كيفية تحضير البكبوكة أو العصبانة.....دائما من بلعباس

ام عبد الله 22 · 2014-10-10, 20:39

السلام عليكم و رحمة الله وبركاته.

كنت وعدت بكيفية تنضيف الكرشة بالصور و تحضير البكبوكة كذالك ومنها تتعرفوا على عاداتنا وأطباقنا إن شاء الله يعجبوكم و جربوهم لما لا تبقى دائما زيادة معلومة مفيدة فقط.

اولا نبدأ بتنطف الكرشة

نغسل الكرشة جيدا ثم نضعها في إناء ونفرغ عليها ماء و 2 او 3 م ك جير ونتركها نصف ساعة أو أكثر.

عند مرور الوقت المحدد ناخد الكرشة او قطعة منها على طاولة العمل نحاول تكريطها مثل ما في الصورة.

أنطرو ماذا نزعنا منها هل هذا يأكل؟ أريد رايكم.

ها هي نظيفة و بيضاء مثل الثلج.

أنطرو من الداخل هي كذالك نظيفة حتى الشحم نزعت.
ثم وضعتها في الما ء المغلي لمدة دقيقة واحدة او إثنين وها هي واجدة للإستعمال.

يتبع تنظيف المصارين و تحضير البكبوكة.

ثانيا تنطيف المصارين

بعد غسل المصارين جيدا نأتي لقلبهم انظرو كيف

شوفو ماذا اخرجنا منه.

ثم نغسلهم جيدا بالماء ونضعهم في إناء مملوء بالماء و1أو2 م ك ماء جافيل ويكون من الأحسن نوع براف bref نتركم مدة معتبرة ثم نغسلهم من الجافيل ونضعهم يغلو5 دقائق أو أكثر ما يهمش. .

ونتحصلو على هاذو ثم نقصوهم بمقص المطبخ بالطبع.

يتبع تحضير البكبوكة

ثالثا تحضير البكبوكة

الأن نأخد الرية نغسلها ثم نقطعها أطراف و نديروها تغلي في الماء من بعد نرحيوها في الرحى تاع اللحم ( تاع بكري اليدوية )ماشي الروبو او آخر.

هنا خلطنا المصارين مقطعين مع الرية المرحية
ثم نزيدو عليهم التوابل م ك من كل واحد الفلفل الحمر+ الفلفل السود+سكنجبير+ كركب او خرقوم+ملح+راس الحانوت ( ديالنا ما فيهش الكمون ولا الكروية).+ المعدنوس.

نزيدو للخليط غرفية حمص مشمخ بليلة و فنجان روز مشمخ بساعة أو أكثر.

ثم نزيدو راس ثوم مقطع رقيق أو خشين ما يهمش + بصلة كبيرة أو إثنين متوسطين مقطعين كذالك ولي يحب يزيد حفنة زبيب أنا مدرتهاش لأن أولادي ما يحبوهش ونخلط الكل مع بعض مليح و نجيب الكرشة ونبدى نحشي فيها ثم نخيطها.

نحطو البكبوكة في الكوكوط + حمص مشمخ+بصلة مرابيا+طماطم مرابيا+ طماطم مصبرة+فلفل اسود+فلفل احمر+عود صغير قرفة وماء ونديروها تطيب وها هي كيفاش جات.

نجيبو صحن كبير ونحطو فيه الكسكس و نسقيوه بمرق البكبوكة ثم نفتحوها ونحطوها من الفوق .

بالصحة و العافية من بعد الأكل بنصف ساعة نجيبو الصينية تا ع أتاي وبسم الله

نتمنى تعجبكم و أستسمحكم راني طولت عليكم يا أخواتي.

ام حمزة22 · 2014-10-10, 21:03

بارك الله فيك نفس طريقة العاصميين بصح ما نديروهاش فالجير حنا نغلو الماء ونجطوها في هداك الماء ونخرجوها تمتم ونكرطوها
راني صورت الطريقة لاكن ما كفانيش الوقت باه نحط الصور

ام عبيدة · 2014-10-10, 21:15

بارك الله فيك

في انتظار الباقي

ام محمد78 · 2014-10-10, 21:25

يعطيك الصحة

ام عبد الله 22 · 2014-10-10, 21:32

اقتباس:

المشاركة الأصلية كتبت بواسطة ام حمزة22

بارك الله فيك نفس طريقة العاصميين بصح ما نديروهاش فالجير حنا نغلو الماء ونجطوها في هداك الماء ونخرجوها تمتم ونكرطوها
راني صورت الطريقة لاكن ما كفانيش الوقت باه نحط الصور

وفيك بركة يا أختى ام حمزة المهم تكرطوها شكرا .

ام طيري الجنة · 2014-10-10, 21:33

شكرا جزيلا اختي على الموضوع المفيد
احنا تاني في دارنا في تلمسان نكرطو الكرشة بعد وضعها في الماء السااااااخن لكن ما نحطوهاش في الجير لكن مين تزوجت في دار زوجي ما يكرطوهاش في الاول كنت نعيفها هههه لكن الان نورمال

ام عبد الله 22 · 2014-10-10, 21:36

اقتباس:

المشاركة الأصلية كتبت بواسطة ام عبيدة

بارك الله فيك

في انتظار الباقي

وفيك بركة يا أختي راني درت تعديل في الموضوع وحطيت غسل المصارين يبقى تحضير البكبوكة نريح شوية ونكمل شكرا لك.

ام عبد الله 22 · 2014-10-10, 21:38

اقتباس:

المشاركة الأصلية كتبت بواسطة ام محمد78

يعطيك الصحة

الله يسلمك يا أختي شكرا لك.

ام عبد الله 22 · 2014-10-10, 23:08

اقتباس:

المشاركة الأصلية كتبت بواسطة ام طيري الجنة

شكرا جزيلا اختي على الموضوع المفيد
احنا تاني في دارنا في تلمسان نكرطو الكرشة بعد وضعها في الماء السااااااخن لكن ما نحطوهاش في الجير لكن مين تزوجت في دار زوجي ما يكرطوهاش في الاول كنت نعيفها هههه لكن الان نورمال

لا شكر على واجب حتى أنا في دار زوجي ما يكرطوهاش لكن عجوزتي في الأول قالت لي ديريها كما في داركم وكي ذاقتها عجبتها وقالت لي من اليوم ناكلوها هكذا.