الى مترشحي بكالوريا 2011

[Rafife09]

سلام عليكم

كيفاه راكم دايرين على ما أظن راكم قالقين لاحظت أن هناك طلبات كثيرة حول تقديم نصائح الى مترشحي 2011 و أنا فوتت الباك هاد العام اول مرة شعبة رياضيات و خدمت والحمد لله قد ما نقدرش نمدلكم ياسر نصائح و لكن رح نمدلكم مادا لاحظت و ما استفدت من تجربتي ودلك حتى ما تعملوش أخطاء بدائية

ادا كنت من النوع الدي يحب المختصر غير المفيد نقلك ما تقراش في الصيف ما تعولش على الأستاد ما تظنش أن التدعيم هو الحل ما تدوخش روحك بالمراجع و عول على روحك واقرا على روحك و بالتوفيق

أما ادا كنت تريد التفصيل المفيد فتفضل

أولا وقبل كل شيء نحب نبه على القراية تاع الصيف أحيانا تكون مضيعة للوقت و ما عندها حتى معنى شوفو أنا الصيف اللي فات ما قريتش برنامج السنة الثالثة وش عملت عاودت راجعت برنامج الرياضيات و الفيزياء لكل من السنة الأولى و السنة الثانية الحوايج اللي رح نحتاجهم في الباك و نقرا ساعات الفرنسية و الانجليزية في الوقت اللي كانو فيه كل زملائي يقراو برنامج الباك اللي يقرا في التدعيم و اللي يقرا وحدو و كي جات القراية ما لقينا حتى فرق بين اللي قرا و اللي ما قراش في الصيف علاه لأنهم ينساو حنا الحوايج تاع أول العام كان ما نبقاوش نراجعو ونعاودو رانا ننساوها وينك يا الحاجة تاع الصيف لا و بالعكس اصلا تعبو ياسر في لاصيف وش خلاو للعام كامل و فعلا بالرغم اللي معظم زملائي ممتازين و جيدين ولكن أنا اللي ما قريتش بقيت نجي الأولى عليهم لا و ممكن القراية تاع الصيف تعمل مشكل تاني أرواح هادم اللي قراو في الصيف قبل ما تفهمهم في الدرس فهمهم بللي ما همش فاهمين والله أعلم

ثانيا ننبه على قضية الأستاد يعني كاين وحايد ياسر يعتمدوعلى الأستاد بشكل أساسي وش قرا هو هاداك هو أنا مش فاهمة المشكل وين في البرنامج الجديد أو في الأساتدة انا نشوف شكون الأستاد اللي يخدم في خدمتو الامن رحم ربي و كاين صنف اخر من التلاميد خلاص لقى شماعة يعلق عليها أخطاؤو و اللي هي الأستاد يقلك الله غالب الأستاد ما يقريش فينا وش رح نعمل نربح غير الأسف وليكن في علمكم أنا في شعبة رياضيات و ما كنتش نحظر حصة الرياضيات اللي معاملها 7و ما نقراش دعم و نروح غير نفوت الامتحان و نجيب أكبر نقطة بالرغم من ان زملائي ما يغيبوش و يقراو تدعيم وكيما قلت ما همش تلاميد ضعاف بالعكس ممتازين خاصة في مادتي الرياضيات و الفيزياء يعني نحب نقلكم ما تحطوش الحق الكل على الستاد و اقراو مهما يكن و اعتمدو على أنفسكم بالدرجة الأولى أنا حسب ما شفت الأستاد ساعات ما يلعبش دور أصلا مع احترامي لبعض الأساتدة المحترمين والله أعلم

