نصائح للمقبلين على شهادة البكالوريا - منتديات الجلفة لكل الجزائريين و العرب

العودة   منتديات الجلفة لكل الجزائريين و العرب > منتديات التعليم الثانوي > منتدى السنة الثالثة ثانوي 3AS

منتدى السنة الثالثة ثانوي 3AS فضاء السنة الثالثة بمختلف شعبها: علوم تجريبية، رياضيات، تقني رياضي، تسيير و اقتصاد، آداب فلسفة، لغات أجنبية...و لجميع المواد العلمية و الأدبية و اللغات

في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة تقرير عن مشاركة سيئة ( تقرير عن مشاركة سيئة )، و الموجودة أسفل كل مشاركة .

 
 
أدوات الموضوع انواع عرض الموضوع
قديم 2011-08-28, 21:54   رقم المشاركة : 1
معلومات العضو
الامل بالله
عضو محترف
 
إحصائية العضو









الامل بالله غير متواجد حالياً


افتراضي نصائح للمقبلين على شهادة البكالوريا

سلام عليكم أردت أنا انقل هذه النصائح التي اعجبتني كثيرا و هي لطالبة قررت أن تفيدكم بخبرتها

كيفاه راكم دايرين على ما أظن راكم قالقين لاحظت أن هناك طلبات كثيرة حول تقديم نصائح الى مترشحي 2011 و أنا فوتت الباك هاد العام اول مرة شعبة رياضيات و خدمت والحمد لله قد ما نقدرش نمدلكم ياسر نصائح و لكن رح نمدلكم مادا لاحظت و ما استفدت من تجربتي ودلك حتى ما تعملوش أخطاء بدائية

ادا كنت من النوع الدي يحب المختصر غير المفيد نقلك ما تقراش في الصيف ما تعولش على الأستاد ما تظنش أن التدعيم هو الحل ما تدوخش روحك بالمراجع و عول على روحك واقرا على روحك و بالتوفيق

أما ادا كنت تريد التفصيل المفيد فتفضل

أولا وقبل كل شيء نحب نبه على القراية تاع الصيف أحيانا تكون مضيعة للوقت و ما عندها حتى معنى شوفو أنا الصيف اللي فات ما قريتش برنامج السنة الثالثة وش عملت عاودت راجعت برنامج الرياضيات و الفيزياء لكل من السنة الأولى و السنة الثانية الحوايج اللي رح نحتاجهم في الباك و نقرا ساعات الفرنسية و الانجليزية في الوقت اللي كانو فيه كل زملائي يقراو برنامج الباك اللي يقرا في التدعيم و اللي يقرا وحدو و كي جات القراية ما لقينا حتى فرق بين اللي قرا و اللي ما قراش في الصيف علاه لأنهم ينساو حنا الحوايج تاع أول العام كان ما نبقاوش نراجعو ونعاودو رانا ننساوها وينك يا الحاجة تاع الصيف لا و بالعكس اصلا تعبو ياسر في لاصيف وش خلاو للعام كامل و فعلا بالرغم اللي معظم زملائي ممتازين و جيدين ولكن أنا اللي ما قريتش بقيت نجي الأولى عليهم لا و ممكن القراية تاع الصيف تعمل مشكل تاني أرواح هادم اللي قراو في الصيف قبل ما تفهمهم في الدرس فهمهم بللي ما همش فاهمين والله أعلم

ثانيا ننبه على قضية الأستاد يعني كاين وحايد ياسر يعتمدوعلى الأستاد بشكل أساسي وش قرا هو هاداك هو أنا مش فاهمة المشكل وين في البرنامج الجديد أو في الأساتدة انا نشوف شكون الأستاد اللي يخدم في خدمتو الامن رحم ربي و كاين صنف اخر من التلاميد خلاص لقى شماعة يعلق عليها أخطاؤو و اللي هي الأستاد يقلك الله غالب الأستاد ما يقريش فينا وش رح نعمل نربح غير الأسف وليكن في علمكم أنا في شعبة رياضيات و ما كنتش نحظر حصة الرياضيات اللي معاملها 7و ما نقراش دعم و نروح غير نفوت الامتحان و نجيب أكبر نقطة بالرغم من ان زملائي ما يغيبوش و يقراو تدعيم وكيما قلت ما همش تلاميد ضعاف بالعكس ممتازين خاصة في مادتي الرياضيات و الفيزياء يعني نحب نقلكم ما تحطوش الحق الكل على الستاد و اقراو مهما يكن و اعتمدو على أنفسكم بالدرجة الأولى أنا حسب ما شفت الأستاد ساعات ما يلعبش دور أصلا مع احترامي لبعض الأساتدة المحترمين والله أعلم

