ملف الأخطاء المطبخية les erreurs culinaires

[zokhrofa]

................................

[nassirat.er]

المشاركة الأصلية كتبت بواسطة zokhrofa

ههههههههههه صح أنا كان عندي و ربما مازال

أنا نفسي فقط في patisserie مليح

لكن في الأكل نحس أنو ماشي بنين

مع أنو كامل يحبو أكل تاعي و يقولولي بنين

علابالك أضن أنو مشكل تاعنا هو مشكل عدم الثقة في النفس بما فيه الكفاية

جري تكوني واثقة من نفسك

آه و تفكرت حاجة اذا انتي من محبي الملح راح تبقى تجيك الماكلة سامطة حتى تحبسي الملح على الأقل 15 يوم تاكلي بأقل نسبة مالح ماشي بدون ملح أقول ملح قليل جدا

كذلك السكر

راح يتعدّل عندك الذوق

شكرا حبيبتي على جوابك
هههه والله نفس حالتي الحلويات يجوني ملاح وهايلين أما الطياب للأسف حتى يغيضني اللحم والخضر ة كي تجي الماكلة ماشي بنينة
و صح انتي عندك حق انا ما عنديش ثقة في نفسي و عندي مشكل الملح داااااائما ماكلتي ناقصة ملح تالمو نخاف تجي مالحة وماتداواش
المهم الواحد ماييأسش ويجرب حتى ينجح

[zokhrofa]

صح ان شاء الله مع الوقت تكتسبي ثقة اكبر بروحك

[mimi hano]

يعطيك الصحة على طرح الموضوع أنا عندي مشكل فحشوة البقلاوة كي تطيب لبقلاوة تجي غير متماسكة.ممكن تعطيني فكرة ناجحة

[zokhrofa]

شكون لي تجي غير متماسكة اختي الحشو ام البقلاوة كامل

اما اذا كنتي تتكلمين عن حشو البقلاوة فهي تجي حقا ماشي متماسكة يعني في الاخير هي حشو ماشي عجينة اضن انو اللعب كامل على سماكة الحشو يعني اذا رحيتيه رقيق اكثر كل ما تماسك

و ديري ماء الزهر و اعجني

لكن صراحة انا نفضل انو ما تعجنيهاش البنة كامل في انو الواحد كي ياكل يحس بالمكسرات قد ما كانت غليضة قد ما حسينة بيها

[*أم سجى*]

زخرفة ويينك ارواحي حنونة شفتكم تهدرو على اللحم كفاش يمرقو قوليلي اذا بعد التحماس نمرق اللحم والدجاج بالماء السخون ولا بلبارد انا شخصيا نمرق بسخون بصح جابلي ربي شفتكم قلتو الما السخون راه يقرسل اللحم ومايطيبش ولا غلطت في الفهم؟؟

[zokhrofa]

نعم زينونة تمرقي بالماء البارد و كي تكوني تحمصي فيه ما ديريش الملح حتى بعد ما تمرقي ب 30 دقيقة باش ما يفقدش الماء ديالو

[*أم سجى*]

زخرفة نشكرك بزاااف على هذالموضوع ران كنت نراجع فيه صفحة صفحة واستفدت منو بزاف ياريت المشرفات يثبتوه لانه يغني عن قسم الطبخ ومافيه ههه....لكن مازلت نسمط عليك انشاله تحمليني وتساعفيني ضرك نحطلك بزاف تساؤلات....

[*أم سجى*]

حابة نسقسيك على الاعشاب العطرية مثلا (باقة معدنوس .باقة حشيشة .كرافس)كي تكون خضرا واش هي الطريقة المثالية لحفظها في الثلاجة باش متخسرش ؟والدجاج كفاش تنظفيه هل نستعمل الملح ولا الخل ولا القارص وكفاه نحتفظ بيه داخل الثلاجة؟وما هي الطريقة المثلى للاحتفاظ بطماطم العلب (المصبرة )؟...وزيدي في عيدالاضحى المبارك واش هي الاطباق لي تديريها قصدي لما يكون اللحم متوفر عندنا فواش نقدرو نستغلوه؟ .حنا غالبا نديرو طعام ...شربة تع شيشة المرمز.....طاجين زيتون...مثوم.....كشما تزيدي تضيفيلي اختي زخرفة؟....وتاني قوليلي واش هي الاطباق المناسبة للمناسبات والعرضات الخفاف تع 3اشخاص او4حنا غالبا نديرو شربة زائد طاجين زيتون زائد سلاطة ومشروبات او شربة ومثوم او غراتان او شطيحة جاج ولا لحم المهم الشربة حاااضرة دايمن كطبق رئيسي......كشما عندك اطباق زخرفة اختي اسمحيلي كثرت عليك الاسئلة ياريت تقتبسي مشاركتي وتجاوبيني داخلها هكذا باش ماتتعبيش وشكرا مسبقا

[zokhrofa]

أمل 95 : حابة نسقسيك الاعشاب العطرية مثلا (باقة معدنوس .باقة حشيشة .كرافس)كي تكون خضرا واش هي الطريقة المثالية لحفظها في الثلاجة باش متخسرش ؟