ثالثا ننبه على حكاية التدعيم تلقى التلاميد من قبل ما تبدا السنة الدراسية يحكمو في الأساتدة ويشوفو في التدعيم أهم عامل من عوامل النجاح و غير تبدا القراية تلقاهم غير يقراو من الثانوية للجمعية للنادي للثانوية يخرجو من دعم الفيزياء يجريو باه يلحقو على دعم الرياضيات اللي يقراوه في بلاصة اخرى
أنا في بداية السنة ما قريتش خلاص دعم و اللي نقلو ما نقراش دعم يقللي كيفاه مشك حابة تنجحي غير روحي أجري على روحك قبل ما يروح الحال و مع دلك ما قريتش الثلاثي الأول كامل وجبت اكبر معدل 15 عن جدارة و استحقاق في الوقت اللي نشوف فيه الباقي من زملائي أو من شعبة التقني أو العلوم تجريبية غير الأصفار و قريت في الثلاثي الثاني رياضيات شهرين وحبست وفي الثالث قريت الفيزياء يعني نحب نقلكم مش ديما لازم تقراو دعم أحيانا يكون الدعم مضيعة للوقت ادا كنت قادر تقرا وحدك و تقرا فقط لأنك كيما تشوف في وقتنا عاد التدعيم الناس تشوف فيه ضرورة حتمية و قد ما تحتاجش الى التدعيم من البداية قد تحتاجو في وقت معين تحصرت فيه أو في وحدات معينة جاتك صعيبة أما ادا كنت ما تقدرش تقرا وحدك و شفت روحك حاصل تقدر تقرا تدعيم و لكن انتبه ليس الدعم هوبالضرورة الحل الوحيد و الله أعلم

رابعا ننبه على حكاية المراجع ياسر اللي تدوخ وساعات تلقى فيها حاجة زايدة حاجة ناقصة حاجة غالطة تمرينات لا علاقة بالمنهجية الجديدة و ما تجيش كيفها في الباك أصلا أنا كي قريت لقيت بللي الكتاب المدرسي أحسن مرجع بالنسبة للرياضيات و الفيزياء بالرغم اللي ما همش خاليين تماما من الأخطاء ادا حليت كل تماريناتها تقدر تقول تحكمت في البرنامج نهائيا و لدلك المرجع الوحيد اللي استعنت بيه سلسلة هباج في كل من المادتين أما بالنسبة للمواد الأدبية أنا اعتمدت بشكل أساسي على الملخصات و شريت كتاب خاص بالشخصيات و التواريخ و المصطلحات التاريخيةو الجغرافية والله أعلم.

خامسا بالاك لاحظتو أني قلتلكم ما قريتش دعم في الصيف ما نحضرش حصة الرياضيات ما نقراش تدعيم ما نستعملش مراجع ولكن في المقابل كيفاه نجيب أكبر النقاط أنا كنت نعتمد على نفسي بالدرجة الأولى أهم حاجة عندي هي فهم الدرس نقرا الدرس مليح مليح و ما نخليش حاجة مانفهمهاش ومن بعد نروح للتمرينات تاع الكتاب بالنسبة للرياضيات و الفيزياء ما تتصوروش قداه حليت تمارينات تقريبا 95 بالية من تمرينات كل من كتاب الرياضيات و الفيزيا حليتهم و طبعا في التصحيح استعنت بسلسلة هباج
وكنت نقرا في الثانوية نرجع للدار نحط في بالي بللي هاد الليلة رح نحل 15 تمرين في الرياضيات 5 في الفيزياء نراجع درس العلوم على سبيل المثال ما نرقدش حتى نكمل اللي من المفروض نعملو كامل حتى وان ما رقدتش الليل الكل و نراجع يوميا و ما نخليش حتى حاجة تتراكم و ما نخليش حتى حاجة ما نفهمهاش طول الوقت نقرا الجمعة السبت العطل تعبت ما تتصوروش الى اي درجة يعني لازم تجتهدو قدر المستطاع و الله أعلم

