الطبعة الحادية عشر لدورة الرقي بمدبرة منزل مثالية - الصفحة 3

oum radja · 2013-09-22, 15:17

بسم الله الرحمن الرحيم
اليوم خاص بالنسبة ليا
نضت على 4 ونص تاع الصباح توضيت ولبست ولدي وناض راجلي يخرج اللوطو
استنينا الاذان صلينا و توكلنا على الله
في الطريق بديت نقرا في الاذكار و نسبح وفي نفس الوقت شغلنا
سي دي تاع قران حتى طلع النهارمن بعد استمعنا الى درس من دروس عائض القرني في قصص الانبياء
رجعت لداري مع المغرب صليت الاوقات لي فاتوني
قريت بنتي شوية و رقدت هاذا ما كان اليوم

oum radja · 2013-09-22, 15:18

بسم الله الرحمن الرحيم
بالنسبة للجانب الديني المحافظة على صلاة الفجرو جميع الصلواة في وقتها
قراءة الاذكار و التسبيح
مراجعة السور لي حفظتهم لبنتي راها في سورة الهمزة

بما أني كملت الصالة في يوم واحد
اليوم درت تنظيف يومي عادي اي تجفاف و مسح الغبار
اضافة الى غسل الملابس باش ما تتراكمش

و درت لامونة للتعشوية

و تحلية تاع ام انس اممممممممممممم

ماكانش حاجة جديدة الا مشط و ترطيب و مكياج خفيف

عودت بنتي تنظم ملابسها و ادواتها بعد رجوعها من المدرسة
و تغسل أسنانها بعد كل وجبة

oum radja · 2013-09-22, 15:18

بسم الله الرحمن الرحيم
تطبيقي ليوم الخميس

كيما العادة نضت على 5ونص صليت و قريت الاذكار
ودعيت ربي ييسر لنا أمورنا
الصلاة على النبي بلا حساب
رجعت رقدت و نضت على 7 انا وبنتي
عطيتها غسلت و فطرت وغسلت اسنانها وراها متعودة تلبس قشها وحدها
مشطت ليها شعرها و اقبت المحفظة تاعها و عطيتها اللمجة
ووصلتها للمدرسة كي جيت فطرت انا وراجلي
و هو راح يخدم وانا ضربت طلة على حباباتي في النت و شفت البرنامج
الصالون راه نظيف رتبت غلافات المطارح و فتحت التاقة وفرغت فيها الما و سقيت الشجرة لي قدامها
الدار كانت نقية
غسلت مواعين الفطور ودرت شوربة و حميس
لميت القش الي كانمنشور
طويتهم وحددت الي يحتاجو الحديد
على 11 رحت جبت رجاء من المدرسة
غسلت يديها و عطيتها غداها كانت جيعانة و ما تبغيش الماكلة تاع المطعم
تلمت العايلة تغدينا و غسلت المواعين و توضيت و قريت شوية قران حتى أذن الظهرصليت و رقدت ولدي و جيت للميكرو
على 2ونص رحت تاني خرجت بنتي
وجيت للكوزينة درت خبيزات في الكوشة مع مربي الاجاص

عشوينا ومنبعد خرجت انا وبنتي رحنا للحوانيت شرينا حوايج
و شريت مواد تنظيف كنت محتاجتهم
العشا كان باقيلي من الغدا انا دايما نكثر ما نعرفش ندير شوية ههههههههه
تعشينا زدت قريت شوية قران راني في 8 احزاب

oum radja · 2013-09-22, 15:19

بسم الله الرحمن الرحيم
بالنسبة الجانب الديني اذكار الصباح و المساء
الاستغفار و الصلاة على النبي
هاذا ما كان

