موضوع مميز الجزء الثالث من وصفات حراير واش طيبتي اليوم - الصفحة 20

omarat1 · 2016-04-29, 20:42

يشهي كتير
جزاكم الله خيراً

كوثر التائبة · 2016-05-01, 08:16

روعة في ميزان حساناتك

idron0 · 2016-05-01, 11:03

صوص المحجوبة اريج 07

قطعي البصل رقيق ويلا درتيه في الروبو حطيه في كسكاس pcsالبصل يطلق الماء انا نفضلو باليد و في 5حبات بصل ديري 2حبات طوماطيش مربية و 2مغارف كبار تاع طماطم الباط و مغرف فلفل احمر حااااار و نص مغرف راس الحانوت(حنا نديروه في الدار) و ملح و دبشة و فلفل عربي و درفلو 3مغارف زيت.
ملاحظة : كلشي ني ما نطيب والو و كي نخلط المقادير ندير الزيت و نخلطها مليح بالمغرف هذا مكان.

إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.

idron0 · 2016-05-01, 11:31

رولي الدجاج و اللحم المفروم oum ibrahim

نرحي صدر الدجاج الكمية حسب ما حبيتي و نتبلو بسنة ثوم و ملح و فلفل اسود وشوية معدنوس
و نتبل اللحم المرحي بالملح و الفلفل اسود و شوية بصل مقطع رقيق و شوية معدنوس
ناخذ قطعة بلاستيك غذائي شفاف نحل عليها الدجاج و نحل اللحم المرحي فوق قطعة ا بلاستيك خرى و نقلبو فوق الدجاج و نرولي بالشوية و نضغط باه يتماسكو مع بعض ونغلق مليح الورق الشفاف و نغلفو بالالمنيوم و نديرو في بلاتو فرن فيه ماء مغلي و ندخلو للفرن مدة نصف ساعة لانو الدجاج و اللحم مرحي مايطولوش في الطياب لما نخرجة ننحي البلاستيك و الالمنيوم اما تحبي تدهنيه بالزبدة و ترجعيه للفرن يتحمر تحت الشواية او تحمريه في مقلاة في شوية زبدة و تقطعيه و تقدميه كما تحبي و الف صحة و هناء.

إضغط هنا لرؤية الصورة بحجمها الطبيعي.

idron0 · 2016-05-01, 11:43

كيك موشتييي بحبيبات الشوكولاااا lyzzabel

4 حبات بيض دافيين ،، كاس مشي معمر سكر و لي تبغي الحلاوة تعمره ،، م ص معمرة فاني ،، كاس زيت ،، ثلثي كاس حليب ( 2/3 ) 2 أكياس خميرة الحلويات و فرينة حسب الحاجة ،، حبيبات الشوكولا لي نديروها مع الحليب درك نصورهالكم باش تعرفوها
نضرب البيض مع السكر و الفانيلا ملييييح حتة يتضاعف الخليط و نضيف الزيت على 3 دفعات و نضرب طبعا بالباتور و نزيد الحليب و من بعد نضيف الفرينة مغربلة مع الخميرة حتى نتحصل على خليط تقيل شوية و ناعم ،، نضيف كمية حبيبات الشوكولا و نقلب بالسباتولا حتى تتوزع مليح ،، ندهن المول تاع الكيك و نرشه بالفرينة و نفرغ خليط الكيك و نطيبه في فرن مسخن مسبقاا على 180 درجة حتى نشوفه تحمر من فوق ،، ندخل راس السكين و نخرجه ،، لاكان خرج ناشف يعني طاب من داخل ،، نخليه يبرد شوية و نقلبه في صحن و الف صحة و هناااا.

إضغط هنا لرؤية الصورة بحجمها الطبيعي.

idron0 · 2016-05-01, 15:15

اسكالوب باني انا هي رزيقة

تاخدي صدر دجاج و تقطعيه الى شرائح رقيقة انتي و شطارتك مشي شرط يجوك كامل كيف كيف حلاوتهم في خربشتهم .... خخخخخ تحطيهم في اناء عميق مع شوية فلفل اكحل و فلفل عكري يعني احمر و شوية كمون و موتارد و رشة بودرة الثوم وعصير ليمون و حليب خليهم يمارينيو ساعة او اكثر انا الحق دي فوا معنديش الوقت منخلهومش يمارينيو . من جهة اخرى خذي بيضة او اثنين هذا متوقف على كمية الدجاج تاعك ضربيهم مع شوية حليب حوالي 2 او 3 ملاعق مع ملح و فلفل اكحل . و زيدي حضري طبسي واسع فيه خليط من الشابلور و الفرينة الشابلور تكون اكثر من الفرينة . ثم غطسي الشرائح تاعك في البيض المخفوق و بعدها في خليط الشابلور رمديهم مليح تقدري تحضريهم مسبقا و تخليهم في الفريجيدار. ثم طيبيهم في مقلاة فيها خليط من الزيت و مارغارين و حمريهم من الجهتين على نار متوسطة راهم ميطولوش و يتحمرو . يجو مقرمشين من الخارج و طرييين من الداخل ....اممم و بالصحة و الراحة .