سادسا ننصحكم وننصحكم ونعاودلكم ما تهملوش المواد غير الأساسية و خاصة العلميين و خاصة خاصة خاصة الرياضيين و التقنيين نسألكم علاه تلقى تلميد في شعبة الرياضيات معدلو 12 مستواه أفضل ب4مرات على الأقل من تلميد معدلو 12 في شعبة العلوم تجريبية و في الباك تلقى نسبة النجاح أكبر في شعبة التجريبية لا و تلقى المعدلات كبيرة في التجريبية و في شعبة الرياضيات العكس بالرغم من أن المستوى في هده الأخيرة أحسن بكثير من الأخرى درك نقلكم علاه على خاطر العلميين ما يهملوش المواد الأدبية بشكل كبير في حين الرياضيين يهتمو غير بالرياضيات و الفيزياء و لا شيء غير دلك بالرغم اللي العلميين عندهم 3مواد أساسية معاملاتها 5و 5و 6 يعني تطيح في وحدة تطلعك الأخرى و الرياضيين عندهم مادتين أساسيتين معاملتهم 7 و 6 و المعاملات الأخرى 2 يعني تجيب العام كامل تقرا في الرياضيات و من بعد تغلط في اشارة - أو + يروحلك كلش وقللي درك وش بقا ما يطلعك كي تهمل المواد الأخرى حطو ديما في بالكم المواد الأساسية تنجحو بيها أما المواد الأخرى تطلعو بيها المعدل و الله أعلم.

سابعا ننصحكم ردو بالكم من مازال الحال أنا كشغل البارح دخلت أول يوم نقرا باك درك راني فوت الباك وخلاص راك تقول مازال الحال ودرك نقرا ولكن حط هادي الجملة في بالك "الوقت مشوفي صالحك" أنا قريت عام كامل و ما استهونتش بحتى ساعة و كل دقيقة بحسابها وفي النهاية رحت نفوت الباك وأنا مشني مكملة كلش يعني استغلو كل ثانية و الله اعلم.

ثامنا ردو بالكم تحطو في بالكم حكاية السكانار و هادي الحوايج نشفا الأيامات اللخرة في الثانوية الناس الكل تحكي غير على السكانار و اللي نقلو ما عملتش سكانار يقللي يا مهبولة كيفاه رح تفوتي الباك راكي تغامري وللا يقولولكم درك تستعملو البورتابل احنا مترشحي شعبة رياضيات و التقني و التسيير فوتنا في ثانوية معروف عليها كل عام الداب راكب على مولاه هاد العام مساكن اللي عولو على السكانار فعلا تصدمو من الاجراءات المشددة اللي داروهالهم. الحركة ما كانش و الخروج حتى الى دورة المياه ممنوع وقتاه تخرج كي يشوفك مريض في حالة ورح تموت وحتى هنا لازم يستدعيولك رئيس المركز شخصيا هو اللي يرافقك بعد ما يفتشوك 10 مرات كل خطوة تلقى واحد يفركتك باه تشرب يجيبولك للقسم و باه يمدولك ورقة اضافية هاداك تاع الاتصال يفتحلك تحقيق يعني عولو على رواحكم خير ما تتصدمو كيما هكا و حطو الجملة هادي في بالكم
"لما طلب ادم الخلود في الجنة من جهة الشجرة عوقب بالخروج منها
ولما طلب يوسف الخروج من السجن من صاحب الرؤيا لبث فيه بضع سنين" تعلم ألا تطلب حاجتك الا من الله وحده

تاسعا اجتهدو على قد ما تقدرو هاد العام أهم مرحلة في حياتك وش رح يصرا لاكان اجتهدت عام في حياتك ما عندك ما خسرت أقراو مليح العام راه يفوت يجري و تبقى حكاية خير ما تندمو من بعد و يكون في علمكم أن الامر بسيط خلاص غير احنا الي نعقدو فيه خلي الأمور تمشي على بساطتها واعمل الي عليك و هدا ماكان و يقلك المتنبي
على قدر أهل العزم تأتي العزائم و تأتي على قدر الكرام المكارم
وتعظم في عين الصغير صغارها و تصغر في عين العظيم العظائم

عاشرا أي حاجة تحتاجوها راني لهنا و في خدمتكم و ما تنساوش تحطو الردود و بالتوفيق للجميع ان شاء الله تنجحو كامل و تجيبو معدلات مليحة

