مشكلتي أهل زوجي

[مشكلتي]

السلام عليكم ورحمة الله وبركاته
عاونونى الله يرحم والديكم
اليوم حبيت نفرغلكم قلبي شوية وتانيك باش تعاونونى ربي يحفضكم وتقولوى واش ندير
المهم انا عندي 18 سنة غير كيما تزوجت في فيفري ورانى بالحمل عندي 3 اشهر
المهم انا مع زوجى الحمد لله ايحبنى ونحبو بصح المشكل تاعو انو يسمع بزاف لاهلو يعنى مازال وليد يماه الصغير
وماتفهمونيش بالمقلوب وتقولو انو نحب نبعدو على يماه والله العكس درك نحكيلكم تفهمونى
انا زوجى عندو اختو والله صدقونى نحبها بزاف ونحب نكسبها بزاف كي هي كي عزوجتى
بصح للاسف هم يبانولى ايغيرو بزاف كي يعاملنى زوجي بمعاملة جيدة ويقلشنى قدامهم كيما
ومرة مرة نخرجو انا وهو ندورو شوية بصح كي نرجع للدار نلقاهم مشنفين عليا ماعلى باليش علاه
وفي رمضان هادا رحت للطبيبة على الحمل تاعى قاتلى لازمك تمشي ورا الفطور شوية اذا تقدرى قلت ايه نروح نصلى التراويح
مع زوجى منها نمشي شوية منها نصلى
حكيت مع زوجى قالى ان شاء الله رحنا انا وهو وقلنالها اذا تروحى معانا نصلو التراويح
قاتلنا لالا روحو وحدكم قالت لوليدها كي قتلك العام اللي فات خلينى نروح قتلى لالا ودرك مرتك خليتها تروح
فوتناها ووليت نروح
ومن بعد وليت نتعب وتقبضنى الددوخة من الوقاف بزاف مارحتش قريب 10 ايام ومن بعد عاودت وليت نروح وليت كل مانروح لازم نروح ليها ونقولها رانى رايحة
كون مانقولهاش تزعف منى الله اعلم علاه
بصح المشكل هو انو كل مانجي من التراويح نروح نقعد معاهم هي ولوستى نلقاهم مشنفين عليا ولا يهدرو معايا ثقال
ومن بعد في الصحور كي نتصحرو ونبداو نغسلو الماعن يدورو عليا ويقولولى
راه اداك راجلك
ووكلك برى وراه يشريلك اللحم برى وتاكلو واحدكم
والله والله والله في هاد رمضان كامل مافاتتلى حاجة وانا مع راجلى برى برك مرة اتشهيت اللحم وانا نتوحم جابلى راجلى وجاب لختو
ويماه كانت راقدة ماجابلهاش
كي نضت الصباح قاتلى عجوزتى تاكلى واحدك اللحم قتلها ياك جابلى ليا وجاب لبنتك وانت كنت راقدة
الله غالب
ومن بعد بنتها نطقت قاتلها يما انا وجابولى غلطة
ماصبتش واش ندير نسكت ونخليهم هاكدا رباونى والديا
وهادي المرة التالية قاتلى الطبيبة مكان لاه ترفدى الثقيل حتى لو كان بيدون لانو البيبى راه هابطلك
وانا والديا وصاونى قالولى بلاكى ترفدى الثقيل ولا ارواحى عندنا
قلت ماعليش واش ندير خير من نجيب لهدرة لروحى نعاونهم على قد مانقدر
واحد النهار في رمضان
قلت نقى شوية شمبرتى في رمضان قبل العيد البيوت منقيين وانا عروسة جديدة شمبرتى موسخة بديت على 10 تاع الصباح بديت بالتطباق تاع الحوايج طبقتهم
حتى 5 تاع العشية وانا غير مع الشومبرة تاعى هبطو للكوزينة
وماقالوليش لانو كنت غالقة ونقى باش مانديرونجيهمش كانو راقدين
هبطو طيبو وطلعو كي طلعو قالك ماحبتش تهبط اتعاونا وانا والله ماشي بلعانى كنت لاتية
مع شمبرتى
جا راجلى مشحون عليا وحب يضربنى قالى قالولى ماهبطتيش معاهم للكوزينة قتلو راك تشوف فيا واش رانى ندير وزيد والله ماشفتهم كي هبطو
انا زعفت بزاف لانو قالولو وكي شغل صح ماحبيتش نهبط معاهم
فات نهار ماشفتوش وعيطتلو قتلو اشفى عليها مليح مليح
اضربنى وانا حامل بوليدو
غاضتنى بزاف لانو ماشي المرة الاولى وكل مايضربنى ايقولى روحي لداركم نقولو لالا نقعد هنا
بصح هادي المرة عيطت لخويا جا ادانى
ودرك عندي 5 ايام وانا مرمية في دارنا لحد الساعة هادي ماعيطلى ماعيطتلو
وهادا اول عيد ليا
بصح ماعيطلى ماقالى نجي نديك
وانا حلفت مانروح ش ومانعيطلوش
حتى هو ايعيط بصح هو والو
انا درك حابتكم تنصحونى واش ندير