نهار الجمعة كل شي صبح نظيف و صبحو صحاب الدار راقدين

غير انا نضت بكري ما بغيتش ندير الحس
جيت قعدت شوية مع حباباتي في الدردشة
درت غدا خفيف على خاطر كانو معروضين بقيت انا و الصغار
درت دنجال بالبيض و فريت
العشية كنت معروضة في قصعة لي هي باروك المولود الجديد
رحت كليت البركوكس و الروينة وجيت حتى 6
درت ليهم الطعام في العشا و انا كنت شبعانة
نهار السبت درت تنظيف عادي ورتبت الغرف و هويتهم
نقيت الدوش و التواليت
درت الغدا ور حت شريت دوا لبنتي صبحت مريضة
تغدينا و جيت نحط تطبيقي و راني رايحا ندير في المبسس للتعشوية
طفيت الفريجيدار باش نقيه
و الاسبوع الاول انتهى و الدار نقية بلا ما نحسو باي تعب و الحمد لله العايلة مبسوطة و زوجي اكثر
اللهم ادمها نعمة

oum radja · 2013-09-22, 15:23

هاذا هو الرابط لي فيه تطبيقي

https://www.djelfa.info/vb/showthread...post1054428662

وفاء سعاد · 2013-09-23, 08:24

بسم الله الرحمن الرحيم تطبيقي الاحد الجانب الديني عندي عدر شرعي اليوم ان شاء الله ندوش ونبدا

الجانب التنضيفي نضت عل 6تاع الصباح درتلهم السفنج شربو بيه الحليب وكاين اللي حط فيه الفرماج وماشربش الحليب يدوخو منو كي يعودو يقراو وبديت بالكوزينة غسلت الماعن ولميت الطابلة ونصبت الغداء تليتلي وكترت التليتلي وهزيت نصو كونجليتو باه مرة اخرى ندير المرقة برك كي نعود مزروبة وخرجت للكولوار غسلت السقف والحيوط بجال العملاق ممتاز حتى حشرة ماتزيد تجيك تهرب من ريحتو انا الدبان الناس كامل تشكي وانا مايجينيش خاصة درك الخريف وكي خلصت سيقت ماكترتش الما في النفيضة

راني الساعة هادي كونجي في كلشي اليوم نتكيس مليح راهو جانب جمالي تاني الكاسة والحجرة تاع الرجلين مايخطونيش وندير الفازلين لرجلي ونيفيا ليدي ووجهي اليوم نبداه

ماريا205 · 2013-09-23, 08:29

السلام عليكم ورحمة الله تعالى
عندي يومين وانا نحاول نحط تطبيقي لكن الكونكسيون

بعد اداء الصلاة وقراءة الورد والاذكار وبديت حفظت 10 ايات سورة الملك قمت والاستغفار ما حبستوش نوضت الاولاد يوجدو ارواحهم وجدتلهم الفطور باش نكسر الروتين ونفرحهم درتلهم بيض مقلي وزيتون وفرماج ورغيف وكاس حليب بارد بعدنا على الفطور التقليدي وعجبهم الحال .
كي خرجو ودعتهم بقبلة وابتسامة

كي خرجو الاولاد لميت الدار على السريع كنست ومسحت الغبرة وغسلت ماعن الفطور وضربت طلة على المنتدى شفت البرنامج ورحت نبدا نصبت الغداء يطيب بركوكس وبديت بالدوش والتوالات نقيتهم والى الكولوار غسلت الباب من داخل ومن برا ومسحت الفون بلافو وحكيت الحيوط وثاني الطاقة اللي في الكولوار نقيتها بلا ما نسيت القواطع ولساني ما حبسش الاستغفار والتسبيح غير كي نكلم بنتي ههههههه.طفيت على الغداء وسيقت كامل الدار.بعد الغداء غسلت لماعن صليت الضهر وعملت قيلولة.المساء نخصصو لتدريس الاولاد.
دوش خفيف وغسل الوجه بصابون الطرف وفوت عليه قطعة شب يخلي الوجه روعة مع فرش الاسنان وماكياج خفيف .