كوثر التائبة · 2016-05-01, 15:50

يعطيكم الصحة -

idron0 · 2016-05-04, 18:23

البريوش بلونين جازيا ام البنات

500غ فرينة +3ملاعق كبار سكر عادي +4ملاعق كبار زبدة دايبه +ملعقة كبيرة خمارة خبز كاس كبير حليب دافئ+نصف كاس صغير ماء دافئ+قرصة ملح +لفاني اوبشر البرتقال ونحتاج 2ملاعق كبار كاكاو
الطريقة نخلط جميع المقادير للحصول على عجينة نقسمها الى قسمين واحد نخليه ابيض والثاني نضيفله الكاكاو لازم العجين ينعجن مليح يكون طري ويلصق شويه نخليه يخمر ثم نهبط الخميرة ثم يخمر للمرة الثانية ثم نحل العجينة البيضاء ثم نحل العجينة البنية ونحطها فوق البيضاء ونبدا نلوي مثل البسكوي رولي ندهن مول طويل ونحط فيه البريوش وندهنه من الفوق بالبيض+نسكافي ونخليه يخمر مليح ندخله لفرن ساخن مسبقا لما نخرجه ممكن ندهنه بالعسل او نرشه بسكر ناعم.

idron0 · 2016-05-04, 18:26

الفول بالثوم والكمون والعكري جازيا ام البنات

تنقي الفول وتبخريه مليح حتى يطيب من بعد في طنجرة قطعي البصل والثوم وقليهم في زيت الزيتون ثم فرغي الفول وبداي تقلبي فيه حطي الملح+فلفل اسود+الحار يلا تحبي +فلفل عكري ومرقي غير شويه متكتريش وزيدي الكمون غلقي وخليه يتشرب نكهة التوابل وينقص من الماء وبالصحة والراحه.

idron0 · 2016-05-04, 19:02

حلويات ام لجين هيثم

إضغط هنا لرؤية الصورة بحجمها الطبيعي.

idron0 · 2016-05-04, 19:25

رولي لحم ودجاج مرحي ام لجين هيثم

تاخذي الساشي تاع الفور راهم يتباعو تقصيها وتطرحي فيها الدجاج تكوني مداوياتو وبعدها الكفتة وحطي الفرماج في الحاشيو والترولي مليح وتسكري وتزيدي تغلفيها بالالمنيوم وتدخليها للفرن وتحطيها في بلا يكون فيه الما وتقلبيها كل مرة ولما تطيب تنحيلها الالمنيوم و الورق الشفاف وديريها تتحمر في الفور من كل الجهات ولا ديريها في المقلة شوية زيت وشوية زبدة وقدميها باي صلصة حابة.

idron0 · 2016-05-04, 19:28

وصفات منقولة oum islem

إضغط هنا لرؤية الصورة بحجمها الطبيعي.

idron0 · 2016-05-05, 09:49

رولي البطاطا جازيا ام البنات

3حبات بطاطا متوسطين نرابيهم في الجهة الغليضة نضيف حبة بصل صغيرة مرابية ضرسة ثوم فلفل اسود وملح 3حبات فرماج مثلثات مقطعين وملعقة كبيرة فرينة و3حبات بيض نخلط كلش مع بعض ندهن ورق الطهي ونفرغ الخليط ونعدله مليح وندخله للفرن حتى يتحمر في هذه الاثناء نكون وجدت الحشو انا عملت لحم مرحي طيبتو بالبصل والثوم والتوابل حتى نشف زدت رابيت شوية باطي وشوية فرماج لما تطيب البطاطا نفرغ الحشو ونروليها بالخف ونخليها تبرد باش نقطعها
ملاحظة يبقى الحشو اختياري وشهية طيبة.

إضغط هنا لرؤية الصورة بحجمها الطبيعي.

idron0 · 2016-05-05, 12:12

كرواسون بالليمون ام ساجد

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

idron0 · 2016-05-05, 12:13

الكريب المالح ام ساجد