كيف يقضي أعضاء منتدانا أيامهم

[mascara]

السلام عليكم
أظن أن الموضوع معروف من خلال العنوان
هل ممكن أن يخبرنا أعضائنا كيف يقضي أيام الاسبوع
أي كل يوم ماهي الأمور الأكثر تداولا لديك
هل يشعر أعضائنا بالملل في بعض الايام ولماذا

أظن الشرح مفهوم
أتمنى المشاركة منكم
وشكرا

[ل..ب..ن..ى]

شكرا لك على الموضوع
فبه سنتعرف على بعضنا اكثر!!

السبت : انهض كالعادة متاخرة او جد متاخرة !!
فاحضر نفسي للدهاب الى الجامعة بسرعة
وكالعادة انسى شيئا !
وماما لم تغلق الباب لانها تكون متاكدة انني ساعود حالا !
ههههه انها من عاداتي!!
والشيء الدي اكون قد نسيته هو الدراهم تاع الركبة
لانني اسكن شوية بعيد على الجامعة ولازم اخذ الحافلة
ودراهم الماكلة ...
نروح للجامعة نوصل روطار
ودائما مانقراش الحصة الاولى
عند 8و30 د وااااااو
ادرس ادرس وادرس والوقت كله وانا نخمم في كرشي ههه!
ومن بعد نروح مع صديقاتي
نفطر في الخارج
وشحال توحشت فطور الدار !!
نعود الى الوحش -الجامعة - من جديد
للدراسة
واذا ما جاش الاستاذ نروح للمكتبة باش نكونكتي ههه!
ومن بعد بعد انتهاء الدراسة
نولي مباشرة للدار
ومين ندخل قبل نزع ملابسي وحتى المحفظة
اقوم بتشغيل الحاسوب
نخليه يشعل ونروح نشوف واش فطروا
واذا مالقيتش الماكلة
ندير الحرب العالمية 3
ههه!
ماما دايما تقولي : تاكلي بزاف لوكان غير جات باينة عليك ! هههه
نرو نصلي كامل النهار ! ايييييي!
اه . من بعد نجي للحاسوب ونفتح صفحة للدراسة
-باش منين يفوتوا عليا اصحاب الدار يقولوا :
مسكينة راهي غير تقرا !-

ونفتح المنتدى ونقعد فيه حتى ينوضوني
وخطرات نفتح الميسنجر
وما نتقهواش قهوة المساء -لانني نكون غير كيما فطرت-
ولا اتعشى لانني لا احس بالجوع وانا في المنتدى !!

ولما ينوضوني من الحاسوب نروح نصلي ومن بعد نرقد
وكانني اعطي الاسبقية للمنتدى على الصلاة :o
ونوض يوم الاحد في عجلة وكانهم باتو يحاوقولي في المنام ههه
وتتكرر القصة حتى يجي يوم الجمعة
ويوم الجمعة انهض في ساعة جد متاخرة لانني نكون قد سهرت كثيرا ليلتها
انهض نصلي الصبح
نعاون ماما شوية في الميناج
ونجي نكونكتي !!
وبعد صلاة الجمعة نروح مع العائلة للخارج
للترفيه عن النفس
<وكانني تعبت في الاسبوع !!!>
ومين نجي في الليل نصلي نتفرج ونروح نرقد

ملاحظة: كل يوم نتفرج فيلم او 2
وجامي فتحت كراس من كراريسي الا ليلة الامتحان

انها حياتي الروتينية
انها دالة جيبية دورها يساوي اسبوع !!

هدا البرنامج الشتوي
اما في الصيف فلا تكفيني صفحات المنتدى لاسرد حياتي الصيفية مختصرة!
ما اجمل الصيف

اه راني طولت
علابالي نهدر بزاف
......
!

عذرا

[NABIL23]

برنامجي اليومي بين الدراسة والرياضة والانترنت هذه ثلاث الاشياء التي اعرفها

[AMARAGROPA]

السلام عليكم ورحمة الله وبركاته .

