مشكلتي لم اعرفها بعد

[مشكلتي]

السلام عليكم ورحمة الله تعالى وبركاته
مشكلتي ياخاوتي والله ماعمبالي اذا هي مشكلة حقيقية واللا هبالي هو المشكلة وقاعد يخلق في حكايات ومشاكل , نفسيتي راهي تعبانة بزاف راني تعبانة فكريا جسديا من كل النواحي , انا وحدة عمرها 20 سنة مديتش البكالوريا والله معمبالي اذا تأثرت واللا متأثرتش صح غاضتني بصح منيش حاسة بروحي للي زعفانة خلاص اللي حساتو اني وليت منحسش , كانت امنيتي ندي البكالوريا ونفرح والديا مع بداية العام قريت وتعبت بصح في نهاية العام فلست وحبيت واحد هذا الواحد تعرفت عليه في النات ووليت نخمم فيه بزاف ووليت منراجعش ماوالو , حتان ماديتش الباك وهكاك مزلت نحبو والباك منعرف والله معمبالي ,عمبالي راكم تقراو وتقولو وش بيها هاذي هدرتها مايش مفهومة والله ياخاوتي راني في دوامة مايعلم بيها غير ربي مفهمتش علاه عمبالي اني ارتكبت معصية كي حبيت واحد وحكيت معاه وعمبالي وواثق من نيتي الصافية اللي جامي توصلني الحرام ,المهم كي مديتش الباك موليتش نحس خلاص ,حابة نقعد غير وحدي في بلاصة خالية واحد مايقعد معايا نقعد عام عامين حابة نبعد على الناس لأن قلبي تجرح بزاف من معاملاتهم ,هنا اكل موصلتش للمشكل الحقيقي المشكل هو راني حااااااااااااااااابة نتزوج حابة نتستر منيش حابة نكمل نعيش هكا خلاص صح الحمدلله على كلش ,سبحان الله الرسول عليه الصلاة والسلام قال :" عجلو في اثنين دفن الميت وزواج البنت".
صح مكتوبي مجانيش وكلش بيد ربي , المشكل والديا حابيني نقرا وانا راني الله غالب عليا لوكان عيني في القراية راني قريت ونجحت , صح العلم نور بصح نتعلم في داري نتعلم في المسجد نتعلم من الانترنات كاين الكتب ,كرهت من كل يوم برا بحجة العلم وكرهت من الاختلاط حتان عييت نغض بصري , حابة نريح في الدار ونتستر والله كرهنا من الشبهات ,ياخاوتي المشكل هو اني كارهة بزاف حوايج ومتأقلمة معاهم رغم كرهي ليهم
وزادت ضربت الباك اللي مديتوش كملت عليا وليت نشوف الدنيا فلو , وفوق هذا الشي خلي والديا ربي يحفظهملي صح مديتش الباك بصح راني ديما نبقا بنتكم ونتوما ديما تبقاو والديا , الوالد ربي يسمحلو اول يوم سمع بلي مديتش الباك قالي كلمة جامي ننساها , غلبت ياخاوتي والله غلبت , المهم راني حابة نزوج وعمبالي علاه حابة نزوج باه نبعد على دارنا اللي شبه خالية من العاطفة وحابة نلقا واحد يفهمني حلالي منيش حابة نغلط في حياتي .
اسمحولي خاوتي كثرت عليكم والله لوكان نعطي لاتوريزاسيون لقلبي الكتيبة متخلصش باسكو راهو معمر بزززززززززززززااااااااااااف
بغيت حل , ولجأت ليكم باه تعطيوني حل معقول مستخلص من تجاربكم وتساعدوني تعرفو وش هي مشكلتي بالذات راني معرفتهاش
منيش حابتكم تقولولي اكثري من القرآن والصلاة واصبري , والله راني منيش مقصرة من الناحية هاذي خلاص ,حابتكم تكونو معايا واقعيين .
شكرا مسبقا

[nadji84]

كان الله في عونك

[wafa16]