ثالثا ننبه على حكاية التدعيم تلقى التلاميد من قبل ما تبدا السنة الدراسية يحكمو في الأساتدة ويشوفو في التدعيم أهم عامل من عوامل النجاح و غير تبدا القراية تلقاهم غير يقراو من الثانوية للجمعية للنادي للثانوية يخرجو من دعم الفيزياء يجريو باه يلحقو على دعم الرياضيات اللي يقراوه في بلاصة اخرى
أنا في بداية السنة ما قريتش خلاص دعم و اللي نقلو ما نقراش دعم يقللي كيفاه مشك حابة تنجحي غير روحي أجري على روحك قبل ما يروح الحال و مع دلك ما قريتش الثلاثي الأول كامل وجبت اكبر معدل 15 عن جدارة و استحقاق في الوقت اللي نشوف فيه الباقي من زملائي أو من شعبة التقني أو العلوم تجريبية غير الأصفار و قريت في الثلاثي الثاني رياضيات شهرين وحبست وفي الثالث قريت الفيزياء يعني نحب نقلكم مش ديما لازم تقراو دعم أحيانا يكون الدعم مضيعة للوقت ادا كنت قادر تقرا وحدك و تقرا فقط لأنك كيما تشوف في وقتنا عاد التدعيم الناس تشوف فيه ضرورة حتمية و قد ما تحتاجش الى التدعيم من البداية قد تحتاجو في وقت معين تحصرت فيه أو في وحدات معينة جاتك صعيبة أما ادا كنت ما تقدرش تقرا وحدك و شفت روحك حاصل تقدر تقرا تدعيم و لكن انتبه ليس الدعم هوبالضرورة الحل الوحيد و الله أعلم

رابعا ننبه على حكاية المراجع ياسر اللي تدوخ وساعات تلقى فيها حاجة زايدة حاجة ناقصة حاجة غالطة تمرينات لا علاقة بالمنهجية الجديدة و ما تجيش كيفها في الباك أصلا أنا كي قريت لقيت بللي الكتاب المدرسي أحسن مرجع بالنسبة للرياضيات و الفيزياء بالرغم اللي ما همش خاليين تماما من الأخطاء ادا حليت كل تماريناتها تقدر تقول تحكمت في البرنامج نهائيا و لدلك المرجع الوحيد اللي استعنت بيه سلسلة هباج في كل من المادتين أما بالنسبة للمواد الأدبية أنا اعتمدت بشكل أساسي على الملخصات و شريت كتاب خاص بالشخصيات و التواريخ و المصطلحات التاريخيةو الجغرافية والله أعلم.

خامسا بالاك لاحظتو أني قلتلكم ما قريتش دعم في الصيف ما نحضرش حصة الرياضيات ما نقراش تدعيم ما نستعملش مراجع ولكن في المقابل كيفاه نجيب أكبر النقاط أنا كنت نعتمد على نفسي بالدرجة الأولى أهم حاجة عندي هي فهم الدرس نقرا الدرس مليح مليح و ما نخليش حاجة مانفهمهاش ومن بعد نروح للتمرينات تاع الكتاب بالنسبة للرياضيات و الفيزياء ما تتصوروش قداه حليت تمارينات تقريبا 95 بالية من تمرينات كل من كتاب الرياضيات و الفيزيا حليتهم و طبعا في التصحيح استعنت بسلسلة هباج
وكنت نقرا في الثانوية نرجع للدار نحط في بالي بللي هاد الليلة رح نحل 15 تمرين في الرياضيات 5 في الفيزياء نراجع درس العلوم على سبيل المثال ما نرقدش حتى نكمل اللي من المفروض نعملو كامل حتى وان ما رقدتش الليل الكل و نراجع يوميا و ما نخليش حتى حاجة تتراكم و ما نخليش حتى حاجة ما نفهمهاش طول الوقت نقرا الجمعة السبت العطل تعبت ما تتصوروش الى اي درجة يعني لازم تجتهدو قدر المستطاع و الله أعلم

سادسا ننصحكم وننصحكم ونعاودلكم ما تهملوش المواد غير الأساسية و خاصة العلميين و خاصة خاصة خاصة الرياضيين و التقنيين نسألكم علاه تلقى تلميد في شعبة الرياضيات معدلو 12 مستواه أفضل ب4مرات على الأقل من تلميد معدلو 12 في شعبة العلوم تجريبية و في الباك تلقى نسبة النجاح أكبر في شعبة التجريبية لا و تلقى المعدلات كبيرة في التجريبية و في شعبة الرياضيات العكس بالرغم من أن المستوى في هده الأخيرة أحسن بكثير من الأخرى درك نقلكم علاه على خاطر العلميين ما يهملوش المواد الأدبية بشكل كبير في حين الرياضيين يهتمو غير بالرياضيات و الفيزياء و لا شيء غير دلك بالرغم اللي العلميين عندهم 3مواد أساسية معاملاتها 5و 5و 6 يعني تطيح في وحدة تطلعك الأخرى و الرياضيين عندهم مادتين أساسيتين معاملتهم 7 و 6 و المعاملات الأخرى 2 يعني تجيب العام كامل تقرا في الرياضيات و من بعد تغلط في اشارة - أو + يروحلك كلش وقللي درك وش بقا ما يطلعك كي تهمل المواد الأخرى حطو ديما في بالكم المواد الأساسية تنجحو بيها أما المواد الأخرى تطلعو بيها المعدل و الله أعلم.