برنامجي اليومي : خليط من الميكانيك والإلكترونيك في النهار - نحب ندير الترافيك ياسر ياسر - ومن بعد كاين نهارات للجامعة كامل أوو ديما ديما المطالعة شوية شوية باه مولاها يحافظ على سقف معلومات لاباس بيه ومن بعد الإنترنت ومنتديات الجلفة . أوووو نسيت :

ننوض صْباح على 08:00 ونرقد على 01:00 وتقولوا راه تعبان بصح أنا نشوف فيها نورمال والنهارات لمليحة يا نروح نصاد يا نروح نحوس لازم لازم .

سلام ...

[طارق القبطان]

أما انا فبعد التوقف المؤقت عن العمل
أبدأ من الليل أنام متأخرا للغاية
ووقت صلاة الفجر يأتي الوالد لإيقاظي ولكن أحاينا لاأستجيب له إلى أن ت؟أتي الوالدة بكثير من الزجر والتأنيب يعني لا زم تنوض ما فيهاش هدرة
أصلي الفجر ثم أعود للشوط الثاني وأستيقظ غالبا مابي ن 8و30 إلى ا9و30 وإذا تجاوزت هذه الفترة فإنها تمتد إلى أبعد من ذلك
أخرج مباشرة إلى المقهى لتناول فنجان قهوة وفي الغالب يكون مرفقا ب4إلى 5سجائر
ثم ألتقي بعض الأصدقاء ويكون يومي بين مراجعة بعض الدروس لأن لدي امتحانات في جوان وبي السيبار التي بجوارنا أجلس فيه لمدة طويلة مساعدني مدايرلي سعر خاص بي
ولا بد منآداء الصلوات طبعا وغالبا ما تكون في المسجد وإلا فإني سأجد نفسي في متاعب مع الوالدة الت سترفض التحدث إلي إن علمت أني تركت صلاة الجماعة
اما في أيام العمل الفارطة أخرج من البيت الساعة 4و30صباحا من أجل الحافلة لأتنقل إلى مكان عملي أمكث لفترة ليست بالقصيرة في إحدى المقاهي
أدخل إلى العمل وأخرج مساءا مسرعا كي ألتحق بالنقل وإلا فسأبقى إلأى وقت متأخر للغاية لأن النقل في البلدية التي أقطن فيها نادر

[صالح القسنطيني]

طارق اك مجاهد ربي يعاونك خوك حياتو و الله كثيرة التغير ليمات هذي:
روح للجامعة و هي اصل كل شر ابتليت به + اني مع المرض تاع التقارير تاع قرايتي نكتب فيهم في مكرو + روح نبيع الياؤورت مع صاحبي و لا نقعد في طكسيفون مع واحد آخر + اني في دار مع الوالدة نعاون فيها بحكم معندناش بنات و هي تعبت علينا بزاف + مكرو نهار كل و هو شاعل مام نخرج نخليه شاعل + الأنيس زوج حوايج المكرو و لا كتاب و عندي في دار شبه مكتبة فيها شوي كتب.......................

[بن اعمرعبدو]

الأوقات الصباحية اقضيهافي قضاءالحوائج
اما في المساء فااقضيها في عملي

[س..ع..ي..د]

انالست منظم ولا احب ان اتبع برنامج معين .ولكن يوجد شئ واحد لا استطيع ان استغني عنه وهو النت

[B.Badis]

السلام عليكم
أنا كأغلب الأعضاء ....والفت كل يوم ننهض على السادسة و الربع صباحا ....نصلي الصبح ....نشرب الحليب....و أبي يعيط و يعيط .... هيا أخرج راح يروح عليك le bus تاع الجامعة و انا كيما عادتي من الغرفة أحظر الأدوات إلى الدوش ندير الجال....و موالف ساعات نخرج من الدار حتى نعاود نرجع و نخلي أبي يستنى و نقولو بلي نسيت الأدوات و لكن راني نرجع باش نحط العطر على خاطر نسيتو و البورتابل دايما ننساه في الفراش تاعي....و دايما نروح لbus نجري حتى حفظني السائق و عاد ينتظرني إذا تأخرت....المهم كي العادة لما ندخل للجامعة لازم عليا نبدا نافيشي اللخدمة تاعي و البحوث للأساتذة....و بطبيعة الحال يقولك الأستاذ عاودها....المهم أنا في هاذ السنة كل أيام الأسبوع عموما نخلص على الواحدة أو الثانية زولا لما نجي للدار نصلي أولا و ثم نتغذى و نشعل الميكرو و ندخل للمنتدى هذا نبلبل و نبلبل و نبلبل حتى يجي عندي صاحبي و نخرجو حتى وقت المغرب ....نرجع نصلي المغرب في الدار أو في المسجد و نبقى في هذا المنتدى تارة و مع الخدمة و البحوث تاع الجاميعة تارة حتى منتصف الليل....و لكن يوم السبت و الأحد و الثلاثاء موالف نسهر حتى الرابعة صباحا و أنا نحضر للأعمال و البحوث لي طلبوهم منا الأساتذة - فالكل يعرف الهندسة المعمارية هذه هي طريقة الدراسة فيها .... يمصولك الأساتذة دمك - حيث يوم الأحد مع أستاذ و الإثنين مع آخر و الأربعاء مع آخر....و لكن الخميس و الجمعة نبرد على قلبي بالرقاد و الخروج مع الأصدقاء و الجلوس أمام الكمبيوتر....