يا اختي والديك ما يحبولك غير الخير و اذا حبوك تكملي قرايتك باش يكون عندك شهادة و سلاح في هاذ الزمن
وشكون قالك الزواج يريح كاين ناس مشاكلهم الحقيقية بدات بعد ما تزوجو
لهذا نقولك ما تتسرعيش اذا تقدملك اي خاطب و خممي مليح و اللي ما صبتيهش عند اهلك ما رايحاش تصيبيه دائما عند البراني
ركزي على الاخلاق وادعي ربي يرزقك الزوج الصالح و يجي في الوقت المناسب راكي صغيرة و جاية للدنيا
اما لقراية اللي كرهتيها شوفي السبب و بطليه اذا كانت الانترنت بطليها و ما تدخليش اذا كانو صحاباتك ماشي تع قراية اجبدي روحك عليهم و صاحبي المجتهدات و المتفوقات و الملتزمات خيري اختصاص تحبيه باش تنجحي فيه وما تقارنيش روحك بالاخرين
على خاطر تقدري تديري امور ما يقدروش يديروها انتي تاني تقدري تكوني ناجحة و موهوبة
مارسي نشاطات تحبيهم و اشغلي وقتك و خليك من المسلسلات والافلام راهم يبيعو في الوهم و الزواج ماراهوش نهاية انما بداية
السلام

[aissam .3820]

يا اختي اذا حابة تقراي الانترنت راهي مرض غير اخطيك منها.....

..


بالتوفيق...

...

وربي يرزقك الزوج الصالح..


..

[مهاجرة إلى ربي]

وعليكم السلام ورحمة الله وبركاته ومغفرته
لا أدري ما أقول لك أختي
ولكن
الزواج إذا بقيتي تفكري فيه ...تعياي صراحة
خلي الأمر لله سبحانه وتعالى
واشتغلي بما ينفعك
حتى يرزقك الله الرجل الصالح إن شاء الله
وعليك بالاكثار من الطاعات ، والرجل الصالح رزق من الله تعالى ،فأكثريييييييييييييييييييييييي الدعاء.
بالنسبة للباكلوريا والوالدين ...فترة وتمر بإذن الله تعالى
وعليك بزيادة برهما والتودد لهما.
واشتغلي بالعلم الشرعي فهو ماينفعك إن شاء الله تعالى
فنحن قاربنا الخمس سنوات في الجامعة وقلوبنا لم تعد مثلما كانت والله المستعان من هول مانراه هناك.
وما تعانين منه هو فراغ نفسي وعاطفي ناتج عن تجربتك السابقة ، والنفس إن لم تشغليها بالطاعة شغلتك بالمعصية ، فحاولي أن تملأي قلبك بالنافع من العلم الشرعي ، وحب الله ورسوله صلي الله عليه وسلم.
وهي فتــــــــــرة وتجوز بإذن الله.
فرج الله عنك ورزقك الزوج الصالح التقي النقي...آمين

[النجمة القطبية]

شوفى اختى الكريمة
الهدف من الزواج هو تاسيس اسرة مسلمة وتربية جيل صالح ويحتاج الى استعداد وتطوير للذات
وليس للهروب من البيت ومشاكله
اياكى وهذا التفكير الذى لا يحمد عقباه مهما كان لن تجدى مثل والديك اطيعهما واحسنى اليهما واصبرى عليهم
ولن تجدى من يهتم لامرك او يخاف عليكى مثلهم
ربما اعتقدو ان مصلحتك فى الدراسة فلا تلوميهم ولا تفكرى بالهروب منهم بل فكرى فى برهم لانه واجبك
ونهار تتزوجى فى المستقبل باذن الله اخرجى من داركم وهو راضيين عليك باش يدعولك دعوة الخير وباش ربى يباركلك فى بيتك مستقبلا لان اهلك هم بداية البركة فى الحياة
وبما ان هدفك الزواج فقط ولا تريدين التعليم اذن اختارى مجال مناسب لهدفك كتعلم الحلويات او الخياطة او مجال تثبتى فيه ذاتك وفى نفس الوقت تطورى مهاراتك
موفقة

[توكل]

شوفى اختى الحل راه موجود شوفى النت عندك استغليها بحوايج ملاح كاين فى منتديات اسلامية نسائية فقط بها دورات لحفظ القران وتعلم التجويد والنورانية اعطيك مثلا منتدى خير زاد وايضا فى منتدى طالبات سبكة القراءات القرانية يوجد الكثير الدروس تقدم فى غرف وهده الغرف بها غير النساء ومن كل الدول رايح تتعرفى على اخوات هناك
والله والله رايح تتغيرى انا عندى اخوات والله نعم الصحبة الصالحة وحاجة اخرى الزواج راه رزق من عند ربى غير متقلقيش ارضى الله اولا وثانيا كونى بارة بوالديك ادا حابينك تقرى حاولى وماتقليش مانقدرش تقدرى بحول الله صلى وادعى ربى الله كريم وهو ارحم الراحمين
ربى يفتحها عليك

