لسهرات رمضان الكريم مقروظ السنيوة بالخطوات المصورة

[ام اماني77]

بسم الله الرحمان الرحيم

السلام عليكم اخواتي في الله

وصفة اليوم عبارة عن مقروظ السنيوة وصفة سهلة والنتيجة اكثر من رااااائعة بالنسبة للطريقة نفسها في قاطو المنقوشة لي سبق وادرجتها فقط نغير عجينة الصابلي بعجينة المقروظ

راح نقص فقط شوية من كمية السمن نعمل 3 كيلات ونصف سميد بكيلة سمن حتى يحافظ على شكله ومايتفتتش بعد الطياب وكاين لي يعملوه 4 كيلات بكيلة سمن جربته صراحة ماعجبنيش يجي يابس شوية بدون اطالة نخليكم مع الوصفة والخطوات المصورة

المقادير:

الكيلة المستعملة كاس مل250
ثلاث كيلات و نص سميد متوسط انا استعملت سميد سميد مولا
كيلة سمن ذايبة وباردة
نصف ملعقة صغيرة خميرة حلوى يعطيه هشاشة وممكن نعوضها بكمية قليلة من البيكربةنات
ملح
خليط من الماء وماء الزهر انا استعملت حوالي ثلاثة ارباع الكيلة وهذا حسب نوعية الدقيق المستعمل

الحشو:

ثلاث كيلات لوز مرحي أو كاوكاو
كيلة سكر
ونجمع بماء الزهر
ممكن نستعمل الغرس
نضيف له القليل من القرفة

الطريقة:

نضع السميد مع الملح والخميرة والسمن يكون ذايب وبارد نحكو باليد جيدا

نغيطه ونخليه لعدة ساعات او ليلة كاملة
بعدها نشمخو بماء الزهر دون عجنه كما نعمل في المقروط العادي
في هاذ الوقت نحضر الحشو هو نفس الحشو لي نستعملو في البقلاوة
نخلط السكر مع اللوز ونضيف ماء الزهر والفاني

نقسم العجينة الى قسمين

نبسط العجينة الاولى على ورق الزبدة

نضعها في البلاطو

ثم نضع فوقها الحشو ثم نبسط الكويرة الثانية ونضعها فوق الحشو ونعدلها

نقطعه مقروضات وننقشه ونزينه بالعقاش واللوز او حسب الرغبة

ندخله للفرن على 180درجة ونخليه يطيب لان سر نجاحه في الطياب مالازمش يبقى اخضر من الداخل

بعد ما نخرجه من الفرن نسقيه وهو سخون بالعسل مخلط مع شوية ماء الزهر لازم العسل بارد والمقروظ سخون ونخليه يتشرب

انا استعملت حوالي 750غ

بعد مايبرد ويتشرب العسل اذا لقيته ناقص عسل نزيدله
بعدها نقطعه ونقدمه بالصحة والهناء

عن قرب امممممممم

https://

ملاحظة:

قياس البلاطو المستعمل 24على 28سم والكيلة هي كاس بحجم 250غ
العسل نخففه بكمية قليلة من ماء الزهر وكميته العسل على حساب حجم البلاطو
من الاحسن الحشو مانوصلوش لحواف الصينية حتى لا يحترق
يمكن اسبدال اللوز بالكاوكاو او الغرس
الطياب على نار متوسطة حتى يطيب من الداخل حوالي 45د او اكثر على حسب الفرن

ان شاء الله تجربوه لان ساهل وذوقه رهييييييب

غتالياتي انا بحاجة لدعائكن لابنتي اماني بالنجاح وبتيسير الامور جزاكن الله كل خير

تم بحمد الله