رح نموت من الخوف

[مشكلتي]

السلام عليكم ورحمة الله وبركاته
صحة رمضانكم وربي يتقبل
انا فتاة باقي على زواجي اشهر قليييلة جدا
صرالي حادث كي كنت صغيرة كنت نلعب مع خويا الغميضة وكي رحت نتخبى طحت وشفت دم بزاف
كنت في مرحلة الابتدائي ذاك الوقت
وكشفت عليا في ذيك اللحظة ممرضة وقالتلي لاباس بيك هكذا راني شافية عليها لحد الآن
ودوكا راني مخطوبة ومعقود عليا
نحب زوجي بزااااف بزاااف وهو تاني وداير فيا ثقة كبيييرة لاننا معروفين بالالتزام
مي خاايفة وموسوسة بزاااف
اذا كنت فاقدة للعذرية كيفاش رح يكون الموقف تاعو معايا
وزيد خفت نروح للطبيبة من جهة هو مش رح يعجبو الحال
ومن جهة منحبش تكشف عليا حتى وحدة
راني نسمع في قصص تخوف كيفاش الرجال يتعاملو ليلة الزفاف
وخااااااااااااااااااااايفة في حااالة
لانني كي حكيت لوحدة وقلتلها راهو يحبني قالتلي في هاذي مكانش حب
ساعدوني وانصحوني
ولاتنسوني من دعائكم

[ناصرالدين الجزائري]

كان الله في عونك أختي

الحل الوحيد لتنتهي هذه الحالة من الخوف و الشك هي أن تزوري طبيبة النساء لتخبرك بحقيقة حالتك .. فمهما قلنا فلن يكون إلا ظنا لكن الطبيبة هي من تستطيع اعطائك شئ رسمي فلا تتهاوني في هذا الامر .. و ان شاء الله ستسمعين إلا الخير

[oummarwa]

rabi maak w maykoun ghi l khir

[همسة مشاعر]

انتي غالطة من اول مرة وعلاش متروحيش تشوفي روحك ومن بعد تتخطبي هكا تقلقي وممكن توليلك حاجة كبيرة روحي للطبيبة وخلاص

[مريم الصابرة]

السلام عليكم اختي صحا فطورك انا ٍاي من راي المشرف لازمك تروحي للطبيبة وما تستنايش لأانو هي اللي تاكدلك الخبر وكنت صغيرة بزاف يعني ممكن جرح فقط والطبيبة تقدر تبين إنو ما ما رستيش الجنس يعني حتى لو بعيد الشر ما كنتيش عذراء تقدري تروحي مع خطيبك لأاي طبيبة وهي تشرحلو لانو قادرة تعرف إذا من السقطة او الممارسة وكيما قاتلك الاخت في هذيك ماكانش الحب على العكس لانو يحبك راك يتصدم وما راحش يصدق انك طحت لانك خبيتي عليه على هذا لازم من ضرك وإن شاءالله يكون مجرد جرح وتكوني لاباس عليك لكن ما تعذبيش روحك لازم تقطعي الشك باليقين وعادي اختي ما تديش وقت يا رب 3 دقايق او اقل وراحا تخبرك ديري الكوراج وروجي وأرواحي بشرينا ربي يكون معاك

[lola-lola]

علاه تخافي نزيدك حاجة الراجل والله ما يفيق..........اديها من عندي رسمي غير وادا قلتيلو وادا فاق وهذا احتمال ضئييييييييييييييييييييييييل احكيلو الحقيقة وما تخافيش لخاطر ما رح يصرا والو راكي برك مقلقة ...رب يكون معاك وما كان والو

[آلاء النايلية]

ياك قلتي كشفت عليك ي الصغر و قالت لاباس عليك .......... خلاص
بالصح مافيها والو اذا زدتي رحتي للطبيبة باش تتأكدي و تطمأني و مش شرط تقوليلو راني رايحه على جال كذا روحي انت و وحدة من العايلة و قوليلو راها مريضة رايحه تزور طبيبة و رايحه معاها

[arc en ciel]

اقطعي الشك باليقين

و ادا لا قدر الله كنت مصابة صارحيه كل راجل و كيفاه كاين الي يقبل و كاين الي لا

و انا نظن قبل مايخطبك يكون تاكد من اخلاقك و التزامكم ؟؟ و انت صرالك في صغرك


روحي للطبيبة روحي ماكان والو

[YARMORACEN]

1- روحي عند الطبيبة تأكدي .
2- صارحي خطيبك قبل ما تتزوجي .