[soumia24]

ياختي هدي الحالة والله تصرا مع بزاف لبنات لي ف عمرك صدقيني علابالي تقولي انهدرو و ماحاسينش مي انا شخصيا عديت عليها و حتى لدرك هو المشكل كامل انا عندي كي عودو الوالدين بعاد عن ولادهم كيما انا مع ماما معندنا حتى تواصل بيناتنا كون يكون عندي مشكل منقدرش نحكيلها و نفرغ على قلبي و بابا منحكيوش .... الوغ كلش يبقى ف قلبك وتبقاي طلعي و تهبطي و بلاك تغلطي ف تخمام تاعك ..... شوفي العمر هدا الطفلة تبدا تتقلق و تحب دير قرار و طريق ف حياتها خاصة كي يكون الجو فدار ميساعدش هنا متلقايش روحك خلاص بين كيما قولتي قراية ولا زواج ...انا وحدة من ناس صدقيني تقريبا عشت لحكاية تاعك و عندي 22 عام مابعادش بزاف الحاجة لي نصحك و ناكدلك عليها هي قرايتك و قرايتك بسكو الزواج و الهروب من الدار مهوش حل خلاص اصبري ووالديك ميكرهوكش وديري تحدي و كملي لقراية هدا هو السلاح تاعنا ف الوقت هدا اما الراجل قادرة تدي واحد تحبيه و كامل مي صدقيني كي يخلقو المشاكا او مش والديك ولا خوتك رايحة تكون الكارتة اكتر و اكتر .......... و ربي يعاونك

[عمتوتة1]

يا اختي اذا حابة تقراي الانترنت راهي مرض غير اخطيك منها.....

..


بالتوفيق...

...

وربي يرزقك الزوج الصالح..


..

:19::19::19::19::19:

[نور اليقين جيداء]

ربي يرزقك الزوج الصالح..

[أحلام سرمدية]

أختي ان حلي قد يكون ساذج بقدر ماقد يكون جد واقعي
لي جارة قد قنطت العيش تحت حكم زوجة الأب المستبدة فتزوجت بأول واحد تقدم لها وادعى الطهر والعفة
المصيبة أنه من جماعة المخدرات والله يا أختي انه ليضربها ويسبها وينكد حياتها يوميا
لازالت البنت نادمة على دراستها على الأقل كانت نفعت نفسها
أختي تخلي قرايتك يعني انك راح تخلي مستقبلك وسلاحك في الطريق
وكي تقولي راني ماديتش الباك معناتها ماش تاع قراية راي غالطة
شوفي السبب اللي خلاك ماتربحيهش ختي عالجيه العام القادم وربي يقدم اللي فيه خير
المهم ندعي ربي يرزقك الزوج الصالح والتوفيق

[nouna l maghbouna]

رانا كيف كيف يا اختي انا تاني وليت مانحس بحتا حاجة حابة نقعد وحدي .... رانا كيف كيف في كلش ههه ماناش كيف كيف غير في الدراسة انا زعكوني قالولي توجه الى الحياة العملية هههه
ختي آخرتها موت عيشي حياتك ألبسي أخرجي اضحكي و مكتوبك كي يجي او يجي انا رحت لطبيب نفساني و الله استرحت
و كيما قتلك عيشي كل دقيقة من عمرك فوور زهو و صلاة و طريق ربي
آسفة على الاطالة *

[yesican]