سابعا ننصحكم ردو بالكم من مازال الحال أنا كشغل البارح دخلت أول يوم نقرا باك درك راني فوت الباك وخلاص راك تقول مازال الحال ودرك نقرا ولكن حط هادي الجملة في بالك "الوقت مشوفي صالحك" أنا قريت عام كامل و ما استهونتش بحتى ساعة و كل دقيقة بحسابها وفي النهاية رحت نفوت الباك وأنا مشني مكملة كلش يعني استغلو كل ثانية و الله اعلم.

ثامنا ردو بالكم تحطو في بالكم حكاية السكانار و هادي الحوايج نشفا الأيامات اللخرة في الثانوية الناس الكل تحكي غير على السكانار و اللي نقلو ما عملتش سكانار يقللي يا مهبولة كيفاه رح تفوتي الباك راكي تغامري وللا يقولولكم درك تستعملو البورتابل احنا مترشحي شعبة رياضيات و التقني و التسيير فوتنا في ثانوية معروف عليها كل عام الداب راكب على مولاه هاد العام مساكن اللي عولو على السكانار فعلا تصدمو من الاجراءات المشددة اللي داروهالهم. الحركة ما كانش و الخروج حتى الى دورة المياه ممنوع وقتاه تخرج كي يشوفك مريض في حالة ورح تموت وحتى هنا لازم يستدعيولك رئيس المركز شخصيا هو اللي يرافقك بعد ما يفتشوك 10 مرات كل خطوة تلقى واحد يفركتك باه تشرب يجيبولك للقسم و باه يمدولك ورقة اضافية هاداك تاع الاتصال يفتحلك تحقيق يعني عولو على رواحكم خير ما تتصدمو كيما هكا و حطو الجملة هادي في بالكم
"لما طلب ادم الخلود في الجنة من جهة الشجرة عوقب بالخروج منها
ولما طلب يوسف الخروج من السجن من صاحب الرؤيا لبث فيه بضع سنين" تعلم ألا تطلب حاجتك الا من الله وحده

تاسعا اجتهدو على قد ما تقدرو هاد العام أهم مرحلة في حياتك وش رح يصرا لاكان اجتهدت عام في حياتك ما عندك ما خسرت أقراو مليح العام راه يفوت يجري و تبقى حكاية خير ما تندمو من بعد و يكون في علمكم أن الامر بسيط خلاص غير احنا الي نعقدو فيه خلي الأمور تمشي على بساطتها واعمل الي عليك و هدا ماكان و يقلك المتنبي
على قدر أهل العزم تأتي العزائم و تأتي على قدر الكرام المكارم
وتعظم في عين الصغير صغارها و تصغر في عين العظيم العظائم

و بالتوفيق للجميع ان شاء الله تنجحو كامل و تجيبو معدلات مليحة





منقووووووووووووووووووول







 

3 أعضاء قالوا بارك الله فيك /شكراً لـ الامل بالله على مشاركته المفيدة
مساحة إعلانية
قديم 2011-08-28, 22:55   رقم المشاركة : 2
معلومات العضو
kamela
عضو محترف
 
الصورة الرمزية kamela
 

 

 
إحصائية العضو









kamela غير متواجد حالياً


افتراضي

نصائح في القمة
يعطيك الصحة







قديم 2011-08-28, 23:57   رقم المشاركة : 3
معلومات العضو
khaoula rouh
عضو مميّز
 
إحصائية العضو









khaoula rouh غير متواجد حالياً


افتراضي

شكرا على النصائح التي كنت احتاجها







قديم 2011-08-31, 17:45   رقم المشاركة : 4
معلومات العضو
الامل بالله
عضو محترف
 
إحصائية العضو









الامل بالله غير متواجد حالياً


افتراضي

العفو اخوتي و كينا نحب النصائح ليا نحبها ليكم و انشاء الله نستفادة جميعا و شكرا على مشاركاتكم و وفقنا الله جميعا اااااااااامييييييين







قديم 2011-08-31, 19:34   رقم المشاركة : 5
معلومات العضو
kwaydar
عضو فعّال
 
الصورة الرمزية kwaydar
 

 