[chahd alger]

أرى أن الكل يمضي وقته في البيت آآآآآآآآي أنا الوحيدة أدرس داخلي و بدون شرح فأنتم تعرفون الميزيرية نتاع الداخلي في الصباح أمضي يومي في الجامعة و أعود مساءا أفطر وأصلي و بالليل أنام متأخرة إما في النت أو سهرة مع صديقاتي التي تعرفت عليهم من بلدان عدة .............

[سلاف26]

الصبح نوض نصلي الفجر وو مرات نرجع نرقد و مرات لالا نوض نشرب قهوتي و نتفرج على قناة الجزيرة نشوف آخر الأخبار و بعدها نقضي الشغل تاع الدار و ندير التليفزيون في قناة الرسالة أو قناة راما و مرات ندير الفطور لكن أغلب الأوقات يما ديرو نكمل على جوايه 10.30 ندخل للنت و بعدها على 12.00 نحطو الفطور نفطروا و نرفد الطابلة و نرجع هنا نقعد حتى 15.30 ولا 16.00 و بعدها نروح نشرب قهوتي و نتفرج مرة مسلسل و بعدها يجي اليل نتعشا نصلي العشاء و نقعد في بلاصتي نقرا شوية كاش كتاب "الكتاب الذي أقرأه هذه الأيام التحليل النفسي الفوري 'كيف تفهم و تغير 100 من أكثر السلوكات و العادات انتشارا و تثبيطا و تحييرا و إزعاجا للذات' للدكتور دفيفد ليبرمان' أنصح الجميع بقرائته روعة
و نرقد على22.30 أو 23.00 على حسب تعبي
مشكور أخي mascara على الفكرة

[إبتسامة أبي]

أما أنا أنهض كل صباح على 6.30 أصلي وأفطر ومن ثم أرتب غرفتي وأجهز نفسي ثم أجلس مع أبي حتى يحين موعد ذهابي
أخرج من المدرسة على 12.00أتغدى أصلي الظهر ثم أذهب على 13.00وبعدها أعود إلى المنزل على 16.30 أصلي العصر
ثم أتوجه إلى النت حتى أذاني المغرب أصلي ثم أبدأ بالدراسة عندما أنتهي أصلي العشاء ثم أجلس قليلا مع عائلتي وبعدها أنام باكرا
هاكذ أقضي كل أيام الأسبوع

[نور المنتديات]

أنا بالسبت انوض على 6 ونروح نقرا ومبعد فالمساء ندير سبور تاع الثانوية من 3 حتى 5 انجي لعشية نستحم ونصلي ومبعد نتفرج المسلسل ومبعد نقرا شوية وساعات ندخل للمنتدى ومبعد نرقد
بالأحد نروح نقرا نخلص على 4 انجي نصلي نتفرج شوية وندخل للمتتدى ومبعد نتفرج على المسلسل ومبعد نقرا ونرقد
بالاثنين نخلص على التلاتة نروح نلعب كرة اليد
بالتلاتاء نخلص تاني على 3 انجي نصلي ونخرج ندور مع البنات ونتفرج ونقرا ونرقد
بالاربعاء نخرج على 2 نروح نلعب كرة اليد و انجي نستحم ونصلي ونتفرج ونقرا ونرقد
الخميس نخلص الدراسة على 12 ندير ليكور على 1.5 ومبعد نخلص على 3.5 نجي نخرج برا ونتفرج و نراجع تاع نهار السبت باه نقعد بالجمعة في راحتي ونرقد
الجمعة نجي للمنتدى ومبعد على 2 حتى 4 ندير ليكور ومبعد درك رايحا تبدا ستار أكاديمي نعود نتفرجها