الاجابة من زخرفة :

كاين عدة طرق و انتي خيري لي تساعدك هههه

1- كاين تاع تغسليهم و تنشفيهم تماااااااااااااااااما من الماء و تقطعيهم صغار و ديريهم في علب مختلفة باش تفرقي بيناتهم من الاحسن تكتبي الاسم و تجمديهم (انا ما نحبهاش هذي الطريقة لكن تسلك كي تكوني حاصلة يعني تقدري ديري كمية صغيييييييييييرة و تخبيها لنهار تكوني حاصلة)

2- ما تغسليهمش و كيما راهم فالصاشي تخليهم و تقفلي الساشي و تحطيهم في الثلاجة ماشي المجمد، لكن الشرط الوحيد انو يكون ثلاجة الله الله تبرد مليح ماشي لي تحطي فيها الحليب يصبح رايب ههههههههه (انا هذي الطريقة تحكمهملي 20 يوم بالدات )

3- ما تغسليهمش و تحكمي كل ربطة ديري في قاع العلبة ورق مصاص و تحطي الربطة فوقو و تغلفي بفيلم غذائي و تغلقي العلبة بالغطاء تاعها (هذي الطريقة تشد اكثر من الثانية و مرات اقل على حسب التبريد )



والدجاج كفاش تنظفيه هل نستعمل الملح ولا الخل ولا القارص وكفاه نحتفظ بيه داخل الثلاجة؟

الاجابة :

شوفي الخل لازم لتطهيرها لكن ماشي خل المائدة لي نستعملوه للأكل لذلك في هذه الحالة ديري يا اما الملح يا اما الليمون يا اما خل الأبيض يجي مكتوب فيه خل ابيض


وما هي الطريقة المثلى للاحتفاظ بطماطم العلب (المصبرة )؟

الاجابة :

شوفي انا احسن طريقة اكتشفتها غير كيما و لقيتها هااااااااااايلة

كاين وحد العلب لتخزين الطعام بالزجاج و غلاقها بالبلاستيك و فيها شريط كاويتشو لمنع تسرب الهواء ديري داخلها الطماطم و هناك ربي ما تتأكسدش كامل

...وزيدي في عيدالاضحى المبارك واش هي الاطباق لي تديريها قصدي لما يكون اللحم متوفر عندنا فواش نقدرو نستغلوه؟ .حنا غالبا نديرو طعام ...شربة تع شيشة المرمز.....طاجين زيتون...مثوم.....كشما تزيدي تضيفيلي اختي زخرفة؟

الاجابة :

انا شخصيا في العيد الاضحى ندير اللحم مفور راني درت موضوع ديالو يعني نديرو هو و ندير طبق عادي بدون لحم باش نستبنو اللحم وحدو و من جهة نتخلص من الدهون الزائدة فيه

الرقبة تقدري ديريها كوشة محمرة في طبق زجاج بالغطاء ديالو فرشيلها البصل و البطاطا و الطماطم و ديري البهارات لي راني دايرتهم في اللحم المفوّر تجيك هايلة

الدوارة نديرها بالقرعة و مرات باللفت و مرات بالبصل و الطماطم

البوزلوف نديرو محمر في الكوشة او شطيطحة بالحمص

الكعالة تاع الغنمي نديرو بيها الطعام و انا درت بيها عدس و مرة درت بيها بويون جاو يهبلو مممممممممممم ما تفكرينيش ههههه

الفخض نديروه مشوي بروشات راني حاطة الموضوع ديالو

الكتف نديروه في الطعام و انا نديرو في الجوازات و الشربات

الكوتلات نديرهم مقليين او محمرين فالكوشة او مفورين تان باش نحيلهم الشحم

اللسان شطيطحة طبعا


....وتاني قوليلي واش هي الاطباق المناسبة للمناسبات والعرضات الخفاف تع 3اشخاص او4حنا غالبا نديرو شربة زائد طاجين زيتون زائد سلاطة ومشروبات او شربة ومثوم او غراتان او شطيحة جاج ولا لحم المهم الشربة حاااضرة دايمن كطبق رئيسي......كشما عندك اطباق زخرفة اختي اسمحيلي كثرت عليك الاسئلة ياريت تقتبسي مشاركتي وتجاوبيني داخلها هكذا باش ماتتعبيش وشكرا مسبقا


الاجابة :


كاش ما خليتو اعرضوني ههههههههههههه (امزح )

شوفي انا وحد المرة فطرت في مطعم تركي كي كنا نستناو حطولنا بيون تاع خضر مابيد يجيبولنا واش طلبنا

انا حسيت فيه الجزر و البطاطا و الدجاج و الحمص بكمية معتبرة خاطش كنت نسبن فيها اكثر من المكونات الاخرى و صدر الدجاج بنتو باينة و الكمون و القرفة و فلفل الاسود و قصبر و بصل طبعا ديري كلش يطيب و ارحيه في الاخير المهم يكون خاثر ماشي شورورو

