ستضيع حياتي بسبب تناقض امي

[مشكلتي]

السلام عليكم رمضان كريم و ربي يتقبل منا ومنكم ... مشكلتي في أمي التي اصبحت أنا في حد ذاتي نمشي في طريقها و نشابهها في امور...
بالمختصر أمي إنسانة غير طموحة ... ما عندهاش النفحة يعني الرغبة في الاستمتاع بأي شيء ... كي نقولها هاك تقولي : أنا خلاص ران عايشة نكمل في ايامي مع انها ماش كبيرة 52سنة ... نقولها على الناس تروح تمشي و تحوس في الصيف ... تقولي انا شفت البلدان لما كنت صغيرة ...نقولها ماش قضية تشوفي المهم تبدلي جو تقولي: عادي ماش نافحة... يا عباد الله و احنا ماتفكرش فينا ؟؟؟ تخيلو جامي رحت حوست في صيف مع انو قادرين الحمد لله ...إخوتي الذكور كل واحد يروح يحوس وحدو واحنا البنات نقعدو بين 4 جدران ... وهي ماتحاولش حتى تقولها ادونا معاكم ...
هادا بالنسبة للتحواس ...نجو للأمور الأخرى .... الزواج : تخيلوووو أم ماش حابا بنتها تتزوج ؟؟؟؟
قلتلها انتي تشوفي للمادة ...تقولي لالا المهم الهناء ....و هي كل ماتسمع وحدة تخطبت تبدا تعدد في ماديات خطيبها ....
تخيلو انو الحمد لله يجوني الخطاب و هي كل مايجي واحد تبدا تحوس على سلبياتو و سلبيات أهلو ... ايجابياتو ماتدكرهمش الا قليلا...
انا وش يصرالي ؟؟؟ نتأثر يا عباد الله بهدرتها ... حتى لدرجة نقبل بالشخص و مع الوقت تبدا هي تنتقد و انا نسمع و هي تنتقد حتى يجي نهار نقولها نقولو والو و ران شفت عليه الحاجة الفلانية و ماعجبتنيش... تقولي خلاص شوف انتي ... نروح انا نقولو خلاص مكاش مكتوب...
بعدها تخيلووووو يجي موضوع هاك و نجبد موضوع تقولي انتي راك تتشرطي كل مرة يجيك واحد و ترديه .... فلان مليح و فلان كان لاباس بيه ............
انااااا علابالكم مانفهم والو و .... كي ولاة هاكدا علاش ماتقوليش لالا ماترديهش ... مع هادا انا مانكترش هدرة معاها ....
رايحين تقولولي كي يجيك واحد قوليلها خلاص هادا نقبل بيه و كدااا..... ياااااااااااااويلي لو نقولها هاك ...علابالكم وش تقولي ؟؟؟ تقولي راك ميتة على زواج .... مرة يا ناس جاني واحد و قلتلها خلالالاص هادا .... من بعد اكتشفناه كارثة و تاع تبايك و لاأخلاقي ..الحمد لله اللي عرفنا هاد الشي ...المهم ...إلى حد الساعة كل مايجي موضوع هاك ...تجبدولي و تقولي هاداك اللي كان عاجبك ...هاداك رايك ... مع اني انا ماكنتش عارفة......... يرحم باباكم قولولي وش ندير وليت نخاف نقولها هاد انسان مليح او راه عاجبني...
ران نكبر درك و ماشي رايحين يجوني خطاب بالوتيرة تاع زمان ... مرات نقولها ران حابا ندير عايلة و يكون عندي ولادي غي باش نوصلها ميساج ...تشوف فيا و تعوج فمها ... و انا صح يا اخواني حابا ندير عايلة حابا يكون عندي دراري حابا نجيب دراري و انا في عمري هادا ماشي حتى نولي في الثلاثينيات ....
حتى تخمام كما بنات ماوليتش نخمم ...زعما يجيني واحد و نحبو و كدااا ... خلالالاص موليتش نأمن بحتى شي ....تخيلو وليت كي يجيني واحد يسقسي عليا ... أول مايتبادر في ذهني هو : أكييد رايحيين نردوووه ....... ران واصلة لهاد الدرجة
امي ماتتحركش و مايعجبها العجب ....لكن لما تشوفا لناس و تسمع بيهم تولي غي ترحي الناس و الناس .... و فلانة و زهرها .... مع انني جاوني فرص و هي كان ليها دور في أني رفضتهم
ران متأثرة بيها لدرجة كبيرة ...مانقدرش مانسمعلهاش ... نحبها هي ثان يكون عاجبها الشخص ... لو تقول عليه أي شيء أي شيء... انا نتأثر و لو بعد حين ... ممكن هي تكون غالطة لكن انا نتأثر بهدرتها و نرفضو بعد وقت ....
حتى أفكاري اصبحت كما افكارها ...وش تحب ... وش تكره حتى لو كان الامر بخصوص بلاد أو مسلسل أو لون ....
هي الخرجة و متخرجهاش غي قليل... ماتحبش... و أنا من اللي نشفى على روحي و أنا من قراية للدار و درك من الخدمة للدار ... حتى جيران تاعنا مايعرفونيش...
هي تشوف للزواج على انو مصلحة متبادلة و ماتآمنش انو واحد يحب وحدة و يتزوجها ... مرة قالتنا بنبرة سخرية علالالاش هو هادا حب كاين ؟؟ غي في مسلسلات كاين .... ههه انا اصلا كنت نظن هكدا كان عندي امل انو موجود ... لكن الآن ران متأكدة انو غير موجود مدام امي قالت هاكدا ... هدرة امي لا نِقاشَ فيها حتى و لو ماتعجبنيش حتى و لو نكون متأكدة انو غالطة 100في 100
هي انسانة ماش واعرة كما يوقولو العكس مسالمة .... لكن نكدية و حاااااجة ماتعجبها و في نفس الوقت أي شخص ممكن تحسدو ... ومع هدا هي مؤمنة و تحمد ربي ... و علابالي تحب لينا المليحة لكن ماش مخلياااا المليح يجينا .... مرات نبقى حايرة وش راها حابا ؟؟؟ هي متناقضة بزاااف و متخلينيش نقرر لالالازم تأثر عليا ... وما نقدرش نعارضها في امر زواج لما تنتقد شخص لأني في الأخير أنا ثان مانعرفوش ... هي النية و ماتنويهاش في اللي يجيني دايمن تقعد خايفة و متوجسة منو ... إلى متى هاد الشي ؟؟؟؟؟؟؟؟؟؟؟؟؟؟؟؟؟؟؟؟؟؟ ماعلاباليش .....