ماريا205 · 2013-09-23, 08:30

اليوم الثاني
السلام عليكم ورحمة الله تعالى

بعد اداء صلاة الصبح قريت الاذكار مع الاستغفار والتسبيح ثبت 10 ايات اللي حفضتهم توجهت للكوزينة وجدت الفطور والاولاد يوجدو ارواحهم كي فطرو ودعتهم بابتسامة

جيت للميكرو باش نشوف البرنامج وكانت النت ثقيلة نضت نصبت الغداء على نار ذليلة ولميت الدار مسحت الغبرة توجهت للصالة نفضت الفراش الريدو والتابي من بكري مهزوزين .نشفت على خفيف صبحت الدار نظيفة.توجهت للدروج نظفتهم .
حبيت نمد فكرة كي يكون الميناج اكيد يكون الماء سايح يعني نكونو معرضين للسقوط خاصة الصغار اذا لا قدر الله وطاح ولدك باش ما تزرقش منين طاح اضغطيلو في هذيك اللحظة منين طاح وادهنيلو بمرغرين او زبدة او دهان هذيك البلاصة

عادي فرش اسنان وماكياج خفيف وترطيب.

ماريا205 · 2013-09-23, 08:31

اليوم الثالث
السلام عليكم ورحمة الله تعالى

بعد اداء صلاة الصبح قريت الاذكار مع الاستغفار والتسبيح حفظت 15اية من سورة الملك توجهت للكوزينة وجدت الفطور والاولاد يوجدو ارواحهم كي فطرو ودعتهم بابتسامة

جيت للميكرو باش نشوف البرنامج نضت نصبت الغداء تليتلي ولميت الدار, رنخت القش نقيت التوالات والدوش مسحت الغبرة توجهت للصالة وجبت بسينة والزيس والجافال واسفنجة فرغت البونكات وغسلتهم من داخل ومن برا وبديت بالطاقة غسلتها شللتها وفوت على الحيط وشللتو وفت للحيطان اللي مقابلين كملتهم وزدت الباب الاول.على فكرة الصالة قسمتها على2 غدوة نزيد الطاقة الثانية والباب والحيطان اللي مقابلينهم .خرجت الماء وسيقت كامل الدار .
بعد الغداء غسلت لماعن ولحت القش في المشينة صليت الضهر وريحت شوي.

عادي فرش اسنان وماكياج خفيف وترطيب.
الجانب التربوي راجعت لبنتي تمارين الرياضيات وحفضت الاسلامية على فكرة نعاني معاها ما تنوضش تحفظ بالخف الا بعد تكرار الامر عدة مرات وتستغرق وقت في الحفظ يعني بطيئة فيا ريت اللي عندها افادة تلحقني بيها.
الجانب الرياضي بديت بالقفز

وفاء سعاد · 2013-09-23, 08:33

لقيت واحد الكلام رائع جدا تاع واحدة حطاتو في منتدى اخر عجبني وقلت نحطو هنا لانها عندها الحق فاقد الشئ لايعطيهمالذي حصل لنا نحن الزوجات حتى فقدنا هذه السلوكيات الرائعة في حياتنا ؟
كثير من الزوجات لكثرة انتقاد الزوج لها خلاها تتقوقع في نفسها وتنزوي واحبطت حتى ظنت بنفسها انها اسوء ام وزوجة, وسبب هذا _ عدم الثقة بالنفس _
إن احترام الذات يتعلق بالطريقة التي نحكم بها على أنفسنا
ثقي بقدرتك
ثقي بجسمك
ثقي بنفسك
ثقي انك انتي
لك من القدرات من ليست عند غيرك وتلملكين ما لا يملكه غيرك فلك كيانك ولا تسمحي لاي شخص مهما قرب او بعد ان يحطم كيانك
فتحطيم كيانك يساوي انك ستصبحين حطام امراة فبربكن كيف لحطام ان يعيش او يسعد من حوله او تري له اثر حطام لا ظل له ولا حركة ولا حس ولا روح
لننفض الغبار عنا ولنبرز المعدن الصافي لكل شخصية فينا ولنؤمن انني انا ولي رب كريم