علاه ماتبديش في صفحة جديدة من حياتك و و تشوفي الحياة من الجهة الثانية التي تتيح لك السعادة و الايمان وصفاء القلب و الدخولة في عالم المجتمع و المعاملات و كسب محبة الناس لانني اضن ان مشكلتك هي العزلة و الانطواء مما سبب لك الياس و الكابة :mad:...................يا ختي خسارتك في الباك ماشي نهاية العالم انا عندي خالتي و الله خسرت الباك 4 مرات و في الخامسة ربحاتو بمعدل 17 و الان راهي استادة جامعية في الانجليزية و عندها الدكتوره في التاريخ و اللغة الفارسية بعدما درست في ايران و زيادة هي مترجمة الكتب مثل كتاب دار الحريق لمحمد ديب و عندها ثلاث اطفال مثل القمر :).....يا ختي على حساب كلامك بقالك غير تربعي في وسط المدينة و تقولي للمارة (زوجوني ......زوجوني ....) هههههههه:1: ..................يا ختي راكي صغيرة ماضيعيش حياتك راكي تعيشي غير مرة وحدة استغلي الفرصة و انطلقي نحو الامام بالدراسة لكي يكون لكي قدر لاباس به من الثقافة و مستوى يسمح لك بالعمل فادا اردت الزواج فمن الدي يقبل اليوم بفتاة غير متعلمة ليس في جيبها حتى شهادة البكلوريا :confused:.............يا ختي افيقي راكي حاسبا والديك يدومولك (ربي يطول في عمرهم ) و لكن هم تعبوا لكي تكبري و ترفعي شانهم و يعودو يفتاخروا بيك فلا تخيبي املهم فيك و كوني البنت البارة المطيعة و المتفوقة في دراستها الخلوقة طيبة القلب و اللسان طاغية الانوثة و بنت الدار بامتياز القافزة في البيت و في الخارج ماتخليش حتى واحد يلعب بعقلك و جيبي حقك وين ماكان ;)........... و اكيد ادا كنتي تتمتعين بهده الصفات راح يتمناكي كل راجل و انتي ان شاء الله تدي سيد سيادهم ههههه :19:

[قابضة على الجمر]

انا اظن ان تفكيرك بالزواج ليس الا محاولة هروب من الواقع انت تعبانة نفسيا لهذا انا ننصحك تقربي من والديك و اخواتاتك او صديقاتك او اي حد يفهمك و تحكيلو كل شي وانا متاكدة بلى بعدها ان شاء الله راح تتحمسي للقراية من جديد وكي تدي الباك خلاص تتحل المشكلة تعودي تفكري في المستقبل فرات
اما عن الشاب تاع الانترنيت انا ننصحك ماتزيديش تقربي للكمبيوتر خلاص حتى شهر و تنسيه ما هوش مشكل انت درتي هكا خاطر ماكانش حد قريب منك تفتحيلو قلبك
و ايضا حاولي تشغلي اوقات فراغك و ما تفكريش بزاف

[نصر الدين 17]

السلام عليكم ورحمة الله وبركاته
يا اختي ننصحك بنصيحة ديري واش قالولك والديك هما ادرى بمصلحتك وكملي قرايتك اما بالنسبة للزواج فهو راه مكتوب ربي سبحانو ونطلبو منو سبحانو يرزقك الزوج الصالح والذرية الصالحة ان شاء الله

[medrid]

انتي مافهمتيش واش حابا واحنا واش نقولو

[imi02i]

أنا شبيهة بك إلى حـد مـا
فبعدما كنت الأولى في الصفوف الدراسيـة ماعدت الآن أتحمل شيئا إسمـه الدراسـة
والكل منصدم بحالتي هذه ، والكارثـة أن الكل كان ينتظر نجاحي في البكالوريا بفارغ الصبر خاصة والداي وبمعدل مرتفع أيضا
ليست مشكلتي أني وقعت في حب أو شيئ من هذا القبيل {فقلبي حاليا مغلق}
لكن أصبحت لي إهتمامات أكثر من الدراسة ، و عائلتي تنظر إلى كأنني البنت الصغيرة
ولا يدعون لي أبدا وقتا لأتخذ قرارتي بنفسي
ويفرضون علي مايريدون دون رغبتي كالدراسة مثلا
وهذا ماأهابه في المستقبل القريب ...
ربي يجيب الخير إن شاء الله
أما بالنسبة لك فليكن لك هدف صالح تجاه الزواج كي يبارك الله لك
وإن كان همك الوحيد أن تهربي من المشاكل وتطلبي الحماية من رجل آخر لربما تقعين في دوامة مشاكل اكثر من التي تعانينها
ربي يرزقك الزوج الصالح عاجلا غير آجـل

[محمد غيزة]