 
إحصائية العضو









kwaydar غير متواجد حالياً


افتراضي

ماحضرتيش في الصيف و ماتقريش دعم و تغيبي و في الاخير تجيبي 15







قديم 2011-09-01, 09:48   رقم المشاركة : 6
معلومات العضو
الامل بالله
عضو محترف
 
إحصائية العضو









الامل بالله غير متواجد حالياً


افتراضي

هههههههههه هاذي مشي انا انا لقيتهم في وحد المنتدى حبيت ننقلهم







قديم 2011-09-01, 12:06   رقم المشاركة : 7
معلومات العضو
amel soltani
عضو نشيط
 
الصورة الرمزية amel soltani
 

 

 
إحصائية العضو









amel soltani غير متواجد حالياً


افتراضي

merci bcq kheti rabi ynaja7na kamel







قديم 2011-09-01, 12:22   رقم المشاركة : 8
معلومات العضو
**sarita**
عضو مجتهـد
 
إحصائية العضو









**sarita** غير متواجد حالياً


افتراضي

نصائح قيمة
ربي يحفظك وينجحنا كامل







قديم 2011-09-01, 19:20   رقم المشاركة : 9
معلومات العضو
الامل بالله
عضو محترف
 
إحصائية العضو









الامل بالله غير متواجد حالياً


افتراضي

ااااااااا مييييييين ربي يوفقنا و ينجحنا كامل







قديم 2011-09-02, 09:35   رقم المشاركة : 10
معلومات العضو
rimayeva
عضو مبـدع
 
إحصائية العضو









rimayeva غير متواجد حالياً


افتراضي

نصائح في القمة
يعطيك الصحة







الأعضاء الذين قالوا بارك الله فيك/ شكراً لـ rimayeva على المشاركة المفيدة:
قديم 2011-09-02, 15:18   رقم المشاركة : 11
معلومات العضو
abdelailah
عضو مشارك
 
الصورة الرمزية abdelailah
 

 

 
إحصائية العضو









abdelailah غير متواجد حالياً


افتراضي

اختي بلاش كثرة الهدرة
1-وين راك داير راسك تكون
2- ماتزيرش بزاف وتمشا درجة درجة
3- تمسك بالله
4- خدم تدي ماتخدم راك حابس


والله ولي التوفيق







الأعضاء الذين قالوا بارك الله فيك/ شكراً لـ abdelailah على المشاركة المفيدة:
قديم 2011-09-02, 15:47   رقم المشاركة : 12
معلومات العضو
خولة الخنشلية
عضو فعّال
 
الصورة الرمزية خولة الخنشلية
 

 

 
إحصائية العضو









خولة الخنشلية غير متواجد حالياً


افتراضي

الحق ملقيتش تعليق فسمحلي نقولك جزاك الله خيرا
بالفعل روووووووووووووووووعة ربي يوفقك







الأعضاء الذين قالوا بارك الله فيك/ شكراً لـ خولة الخنشلية على المشاركة المفيدة:
قديم 2011-09-02, 17:04   رقم المشاركة : 13
معلومات العضو
الامل بالله
عضو محترف
 
إحصائية العضو









الامل بالله غير متواجد حالياً


افتراضي

اقتباس:
المشاركة الأصلية كتبت بواسطة rimayeva مشاهدة المشاركة
نصائح في القمة
يعطيك الصحة
بارك الله فيك على التفاعل






قديم 2011-09-02, 17:05   رقم المشاركة : 14
معلومات العضو
الامل بالله
عضو محترف
 
إحصائية العضو









الامل بالله غير متواجد حالياً


افتراضي

اقتباس:
المشاركة الأصلية كتبت بواسطة abdelailah مشاهدة المشاركة
اختي بلاش كثرة الهدرة
1-وين راك داير راسك تكون
2- ماتزيرش بزاف وتمشا درجة درجة
3- تمسك بالله
4- خدم تدي ماتخدم راك حابس


والله ولي التوفيق
و الله عندك الحق شكرا






قديم 2011-09-02, 17:06   رقم المشاركة : 15
معلومات العضو
الامل بالله
عضو محترف
 
إحصائية العضو









الامل بالله غير متواجد حالياً


افتراضي

اقتباس:
المشاركة الأصلية كتبت بواسطة خولة الخنشلية مشاهدة المشاركة
الحق ملقيتش تعليق فسمحلي نقولك جزاك الله خيرا
بالفعل روووووووووووووووووعة ربي يوفقك
اختي العزيزة تكفي مشاركتك جزاك الله خيرا و ربي يوفقنا جميعا






 

الكلمات الدلالية (Tags)
للمقبلين, البكالوريا, شهادة, نصائح

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 07:08

المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية


Powered by vBulletin® Copyright ©2000 - 2014, Jelsoft Enterprises Ltd. TranZ By Almuhajir
2006-2013 © www.djelfa.info جميع الحقوق محفوظة - الجلفة إنفو (خ. ب. س)
Protected by CBACK.de CrackerTracker