ابي ابي ابي.....

[مشكلتي]

السلام عليكم و رحمة الله و بركاته.....صحا رمضانكم

علابالي من العنوان تقولو هذا باباها يضربها ...مشي مليح ....كشما فيه ديفو...

انا نقولكم العكس....بابا واحد مثالي زوج رائع و اب اكثر من رائع...

راكم تتساءلو واش هو المشكل ؟

حنا ثلاثة خاوة انا واختي الصغيرة و اخي الكبير بصح بابا ما يشوفش غيري...... انا بنتو الوحيدة

ليكادو بالاطنان... سيارة....مجوهرات..=حنا عايلة مرفهة= و هدايا لا تعد و لاتحصى و الحنان هداك الغامر يقعد معايا بالساعات نخرجو كيف كيف لي يزعفني خلات عليه......الخ.

كي كنا صغار نورمال بصح كي كبرنا بداو خاوتي يحسو انا ما نقدرش ندافع على روحي قدامهم خاطش الحالة باينة انا و حسيت بيها ....مرات اختي تقولي يا عزيزة باباها وو....انا ما قلتش مقصر معاهم بصح مفضلني عليهم زعما الاساتذة تاعهم جامي لا شافهم و انا الاساتذة تاوعي دايما يفيزيتيهم ......

طولت عليكم و رانا في سهرة رمضانية...راني حابة نابا يعود يعاملنا كيف كيف بصح بلا ما نقولو انا ...نخاف لا يبعد بزااف.......قالتلو مرة ماما و سمعتها قالها مكاش منها انا نحبهم كامل بنفس القدر.....................................سلاااام

[جزائري وفقط]

ولا تؤاخذني فيما تملك ولا أملك

ليس لديك ما تفعلينه هو يحبك عن الآخرين وهذا أمر قلبي خالص .................................

[karimblida]

الله يحفظلك باباك
ربي يوفقك و تكوني في حسن ظنو
ربما في الأمر حكمة ما
ان شاء الله تكوني في المستوى لي يفرح بيك

[hajer.joujou]

احمدي الله و اشكريه على هدا الاب الحل الوحيد ادعيلوا و يولي يعدل بيناتكم ربي ما فيه غير الخير

[باهي جمال]

القضية نفسية عند الاب والحل عندك انت يجب عليك ان تهدي اخوك واختك من الهدايا التي تهطل عليك واعطيهم من الاموال التي عندك دون ان يحسوا بتفضلك عليهم انما هي وسيلة للتحابب والالفة بينكم

[يوسف الحق]

يجب عليك مقابلة الحسنة بالحسنة فبقدر ما يحبك يجب أن تحبيه و تقدري شأنه و تردي له خيره و الله يقدرنا على رد جميل الوالدين...أمين

[سيرتا12]

لابد انك تطيعينه اكثر من اخوك او اختك فهذا التمييز لا اظنه يجيئ صدفة

[نور اليقين جيداء]

لابد انك تطيعينه اكثر من اخوك او اختك فهذا التمييز لا اظنه يجيئ صدفة
و هو كدالك

[مريم الصابرة]

السلام عليكم اختي
بارك الله فيك تخمي في خاوتك واكيد الوالد ربي يخليهولك يحب كل اولادو لكن واحد مفضل هذي تابعة للحنان الأاب ينبع واحد من ولادو اللي يرتاح معاه وهوما كامل ولادو انا أيضا مثلك إحنا 4 كامل لكن كنت انا رقم واحد مع غني الأوسط لكن محال لا خويا الكبير ولا لخرين انا وبرك للدقيقة الاخيرة ربي يرحمو ويخليلك الوالد نتاعك

[ولد حمد الباتني]

الله يحفظهولكم
لعلو نتي ثاني تعامليه مليح ونتي ألي تقربي ليه بزاف مقارنة بختك وخوك
ومدامو ماهوش مقصر في حقهم اتقلشي نتي بصحتك ههههه

[صفاء الروح]

احمدي ربي اللي عندك اب كيما هادا هادا ماهوش مشكل كبييير

[سجل أنا جزائري]

مادام يحبك لدرجة هذي كي يجبلك حاجة قوليلو جيب لخاوتي ثاني كيما جبتلي سينو ما قدرتيش نتي أعطيلهم من وش يجبلك

ربي يخليلك والديك

[ام رحوقة]

اختي احمدي ربي وهذا ماهوش مشكل خلاااااص والله الوالدين كامل عندهم واحد في الاولاد كون المفضل على البقية
ربنا لك الحمد

[knives55]

سلام عليكم اختي
نعم حتي انا سراتي وراني كاره خاوتي كامل ((الرسول صلى الله عليه وسلم )) حذر من تفرقه بين اخوان

والله ما فهمتش علاه يفضلوا واحد على واحد

ومبعد يقلوا علاه تصراه المشاكل بين اخواء

على كل حال خليها على ربي

وشكرا

[منهاج]

السلام عليكم ..........................مبارك عليكم الشهر

الله يحفظلك بوك ويخليه تاج فوق راسك وفوق راس خوتك وانشاء الله ترجعيله هدا الحب ويفتاخر بي كيما راكي تفتاخري بيه

[أم البشائر]

اختي اذا حبيتي نتبادلو


تولي تمرضي باباك ما يحوسش عليك

وخوك تمسو شوكة الناس قاع تسمع دموع الاب عليه

كل واحد وربي واش عطاه

المهم انت ما تتغطرسيش على خاوتك بحكم تفضيل ابيك ليك

وتستغلي هاذ النقطة

اما رايي الرفق بالبنت مطلوب اكثر من الذكر لرقة قلبها

وكيما يقولو عز البنت مع باباها

اذا قلقك باباك سلفيهلي نهار برك:1:

ربي يخليه لك ويرزقك زوج اطيب منه

[نبيلة المهبولة]

انتم عائلة مرفههين رانا محتاجين شوية دراهم حنا كون تشوفو لمعيشا نتاعنا تموتو حنا فقيرين ناس فرمضان تاكل غير لحم حنا ناكلو طماطيش ولفرماج ساعدونااااااااااااا ياهل لخير

[~~نهال~~]

ماعندك ماراح ديري غير مثلا تع الهدايا ماتبينيش قدام خاوتك و اذا ماقدرتيش صارحيه قوليلو وش في قلبك