السلام عليكم قرات مشكلتك اختي من خلال تجربتي اختي الحالة التي تعيشينها سببها الحب انت تردين الزواج بالشخص الذي تعرفتي عليه في النت المهم مشكلة عاطفية لما كل هذا الحزن اعلمي اختي ان الله معك واعلمي ام من يتق الله يجعل له مخرجا من حيث لا يحتسب ان اردت الزواج للتعفف فاعلمي ان الله عز وجل لن ينساك ولكن اصبري حتى يرزقك الله بالزوج الصالح لا تفكري اختي المهم ان تتزوجي المهم ان تتزوجي زوج صالح اختي احذري من العلاقات عبر النت فانت لا تعرفين نوايا الاخرين ولا تعطي قلبك لاي كان الا اذا جاء الى بيتكم وخطبك عندها لا عليك اختي انت نيتك حسنة ولكن الاخرين ليسوا بمثل طيبتك ان تعرفتيبهذا الشاب فاطلبي منه ان يتقدم لخطبتك عندها تعرفين هل هو جاد ام لا ولا تكترثي ان تحجج لك بالعمل او الظروف الاجتماعية فاعلمي اختي ان من يريدك زوجة لن يتردد ابدا في التثقدم لخطبتك
بالنسبة لدراستك يمكنك متابعة دراستك طبعا ان اردت ذلك ولن يكون هناك مشكل ان لم تدرسي ولكن ان بقيت في البيت ولن يتقدم احد لخطبتك عندها سوف تندمين ويطول الوقت سوف تقوليت ليتني اكملت دراستي اعلم ان المراة الافضل لها ان تبقى في البيت انه راي الخاص وكل ما اقوله لك اختي لا تحزني واعلمي ان الله سوف يفرج همك ادعي الله في الثلث الاخر من الليل واعلمي ان الله لن ينسى عباده ابدا كان الله في عونك وجعلك من الصابرين ولا تنسي اختيان فرج همك اخبرينا استودعك الله

[evaevalle]

السلام عليكم ورحمة الله تعالى وبركاته
مشكلتي ياخاوتي والله ماعمبالي اذا هي مشكلة حقيقية واللا هبالي هو المشكلة وقاعد يخلق في حكايات ومشاكل , نفسيتي راهي تعبانة بزاف راني تعبانة فكريا جسديا من كل النواحي , انا وحدة عمرها 20 سنة مديتش البكالوريا والله معمبالي اذا تأثرت واللا متأثرتش صح غاضتني بصح منيش حاسة بروحي للي زعفانة خلاص اللي حساتو اني وليت منحسش , كانت امنيتي ندي البكالوريا ونفرح والديا مع بداية العام قريت وتعبت بصح في نهاية العام فلست وحبيت واحد هذا الواحد تعرفت عليه في النات ووليت نخمم فيه بزاف ووليت منراجعش ماوالو , حتان ماديتش الباك وهكاك مزلت نحبو والباك منعرف والله معمبالي ,عمبالي راكم تقراو وتقولو وش بيها هاذي هدرتها مايش مفهومة والله ياخاوتي راني في دوامة مايعلم بيها غير ربي مفهمتش علاه عمبالي اني ارتكبت معصية كي حبيت واحد وحكيت معاه وعمبالي وواثق من نيتي الصافية اللي جامي توصلني الحرام ,المهم كي مديتش الباك موليتش نحس خلاص ,حابة نقعد غير وحدي في بلاصة خالية واحد مايقعد معايا نقعد عام عامين حابة نبعد على الناس لأن قلبي تجرح بزاف من معاملاتهم ,هنا اكل موصلتش للمشكل الحقيقي المشكل هو راني حااااااااااااااااابة نتزوج حابة نتستر منيش حابة نكمل نعيش هكا خلاص صح الحمدلله على كلش ,سبحان الله الرسول عليه الصلاة والسلام قال :" عجلو في اثنين دفن الميت وزواج البنت".
صح مكتوبي مجانيش وكلش بيد ربي , المشكل والديا حابيني نقرا وانا راني الله غالب عليا لوكان عيني في القراية راني قريت ونجحت , صح العلم نور بصح نتعلم في داري نتعلم في المسجد نتعلم من الانترنات كاين الكتب ,كرهت من كل يوم برا بحجة العلم وكرهت من الاختلاط حتان عييت نغض بصري , حابة نريح في الدار ونتستر والله كرهنا من الشبهات ,ياخاوتي المشكل هو اني كارهة بزاف حوايج ومتأقلمة معاهم رغم كرهي ليهم
وزادت ضربت الباك اللي مديتوش كملت عليا وليت نشوف الدنيا فلو , وفوق هذا الشي خلي والديا ربي يحفظهملي صح مديتش الباك بصح راني ديما نبقا بنتكم ونتوما ديما تبقاو والديا , الوالد ربي يسمحلو اول يوم سمع بلي مديتش الباك قالي كلمة جامي ننساها , غلبت ياخاوتي والله غلبت , المهم راني حابة نزوج وعمبالي علاه حابة نزوج باه نبعد على دارنا اللي شبه خالية من العاطفة وحابة نلقا واحد يفهمني حلالي منيش حابة نغلط في حياتي .
اسمحولي خاوتي كثرت عليكم والله لوكان نعطي لاتوريزاسيون لقلبي الكتيبة متخلصش باسكو راهو معمر بزززززززززززززااااااااااااف
بغيت حل , ولجأت ليكم باه تعطيوني حل معقول مستخلص من تجاربكم وتساعدوني تعرفو وش هي مشكلتي بالذات راني معرفتهاش
منيش حابتكم تقولولي اكثري من القرآن والصلاة واصبري , والله راني منيش مقصرة من الناحية هاذي خلاص ,حابتكم تكونو معايا واقعيين .
شكرا مسبقا



