ارشدوني دون تجريح...تابع

[مشكلتي]

اولا اشكر الأخ محمد الرازي على فهم طريقتي في المقطع الأول
وشكري للسيدة زبدة حقيقة ردودك عقلانية واتمنى انني وضحت لك فموضوعي الثاني
الحقيقة ليس لي يد فقط ساعدتها في شي ضروري في السنة السابقة وهي مرأة جد متدينة ومتنقبة حاولت ادخال فكرة الارتباط معها لكن لم استطع لا اكن لها مشاعر وكما قال الأخ الرازي ربما سبب تعلقها بي هو معاملتي الجيدة لها وانا لست متدين رغما من ذلك نعطيها دروس فالدين ويوم رأتني(اخذت لها شي ضروري ) لا استطيع الحكم على نفسي اعترفت لي مقبول وجميل وهذا لايهم ومن ناحية الخجل قلت فارق السن هو من اجبرني اكن لها الاحترام فرضا لو كانت في مثل سني اكيد نحظرها
في مايخص تجاوز الحد هي من تجاوزت الحد عندي اصدقاء يعدون على الأصابع في موقع التواصل الفيسبوك ووصلت بي مرة حذفتهم كلهم لكي تعرف انني لست من هواة الدردشة بمعنى تدخلت في اموري الخاصة ومع ذلك لم برهنت لها وليكن فعلمك اسجل الخروج من الفسبوك قبل وقت العشاء
اما علاقة الثانية ليست علاقة وقلت لا اعرف عليها ولا شي وياليتها تعرف اريد الزواج بها صرت دائم التفكير فيها وليس تلاعب والدليل صرت كثير السهر واريدها للزواج وان لم يكتب القدر كل واحد فطريقو
في مايخص المصارحة لا استطيع مصارحة المرأة المتدينة بالحقيقة خايف عليها كثيرا تفعل شي في نفسها اسمحيلي مستحيل نصارحها
لي طلب اتمنى يحذف الموضوع بعد اسبوع

[محارب الحمق]

المرأة هاذي لاهي أمك لا هي زوجتك لا هي أختك لا هي من محارمك. لست مطالبا بالخوف على مشاعرها بل أنت مطالب بالخوف من الله. مادام كما تقول هي تجاوزت الحدود هذا يعني أن علاقتكما لم تعد (ولم تكن) سليمة. كما قلت أنت مطالب بالخوف من الله لا الخوف على مشاعر فلانة أو علانة. اقطع علاقتك بها والاخرى ان أعجبتك أطرق بابها وكفى فلسفلة.....نقطة الى السطر

[هـــدوء]

ما قدرتش نحدد شكون فيكم متمسك بالآخر أكثر !
من جهة تقولنا ما عندك أي شعور تجاهها و حاب تليكيديها ...
و من جهة أخرى خايف عليها دير حاجة في روحها!!
أصلا منين جاتك الفكرة بلي دير حاجة في روحها ؟
و فرضا راح دير حاجة في روحها ..ها ربي يسهل عليها بغات تشعل روحها بغات تهبل أنت وش راحلك؟
راهي بالغة كفاية بش تتحمل مسؤولية أعمالها و أنت مسؤول على أعمالك .
كل مرة طول فيها و أنت معاها راك تمدلها أمل بلي ممكن تكونوا مع بعض.
مالا فهم روحك وش راك حاب فعلا و تصرف على هذا الأساس ...
أخشى أن عذرك الواهي تاع خايف عليها يكون باش تقنع نفسك بالبقاء أكثر و الاستمتاع بشعور كونك مرغوب ..

[مُحمد رازي]

