الله يجازيكم عاونوني راني حايرة وباه نهبل [الأرشيف] - منتديات الجلفة لكل الجزائريين و العرب

مشاهدة النسخة كاملة : الله يجازيكم عاونوني راني حايرة وباه نهبل

وهمُـ الأقنعة~

2012-07-30, 16:55

السلام عليكم
صح رمضانكم نتمنى تكونوا بخير

والله الا راني حايرة وباه نهبل وان شاء الله نصيب عندكم الحل

انا بنت عمري 19 عام هذا العام جبت الباك انا نسكن في ولاية شلف واخترت انني نقرا في الجزائر درت تخصص نبغيه بزاف بصح والديا وكامل لافامي راهم معارضين باه نقرا خارج ولايتي راكم عارفين حالة الاقامة والترونسبور

راهم يقولولي ايلا مراكيش باغية تقراي اتزوجي مع العلم انه عندي شخص نبغيه بزاف منقدرش نوصفلكم شحال نبغيه وعلى حساب منعرف هو تاني يبغيني بصح افار نتاع تكون بيناتنا علاقة هادي موحال باسكو كاين اسباب لا داعي لذكرها أحسن

وغير في هادوا ليام تقدم ليا واحد يسكن خارج الولاية نتاعنا قالولي كامل اقبلي بيه
وانا كيما العادة دائما ندير السبة بقرايتي غير باه منتزوجش باسكو كيما قلتلكم من قبل عندي واحد نموووت عليه

بصح هادي المرة الحيلة نتاعي نتاع القراية مخرجتش عليا باسكو هذاك الراجل الي تقدملي قالي نخليك تقراي يا لوكان 5 سنين
على حساب مشفتهم يتبعوا فيا ومام هو تاني قاللهم مانيش باغي نسمح فيها
انا قلتلهم مدام عندي واحد نبغيه منقدرش نروح عند واحداخر
بصح قالولي راكي تقولي موحال باش المكتوب يجمعنا شتا راكي تستناي

والله يا جماعة ألا تخلطتلي وراني حـــــــــــــايرة
الله يرضى عليكم عاونوني ولو بالقليل

ملاحظة الشخص الي نبغيه منقدرش ننساه عزيز عليا كيما بابا

djazia94

2012-07-30, 17:09

السلام عليكم
انا من راييي تعفسي على قلبك وتتزوجي
مادام محال تزوجي بلي حبيتيه وش راكي تستنايي
انسايه و خممي فمستقبلك
الله غالب لازم اتضحي بحاجة
وانا في رايي الامور راي واضحة لانو ماعندكش الاختيار
خممي منيح بما انك خسرتي الحب ما تخسريش القرايا ثاني حاجة وحدة خير من زوج
و ان شاء الله ربي يهنيك

madjid.03

2012-07-30, 17:17

سلام اختي العزيزة

يعطيك الصحة عللى الجرأة الي قمتي بيها
نقدر نعاون اختي نقولك اصبري وحاوللي انك تقنعي عايلتك غير بشوي وماتهبليهمش ياسر مذابيك
قنعيهم باسلوبك الخاص الرائع الحلو ماشي بالسيف انا نديه ولا منزوجش غير بشوي كملي قرايتك في ولايتك
وبعد بشوي يجي يخطبك وخبري ماماك بلي مش رايحة تزوجي خلافوا وإذا صبتي ترسلي الي خطبك بلي راني نحب فلان ومنقدرش ننساه حتى ولو تزوجتني وجربي وخممي وشوفي وادعي لخيك مجيد
راها عندي نوعما خبرة قليلة
وربي يعاونك وياربي يكون حلالك اختي لعزيزة

مريم الصابرة

2012-07-30, 17:50

السلام عليكم اختي راني كتبتلك رد في قسم المجتمع موفقة صحا فطورك

sraya

2012-07-30, 18:29

الامر سهل و واضح اختي العزيزة انت تقولي باللي الراجل اللي تحبيه موحال تتزوجيه
و حابة تكملي قرايتك
و هذا الشخص اللي خطبك ناس ملاح و يحبك
من رايي اذا رفضت هذا و حتى اذا قبلو والديك رايحة تزيدي تتعلقي بالاول اكثر و انت مكيش رايحة تتزوجيه على كل حال و تضلمي اللي خطبك باطل
علاش تطولي في الامور و تعقدي فيها انت حابة الهناء و الا الغذاب تتزوجي و تقري خير ما تبقي تحبي في واحد من المحال باش تديه
صح فطوركم

وهمُـ الأقنعة~

2012-07-30, 19:53

السلام عليكم
وبارك الله فيكم على الردود اخواني اخواتي

الحاجة الي مقدرتش نوصلهالكم انه الشخص الي نبغيه أكدلي من مصدر موثوق انه ماهوش يخمم باه يتزوج بيا هادي الاولى
والثانية انا مادام الواحدة تحب اي شخص تولي عندها مخيلة كبيرة مثلا تقول كي نتزوج بفلان لازم ندير هاديك وهاديك وهاديك انا راه صاريلي هكذا راني مقيدة روحي بهذاك الشخص

وكي قلتلكم معزتوا معزة بابا بالاك الي نتزوج بيه وميكونش كيما هو باسكو فات عليا وقت نتاع محاين ووقف معايا وقفة مننساهاش
وعلى الحلال والحرام والله الا نعرف والحمد لله نطالع ونقرا بزاااف ومعندي حتى مشكل
لدرجة انني مخلصة للشخص الي نبغيه
كي يهدر معايا راجل والا اي واحد يخطبني هو الشخص الاول الي نخمم فيه سبحان الله قبل منخمم في نفسي