[aihemsara]

و الله يا اختي ما علابالي واش نقلك لانو كاين دااايما حساسية بين الزوجة و اهل الزوج
لوكان نقولك ابقاي تما في دار والديك,, تخيفي تخربي دارك
و لوكان نقولك روحي لدارك,,, تخافي يقولو فهمت روحا غالطة جات وحدها
اختي انا لوكان في بلاستك نصلي كل يوم صلاة استخارة شحال من مرة
و زيدي استناي حتى نهار العيد الا ما عيطش راجلك,, عيطيلو انتي و شوفي الا قدرتي تفهميه بالعقل
و زيدي شاوري والديك واش يقولولك
ربي يهنيكي

[elise]

يا اختي هاذو المشاكل ديما كاينين.المرا واش عليها دير تسااااااااعف و خلاص انت حاولي تكسبيهم قد ما تقدري و راجلك تاني ....ربي يهدي الاحوال ان شاء الله

[مَجْنُوْنَةٌ أَنَاْ]

ربي يكون معاك أختي
وش نقولك
شاوري ماماك هي كبيرة و تفهم في هادو الامورات و زيدي استخيري
مانقدرش ندبر عليك خاطكش راهي حاجة كبيرة و انت مازالك صغيرة 18 سنة برك
استخيري ربي هو اللي يوجهك للطريق الصواب
و بالنسبة لأهل زوجك ، حاولي تساعفيهم شوي خاطكش انت اللي تخسري
و حاولي تديري الحاجة حتى قبل ما يطلبوا
وقت التطياب اهبطي للكوزينة
وقت التنظيف نظفي
كوني قافزة
بصح تولهي على روحك و على البيبي تاعك
ما تخليهوم يحكموا عليك والو بش ما يصرالك حتى بروبلام مع راجلك
علابالي بلي كاينين عباد يتبلاوك بصح كوني واعية
و حكاية الدوران موش تقولي مانخرجش بش مانزعفهمش
راهي حياتك اتمتعي بيها ما عندهمش قاع الحق بش يزعفوا راهو راجلك
و ربي يكون معاك و يفتحها عليك ان شاء الله

[bladi dz]

اكبر مشكل نعيشوه في مجتمعنا هو المشاكل تاع العجوزة على هذيك الاسلام قالك ليق تسكن المرا وحدها تجنبا للمشاكل


بالنسبة ليك حبوبتي واضح انك مزلتي صغنونة الله يبارك وباين كنتي مقلشة في داركم ومرة وحدة ولت عندك مسؤولية كبيرة بزاف وهي اهله انا ننصحك انك تعامليهم بما يرضى الله وباش تكسبيهم ما عليك غير بالهدايا لانها تولد المحبة بين القلوب