إدا كان خطيبك يحبك ، ما راحش يهمه الأمر ، اما إدا كان يمثل عليك الحب برك ..... الله يسهل

[فاطمة الزهراء31]

السلام عليكم
ختي في هادي مكانش تمسخير بلاكي تحكي لخطيبك لاخطرش رجال مشكاكين وكان تقوليله يقول باينة راها دايرة حاجة وخايفة حتى هو يتوسوس روحي لطبيبة تاكدلك ومدام فوتي وانتي صغيرة خلاص راكي لااباس قلعي توسويس من بالك ربي يفرج همك وان شاء الله تكوني غاية

[السي محمد]

يعني من الابتدائي ما خممتيش تشوفي طبيبة حتى الآن؟؟؟

غريبة الدنيا

=====================

الله يعلم ربي يوفقك

[شوق الجنة]

يا اختى انصحك بالطبية حتى تتخلصى من شك ويرتاح لك بال

[amiramira2012]

عليك بطبيبة نساء حتى ترتاحي

إن شاء الله خير

[Floona]

الطبيبة تقدر تعرف كان طحتي ولا درت حاجة بعيد الشر عليك
ومتخافيش راهم دارو رايهم وتزوجوومخافوش وإنت مادرت والو وخايفة
ربي يوفق

[**د لا ل**]

اختي ما تقلقيش روحك ابدا

حوادث الصغر غالبا لا تؤثر على غشاء البكارة الا اذا كانت حادثة قوية جدا

لان الغشاء محمي جدا وكما انه يتكون مع نمو البنت لا مع ولادتها

ثم ان عمرك في ذلك الوقت صغير لم تتجاوزي 10 سنوات على مااظن

لا تخافي ابدا وبرأي لا داعي لزيارة الطبيبة

توكلي على الله و تزوجي وباذن الله لن يكون الا كل خير

موفقة اختي

[اسعى لرضى الله]

مرة قريت في واحد الكتاب اظنو لابراهيم الفقي ان نسبة كبيرة من المخاوف اللي تواجه اي انسان لا وجود لها


يعني كيعاد راكي جاية على زواج خايفة برك بصح شوفي اتكلي على ربي مادامكي مغلطيش وصدقيني كلش يفوت مليح باذن الله وتزوجي وان شاء الله ربي يرزقك السعادة والهناء

[massoud0102]

لاتخبري خطيبك صعب يصدق الا بطبيبة ممكن هده نصيحتي وبربي منبخلش عليك بي الدعاء وربي يسجي وتفرحي بدريتك

[~~ أغيلاس ~~]

لا تخبري خطيبك، ممكن يوسوس له الشيطان و يظن بك سوء، أما العضوات اللواتي تحدثن عن يحبك و ما يحبك خليكم من الأفلام و الحب تع الكفرة، ما تنساوش نحن مسلمون .

ما تمرين به وسوسة شيطانية أزيليها بالكشف عند الطبيبة .

[zaaaki]

توكلي على ربي برك ربي يكون معاك باتوفيق ونشاء الله نفرحوا بابنائك

[faridos]

علاه تخافي نزيدك حاجة الراجل والله ما يفيق..........اديها من عندي رسمي غير وادا قلتيلو وادا فاق وهذا احتمال ضئييييييييييييييييييييييييل احكيلو الحقيقة وما تخافيش لخاطر ما رح يصرا والو راكي برك مقلقة ...رب يكون معاك وما كان والو

ههههههه ...راكي تصبري في روحك اختي ..اول حاجة يريد معرفتها العريس من زوجته ليلة الزفاف عفتها ..ويريد ان يكون هو من يفقدها عذريتها .انه حلم اي شاب مقبل على الزواج فلا تاخذي الامر بهذه السهولة

[عروبتي]

يااختي روحي للطبيبة هي لي تقدر تنحلك الشك ومايكون غير الخير ان شاء الله

[faty05]

ان تذهبي الطبيبة افضل شي لتقطعي الشك و الوساوس
و بالطبع خطيبك لا تخبريه أنكي ذاهبة عند الطبيبة من اجل كذا و كذا
فقط ان كنت من النوع الذي يخبره عن كل تحركاتك
قولي له راني رايحة ندي أمي او اختي عند الطبيبة و خلاص
ان شاء الله ما يكون غير الخير
تفائلي

[lilou f lilou a]

الطبيبة تقلك اختي وبربي مايكون غير الخير

[economica]

حسب رأي الامر يعتمد على مدى الثقة بينكما،اذا كانت الثقة كبيرة بينكما يمكنك طرح المشكل للنقاش مع شريكك من اجل استخلاص حل توافقي بينكما،اما اذا كان هذا الامر غير ممكن يمكنك اللجوء للطبيبة من اجل الكشف عليك دون اخبار شريكك.ان شاء الله مايكون غير الخير و تذكري ان الطيبون للطيبات

[salimsalm]

الحل ان تكشفي عند طبيبة ..........

[جلناار]

ومن جهة منحبش تكشف عليا حتى وحدة

استغربت قولك هاذا يعني الطبيبة اليوم ولا غدوه رح تكشف عليك في حالة الحمل مثلا .... روحي للطبيبة اقطعي الشك باليقين هكا تكوني

مرتاحة نهار عرسك...و ماكان لاه تقوليلو رح تقلقيه برك...