والله الا نضريت بزااااف
القراية في شلف مانيش باغيتها
والزواج لالا
والي نبغيه مكانش معاه avenir

والحل ؟؟؟؟؟؟؟

جسر الأمل

2012-07-31, 00:31

وهمُـ الأقنعة~

2012-07-31, 00:40

ايا صايي راكي فريتيها
الحل في قرايتك معناها كي غادي تقري غادي تتلهي بامور الدراسة وفي هدا الوقت انسيييييييييييييه واه انسيه لخاطرش قالك مانتزوجش بيك امالا راه مقطعك لياس منه
وصلي الاستخارة على السيد اللي خطبك ياك ماراكي خاسرة والو زوج ركعات معاهم دعاء، وكي قالك نخليك تقري اقري على روحك وتعرفي عليه اكثر في فترة الخطوبة ودوووووووووووووووووووك تشوفي غادي ينسيك في الاول
لخاطرش انت عمرك 19 المراهقة مازالت دايرتلك هاجس تاع واحد تبغيه وتبني معاه الدار ووووووووووووووو
وربي يوفقك اختي
هي والله ماصعيبة ماوالو استخيري ربي واكيد رايح يفرجها علييييييييييييك

بالعكس كي نقرا نزيد نتلاها بيه
الدراسة معنديش اشكال كون نحط معاها نجيب اكثر واكثر بصح الله غالب
واحد الوقت الناس تقرا وانا دايرة يدي على خدي ونبكي ونزعف في روحي

100 بالمئة مخرجتش عليا
بصح الله غالب مكتوب ومعندي مندير
صلاة الاستخارة منقدرش نصليها باسكو قلتلهم مادام منقدرش ننسى الي نبغيه منخدعش ولد الناس ونتزوج بيه وفي التالي منعطيلوش واش يستحق مني

ربي يجازيك
بارك الله فيك

sarl02

2012-07-31, 02:49

تلهاي بقرايتك ....وقراي في الشلف واش بيها راه فيها بزاف تخصصات مليحة وخليك مالحب والهم هذا وانت وين بنتي يا طفلة؟؟19 سنة وراكي حابة اطيري ها هني روحك يا بنتي.

وهمُـ الأقنعة~

2012-07-31, 11:33

تلهاي بقرايتك ....وقراي في الشلف واش بيها راه فيها بزاف تخصصات مليحة وخليك مالحب والهم هذا وانت وين بنتي يا طفلة؟؟19 سنة وراكي حابة اطيري ها هني روحك يا بنتي.

والله معلابالي تخلطتلي كامل عندك الحق في هدرتك بصح الله غالب هذا حالة الي يتبع قلبوا
وميصنتش لهدرة الناس

دموع الورد2

2012-08-20, 12:28

السلام عليكم

انا نقولك كملي قرايتك اما الوهم الي راكي عايشتيه وحدك ما اسموش حب يمكن يكون اعجاب او امنية الحب لازم يكون من الطرفين

كيما يقول المثل من عندي و عندك تنطبع و من عند واحد واحد تنقطع

المهم انا نقولك عكس واش قالولك الاخوة عيشي وهمك استنايه حتى الموت تديك و انتي سميتي نفسك وهم الاقنعة ادن فليكن

و للحديث بقية ادا رديتي عليا

سلام....................................

chamsa0258

2012-08-20, 12:57

صحا عيدكم
تاخذي برأيي ختي العزيزة :
هاد الانسان لي راه يخطب فيك قلتي لباس بيه و يحبك وناويك في الحلال و جاك من الباب قدام ربي وعبادو و حابك تكملي قرايتك
وش تحوسي اكتر من هاك ؟؟؟؟
اقبلي وتزوجي في نفس الوقت راكي تقراي وفي نفس الوقت جيبي دراري
هاكي بنيتي الدار وعمرتي حياتك ،واكيد اكيد اذا كان هاذ الانسان يحبك تاكدي مئة بالمئة رايحة تحبيه وتموتي عليه
وربي سبحانه وتعالى انعم علينا بنعمة النسيان

مع هاذا الكل رايحة تنساي دراكم اذا حبيتي
و تاكدي من شيء واحد فقط:ربي مافيه غير الخير
عسا ان تكرهو شيئا وهو خير لكم وتحبو شيئا وهو شر لكم
توكلي على ربي وخمي في روحك _برك _
:19::19::19::19::19::19:
:19::19::19::19::19:
:19::19::19::19:
:19::19::19:
:19::19:
:19:

♥' سندس الفردوس ♥"

2012-08-20, 17:25

احسن حل انك تصلي صلاة الاستخارة فما خاب من استخار ربي
إن شاء الله يكتبلك اين ما كان و يرضيك به

ام مريومة

2012-08-20, 23:33

ختي انا نقولك اقبلي بالراجل اللي خطبك راهو على حساب قولك وليد فاميليا و حابك انت ديري الخطوة الاولى شوفيه اهدري معاه و رح واذا تفاهمتو اتكلو على ربي و هاداك الشاب اللي راكي تحكي بلي تحبيه ياختي علاه تضيعي في روحك و في مستقبل نتاعك علا حاجة فارغة و حاجة ماكاش يعني هو راهو رافضك باه تكوني شريكة حياتو انتي كيفاه مازالتي تخمي فيه كبري عقلك و ربي ينورلك طريقك
اما بالنسبة للقرابة غير اقعدي في بلادك العاصمة راهي واعرة و انتي مازالتي صغيرة غير بلاكي اقعدي مع اهلك و اقراي قدام داركم خيرلك يا ختي و انخطبي حتى عام باه تتعرفي على هاد السيد الي خطبك و خوذي رأي باباك و يماك وربي يسهلك