علابالي بلي صعيبة بزاااااااااااااااف بصح نتي ديري روحك راكي تخدمي في ربي سبحانه وتعالى وارمي حمولك على الله وربي معاك حبيبتي

[ريتاج78]

اختي العزيزة
مزالك عروسة جديدة
الناس مزالها تجي تبارك ولالالا

المهم والأهم انك حامل
انت مزلتي صغيرة بزاف
مدخليش الشيطان بينتكم

لازم تعرفي حاجة واحدة بانو الزواج مسؤولية وتحمل وتسامح
مكانش زوج ملاح ابدا غير الا كان الحمل على واحد فيهم
وعلى حساب قولك عند 5ايام معيطلكش راجلك
مافيها والوا
انا ثاني صراتلي ولدت بوليدي وخلاني في دار بابا
ويما قعدت تقولي خليه وارميه بصح منكذبش عليك تبعت راي بابا
قالي يابنتي الا حابة تديري الدار روحي عند راجلك وانا راجل ونفهم
وفعلا قمت الصباح وروحت لدارو ولما جاء تضاربنا شوية وتصافت النفوس والحمد لله والمركب راهو فات
لكن انك تعندي وهو يعند
راهو زواج يالالا
ومراح ينفعك حتى واحد
وعمرك مراح تولي كيما كنت
ومتنسياش ربي والنبي وصى الراجل
وزيد انتي لازم تكوني شاطرة وحادقة بزاف باش تكسبي عجوزتك
ميهمكش في لوستك حبيها بصح غدوة تتزوج وتروح
ربي يهنيك
وصح عيدك
وحاولي تعيدي مع راجلك

[lidouch]

شوفي يا اختي انا عندي7سنين زواج وعلى تجربتي نقولك راكي غالطة 100000مره كيفاه حابه راجلك يصدقك و انت عندك الا3 شهور و هو عمرو اكل مع دارهم حاولي تكسبيه يا اختي و كوني فحله و عيطي لراجلك راه كاين الي يعمر فيه و راه يفرح كي تعيطيلوا مالا كوني فحله و اكسبيه

[همسا]

السلام عليكم اختي الكريمة معا انه ليس لدي خبرة كثيرة في الحياة الا انها تعتبر نصيحة ما عليك الا الصبر عودي الى منزلك ربما بعدما يزيد طفلك ان شاء الله تتغير مجرى الحياة فوالله الاطفال زينة الحياة ممكن يلقاو باش يتلاهابالمزيود وينساوك شوي المهم لا تضيعي منزلك فهناك طفل قادم الى الحيا ةاصبري من اجله
فهناك من يتمنى حياة مثل حياتك وما زال بنتضرها فحمدي الله وعودي الى منزلك

[la perle blanche]

أنا نقولك يا ختي لوكان ديري النيف على راجلك غادي يفرحولك امه وأخته خاترش هداك وش راهم يحوسو

شدي في راجلك هو صح وراه أبو ابنك وتبتي ليهم العكس لانهم أكيد راهم يعمرو فيه

هما عمروه قدامك فما بالك ونتي غايبة

ونزيدك حاجة يا ختي العزيزة ...لا قدر الله لا قدر الله وحدت طلاق ما تسالي وآلو لانك نتي لي خرجتي من دارك

وهاد الشي القانون هو لي يقولو

نصيحتي عفسي على كلش وعيطيلو وحاولي تصالحيه

[أم عبد النور]

السلام عليكم

متستغربيش هذه المشاكل كاينة في كل بيت وبالحرف الواحد

العروسة حياة جديدة ومسؤولية كبيرة وفي دار ومع ناس أغراب

ولكن هادوا الناس أصبحوا أهلك الجدد وعلابالي العجايزات

ديما يديروا المشاكللأن بكل بساطة جات وحدة داتلها ولدها

مهم أختي أنت مزلتي صغيرة وحاولي متعمريش راسك بالكلام

ديري سعادة زوجك وبناء أسرة هي أهم شي وحاولي تكسبي

أم زوجك بكل الطرق. عيطيله وصالحيه علابالي 2 كلمات

معسلين كأن شيئ لم يكن وعمرك متعاوديها وتخرجي من دارك

هذي نصيحة ليك ولكل متزوجات هذه الخرجة هدمت كثير من بيوت

ان شاء الله سحابة وتعدي ارجعي لدارك ربي يوفقك

[أم محمد و آيه]

