انا في حيرة

[مشكلتي]

السلام عليكم راني حابة نتقاسم معاكم الي عاشتو و الي راني عايشاتو راني في حيرة و قلبي محروق

حكايتي مع شاب بدات بصداقة تعرفت عليه في احد مواقع التواصل الاجتماعية في صيف 2011هو من نفس المنطقة الي ساكنا فيها العلاقة مع الاول كانت عادية الى غاية شهر فيقري 2012 بدات العلاقة تتطور و و ليتا قراب رتحتلو و لقيت عندو الي كان في قلبي و الي تتمناه أي مرأة لكن المشكل اني نعيش جحيم و هبلتو معايا من خوفي اني نخسرو لانني كنت مرتبطة من قبل لمدة 6 سنوات و كنا راح نزوجو لكن في اخر دقيقة غير راي و صرات مشاكل كتيرة و تفارقنا و صراولي كشاكل مع عابلتي ومن بعد هدا المشكل تعقدت و وليت نخاف الارتباط
و الي زاد عليا انو هذا لشاب كل ما تقولو لازم نديرو خطوة رسمية يقلق و يقولي عندي مشاكل و و و و يقولي ديري النية و إن شاء الله ما يكون غير الخير و يقولي تحبي تزربي الامور خليها على ربي ديما هدا كلامو
راني في حيرة و الله كي نقولو مزوجو يقولي ماشي وين تحبي انت وين نحب انا ملكيتش كيف نتصرف معاه ساعات نقول ننهي كاش ونرتاح عايشا في خوف معاه راحو 6 سنوات من عمري قبلوريحت فرص بزاف وخسرت مانيش حابا نعاود نفس الخطأ و مانيش حابة نخسرو من جهة اخرئ مع العلم اني 28 سنة و هو 36 نصيحة يرحم ولديكم راني في صراع داخلي

[/زهرة عصفور الجنة/]

النصيحة راكي في علاقة محرمة توبي إلى الله إذا أراد أن يخطو إلى الأمام ف بها ونعمة وإلا أنصحكي بالإنسحاب

[azade]

سلام اختى معاك حق تخافى هدا الشاب راكى معاه فى عام ومكان حتى خطوت رسمية واش راهو يستنا و ديجا عندو 36سنة مراهش صغير أختى راكى غالطة لما قعدت معاه المدة هدى بدون إرتباط رسمى والمهم الله يوفقك

[محمد جديدي التبسي]

كوني صارمة وقيسي ما تفعلين بمقياس الشرع نسأل الله الهداية لنا ولكم
من يريد الحلال يسارع إليه أما التماطل فيدل غالبا على سوء النية والله أعلم

[da3dou3]

و الله عندك الحق بصح من كلامو راهو رزين صح كي تزربي راكي طيحي في مشاكل و اكي تعلمي الناس ماترحمش انت وحدك تقدري تعرفي العلاقة مع هذا الانسان وين توصل.

[❀عنْفُوَاפּ طُمُوحْ❀]

رايي من الرد الاول

ادعو الله ان يرزقك الزوج الصالح

http://rafat0004.net/vb/uploadcenter/uploads/07-2011/PIC-676-1310861145.gif

[الوداع]

وانسيني أخرى ,,, يا اخت راهو دايرك عشيقة ولا أظن أنه يرشحك لتكوني شريكة حياته

[selma sosou]

هكا راكي تعصي ربي لوكان تقوليلو ما نزيدوش نتلاقاو او ولا تحبني راني نستنى جي تخطب صلي صلاة استخاة او لي فيها خير ربي يجيبها

[hayet04]

يا رب الي فيه الخير يقدمهولك

[أكوام الورد]

أختي صلي صلاة الإستخارة وربي يفتح عليك ان شاء الله مع أني راني نشوف بلي راكي غالطة في هاد العلاقة اللي مصيرها مجهول
المهم ربي يسرلك أمورك و يجيبلك اللي فيه الخير

[malak achark]

راكي غير ديعي في وقتك خليك من التمسخير هدا لوكان جا سيريو راه جا من الباب صل لرب وادعيه يرزقك زوج صالح في الحلال

