مشكلة الفونطاي مع النصائح

إلهام07 · 2015-02-07, 11:35

البسملة1

طريقة تشكيل مشكلة الفونطاي

صباح الخير عليكم حبيباتي ، آسفة على الإطالة كان الميكرو نتاعي معطل ماقدرتش نكمل الوصفات اللي وعدتكم بيها.
بما انو بزاف طلبتو طريقة مشكلة الفونطاي مع النصائح راني حطيتها واتمنى تكون واضحة فقط حبيت نوجه شكر لأم اماني اللي دائما متميزة بوصفاتها وماتبخلناش بجديدها ونشكر بزاف اختي بشرى اللي وقفت معايا حتى تعلمتها خطوة بخطوة ضرك وليت نشوف المشكلة نتفكر بشرى هههههههههههه .

الرابط الأصلي للوصفة : https://www.djelfa.info/vb/showthread.php?t=1126523

· العجينة: عملت نفس وصفة ام اماني طبعا وصفاتها كلها مضمونة وحلوياتها روعة . لكن أضفت عليها شوية تغييرات فقط اللي هي نفس العجينة +:
- عملت 4 كيلات فرينة مع كيلة واحدة سمن ذايب وبارد .
- أضفت فوق مكونات أم أماني ( من وصفة فلة ) : رشة ملح + ملون ابيض + 1 بيضة
- الحشو: درت 4 كيلات مكسرات مرحية ( خلطت لوز بالقشرة ماشي محمص مع جوز )+كيلة سكر عادي ماشي سكر ناعم + فاني + كمية قليلة جدا من عطر اللوز الحلو وعطر الجوز. انا ديما العقدة ندير 4 كيلات مع 1 فقط سكر وهذا سر العقدة باش ماتيبسش وخاصة ديما حوايج العقدة إما يتعسلو أو نديرولهم قلاصاج او يترمدو في السكر يعني مانحتاجش نكثر سكر مع المكسرات.

· النصائح بالنسبة للعجينة :
- لازم السمن يكون بارد .
- البيضة نخفقها مليح بشوكة مع شوية ماء زهر باش ماديرش كتل في العجينة كي نضيفها.
- نفضل نجمعها بماء دافيء خاصة إذا استعملتو زبدة توريق تجمد بسرعة وتعمل كتل جامدة في العجينة .
- قوام العجينة يكون طري بصح ماشي بزاف يعني كيما عجينة قريوش الطاجين أو عجينة الفيلو اللي نديرو بيها البقلاوة.
- نعجنها مليح مليح حتى ترجع ملساء وإذا عملت كتل ممكن تقسموها قطع صغار وتفوتوها في ماشينة الرشتة بالتدرج من العريض حتى الرقيق ترجع ملساء عادي.
- لاااااااااااااااااااازم ترتاح عدة ساعات ويفضل لو تخليوها تبات أحسن.
- نديرها في كيس بلاستيكي ونخبيها في الثلاجة .
· النصائح بالنسبة للحشو :
- البيض: أنا عملت كيما المخبز يعني لازم يكون الحشو يابس نضيف البيض غير بالشوية ونعجن ونخلط مليح قبل مانضيف البيض مرة أخرى لازم الحشو يكون متماسك مليح ونعجنو مليح .
- عملت مرة بيضة كاملة ومرة صفار باش الحشو مايجيش يابس.
- نحطو في كيس وإلى الثلاجة .
- من الأحسن يرتاح ليلة كاملة.
- يفضل ماتكثروش من عطر الجوز خاصة غير شوية فقط.
· الشربات : طبقت نفس طريقة أم أماني فعلا روعة الكيلة مضبوطة تماما ودقيقة.
· التشكيل:
- العجينة طرحتها بالحلال بيدي ماشي بالماشينة ( نرش النشاء فوق الرخام ونطرح بالحلال باش ماتلصقش بصح مانكثرش النشاء باش ماتنشفش العجينة ) ، العجينة ماتكونش رقيقة بزاف كيما البقلاوة راهي واضحة في الصورة .
- طرحت الحشو فوق ورق الزبدة ( في هذا الشكل نحتاج الحشو مايكونش سميك يعني ماتديش بزاف حشو – درت حوالي رطل لوز + نص رطل جوز عطاتني حوالي 80 حبة )
- الآن ندهن العجينة ببياض البيض طبقة رقيقة فقط( لو دهنتو من قبيل يكون شاح نخلي حتى نحل الحشو باش ندهن العجينة بالبيض ). نحب ندهن بالبيض كيما فلة لأنو نحب الحشو يلصق مليح في العجينة كي نجي نقطع بالطابع ماتفصلش العجينة عن الحشو.
- نحط الحشو فوق العجينة ونعدلو مليح .
- نزيد نطرح عجينة أخرى وندهنا ببياض البيض ونحطها فوق الحشو ونعدلها مليح.
- الآن نقطع بالقطاعة الدائرية اللي مشرشفة على الحواشي ( طبعا الحجم اللي حبيتو انا نفضل الحجم المتوسط هو الأفضل ، المهم جربو قطعو حبة وحدة وديرولها الجوزة وشوفو كيفاش تخرج ).
- نحاول نقطع اكبر عدد ممكن يعني نقرب الدوائر لبعضاها لأنو العجينة الباقية بعد مانحي منها الحشو راهي فسدت وغير صالحة للاستعمال مرة اخرى.
- لازم هنا مساعدة لازم ننقش بسرعة الحبة اللي نقطعها قبل ماتنشف لانو إذا نشفت تتقطعلي العجينة كي نكون ننقش فيها . لازم شخص آخر يساعدنا في النقش وفي لصق الجوز.
- أنا هنا لقيتلها حل مليح ، كي نشوف العجينة بدات تنشف إما نبلل يدي بشوية بياض ونمسح على وجه العجينة باش تبقى طرية ومندية أو كي نقطع ننقش الوجه السفلي يكون مانشفش من الهواء كيما حبيتو ديرو .
- طبعا ننقش كيما الصورة ونحاول مانقطعش العجينة.
- الجهة اللي ماتعجبنيش نخليها بدون نقش هذيك هي اللي نضغط عليها بأنصاف الجوز باش نشكل حبات المشكلة على شكل الفونطاي.
ندهن بشوية بياض بيض الجهة اللي خليتها بدون نقش قبل مانغلقها باش تلصق مليح وماتتحلش من بعد في الفرن.
- نضغط مليح بحبات الجوز باش يلصقو مليح ومايطيروش من بعد .
- اختي هنا كانت تعاون فيا دهنت انصاف الجوز بشوية نتاع بياض باش يلصقو مليح (هذا اختياري).
- نحط حبات المشكلة في بلاطو مغطى بورق الزبدة ونخليها ترتاح عدة ساعات أو تبات قبل مانطيبها.
- نسترجع الحشو بسهولة من العجينة ونعاود نستعملو عادي .
- نطيبها في الرف الوسطاني على 180°، أنا نفضل صينية ثقيلة شوية ماشي خفيفة باش ماتتحرقش بسرعة.
- لان المشكلة ماتزيدش في الحجم ممكن تخليو فراغ صغير بين الحبات في الصينية وهكذا تربحو الوقت في الطياب.
- مالازمش تحمار غير تصفار من تحت نطفي ومانطيبهاش من فوق ( عجينتها رقيقة طيب بسرعة ).
- الشربات تكون واجدة من قبل بعدة ساعات أو ليلة كاملة.
- بمجرد ماطيب المشكلة نغطسها في الشاربات باردة ونخليها تبقى فيها مدة لأنو لو نحيها ثم ثم من بعد تلقاوها ناشفة وماشي مشربة مليح. انا نخليها تبقى في الشربات حتى يطيب البلاطو الثاني نصفيها ونلوح الحبات اللي طابو سخونين. ووممكن تعسلوها مرتين يكون أفضل.
- كي تقطر من الشربات نحطها في كيسات الورق ونرشها بالبيسطاش مرحي وشوية لماع ذهبي.
- مباشرة تتخبى في علبة محكمة الإغلاق باش ماتنشفش وماتيبسش.
- حبيت فقط نضيف أنو ماتحتاجوش بزاف جوز وبيسطاش في هذي الوصفة يعني ماتديش بزاف كيما راهي تبان مكلفة.
- طبعا ماكلاه نقوللكم باللي وصفة من أروع الوصفات اللي فعلا بنينة وتحمر الوجه يعني كي الشكل كي البنة وبصراحة بالنسبة ليا هذا احسن شكل للمشكلة من بين كل الاشكال اللي شفتهم حطة وبنة