لالا حبيبتي عيطي راجلك وقوليلو يجي يديك لبيتك

حتى هو راه يستنى فيك ....كون ما يبغيك ما يديك معاه لتراويح ....وما يخرجك معاه

هاد الهدرة الزايدة كل من العجوزة و بنتها ...مي لازم تصبري الام تاني تغار على وليدها وتقول جات اللي تدي بلاصتي

اصبري شوية حنونة ....

بصح لازم تقولي ليماك غادي نعيطلو باش يجي يديني باسكو راكي عند والديك درك ومن حقهم يعرفو واش راكي ديري

وربي يهنيكم وان شاء الله تجيبي ببون شباب ......

صح عيدك حبيبة

[- بصمة خير -]

ربي يفرج عليك اختي

انت اللي تعيطيلوا و انت اللي تروحي لدارك

داك خوك يرجعك خوك

و انت راكي غالطة بببببزاف في طريقة المعاملة

و تاني النهار كامل و انت في الغرفة مافكرتيش تشوفي الساعة ؟؟؟ تصلي العصر ؟؟؟

ربي يفرج عليك

[ام مريومة]

ختي متقلقيش روحك راكي حامل و راجلك أكسبته ليك لازم تخلي دارهم يغلطو فيك و انتي عمرك الا تغلطي خليهم يهدرو و انتي أسكتي ثم راجلك يشوف مليح بلي انت مراكيش تع مشاكل عيطيلو في التلفون وتحكي معه و قوليلو مقدرتيش تعيشي بلا بيه و كلام كيما هاك الرجل يضعف قدام مرو تو انتي أعرفي برك كيفاه جيبيها و الضرب هاذا لازم تحبسيه عند حدو والله يهنيكم و يبعد عليكم و يحنن قلوبكم على بعضاكم

[baha...]

..................و عندها حق عجوزتك ديرلك كيما اكا.

[اسهاء]

لا حول و لاقوة الا بالله
ندعيلك اختى بظهر الغيب يفرج عليك ربى و يكتبلك الى فيه الخير
و خلى دايما كرامتك مرفوعة واحد مايقدر يمسهالك الى سمحتى فى حقك مرة راح دايما تتقاسى
جربى اركرى خيرلك

[صُبح الأندلس]

أنت حديثة عهد بالزواج و مثل هذه المشاكل موجودة في كل البيوت و كل امرأة و ما تتحمل
يعني هل تتوقعين أن تحبك أم زوجك و أخته و تفرحان عندما تخرجي مع زوجك للنزهة ؟ هذه طبيعة النساء الغيرة وإن كانت أمه.
إن كان بمقدوره توفير بيت مستقل ( شراء أو كراء ) فهذا أفضل للجميع و على فكرة البيت المستقل حق شرعه الإسلام للمرأة
وكذلك القانون المدني

وإن لم يستطع توفيره فاصبري كما صبرت أخواتك و عماتك وجداتك لكن بشرط أن لا يضربك مجددا
سبحان الله كأني قرأت مشاركةتقول ربي والنبي وصى الراجل ؟ بل العكس فقد أوصى الإسلام الرجل بأن يحسن للمرأة و يكرمها لا يهينها و يضربها

[ريتاج78]

أنت حديثة عهد بالزواج و مثل هذه المشاكل موجودة في كل البيوت و كل امرأة و ما تتحمل
يعني هل تتوقعين أن تحبك أم زوجك و أخته و تفرحان عندما تخرجي مع زوجك للنزهة ؟ هذه طبيعة النساء الغيرة وإن كانت أمه.
إن كان بمقدوره توفير بيت مستقل ( شراء أو كراء ) فهذا أفضل للجميع و على فكرة البيت المستقل حق شرعه الإسلام للمرأة
وكذلك القانون المدني

وإن لم يستطع توفيره فاصبري كما صبرت أخواتك و عماتك وجداتك لكن بشرط أن لا يضربك مجددا
سبحان الله كأني قرأت مشاركةتقول ربي والنبي وصى الراجل ؟ بل العكس فقد أوصى الإسلام الرجل بأن يحسن للمرأة و يكرمها لا يهينها و يضربها


ربي يهديك

.......................