[*أم سجى*]

يا اختي فهمت قصتك......والحل أنك تتعايشي مع يماك فالحياة اليومية وتساعفيها....وكي يجيك أي خاطب مرة ثانية ما تسمعيلهاش شوفي راي باباك وخاوتك وتفاهمي معاهم واقبلي وانهي معاناتك وزيدي ساعفيها مدة الخطوبة تاعك ومباعد تروحي ببيت زوجك وكل واحد في حدو ...والأشياء الي انحرمتي منهم في بيت والديك ان شاءالله يعوضك عليهم زوجك...جزاء صبرك عن أمك ومتنسايش حاجة اختي مهما يكن هذي امك ورضاها أغلى شي عليك احذري كشما تجرحيها ومباعد يجي نهار تندمي عليها.......

[ramzi-messi]

الله يعينك اختي , يا اختي لوكان توقفي ليها و تقوليلها كدا و كدا يعني كي تغلط لازمك تصححي ليها بويسك ماشي عقوق

الله يوفقك و يفرج عليك

[nihal159]

حياتك ستضيع بسبب ضعف شخصيتك وليس لسبب آخر؛ مادام أمك مسالمة و ليست عدوانية وماتفرضش رأيها عليك بالقوة؛ كيفاش أنتِ تتأثري بالطريقة هذي لدرجة أنك رجعت تحبي نفس اللون المفضل عند أمك ؟؟؟؟ المشكل راهو فيك؛ أنا نشوف أمك طبيعية جدا.