هاذي تقدري تضيفيها في بلاصت الشربة للتغيير

بوراك او باركات او كيني بيتزا

سلطة الخضر المفورة او الورق او جزر مسكرفج و بيطراف مسكرفج ، سلطة الفلفل الحلو مشوي، سلطة باتنجال مشوي، الحميص

الاطباق : الكباب، طاجين الزيتون بالفطر، شطيطحة جاج او شطيطحة لحم، دولمة الحوت، او حوت فالفرن، سردين دولمة ولا شطيطحة

التحلية : انا نفضل كي يدخلو الضياف نحطلهم الماء فقط و الفواكه مشكلة مقطعة على شكل سلطة خاطش صحيا يقولك من الاحسن الفواكه تكون قبل الاكل ب 15 او 30 دقيقة و ليس بعد الاكل خاطش يثقال الانسان
لذلك كي يدخلو حطيلهم هكذا باش من بعد ياكلو و هوما خفاف

بعد الاكل ب 30 د حطي شاي فقط و مكسرات بدون حلويات

خاطش الانسان يترك انطباع كي يروح لدارو اذا راح خفيف من عندك ولا ضراتو كرشو ههههههههههه يقولك حطتلي حاجة خاسرة و لكن هي في الحقيقة هو خلطها ولا نتوما حطيتولو كلش و هو كلا كلش هههههههههه


نتمنى نكون جاوبتك و انا تحت تصرفك في كل وقت اهلا و سهلا

[*أم سجى*]

باااااااارك الله فيك اختي كفيتي ووفيتي جعلها الله في ميزان حسناتك.. ...حبيت نسقسيك تاني..عندي خبز يابس مرحي احتفظت به في ساشي شفاف واغلقتو وحطيتو فلبيت هل هذه الطريقة جيدة للحفظ؟ والعلب لي قلتيلي عليهم تع حفظ الطعام معنديش فكرة عليهم ممكن توضحيلي بصورة بلاك ران شايفتهم وجايزة عليهم ههه؟يتباعو عند مول الاواني شحال سعرهم؟والبويون لي قلتيلي عليه تع االمطعم التركي يشبه لي لنديروه حنا للمريض تع العملية وللنافس ايه بالنسبة للدجاج والحمص تاني نرحوهم فهذا البويون حنا منديروش الحمص نرحو الخضر ونخلو قطع اللحم ولا الجاج هكداك منرحوهاش ..شكيت البيون لي راكي تحكي عليه راحيين كلش ايه فكرة مليحة؟

[*أم سجى*]

اختي قطع الدجاج نحطوهم في صحن ونحطوه في المجمد ؟ والسردين ولا الحوت كفاه نحتفظو بيه قاتلي وحدة بلي المجمد ينحيلو كامل البروتينات لي فيه لازم منديروش فلمجد بصح شكيت يخسر؟همال كفاه الحل اخت زخرفة؟....وفتمريق لاحظي معاي اختي وصحيلي الخطأ..نضع زيت ودجاج يتقلى شويا ومبعد بصل مرابي يتقلى معاهم ومبعد قيس كاس ولا زوج ماء بارد قيس ميغطي اللحم ولا الجاج مع التوابل والملح ومبعد نرمي الخضر او الحبوب ونمرق بلتر ولا تحت يدين الكوكوت ماء سخون ونخلي تكمل طيابها؟ وطماطم الحب وقتاش نديرها؟ساعديني اختي تعيشي ران مخلطة في مجال الطهي كل واحدة كفاش تقولك ديري انا قررت نتبع المنهج تاعك وفرات ران حاطة فيك ثقة كبيرة اختي زخرفة

[crakabyle]

شكرا جزيلا على الموضوع
بالتوفيق

[zokhrofa]

.حبيت نسقسيك تاني..عندي خبز يابس مرحي احتفظت به في ساشي شفاف واغلقتو وحطيتو فلبيت هل هذه الطريقة جيدة للحفظ؟

الجواب :

من الاحسن علبة زجاجية او بلاستيك مغلوقة بواقي ديالها

والعلب لي قلتيلي عليهم تع حفظ الطعام معنديش فكرة عليهم ممكن توضحيلي بصورة بلاك ران شايفتهم وجايزة عليهم ههه؟يتباعو عند مول الاواني شحال سعرهم؟

الجواب :
شريتهم سعر ناقص 1000دج من الكبيرة الى الصغيرة كامل كاش مرة نحط صورتهم ان شاء الله

والبويون لي قلتيلي عليه تع االمطعم التركي يشبه لي لنديروه حنا للمريض تع العملية وللنافس ايه بالنسبة للدجاج والحمص تاني نرحوهم فهذا البويون حنا منديروش الحمص نرحو الخضر ونخلو قطع اللحم ولا الجاج هكداك منرحوهاش ..شكيت البيون لي راكي تحكي عليه راحيين كلش ايه فكرة مليحة؟

الجواب : نعم نفسو هذاك

[*أم سجى*]

شكرا اختي زخرفة ربي يحفظظظظظكك