كعك تركي من مطبخي

oum radja · 2013-12-02, 14:58

بسم الله الرحمن الرحيم
السلام عليكم و رحمة الله و بركاته
كيما راه واضح من عنوان الموضوع الوصفة تاعي هي كعك تركي
هاذو الاتراك رايحين يهبلونا وين رحنا نلقوهم هههههههههه
اذا شعلنا التلفزيون لقيناهم في المسلسلات
اذا رحنا نشرو في القش يقولك هاذي حاجة فور جبناها من الترك
وحتى اذا دخلنا لقوقل نحوسو على وصفات نلقاو حلويات و معجنات تركية ههههههههههه ماعليش
راني طولت عليكم بالهدرة البارح كنت قاعدة نحوس على وصفات للكعك لقيت هاذ الوصفة للكعك التركي وجربتها الصباح كي خرجتلي مليحة قلت نفيدكم بيها باش تجربوها نتوما تاني وتستمتعو بيها
نبداو على بركة الله بالمقادير
2ياوورت من الاحسن طبيعي او ذوق فاني انا درت لي كان متوفر عندي
كاس زيت
كاس ما دافي
نصف كاس سكر
حبة بيض
فاني او قشور ليمون
ملعقة كبيرة خميرة الخبز
شوية ملح
فرينة

نخلط الماء الدافئ و الخميرة و شوية سكر و نخليهم يرتاحو 5 دقايق
من بعد نضيفو كل المواد السائلة و السكر و نخلطو مليح
ونزيدو الفرينة و شوية وملح و الفاني او قشور الليمون و نلمو حت نتحصلو على عجينة طرية و ندلكوها شوية و نخلوها تخمر في مكان دافي

كي تخمر العجينة قطعوها كريات صغار حسب الرغبة انا درتهم قد حبة المندرين خرجولي 12 كرية

و الان نحكم كل كرية نقسمها على زوج و نشكل زوج حرابيش رقاق كيما راه موضح في الصورة

و نلويهم على بعضهم و نشكل دائرة

ديري نفس العملية مع باقي الكرياتو حطيهم في بلا مدهون و مرشوش بالفرينة خليهم يزيدو يخمرو مرة اخرى غير حساب ما تسخني الفرن على خاطر اذا اختمؤت العجينة مليح في المرة الاولى ماتحتاجش تخمير ثاني و ادهنيهم بصفار البيض مع شوية خل و ذرذري فوقهم كمية مليحة من الجلجلان محمص و دخليهم يطيبو في فرن مسخن من قبل

و هاهو الكعك واجد اممممممممممممممم ريحة تهبل انا هاذ العبر قطعلي 12 حبة على خاطر كي درت الياوورت الصغير هاذاك تاع الف هههههههه عبرت المقادير الاخرى بكاس متوسط يعني اذا درتو الياوورت الكبير كبرو شوية الكاس لي تعبرو بيه

خلوه يبرد و كولوه بالصحة و الهنا بصحتكم و شوفو من داخل

ما تنساوش الرد و التقييم و نتمنى تجربوه خاصة لفطور اولادكم لي راهم يديرو في الاختبارات الله ينجحهم كااااااااااااااااااااامل
سلاااااااااااااااااااااااااااااااااااااااااااام

ام امجد14 · 2013-12-02, 15:34

يعطيك الصحة كعادتك داااااااااااااااااااااااااااااااااااااااايما فى القمة غداا الصباح نديرو و اكيد نردلك الخبر و فعلا رانى محتاجة اكلات للفطوور مع ايام الاختبارات

sarah_sb · 2013-12-02, 15:34

واووو يعطيك الصحة باين بلي يشهي راني ديتلك وحدة ناكلها كي نفطر مع راني صايمة مممممم راني نجربها و نبشرك بالتطبيق

نبض الفؤاد · 2013-12-02, 15:38

يبان بنين وهشيش.....خصوصا انه من عملك يا ام رجاء.....بصح ما تديريهش يخمر بعد التشكيل؟؟؟

سهام دوسة · 2013-12-02, 16:02

راني رايحا نجربها وردلك بلخبر مشكووووووووووووووووووووووووووووووووورة فن

oum radja · 2013-12-02, 16:09

اقتباس:

المشاركة الأصلية كتبت بواسطة نبض الفؤاد

يبان بنين وهشيش.....خصوصا انه من عملك يا ام رجاء.....بصح ما تديريهش يخمر بعد التشكيل؟؟؟

نبض الفؤاد شرفني مرورك
طبعا تخليه يخمر شوية برك غير حساب ما يسخن الفرن شكرا لي نبهتيني رايحا ندير تعديل

الأمنيات · 2013-12-02, 16:09

جزاك الله الجنة على هذه الوصفه
دائما مميزة
بارك الله فيكِ
دمت بكل خير

بشرى2008 · 2013-12-02, 16:13

merciiiiiiiiiiiiiiiiiiiiiiiiiiiiiiiiiiiiiiiiiiiiii i

sana bordeaux · 2013-12-02, 16:13

يعطيك الصحة باين بلي يشهي

أم إناس · 2013-12-02, 16:14

ماشاء الله وصفه راءعة وَبَارِكْ الله فيك شكرًا لك

oum radja · 2013-12-02, 16:14

اقتباس:

المشاركة الأصلية كتبت بواسطة ام امجد14

يعطيك الصحة كعادتك داااااااااااااااااااااااااااااااااااااااايما فى القمة غداا الصباح نديرو و اكيد نردلك الخبر و فعلا رانى محتاجة اكلات للفطوور مع ايام الاختبارات

شكرا ام امجد جربيهم اكيد راح يعجبوك

اقتباس:

المشاركة الأصلية كتبت بواسطة sarah_sb

واووو يعطيك الصحة باين بلي يشهي راني ديتلك وحدة ناكلها كي نفطر مع راني صايمة مممممم راني نجربها و نبشرك بالتطبيق

راني نستنى بفارغ الصبر في تطبيقك و صحا فطورك

اقتباس:

المشاركة الأصلية كتبت بواسطة سهام دوسة

راني رايحا نجربها وردلك بلخبر مشكووووووووووووووووووووووووووووووووورة فن

شكرا راني نستنى