[سجل أنا جزائري]

أختي لازم تتسمحي شوي ما يجبكش النيف عليه راه راجلك

ذرك هو كون يعطلك وش يقولو أمو و اختو ؟؟

و زيد نتي اللي خرجتي من الدار ماشي هو اللي قالك روحي نورمالمو تولي وحدك هذي مش تطيحي ليك راه دارك ثاني

ما تشوفي الأهل تاعو كي شغل أعداء حاولي كيفاه تكسبه كاينة ألف طريقة حوسي عليها الأنترنات

كاين بزاف كانو يعيشو كيما نتي لكن مع الصبر و حس المعاملة تاعهم و ذكاء ولات محبوبة أكثر من ولدهم

هذا عيد عيطولو قوليلو عيدك مبارك و قوليلو اروح اديني حابة نولي اسمحلي غلطت ( ملغري علابالي هوما اللي غلطو مي معليش )

ربي يصلح بيناتكم ان شاء الله

[imene12]

ماشي مستهالة تخرجي من دارك خلااااص يا اختي... الأكيد الآن راهم فرحانين بغيابك ... ارجعي لدارك و اعرفي كيفاش تكسبي راجلك و يماه و بالذكاء

[~ أســـرآر ~]

أختي أنا ماني مزوجة ما ني مجربة

بصح لو كنت مكانك عمري ما نخلي داري , وعجوزتي نديرها في مقام أمي , يخي نتي امك مهما تقولك تسبك تجرحك ما تقدري تردي حتى كلمة وماترفضيلها طلب ؟ هكذا لازم تعاملي عجوزتك مهما ادير فيك ومهما تقول تبقى كبيرة عليك وتبقاي زوجة فلذة كبدها .......

يقولك اسمع الكلام اللي يبكيك ومتسمعش اللي يضحكك .........

معندكش عام ملي دخلتي عروسة ومن اول مشكل خليتي الدار , شوفي للمستقبل , هذي العايلة راكي رح تعيشي معاها حياتك كامل ان شاء الله لازمك تتعلمي كفاه تكسبيهم بأي طريقة ..........





نصيحتي ..... : هزي التلفون واهدري مع عجوزتك فهميها وقوليلها راني غلطت ومقامك في مقام يما , وديريني كي بنتك ولاشتة تجرحك بالكلام ديري بروحك مسمعتيش .... وزيدي اهدري مع زوجك يجي يديك قوليلو راني مقدرتش نبعد عليك كتر , المهم زوج كلمات حلوين وهو يجيك بإذن الله .........

تعيشي يا اختي خلي القلوب تتصافى , اكسبيهم نتي باه يحبوك وتلقاي روحك نتي وليتي تحبيهم ومتقدريش تستغنااااي عليهم واحمدي ربي عندك زوجك يحبك وولدك راه جااااي فالطريف تعيشي متعيشيهش فالمشااااااكل راه يتعقد , خممي عليه قبل ما تخممي على روحك .....

[الفتآة]

السلام عليكم ورحمة الله وبركاته
أختي الكريمة، شفاك الله وعافاك
حساسية أهل الزوج تجاه الزوجة يكاد يكون أمر طبيعي ولم لا...فطري
عودي إلى بيت زوجك ،
وإن حاول أهله إختلاق المشاكل لك فليكن جوابك الصمت عنهم وكفى
أعي أن هذا صعبا ، لكن أحسن من شيء آخر
أسأل الله أن يفرج همك