تسجيلات مجنونة "ادخل لتسمع قصتي"

[zaki_moh_amir]

السلام عليكم و رحمة الله تعالى و بركاته
صح فطوركم
انا بسجلت في بجاية رياضيات تطبيقية , المهم كي رحت نهار الخميس نسجل مشيت من المدينة ديالنا على الخامسة صباحا ووصلت على الثامنة و نصف
دخلنا على بركة الله للجامعة و امبعد المهم قالونا روحو سلكو ديال عشرين ألف في لومفي15 او 16,انا رحت لل16 و كي جاو المشرفين على التسجيلات قالونا ألي يسكن بعيد يمدلنا لاكارت ديالو و شهادة التوجيه و كي نعيطولو يمدلنا 20 ألف فرحت انا و عطيتلهم لاكارت و شهادة التوجيه,و امبعد تخلطت الدعوة لتما و خرجو علينا المشرفين ماسجلت ماوالو ضربتها6 ساعات و انا ندور و نحوس على لاكارت ديالي و المشرف ألي نتلاقاه و نقلو راني عطيتكم لاكارت و ضيعتوهالي يبعثني ل اومفي و يقلي استنى فيه زدت ضربتها وحد الساعتين و انا على هذيك الحالة لا سجلت و زيد عليها ضيعت بطاقة التعريف الوطنية,مي الحمد لله عندي 6فوتوكوبي ليقاليزي و كي ولات ال 4 مساءا روحت للدار بويسك ماكنتش هاز معايا دراهم باه نكري في الفندق
صدقوني راني كاره حياتي من التسجيلات هادم و المشكل الكبير انو في الدوسي قالونا هاتو ملف الحالة المدنية و انا مين راح نجيبو لكان البلدية تحل نهار الاحد يعني انا لازم نروح نهار الاثنين و راني خايف كن نروح اليوم الاخير مانسجلش نهائيا
مي انا قررت نروح غدوة على الربعة انتاع الصباح و ماندي ملف الحالة المدنية ماوالو و لا وش رايكم
والله الحال بعيد 300 كيلو كاملة
والله عييت

[Floona]

موقف لا تحسد عليه
الله يعينك لكن لو تنتظر حتى تفتح البلدية أفضل باش متشقاش

[zaki_moh_amir]

موقف لا تحسد عليه
الله يعينك لكن لو تنتظر حتى تفتح البلدية أفضل باش متشقاش

يعني كن مانديش فيش انديفيديال مايقبلوش الدوسي؟؟؟
لا اله الا الله محمد رسو الله

[الأميرة ميمي]

يا اخي انا ما طلبوليش تاع الحالة المدنية هادي ههههههه

[Floona]

قصدي باش ماتشقاش والعبد صايم
أنا مطلبوش علي هاذي الورقة سجلت عادي

[الأميرة ميمي]

لا ما يطلبوهالكش أ خاي
غيل ما تخممش

[Floona]

نسيت قولي مدولك لكارت ولا راحت

[تائبة الى ربها]

والله عندي تاني البروبلام ديال لافيش هادي يا خويا و أنا من بجاية نسيت ما خرجتهاش علابيها ما سجلتش الخميس و الجمعة

[zaki_moh_amir]

Floona (http://djelfa.info/vb/member.php?u=424484)
شكرا على المرور
الأميرة ميمي (http://djelfa.info/vb/member.php?u=372542)
والله كنت نسنى في هذي الكلمة برك باه نروح و انا قلبي مطمن مع انها مطلوبة ضمن الملف مي والله نروج غدوة بلا بيها و كن مايقبلوش نوكلهم الملف و هوما صايمين

[zaki_moh_amir]

Floona (http://djelfa.info/vb/member.php?u=424484)
لاكارت ذهبت مع الرياح
الله لا تربحهم يارب

[zaki_moh_amir]

تائبة الى ربها (http://djelfa.info/vb/member.php?u=126820)
مافهمتش من دون جامعات الجزائر كاملة بجاية برك ألي نفحتلها على هذا الملف

[Floona]

مكانش منها بصح عيب عليهم زيد غدوة حوس إن شاء الله تلقاها

[تائبة الى ربها]

ههه و الله ما عرفت يا خويا بصح ماشي غير بجاية لوكان تحوس فالمنتدى تلقى اللي قالو بلي كاينة, أنا علابالي بيها بصح نسيت نخرجما هاذ La fiche individuelle d'état civilمن بعد اتصلت بوحدة سجلت خلاص سقسيتها اذا كان عطاتها لهم و قالت لي ايه من بعد اتصلت بيا وحدة أخرى و قالت لي بلي ما نحتاجوهاش ماراهيش Obligatoire علا بيها أنا غدوة نروح باش نشوف ولا نعود نهار الاحد اذا كانت ضرورية كي نخرجها

[ليندا ب]

rabi ykoun m3ak
w allah yahdihom hadou lmochrifin 3arfin ness sayma w jayin men b3id 3lah maysahlouch l ijra2at wyatghadou 3la chi awra9 w f dakhla tkamlouhom
ta9dar tab3ath wahad ghirak????????????