[زبدة ذايبة]

مثل ماقلت الأخت nihal المشكلة راهي فيك انت

انت اللي ضعيفة ومتناقضة وحبيتي تحصليها في يماك ؟؟؟؟؟؟؟؟؟؟؟

انت اللي ماراكيش قادرة توازني بين اإيجابي والسلبي

انت اللي ماراكيش قادرة تعرفي بين الصح والخطأ

لوكانت أمك مثل ماراكي متوهمة لكان أول ضحياها انت وخاوتك

لكن هي كبرتكم ورباتكم وقراتكم ودارت وش تقدر حتى وصلتوا لهذا المرحلة

ومن بعد تجي تكتبي في المنتدى وتقولي متناقضة !!!!!!!!!!!!!!!!!!!

التناقض والضعف صادر منك

انت ماراكيش قادرة تتخذي أي قرار صحيح في حياتك وتتحملي مسؤولياتك كاملة

من خلال ماكتبتي تكوني في حدود 24 أو 26 سنة ( والله أعلم) يعني راكي كبيرة

ماراكيش مراهقة ماتميزيش بين الأمور ؟؟؟؟؟؟

كنت تنتظري منا نوافقوك الرأي بعد ما اقتنعنت أن أمك هي سبب مشاكلك !!!!!!!!!!!!!!!!!!!

كنت تنتطري صفقولك على اتهماتك لأمك !!!!!!!!!!!!!

الخطأ خارج من عندك حنونة

عاودي راجعي تصرفاتك وأفكارك والطريقة اللي راكي تشوفي بيها الأشياء

لأنها صراحة غالطة بنسبة كبيرة وأكبر دليل هو اعتقادك الخاطئ على أن أمك إنسانة مريضة وووو (طبعا حسب ماكتبت في المشكلة)

هذيك العلاقة (الأم) اللي والفتي تعلقي عليها فشلك ماشي هي السبة

انت السبة صححي نفسك وغيري مافيها من عيوب يغير الله من حياتك

تغيير بتغيير

إن الله لايغير مابقوم حتى يغيروا مابأنفسهم

اختصرتلك في الرد كثيرا وإلا لو كنت حللت مشكلتك سطرا سطرا حتى تقتنعي بما ذكرت لك في الأعلى

أتمنى لك التوفيق

[اريج 07]

ديري شحصية لروحك يماك لباس عليها نتي لي معندكش شخصية

[أناييس الربيع]

امك عادية جدا نتي لي عايشة دون شخصية ،وأمك متحبش الخروج متساليهاش ،منكذبوش على بعض قليل وين تلقاي أسرة جزائرية تقضي العطلة الصيفية في مكان
ونظن قرار الزواج يرجع ليك ،وصدقيني كون جا لي يرضيك ساعتها مديري برأي حتى واحد ،عيشي حياتك لا حياة امك

[روح المي]

أنا من خلال وصفك وقبل أن تقولي أعمل عرفت أنك عاملة وإحتمال خايفة ان زوج تاعك يستولي على دراهم وهيا ميبقالها والوا سمحيلي اما كاين امهات تاع بكري هكدا يخممو ربي يهديها وانت اهم شيء إستخاره الله قبل البشر ونهار يجيك مكتوبك كل شيء يسهل ربي يرزقك بولد الحلال

[ريان برهوم]

امكي مثل امي لكن امي بلغة اخرى واعرة بززززززاف ومتحبش تضيع حقها مع اي واحد ولات حتى معانا حنا ساعات نحسها مشي يما

[casscada]

متخميش هكذا الاخت كى يكتبلك ربى رزق واحد ما راح ينحيهولك و لو كانت امك ساساعفى يماك لعزيزة لخاترش ايجى نهار تشتاقيلها بزاف...