وتقريبا جميع الأيام ندخل للمنتدى

ونحس بالملل نهار السبت نقرا 2 سوايع رياضيات على الصباح بعد
ونهار الجمعة كي ندير ليكور من 2 حتى 4

دشكرا أخي أحمد على الموضوع
علابالي وجعتلك راسك بزاف

[mascara]

شكرا على اعترافاتكم جميعا
والله الموضوع كتبته أمس مساءا فوجدت اليوم ردودا كثيرة والله اعجبتني
شكرا لكل واحد باسمه
أما أنا
عندي أكره يوم هو يوم السبت صباحا خاصة عندما كنت ادرس الجامعة والله لا يكفيني الوقت أبدا
أما باقي الأيام قد اختلفت منذ ان تخرجت هذه السنة من الجامعة ففلقد دخلت في ريتم
أخر بعد الخروج من الجامعة
معظم أيامي أقضيها في محلاتنا
اطالع الكتب الاقتصادية في مجال تخصصي
ادخل النت تتقريبا يوميا
نهاية الاسبوع أمارس الرياضة مع االاصدقاء لانها مناسبة قدومهم من الجامعة
أخر يوم في الاسبوع هو يوم الجمعة أشعر فيه بالفراغ خاصة بعد صلاة الجمعة لا أعرف ماذا افعل
أظن ان هذه ابرز ايامي هكذا

[BADEL5]

انا أقضي كل أيامي في الدراسة و الانترنت و الصلاة و اللعب و التلفزيون

[khadredouane]

انا تقريبا كيما معظم الاعضاء mais عندي مرض النوم نرقد بزاف surtout كي نعود في الجامعة و مهبول عل les films d'action ديما رايحة لقراية و الريسطو على جال النوم لمزية عندي 3 moduls و الصلاة الحمد لله عندي صاحبي ادعولوا يديني معاه للجامع كل و نقللكم الصح كي يعود غايب نصلي الاوقات مع بعض و هاذي ماهيش عاجبتني راني نحاول نتعلم البرنامج نتاعوا
و اللي عندو دواء يعالج الحالة نتاعي تاع النوم يدير فيا مزية
كما الح على الدعوة لصاحبي ما تنساوهش و نتمنى يكون لكل واحد منكم اخ كيما هذا

[gotcha]

انالست منظم(ة) ولا احب ان اتبع برنامج معين .ولكن يوجد شئ واحد لا استطيع ان استغني عنه وهو(((( :1:))))

:mh31::mh31::mh31::mh31:

[الصفحة البيضاء]

الدراسة طول اليوم
في المساء نشرب قهوة - نريح و من بعد نراجع دروسي
تجي اختي الصغيرة و تنوض بيناتنا حرب عالمية

. تهدأ الاجواء .

نروح لمنتدى الجلفة .

[rafika1988]

انا نقضي ايامي بين الدراسة في الجامعة وبين وتصفح على الانترنيت...............روتين

[بنت المحمدية]

السلام عليكم
بالنسبة الي يوم السبت ننهض4.45 نتوضى ونلبس6.00 نركب باه نروح للجامعة خاطر أنا مقيمة
كي نوصل للاقامة نصلي ونتقهوىونهود نقرامانوليش حتى 18.00 نصلي من الظهر حتى المغرب
في الأيام الأخرى نوض 6.00 نتوضى ونقرا شوية قرآن مين يأذن نصلي ونطيب قهوةنروح نقرا8.30 ونولي نفطر12.00
نصلي ظهر ونعاود نروح نقرا ونشور حتى 16.30
أيا وفالليل نتعشى نغسل الماعين ونجبد الكايي نشوف فيه شوية ونجمع مع صحاباتي 22.30 راني راقدة
شكـــــــــــــــرا على السؤال
أيا ومين تجي الثلاثاء نفرح خاطر نشور لدارنا ونهدر معاكم في الانترنت