.

الصور هنا في الأسفل توضح اكثر :

هنا ماما تعاون فيا لاحظو العجينة الباقية غير صالحة للاستعمال.

تحياتي .................. لهومة

oum anas 69 · 2015-02-07, 11:55

أول رد لأحلى لهوهة في الدنيا راني توحشتك ققققققققققققد الدنياااااااااااااا
آآآآآآآه على أيام زمان مع أخواتي الرائعات
ضحك مرح زهو نصائح مواساة أخوة في السراء و الضراء
بارك الله فيك على الموضوع الطويل . ماقريتوش .. مخي موش معايا و هازا هديل نقرع فيها
مبروك مازاد عندكم يتربى في عزكم و لعقوبة ليك

ام رويدة · 2015-02-07, 11:56

رراااائعة. ربي يخليك دائما مبدعة

DIDA34 · 2015-02-07, 11:57

الففففففففففف شكر دمت دائما متالقة بارك الله فيك

amel... · 2015-02-07, 11:57

يعطيك الصحة وربي يوفقك
مشكوووورة

oum anas 69 · 2015-02-07, 11:59

موضوع جميل و شرح أجمل
للتثبيت حتى تعم الفائدة

أم ياسين الزهراء · 2015-02-07, 12:11

اهلا بالهاموووووووووووووووووووو جرنالك نحملو ونقراه

ام انس اهلا بيك يالحبيبة واش راهي بنتي هدول وعلى سلامتها والله توحشنا ايام الزمن الجميل واولهم بروقة الحلوة ياههههههههههههههههههههه

إلهام07 · 2015-02-07, 12:46

ياهلا بالغوالي والله ام انوسي الحلوة البطبوطة كون على بالي المشكلة جيبك راني شكلتها من بكري ههههههههههههههههه
مشكورة غاليتي شفتي العشرة الاولى وحدها ماتتعوضش فعلا توحشنا هذوك اللمات والتقرعيجات والزهو
واقيلا هذولة ماخلات فيك عقل محيهالي بزاف وكي تكبر شوية عضيها ههههههههههه

مشكورات اخواتي على المرور اتمنى يكون الموضوع جاوب على كل التساؤلات اللي عندكم