مساء الخير
اختي الزواج مكتوب انا تاني نحب نزوج لكن و الله تندمي إذا عندك الفرصة تولي افضل من هكذا بالعلم و ما تقوليش نتعلم في الدار النت لا تكذبي على روحك لوكان ما تكونش الجدية ما تقرايش
بخصوص النت ربي يغفر راكي فهمتي الغلطة ما تعاوديهاش برك
كل الجزائريات تحب تتستر و تكون عندها اسرة حاجة طبيعية
لكن اذا ما كانش نضيعوا عمرنا لا ابدا نتعلم نقرى انا الباك عاودته 5 مرات و ديته و قريت وراح ننجح في الماجستير و تقري في الجامعة و إذا كان مكتوبي نديه ما نيسش من رحمت ربي و ندفن عمري بالحياة في عهد الرسول و كانت للنساء تجارتهم و مالهم الخاص انا نكون قدوى ماهوش نهرب ربي ما يحبش عبده الضعيف
اتمنى ان نكون و فيت
وراني هنا نعاونك

[فاطمة الزهراء31]

السلام عليكم
ختي انتي قلتيها بفهمك قريتي في بداية العام ممبعد تعرفتي على واحد دالك عقلك انا سؤال لنطرحهلك هو هذا الانسان لي ضيعتي مستقبل تاعك يستاهل ولا لا؟ شوفي ختي راني كبيرة عليك وننصحك كيما ختي عمرك ماتخمي في زواج نقولك علاش حنا البنات مشي حنا لي نكتبوا وقتاش نزوجوا قادرة تتزوجي بعد شهرين ولا عام ولا6سنين ولاكي يكون في عمرك 40 لاخطر مانجموش نصنعوا قدرنا معنتها ختي لعزيزة خمي في حياتك ومستقبل تاعك قراي وتعبي وخلي ايمانك في ربي سبحانه وخلي ثقتك بروحك كبيرة
ومشي ماجبتيش الباك نهاية العالم صح غلطتي وضيعتي الباك مي مزالك صغيرة وتنجمي تعاوديه وتديه بمعدل كبير دروك ياختي ديبلوم هو لي يهدر قري وتعبي ولاديري حرفة في يدك مدامك صغيرة تلقيها نفترضوا تزوجتي وجبتي ولاد ممبعد راجلك مات ادا قدر الله ولاطلقك واش ديري؟بصح ادا كان في يدك سلاح لي هو قرايتك ماتتغبنيش وماطيحيش نيفك لحتي واحد والباك مشي نتي لولا لي ماديتيهش كاين بزاااف لي يقروا ويتعبوا في تالي مايدوهش ننصحك ختي لعزيزة مدامك صغيرة شدي في قرايتك وماتضيعيهاش على جال اي واحد مكانش لي يستاهل تضيعي عام من حياتك على جالوا والزواج بعديه على عقلك حتى يكتبلك ربي وربي يرزقك بزوج صالح ولد ناس ويستر على قاع بنات المسلمين ومكتوبك يجي للباب داركم مايشقاش ضيعي وقتك في حب لاخطرش مكانش منه الحب تاع صح يجي مورا زواج

[Crazy lazy Girl]

يا وسمك راهي الدنيا مشي ساهلة و الزواج بالاكي تظني بلي راهو كيما فالحكايات و الافلام.....كملي قرايتك و عودي حاجة في بلادك خيرلك بويسك اومبعد راح تندمي علابالي .....