عندكم تنساوني بدعواتكم و ادعيولي نجيب معدل مليح في الباك

[تاج محل]

السلام عليك بارك الله فيك على النصائح القيمة
نتمنى لك التوفيق و النجاح

[مروة الايمان]

مشكوووووووووووووووووووووورة أختي الفاضلة على هذه النصائح الجد قيمه .........بخصوص كتاب الهباج أنا لم أجده في الأنترنت إذا كام لديك الموقع الذي أستطيع أن أتحصل عليه فأبلغيني فيكون لك مني كامل التقدير و الإحترام فقد اشتريت جزئين في الرياضيات و جزء في الفيزياء و هو غالي الثمن كثيرا ...........بوركت ..سلاااام و انا في انتظار ردك حنونتي

[امين الاسلام]

سلسة كتاب هباج بحثت عنها و وجدتها لدى سنة الاولى ثانهوي فقط
وانا من راء انه عندم تبدا السنة الدراسية لازم الشخص يركز مع الاستاد ويواضب في حل التمارين وتكرار مراجعة الدرس فكلما اتيحت فرصة للعمل بهاتين نصيحتين زادت في ترسيخ المعلومة لدى الفرد
وجاري البحث عن كتاب
وارجو من ثصاحبت الموضوع انت تدلينا على الكتاب مشكورة

[Rafife09]

المشاركة الأصلية كتبت بواسطة مروة الايمان

مشكوووووووووووووووووووووورة أختي الفاضلة على هذه النصائح الجد قيمه .........بخصوص كتاب الهباج أنا لم أجده في الأنترنت إذا كام لديك الموقع الذي أستطيع أن أتحصل عليه فأبلغيني فيكون لك مني كامل التقدير و الإحترام فقد اشتريت جزئين في الرياضيات و جزء في الفيزياء و هو غالي الثمن كثيرا ...........بوركت ..سلاااام و انا في انتظار ردك حنونتي

أختي العزيزة أنا متأسفة جدا سامحيني ما نقدرش نساعدك بالنسبة لسلسلة هباج فالأمر ليس بيدي للأسف الكتاب على حد علمي غير موجود أصلا في الأنترنت وعلابالي بللي الكتاب هدا غير متوفر في كل المكاتب وعلابالي يسقام غالي ونتمنى أنك تلقاي الأجزاء كامل عن قريب و تقدري تشريهم
و لكن اقتراح اخر مش بالضرورة تشري كل الأجزاء أنتي ممكن تسلفي من المكتبة تاع الثانوية ادا توفر أو من عند زملائك أنا مثلا شريت الأجزاء ال5 تاع الرياضيات و3 أجزاء في الفيزياء و لكن نحكم الجزء اللي رح نراجع عليه و الباقي نسلفهم لزملائي ممكن تتعاملو هكا و أنا ان شاء الله ان امكنني مساعدتك درك نساعدك بالتوفيق و النجاح

[دارين92]

السلام عليكم
شكر اختي على النصائح
قوليلي برك كيفاش ندير مع الحفاظة باسكو راني خايفة غير منها
انا منقدرش نحفظ
و كشما عندك مراجع ملاح و لا دي سوجي تاع هدا العام تاع الباك راني نحوس عليهم و لا اي مواضيع اخرى في جميع المواد لعلمك انا طالبة قسم علوم تجريبية
شكرا

[الأستاذ*عبد الحميد*]

نتمنى لك التوفيق و النجاح

[Rafife09]

شكرا جزيلا للأستاد *عبد الحميد* أما أختي"حطيستة" نطلب منك ادا عرفتي او الاخرين ادا ممكن تحطولي الطريقة بالتفصيل باه نحطلكم الدروس اللي عندي في الميكرو الكل راني ما عرفتش الطريقة كيفاه تعملو باه تظهر روابط للتحميل

[raoulho]

جازاك الله خيرا
ان شاء الله mension tres bien

[إخلاص02]