جوابي السابق قد أخذت من خلاله الظرف لي ممكن تكون فيه تلك المرأة يعني أحيانا المرأة تكون تمر بظرف معين كمثال فرضا هذه المرأة تكون مطلقة أو تكون تمر بظروف أسرية أو اجتماعية أو ما شابه في هاد الحالة و وين تكون في موقف ضعف ادا لقات شخص يسمعلها و تفضفضله و يفهمها و يعاونها ووو راح تتعلّق بيه بسهولة و نظن هنا جا دورك و مين عرفتها من خلال الفايسبوك ، و قضية أنها بدات تلمحلك على الزواج فنظن هاد الشي صرا بعد ما تلاقيت بيها على أرض الواقع و أعطيتها هاد الشيء الضروري ! أما قضية أنها متدينة و تقوم الليل لازم تعرف أخي بلي هاد الشي كامل و هاد المراحل لي قطعتهم معاها الشيطان هو لي كان يسيّر فيكم ، و الشيطان كي يدخل في الوسط بين رجل و امرأة راح يخليك تشوف الشي لي راك دير فيه و ماشي مليح تشوفه أنو مليح و مافيه حتى شي يعيبه ، و الشيطان يمشي معاك بالخطوات و هادي لي راك تنفر منها اليوم و تقول بلي ما عندكش رغبة فيها ادا كملت في طريق الشيطان هذا تأكد راح يديك معاها للهاوية و ما ينفع المرا ساعتها لا قيام الليل لا ختم القرآن ، و نتا من قبل في موضوعك السابق قلت : أنا من ناحية الدين هاد الأشهر ضعت ! ، أمالا اعرف بلي الحصانة تاعك ضد هاد الفتن راهي ضعيفة و دليل الضعف أنو الشيطان تمكّن باش يقنعك بلي لو كان تصارح هاد المرأة و تقوللها على رفضك راح تجرحلها مشاعرها و ما تعرفش واش ممكن دير في روحها ! ، و هاد الشي كي قلتلك كله وساوس الشيطان حاب من خلالها يضمن أنو هاد العلاقة لازم تقعد لأطول مدة ممكنة و حتى تكمل بما لا يرضي الله و مع أنها بالأساس فيما لا يرضي الله ، لهذا و كنصيحة أخوية و ادا راك تقول صعيب عليك أنك تصارحها و خايف عليها ادا حبيت تتخلص منها اجعل الخيار بينها و بين الله و شوف واش تخيّر ، و تأكد إدا تركتها لله مارح يصرالها والو و أسوأ سيناريو ممكن يصرالها و في حالة ما إذا كانت صح تتمناك زوج راح تبكي نهار و لا زوج و بعدها راح يرجعلها العقل و تقول كيفاش أنا نقوم الليل و متنقبة ووو و درت هاد الشي يعني راح تنزال غشاوة الشيطان من عينيها هي تاني و تشوف الطريق الغالط لي كانت تمشي عليه ، أما أنها تنتحر و لا ما رانيش عارف واش راك تخمم يا خويا هادا ماشي فيلم هندي ، و المفروض لي تأمن بالله و تعبده راح تأمن بالأقدار خيرها و شرها و إدا ربي ما قدرش أنك تكون من نصيبها راح ترضى بالواقع ، لهاذا اقلع نتا من راسك هاد الفكرة تاع الخوف عليها و عندك زوج حلول : الأول اشهد الله أنك تركتها لوجهه و قوله يا ربي راني تركها لوجهك و حتى ترضى عليا و اقطع كلشي معاها ما تقوللها لا كلمة أخيرة لا كلمة وداع لا أي شيء و ادا كان بينك و بينها غير الفايسبوك كوسيلة تواصل سيبريميه ، و الحل الثاني : صارحها وواجها و قوللها ديراكت أنك مين عاونتها ما كانش قصدك أنك تخليها تتعلق بيك و نظرتك ليها كانت تاع احترام و تقدير بحكم راهي كبيرة عليك و أنك عمرك لا فكرت أنك ترتبط بيها و اعتذر على الموقف و خلاص نقطة النهاية و كل واحد يمشي في طريقه ، فهادو زوج خيارات قدّامك لا ثالث لهما و أدا كان الله عندك عزيز و كنت تحبه صح فالخيار الأول هو الأفضل لاخاطرش راح يهمك رضا الله في المقام الأول . فيما يخص قضية الفتاة الثانية ما راحش نعلّق عليها لاخاطرش نظن راهي بعيدة المنال عليك في الوقت الحالي و راهي مجرد أحلام و أمنيات ممكن بسبب ظروفك لهاذا من الأحسن إدا ما راكش مستعد للزواج في الوقت الحالي انزع هاد الفتاة أيضا من تفكيرك لأنو السهر و عدّ النجوم و التفكّر فيها ما راح يفيد بحتى شي

[toulay]

السلام عليكم
صحا وحنا واش المطلوب منا بما انه ماكش حايب تصارحها وخايف على مشاعرها ووووو
شوف اخي في امور كيما هاذو مكانش خايف ومنقدرش ولا استطيع وفوق طاقتي وغيرها من الاعذار
الانسان لازم يخمم بالمنطق ويخمم بعقله
انت بعقليتك هاذي والمسايسة تاعك خليتيها تحس بلي راك مهتم بيها ومتقدرش على فراقها بالمختصر انت لمديتيلها الضوء الاخر
كون من الاول كنتي واعر ومكانش اللف والدوران كون مراكش في حل واربط
و en plus ياك راك ناوي تتزوج بهاذيك الطفلة ولا كيفاش
نقولك راني دخت وفرات
بالتوفيق

[زبدة ذايبة]

أسمحلي نقولك ودون تجريح.

هذا كامل تمسخير راك دير فيه.

إن كان كلامك صحيح فهذا لعب بالأعراض سواء من طرفك أو من طرف المرأة اللي راك تحكي عليها.

وإن كان كذبا وتريد تشويه والتشكيك في سمعة المنقبات.

فالمرأة المسلمة التقية النقية أبعد بكثير من أن تنالها محاولاتك البائسة.

ومهما كان وضعية ماكتبت ما اجد سوى أن أقول لك :

إعمل ما شئت فإنك ما تدين تدان.