[رفيف الاجنحه]

يا اخت بارك الله فيك اصل المعرفة بهذا الشاب خطا من البداية ومن كانت بدايته خطأ

فأمره لايستقيم بالمرة دعي هذا الطريق ليس لك

[توكل]

اختى نعلى الشيطان شوفى لو كان ناوى الحلال لو كان جا يخطبك راه يفوت الوقت برك المفروض تفهمى هدا روحك وهده العلاقة محرمة شوفى اختى استغفرى الله وتوبى وادعى ربى يرزقك بانسان تقى ربى يهدينا ويهديكم

[سنوم 33]

اجبديروحك عليه..لكانو باغيك ضرك يجيك من الباب ومستحيل يسبل فيك.على خاطر راهي 6سنين..........واذا كان مازالو يشوف في روحي صغير..ولا مازال حاب يعيش.............اتهناي منو خير
ودجا ربي قال لا على حاجة هك ما هيش محتاجة نقاش
لكان حابك يضرب عليك صدرو...سينو كاين بزاف غيرو
ان شاء الله الي فيه الخير ربي يقربو والي فيه الشر ربي يبعدو

[Crazy lazy Girl]

ااااه من مواقع الدردشة فهي لا تؤدي الى للتهلكة ربي يوفقك .......و نصيحتي بعدي عليه لوكان راه ناوي الحلال يا حسراه ملي خطبك بصح راهو يجوز بيك الوقت هو راجل ما تتمسش سمعته بصح نتي مرا .............

[hamsa1987]

بصراحة اختي هذا ماروهوش رايح يديك (و الله اعلم ) غير اجبدي روحك ممكن حتى راهو متزوج و عندو دراري و انتي لا خبر
كوني قوية و ما تخليهش يستهزأ بيك

[Rihanna]

الأمر كله يعود ليك
اسئلي قلبك، ادا تحبيه صح لازم تضحي من أجلو

[EVE]

أنا تان جزت منين جزتي مي لا سول ديفيرونس هيا حتا انا ما كونتش سيريو معاه او تان هو الي كان يهدرلي على الزواج او نتلاقاو ماشي انا مي ما نكدبش عليك علابالي بلي نص واش قالو كدب في كذب ويلا تلاقينا ما نقدرش نولي للور الور ضربت النح عليه مي انتي ما نهدروش تقولي راكي تصدقي في روحك او ماحبوش يدوك

[أم البشائر]

شوفي اختي ربي يجعلك سكنا لمن يحب ويرضى

رجل في عمره 36 سنة نورمالمون ما عنده ما يقارع


وثانيا

في رايي اي رجل يقولك خلي الامور تسير بهدوء

حاب يطولها بيك حتى يلقى فريسة اخرى

لانو ماعندو ما يستنى

ونزيدك حاجة ما تصعب على الرجل كي يعول على وحده وان خسر امه وابيه على جالها


ثم

اهم شيء

العلاقة محرمة من باب الشرع

يكفيك هذا لايقافها

صعب امر التعلق ولكن

من ترك امرا لله عوضا خيرا منه

وما كان علاه تخبريه بقرارك لانه راح يعاود يقنعك بلي اصبري معاه ووو وتضعفي

اجبدي روحك بكل هدوء وخليه يعيش هدوءه وحده مادام راضي عزوبية اكثر من 36 سنة

احتمال كبير يكون يقضي شهوته بطرق محرمة ولا عنده عادة سرية او عنده عجز جنسي مادام راضي بكل هذا خاصة في عصر الفتن والعري

نسال الله العافية

مامك سجادة
واوقات لا يرد الله فيها عبده

وادعي ربك ورمضان على الابواب يرزقك ويرزق جميع بنات المسلمين بالازواج الصالحين

لا تستمعي لقلبك ان اردت الفلاح واعلمي ان ما هو لك سياتيك فلا تبتغي ما عند الله بمعصيته

[nour73]

أختي الثقة في هاذ الوقت ماكانش واحسن حاجة تكون في الحلال نتمنى انك تكوني صارمة في قرارك و ماتبعيش قلبك