ماشي كل واحد تساعدو الطريقة لقريتي بيها أخت رفيف. كاين نصائح قيمة نشكرك عليها وكاين حوايج نختلف فيها معاك كيما قلتي منبداوش les cours من بداية السنة أنا نقولك يبدا التحضير للباك من أول يوم في السنة الثالثة.
شكرا

[narouma]

شكرااااااا على النصائح القيمة ولكن انا لدي راي اخر وهو انو كل تلميذ اوكيفاه طريقة الدراسة تاعو ان شاء الله دجيبو الباك بمعدل مليح

[*قلبي ملك ربي*]

نشكرك بلبزاف ختي رفيف ماكاش نقطة و مهدرتيش عليها و هادوما النصائح حلونا بزاف عينينا.بارك الله فيك.
بالصح كاينة حاجة مادابيك لوكان تقولينا على مادة التاريخ و الجغرافيا كيفاش نديرو معاها يعني الحفيظة
علاخاطر الأساتذة اللي يقرونا خلعونا بزاف من هاد الناحية surtout الشخصيات و التعاريف حتى كاين اللي يقولك بللي
ماشي شرط يدريلك اللي قريتيهم في السنة الثالثة برك حاب يقول تقدر تكون حاجة تاع السنة الثانية donc في هاد الحالة واش بيدنا
نديرو ؟ و راني نخمم باش نبدا نحفظ شوية في هاد les vacances
و الحاجة لوخرا هي الفلسفة : شفت هنايا بزاف مواضيع تاع أهم المقولات في الفلسفة ووووو يعني الحالة chargé شوية منين تروحي تصيبي الحفيظة
علاهادي هاني حايبة نقص شوية في هاد الصيف مع حنايا scientifique يعني au moins تمدي وقتك للـ physique و science و math
واش رايك نتيا ؟

[Rafife09]

المشاركة الأصلية كتبت بواسطة siv.maya

نشكرك بلبزاف ختي رفيف ماكاش نقطة و مهدرتيش عليها و هادوما النصائح حلونا بزاف عينينا.بارك الله فيك.
بالصح كاينة حاجة مادابيك لوكان تقولينا على مادة التاريخ و الجغرافيا كيفاش نديرو معاها يعني الحفيظة
علاخاطر الأساتذة اللي يقرونا خلعونا بزاف من هاد الناحية surtout الشخصيات و التعاريف حتى كاين اللي يقولك بللي
ماشي شرط يدريلك اللي قريتيهم في السنة الثالثة برك حاب يقول تقدر تكون حاجة تاع السنة الثانية donc في هاد الحالة واش بيدنا
نديرو ؟ و راني نخمم باش نبدا نحفظ شوية في هاد les vacances
و الحاجة لوخرا هي الفلسفة : شفت هنايا بزاف مواضيع تاع أهم المقولات في الفلسفة ووووو يعني الحالة chargé شوية منين تروحي تصيبي الحفيظة
علاهادي هاني حايبة نقص شوية في هاد الصيف مع حنايا scientifique يعني au moins تمدي وقتك للـ physique و science و math
واش رايك نتيا ؟

سلام أختي
أنا ثاني عندي مشكلة في الحفاظة و ثاني حاجة نعاني منها هي داكرتي أعاني من داكرة سيئة جدا و لكن القناعة هي الحل الوحيد صدقيني لمجرد انك تقتنعي أو بالأحرى تقنعي نفسك أنك لازم تحفظي ,,أنك مجبرة على الحفاظة ’’و ما عندكش خيار وأهم حاجة لازم تقنعي نفسك أنها طريقة للنجاح و ادا حفظتي رح تنجحي تحققي الهدف اللي تحلمي بيه

و لازم تنقنعي نفسك بللي الحفاظة عملية سهلة جدا درك تلقايها سهلة وحطي في بالك "أن الانسان لا يرى الأشياء كما هي وانما يرى الأشياء كما يريد هوأن يراها" يعني كي تقنعي نفسك بللي راهي ساهلة فعلا تلقايها ساهلة ربما أقصر طريق باه تفهمي حاجة أنك تقنعي نفسك على أنك قادرة على دلك