وفاء سعاد · 2013-09-23, 08:36

الجانب الديني الصلاة نحاول نصليهافي وقتها هدا تحدي راني ندير فيه والاستغفار دايما في فمي بنية تاع حاجة حابتها تتحققلي امين يارب العالمين واولادي راني نجاهد معاهم علا خاطر بداو يتعوجو في الصلاة بحجة انهم يغلبو رغم انو ساعات انا ايضا نكره من توجيههم ومباعد كي نتفكر بلي راني مسؤولة عليهم قدام ربي نخاف ونوض ليهم حتان يصليوها وتحكم فيهم ويوالفوها ويعودو كي مايصليوهاش كلي حاجة ناقصتهم
انا البنات داري كبيرة وبما انو عندي اسبوع كامل درتو للصالون خدمت بعقلي لانو مالفة بكري نجيب معايا اختي كي نعود ننفض نديرو في نهار واحد ودرك راني وحدي مانخليش وقتي يضيع غير في شغل الدار المهم بديت باليفوتاي مسحتهم وغطيتهم ونحيت الريدو وغسلت ماعن البيبليوتاك وليفينغ ولاطابل تيلي نحيت الزربية خرجتها للبالكو نفضتها راهي نضيفة وخليتها للشمس وغسلت الترية ولات 12 حبست وسيقتو خفيف وقفلت عليه راني مع زيت الخروع والتوم لشعري من الامام بدا ينقص قالو يقوي الشعر وليدي ورجلي فازلين ووجهي مازال كونجي راني مع صابون الطرف برك الساعة هادي نخليه 5دقايق ونغسلو يولي روعة كتر خير وحدة هنا في المنتدى

وفاء سعاد · 2013-09-23, 08:37

الصلاة وقراءة الادكار وجبدت المصحف بديت نقرا فيه وان شاء الله من الاحد نبدا الحفظ
وجدت الحوايج تاوعي وكيما قلتلكم جال العملاق خلاص مايخطينيش وغطيت شعري باه ماينزلش عليه ماء تاع البلافو والحيطان تاوعي عاليين بزاف وبديت نحك ونشلل ولات الصبغة تبريي تقول جديدة وكي خلصت سيقت وزدت قفلت عليه بصح في الليل قتلوني كتافي من السطر عندي بزاف ماحكيتش في الاعالي
الدوش بعد كل عمل تنضيفي وعملت زيت زيتون وسكر لوجهي ويدي باه يتناو شوية خلايا ميتة وتتجدد البشرة ومدايرة قرعة ماء تاع 2لتر نحاول نهار كامل نشربها ونشوف قداه بقى فيها ومغلى الكمون للكرش باه تدخل صباح وعشية ومنين نمشي ندخلها روعة العضلة وحدها توالف تدخل وتتخدم علا خاطر مانيش قادرة للسبور

وفاء سعاد · 2013-09-23, 08:39

الصلاة مع محاولة الخشوع تحدي تاني مع نفسي راكم عمبالكم السجادة تتحط والافكار كامل تجي وقراءة شوية قران
كملت الصالون والحمد لله وعادوت مسحت البيبليوتاك من برا ببليز ولات روعة وفرشتو وركبت الريدو وعطرتو وقفلت الباب مسني غير الضياف
درت قناع لوجهي تاع ماء ورد ونشاء للتبيض ماسك ساهل وموجود في كل بيت بلا ماننسى تفريش الاسنان عل الاقل قبل النوم

وفاء سعاد · 2013-09-23, 08:40

اليوم الخامس

الدر المكنون 7 · 2013-09-23, 08:40

ما شاء الله ربي يبارك