المقرطفة القسنطسنية

[doudou bonoise]

يا الاخوات حبيت نسقسيكم كيفية صنع عجينة المقرطفة اي الرشتة الصغيرة المربعة و كدلك كيفية تطيبها لاني حابة نجربها و لم اعرف كيف ارجو منكم المساعدة

[doudou bonoise]

winkoum ya al fahlat

[it's me]

je ss pa de constantine okhti nchalah yfidouk

[Sissouma Souma]

ان شاء الله نقدر نفيدك اختي العزيزة
شوفي المقرطفة هي التريدة
العجينة :
ديري شوية دقيق وملح وبليهم بالماء وخليهم يرتحو شوية من بعد اعجنيهم مليح حتى تولي طرية
اعجنيها وهي شايحة مش بالماء
كي تتعجن ديريها كويرات متوسطين وغطيهم بنايلون و خليهم يرتحو
من بعد ادا عندك المشينة اللي ترقق العجينة
حطي العجينة في الجهة الملساء وديريلها فرينة عالجهتين و ابداي رققيها وعاودي حتى تولي رقيقة
وادا ما عندكش المشينة ديري بالحلال وعاودي وكل مرة ديري شوية فرينة باه تجيك ساهلة
ومن بعد حطيها تنشف شوية
كي تنشف قصيها مربعات بالموس
وحطيها تيبس ليوم او يومين
وكي تحبي طيبيها:
حطي في طنجرة تاع الكسكاس بصل ، ثوم ، لحم ، فلفل اسود ، فلفل حار، حمص ، شوية زبدة او سمن ، شوية زيت وقليهم ملييح كي تذبل البصلة حطي طماطم مصبرة حسب الرغبة تاعك تحبي ديريها بيضا تحبي ديريها حمرا
وزيدي قليها ومرقيها بالما السخون
كي تغلي المرق حطي التريدة تفور بعد ما دهنتيها بالزيت
كي تهز الفورة الاولى نحيها وبليها بشوي ما وسايسيها في الخدمة تزيد تتكسر
ورجعيها تفور و من بعد زيدي نحيها و بليها بشوية ماء وديريلها الزبدة وابقاي عاودي نفس الطريقة كي تشوفيها طرات ديريلها شوية مرقة وشوية زبدة ورجعيها للفورة الاخيرة
من بعد جمريها بالمرق والزبدة وما تكتريش المرقة بزاف باش ما تتعجنش ديري حق ما تشرب هي المرقة برك
ومن بعد حطيها في صحن التقديم وديري فوقها الحمص و البيض مشرشم
وبصحة وعافية

[doudou bonoise]

شكرا اختي على المشاركة

[doudou bonoise]

وينكم يا القسنطينيات واش راكم غلبكم رمضان

[Sissouma Souma]

اختي هادي هي الطريقة الصحيحة ولا ما عجبتكش
وراني قسنطينية
ونسيت نقولك على اللحم في المقادير
راني نتمسخر معاك برك
ان شاء الله يزيدو يدخلو البنات ويفيدوك

[ام محمد الحبيب]

يعطيها الصحة الأخت sissouma
هادي هي طريقة صنع التريدة القسنطينية
انشاء الله تجربيها سايسيها في التفوار وكي تجمريها باه ما تتعجنش

[قمر الماس]

شكرا لك اختي sissouma جامي جربت عملتها في الدار صراحة موالفين نشريوها واجدة
مي راني تعلمتها من عندك جزاك الله خيرا
كذلك حنا في عنابة نديروها بيضة بالقرفة
صح بعد الفطور

[doudou bonoise]

barak allahou fikoum w ani rah njarabha roudwa w nradalkoum lakhbar

[djamilach]

مشكورة اختي بارك الله فيك صحى فظورك

[dorya]

طريقة الاخت sessouma طريقة صحيحة لعمل التريدة بارك الله فيها

لكن فقط كي تطرحي العجينة بيدك او بالماشينة الافضل انك تحطي النشاء تشيحي بيه بدل الفرينة

انا مثلا نطرحها في الرقم2 ونشيحها بانشا ونزيد في الرقم 5 ونشيحها بالنشاعلى الوجهين ونزيد في الرقم9

وكي تنشف نقصها شرائح ونقص الشرائح مربعات صغار

و صح فطوركم

[doudou bonoise]

صح فطوركم و ربي يخليكم