ومن بعد انت باه تجيك ساهل حاولي انك تفهميها ومن بعد تحفظيها وبالنسبة للشخصيات راهم ما يمدوهالكمش في الدرس وانما انت تبحثي وحدك وتجيبيها اما من الانترنت أوتشري كتاب خاص بالشخصيات و من المفروض الشخصيات اللي تجي في الباك باينة تلقايها عند الناس الكل و ما يجيبولكش شخصية بعيدة على البرنامج

أما المصطلحات فهي أيضا ما تجيش خارج البرنامج و بامكانك تفهميها وتحفضيها بكل سهولة
أما بشأن الفلسفة فأكبر نقطة تجي على المنهجية كل مقالة عندها منهجية خاصة بيها كي تتبعيها تهزي نقطة مليحة بالاضاقة الى دلك كاينة دروس باينة لازم تفهميها مع الأستاد مثلا المشكل والاشكالية ,,السؤال العلمي والسؤال الفلسفي ,, الرياضيات ,, البديهية و المصادرة ,,المنهج التجريبي........الخ و أيضا تحفظي أقوال الفلاسفة الأقوال يعني جمل قالوهافلاسفة يعني عند كتابتك للمقالة لازم تحترمي المنهجية تكوني فاهمة الدرس حافظة مقولات فلاسفة و بامكانك تكتبي مقالة خير من الأستاد


ولكن كاين حاجة ما نوافقكش فيها أنك تبداي الحفيظة من درك تأكدي تماما مهما كانت داكرتك قوية فهدا ما ينفعكش تحفظي من جوان 2010 الى جوان 2011 راني نقلك الرياضيات والفيزياء و تنسايهم مابلك التاريخ والفلسفة

ما تزربيش روحك عندك عام كامل يسنى هو رح يكفيك بشرط يتوفر عندك الارادة,, العزيمة,, والصبر,,الجدية وتنظمي وقتك أهم حاجة تنظمي وقتك وتتجاوزي الصعوبات "القوي مش اللي ما يطيحش خلاص القوي هو اللي يطيح ويعرف كيفاه ينوض و يستفيد من أخطائه
نتمنالك التوفيق و النجاح و ان شاء الله تنجحي و تجيبي معدل مليح

[*قلبي ملك ربي*]

المشاركة الأصلية كتبت بواسطة Rafife09

سلام أختي
أنا ثاني عندي مشكلة في الحفاظة و ثاني حاجة نعاني منها هي داكرتي أعاني من داكرة سيئة جدا و لكن القناعة هي الحل الوحيد صدقيني لمجرد انك تقتنعي أو بالأحرى تقنعي نفسك أنك لازم تحفظي ,,أنك مجبرة على الحفاظة ’’و ما عندكش خيار وأهم حاجة لازم تقنعي نفسك أنها طريقة للنجاح و ادا حفظتي رح تنجحي تحققي الهدف اللي تحلمي بيه

و لازم تنقنعي نفسك بللي الحفاظة عملية سهلة جدا درك تلقايها سهلة وحطي في بالك "أن الانسان لا يرى الأشياء كما هي وانما يرى الأشياء كما يريد هوأن يراها" يعني كي تقنعي نفسك بللي راهي ساهلة فعلا تلقايها ساهلة ربما أقصر طريق باه تفهمي حاجة أنك تقنعي نفسك على أنك قادرة على دلك

ومن بعد انت باه تجيك ساهل حاولي انك تفهميها ومن بعد تحفظيها وبالنسبة للشخصيات راهم ما يمدوهالكمش في الدرس وانما انت تبحثي وحدك وتجيبيها اما من الانترنت أوتشري كتاب خاص بالشخصيات و من المفروض الشخصيات اللي تجي في الباك باينة تلقايها عند الناس الكل و ما يجيبولكش شخصية بعيدة على البرنامج