[سطريو]

غريب...ماقدرت نسمع والو....

[zaki_moh_amir]

غريب...ماقدرت نسمع والو....

ماذا لم تسمع اخي العزيز؟؟

[أبو_ربيع]

ربي يكون في العون

[سطريو]

ماذا لم تسمع اخي العزيز؟؟


تسجيلات مجنونة "ادخل لتسمع قصتي (http://www.djelfa.info/vb/showthread.php?p=10982146#post10982146)


فهمت؟؟؟؟" (http://www.djelfa.info/vb/showthread.php?p=10982146#post10982146)

[@ أمـينـة-94 @]

وثيقة الحالة المدنية مطلوبة في ملف المنحة او الإيواء إن لن تخني الذاكرة
ولا يتم قبول الملف إن لم يكن كاملا

وحسب ما قيل لينا فإن التسجيلات تستمر لغاية يوم الخميس والله اعلم ان كانت تختلف من جامعة لإخرى

وفقك الله

[anisar]

انا من راي روح بكري في الصباح تسجل ومن بعد ماتسكتش على البطاقة انتاعك لخاطر والفونا دائما ساكتين

[فتاة النسيم]

شهادة الحالة المدنية تقدر تعوضها بشهادة ميلاد في الدوسي حاطين شهادة ميلاد او شهادة الحالة المدنية حنا في الجزائر ماطلبوهاش ربي يكون معاك خويا و ان شاء الله يكون كلش مليح وتلقا لاكارت
بالتوفيق

[mr.berns]

انا سجلت اليوم عاااااااااااااااااادي بل خير من العادي

قالولنا ال يسكن خارج الولاية عندهم مراكز خاصة بيهم

والله العظيم خرجت اوراقي تاع التسجيل في اقل من ساعة (ظاع مني الوقت قعدت نحوس في بجاية على مكتبة )

مام لا كارت لحقت للانفي لقيتها تستني ماشي انا الي نستناها

صراحة حسب وش شفت اليوم قمة
بلاك نرجع بالاحد باه نكمل الاقامة والمنحة(في اقل من ساعة)
ونروح نتبحر :1:

[mr.berns]

+
قبلو الملف اتاعي بلا فيش انديفيديال و ناقص تصويرة

[kader.17]

اخيييييي متنساش ديكلاري بلي كرات ضاعة
خاترش لوكان ميطلاريش غادي يسرالك قالب

[la jolie]

الله يعطيك الصبرمعاهوم

[تائبة الى ربها]

للأسف يبدو أن la fiche individuelle d'etat civil ضرورية للتسجيل هذا ما قيل لي اليوم ان شاء الله ما تكونش شقيت روحك لبجاية

[roma dz]

ربي يكون في عونك خويا

[The Hitcher]

الله يعييينك

[zaki_moh_amir]

الحمد لله راني سجلت كل شي البارح
التسجيلات البارح كانت ساهلة و الحمد لله تهلاو فينا مليح

[تائبة الى ربها]

الحمد لله بصح كيفاش سجلت من دون La fiche هاديك؟؟؟أنا اليوم صبح درتها في البلدية من بعد رحت و سجلت في ساعة ونصف ماكانش بزاف ناس من بعد باش ندير بطاقة النقل لقيت la chaine بقيت ساعة وخلصتها ورجعت

[zaki_moh_amir]

الحمد لله بصح كيفاش سجلت من دون la fiche هاديك؟؟؟أنا اليوم صبح درتها في البلدية من بعد رحت و سجلت في ساعة ونصف ماكانش بزاف ناس من بعد باش ندير بطاقة النقل لقيت la chaine بقيت ساعة وخلصتها ورجعت

ملف ديال الحالة المدنية ماحكاوش عليه خلاص,مي كي مديت الدوسي ديالي عطاولي النقمة و قالولي في سبتمبر هاتها مع ملف الحالة المدنية
مي بالنسبة للنقل قالونا في 23 سبتمبر
سلام