحيد تمضية الوقت اكتر قبل ان يستقر مع مخطوبته ادا كان يحبك فعلا لماذا لم ياتي لخطبتك انت بالاول ام الحب نوعان حب من اجل الزواج وحب من اجل اللهو لا يا اختي دعيك منه و حالا والله العظيم انت المتضرر الوحيد في النهاية سياتي اليوم الدي يتزوج فيه وحينها لما يراك امامه سيغير الطريق وانت تنظرين اليه

[imi02i]

يـاأختي حسب مـاقريت من المشكـل وفهمت راه إتباع هوى فقطـ ، ولا حب ولا هم يحزنون
بالإضافـة إلى تلك اللقاءات والإصطدامات عن طريق الصدفـة فهي لا تدل على شيء
وإنما لشديد الأسف خدموهالنا في المسلسلات الهندية والتركيـة
وزيد مادام راح يتزوج إخطيك من طريقو ، وألهاي بشغلك
وحاجة أخرى: متطيحيش القدر مع أمك وتحكيلها على حاجة مش موجودة
وأنا لا أقصد أن أجرحك أو شيء من هذا القبيل
ربي يفرج عليك

[lilou f lilou a]

راك صغيرة يا بنتي

[مبروكة الصحراء]

ياسيدي لوكان جا يحبك و يموت عليك يفسخ الخطوبة نتاعو و يخطبك انت هذأ أوضح فعل ممكن يديرك إذا كان فعلا يحبك
انسيه راه يلعب بيك و لا قوليهالو الي يحبني يجيني للدار
و حبيبتي راكي صغيييييييييييييييييييييييييرة بزاف حطي راسك في قرايتك برك و يجو النهارات و تنسيييييييييييييييييييييييه

[هديل29]

شباب أخر زمن أحرزي روحك اختي راهو يلعب عليك

[شهد12]

يا اختي مازالك صغيرة وهدا راهو الا حاب يفوت الوقت معاك,وزاد قلتي راهو خاطب يعني راهو باين بلي راهو حاب التمسخير هدا ماكان
التهاي فقرايتك خير لك وهده المشاعر ماهي الا اعجاب منك ليه ماهو حب ولا شي تاني

[بشـرى]

أنا كي كنت في مثل عمرك ما علاباليش اصلا بالحكايات هذوووو , والله الحال تبدل بزاااااااف

يا أختي راكي صغيرة وحتى لو كان حاب يخطبك مزلتي صغيرة على الخطبة , راه يتمسخر بيك كي لقاك صغيرة , كبري عقلك وحطي في بالك بلي قرايتك أهم حاجة عندك , اتلهاي بيها ونحي من راسك التخمام هذا تاع يحبني ونحبو ومنعرف وااااش ........

عيشي حياتك , استمتعي , اخرجي , اضحكي ........ وكل حاجة في وقتها مليحة

درك تولي 21 ولا 22 سنة ويجيك ولد الحلال للدااااااااااااار وتولي تضحكي على روحك على التخمام هذااا

ربي يخليييييييييك يا ختي الصغيييييييرة اخطيييييييك واتلهاي بقرايتك

[symsem22]

شوفي أختي انت راكي صغيرة على هذا الشي حاجة باينة بلي باغي افوت معاك الوقت اوزيد بالزيادة خاطب ،شوفي أختي لاحب ولازفت ما ديريلوش قصة خلاص لانو هذا النو ع يلعب بيك حتان يشبع اومبعد ايقولهم انا مانديرش الثقة في لبنات ،
نصيحة من عندي اهتمي بقرايتك او ماتعمريش راسك بالامور هذي راكي صغيرة والدنيا هذي صعيبة

[خدووجة]

ذئب بشري يحاول اصيادك
احذري منه يا بنت الناس
راح يفتح بيت و في نفس الوقت حايب يضيعلك حياتك لأنك في عمر ابنته
أي حب هذا اللذي تتكلمين عنه !!!!

[نور الجنة س]

يا اختي مزلتي صغير كملي قريتك و نسايه
مزال خير قدام مزلت تزيدي تشوفي
تهلي في روحك و مدريهش في بالك ريح تنسي و يكون من ماضي
ردي بالك من دنيا

[اخت في الاسلام]

يا اختي غير نحيه من بالك و خلي عقلك كبير ، علابالي جيك صعيبة بصح تروحي للثانوية تشوفي الدنيا مليح و زيد الجامعة و تشوفي ماخير منو و تنسايه
هذا حب المراهقة برك كي شفتيه مهتم بيك و يلحق فيه حسيتي روحك تحبيه
و هذا راه غير يفوت في الوقت هو عندو خطيبتو و حاب يتزوج و رايح يتزوج ونتي ؟؟؟؟؟؟؟ عندك قرايتك هي في الاول و مازلت صغيرة على الزواج

هو الان راه يدير هكذا باش يخليك تتعلقي بيه و تهدري معاه و تتلاقاو و نهار هو يتزوج و يتهنى .............هو يروح و يخليك و نتي تبقاي تبكي وحدك و تلومي في روحك

طلبتي منا ننصحوك و نصحناك لوجه الله و بالاك تغلطي و تحليلو العين و كي يتزوج رايحة تشوفي كيفاه يعود يدير

[فريال المحتاجة عفو الله]

أختي الصغرة غير اخطيك و الله
حطيني كي أختك الكبيرة و اسمعي مني ... الراجل راااو خاطب وااش حاب منك ؟؟ ما خممتيش فيها ؟؟ كيفاش هذا قلبو يهز 2 في نفس الوقت ؟؟؟