أما المصطلحات فهي أيضا ما تجيش خارج البرنامج و بامكانك تفهميها وتحفضيها بكل سهولة
أما بشأن الفلسفة فأكبر نقطة تجي على المنهجية كل مقالة عندها منهجية خاصة بيها كي تتبعيها تهزي نقطة مليحة بالاضاقة الى دلك كاينة دروس باينة لازم تفهميها مع الأستاد مثلا المشكل والاشكالية ,,السؤال العلمي والسؤال الفلسفي ,, الرياضيات ,, البديهية و المصادرة ,,المنهج التجريبي........الخ و أيضا تحفظي أقوال الفلاسفة الأقوال يعني جمل قالوهافلاسفة يعني عند كتابتك للمقالة لازم تحترمي المنهجية تكوني فاهمة الدرس حافظة مقولات فلاسفة و بامكانك تكتبي مقالة خير من الأستاد


ولكن كاين حاجة ما نوافقكش فيها أنك تبداي الحفيظة من درك تأكدي تماما مهما كانت داكرتك قوية فهدا ما ينفعكش تحفظي من جوان 2010 الى جوان 2011 راني نقلك الرياضيات والفيزياء و تنسايهم مابلك التاريخ والفلسفة

ما تزربيش روحك عندك عام كامل يسنى هو رح يكفيك بشرط يتوفر عندك الارادة,, العزيمة,, والصبر,,الجدية وتنظمي وقتك أهم حاجة تنظمي وقتك وتتجاوزي الصعوبات "القوي مش اللي ما يطيحش خلاص القوي هو اللي يطيح ويعرف كيفاه ينوض و يستفيد من أخطائه
نتمنالك التوفيق و النجاح و ان شاء الله تنجحي و تجيبي معدل مليح

صح tu as raison و ماكاش حاجة مستحيلة vouloir c'est pouvoir و علابالي بلي كي تكوني في هاديك الحالة obligée عليك تحفظي
ماشي مشكل كبير بالنسبة ليا بالصح tellement شفت الحفيظة بزاف قلت نقص شوية على روحي و تبقالي غير la révision و surtout اللي الوقت مايكفيش و au même temps نكرس وقتي للـ les matières scientifiques فهمتي؟ بالصح يعني عندك الحق نكون نورمال
وهاد les vacances لازم نرتاحو فيهم باش نقدرو نبداو مليح
بالصح قوليلي ماكاش فرق بين السنة تاع الباك و السنوات لوخرين حاب يقول تقدري تدي la moyène كيما مالفة ؟
ان شاء الله ربي يعاونا كامل و تربحو نتوما في هاد العام و مبعد حنايا و ماتنسايش كي تربحي تقولينا شحال اديتي علاخاطر شوقتينا باش نعرفو
معدلك
يعطيك الصحة ختي لعزيزة على هاد الوقفة اللي وقفتيها معانا علاخاطر تاع الصح رانا مخلوعين
ربي يجازيك

[Rafife09]

المشاركة الأصلية كتبت بواسطة siv.maya

صح tu as raison و ماكاش حاجة مستحيلة vouloir c'est pouvoir و علابالي بلي كي تكوني في هاديك الحالة obligée عليك تحفظي
ماشي مشكل كبير بالنسبة ليا بالصح tellement شفت الحفيظة بزاف قلت نقص شوية على روحي و تبقالي غير la révision و surtout اللي الوقت مايكفيش و au même temps نكرس وقتي للـ les matières scientifiques فهمتي؟ بالصح يعني عندك الحق نكون نورمال
وهاد les vacances لازم نرتاحو فيهم باش نقدرو نبداو مليح
بالصح قوليلي ماكاش فرق بين السنة تاع الباك و السنوات لوخرين حاب يقول تقدري تدي la moyène كيما مالفة ؟
ان شاء الله ربي يعاونا كامل و تربحو نتوما في هاد العام و مبعد حنايا و ماتنسايش كي تربحي تقولينا شحال اديتي علاخاطر شوقتينا باش نعرفو
معدلك
يعطيك الصحة ختي لعزيزة على هاد الوقفة اللي وقفتيها معانا علاخاطر تاع الصح رانا مخلوعين
ربي يجازيك

سلام أختي
الحمد لله فهمتي المقصود و لكن الحفيظة ماهيش فعلا ياسر كيما تتصوري قتلك حافظي على حظورك للحصص و حافظي على تركيزك في الحصص و من بعد مش لازم في كل درس تحفظي 20 ورقة درك نقلك احفظي الملخصات و افهمي الدرس أنا حفظت غير الملخصات العلوم الاسلامية بالاك 5ورقات برك و جاوبت في الباك كلش صحيح لقيت السئلة هاديك الكل في الموضوعين حافظتها
و التاريخ ثاني الملخصات 4و لا 5 ورقات هدا ماكان و معاها الشخصيات و المصطلحات و التواريخ بالطبع
و ما تنسايش بعد ما تكملي تحفظي تشوفي المواضيع تاع البكالوريات اللي قبل و الحلول النمودجية تاعها لازم تعرفي الطريقة اللي تجي بيها الأسئلة والطريقة اللي لازم تجاوبي بيها

هزي العطلة تاعك كاملة و ارتاحي مليح وما تقلقيش روحك ياسر قتلك أسهل طريق ممكن تديه أنك تشوفي الأمور على بساطتها ولازم كيما قتلك تقنعي نفسك بللي راهو عام عادي وما يختلفش على العوام الأخرى

و بالنسبة للمعدل عادي جدا كاين اللي يهبط كاين قرا معايا طول عمرو يجيب غير معدل 17 و 18 و درك 11 يجيبها بالسيف, تحسيه فعلا دكي,, تحسيه فعلا فاهم ولكن ما تفهميش وش مشكلتو و لكن هو وحدو يقدر يعرف المشكل تاعو وين
وكاين اللي مستواه متوسط و لكن قدر يحافظ على مستواه طول عمرو يجيب 14و لدرك حتى في الباك يجيب 14
و كاين اللي يتعثر و يقوم هادي المجموعة أنا واحدة منها العام اللي فات جبت معدل الثلاثي الأول 14و هاد العام 15 و النقاط نشوف بللي عادي جدا سواء المواد الأساسية ولا الأخرى كاين "حسان يبدا" وكاين "مجيد بوقرة" ههههها
نتمسخر يعني كاين 19 و كاين 2

نسيت نقلكم على حاجة تعرفي الثقةفي النفس مهمة جدا في هاد العام بالدات لاحظتها أنا و قالوهالي ناس قبلي يعني اللي تلقايه يقلك أنا بربي 1000 بالمية ناجح هاداك مبروك عليه راو ناجح و قد تلقاي واحد ممتاز و لكن خوفو من أنو ما ينجحش يأثر عليه أنا شخصيا تقدري تقولي عام كامل حاطة في راسي بللي بربي 99,99999999999999999 بالمية ناجحة يعني لازم تنساي احتمال أنك ما تنجحيش و حطي غير احتمال النجاح

ردي بالك تهملي الامتحانات كاين اللي يقول أنا نخدم للباك و ما يهمنيش في الامتحان اخدمي للباك كلنا نخدمو للباكو لكن الامتحان تعاملي معاه بجدية لأنو رح يكون تقييم فعلي ليك و ادا كانت طريقتك غالطة او عندك مشكلة تقدري تعرفيها بعد الامتحانات و الثلاثي الأول مهم جدا بيه تقدري تقيمي الانطلاقة تاعك كيفاه كانت وكاين ياسر اللي يقولو معدل الثلاثي الأول غالبا يكون هو معدل الباك أو قريب منو


ربي يوفقك وينجحك و ينجحني أنا تاني راني قالقة في حالة خااااااااااااااايفة ما نجيبش معدل مليح باه نقرا طب
ادا فعلا حابة تعرفي معدلي أنا بالاك ما نقدرش نقلك و لكن انتيا تستعنلي الأنترنت الا حبيتي تعرفي هدا رقم التسجيل تاعي 4016433 كي تخرج النتيجة شوفي في الانترنت
ربي ينجحني و ينجحك