يتبلاوني كبار السن

[مشكلتي]

السلام عليكم
مشكلتي هو اني املك وجه لا يوحي بسني الحقيقي عمري 30 سنة متزوجة وام من نهار كنت نقرا في الجامعة لحد الان لايوجد تغيير ....مفهمتش منين نتعرض لقلة االادب والوقاحة من ناس وكون غير جاو نتاجي المشكل كبار ومش متربيين نعطيكم امثلة تفهموا منها
في العام اللي رح نتزوج فيه كنت نروح نصلي التراويح مع الوالدة في وحد المرة تعرضت للسب والشتم وحتا تطاول بالايدي من وحدة نتم مرشدة كي جيبت ندخل للغرفة الثانية باش نشد بلاصة ونقرا القران قاتلي انت شفتك البارح تشوشي في الصلاة وعملتي كدا وكدا .....قتلها اتقي الله قاتلي وجهك صحيح قتلها الزمي حدودك اعرفي كيفاش تهدري معايبا سع سبتني وضربتني في كتفي وشهدوا معاها بالزور وجاو جيرانا قالولها راهي كبيرة وقتلها راني كبيرة مش لدرجة اللي هبطتني ليها دارتها سبة لاني مش قصيرة ومش ضعيفة متوسطة انتهت الحادثة شكيت بيها للمديرية
مثال وحدوخر خرجت ولدي كان الجو ربيعي حتا نلقا عجوزة تجري مورايا وتقولي لاه ملبستيلوش بوني ودايرتلو الشاشية لاكم تاع ديار ولا كم متربيين قتلها الزمي حدك واحترميني قاتلي نعلبو اللي رباكي وصلت تسب في والديا
وحكايات من هاد النوع بزاف يحبسوا المخ وبكل يحسبوني صغيرة بصح هدا مش مبرر لاني متعديت في حتا شخص لباسي حجاب ومحتشم منحطش المكياج وفي حالي ساعات نقول نكحل عينيا كي الفرعون باش يخافو مني والا كيفاش مفهمتش سبب هاد الدخاصة تقول عندي قوة جدب لهاد النوعية والمشكل تقولهم متهدروش معايا هكا يسبوك اللي يسمع يقول هاد الطفلة سبتهم مجتمع كرهت منو كرهوني في حياتي كبار ومش مربيين ويحبوا يعفصوا على الاصغر منهم سن بحجة انهم كبار
طاب قلبي منهم ممكن نبان نية علابيها يدخاصو كون جيت نبان شريرة كان واحد ما يجرؤ

[النجمة القطبية]

ضحكتيني اختي عمري ما شفت مشكل هكا
تبانلي انتي عندك فكرة اساسية على الكبار انهم تع مشاكل ولدلك تلقايهم بزاف في حياتك وهدا منطقي
لان بدون شعور الانسان احيانا يوحي للاخرين بافكاره بالاك من شكل الوجه او حركات الوجه يحقدوا عليك
بدلي تفكيرك راح يتبدلوا معاك
والا كيما قلتي راح تتعبي
موفقة

[هـــدوء]

ما تكبريش الموضوع عزيزتي .
المواقف لي صرات معاك تصرا مع أي إنسان
ماعندهاش علاقة بكونك صغيرة و لا كبيرة و لا أي شي.
كامل لازم في مرحلة ما نفوتوا على حكايات كيما هك .
بصح من طريقتك في الحديث نتي بعد تباني عصبية و مش ساهلة .
كاين مثل يقول "الصامط يغلب القبيح"
لازم تضبطي أعصابك و لي ماعجبكش كلامو تجاهليه .

[مسرورة بحياتي]

هذي نعمة انك كبيرة وتباني صغيرة ، افضل من ان تكوني صغيرة عندك 30سنة ، وتباني كبيرة مولات 50 سنة

[الواثق]

شدي داركم فهو حجابك والبسي الستار ........اما قضية صغيرة فما الفرق بين صاحبة 20 و30 ؟............كلهم صغار.... ......وويناه في الشارع يفرق بين طفلة تقرا في الثانوية واستاذة الا طريقة اللباس والحركات تظهر صغيرة العقل من الكبيرة................اخطونا من الخرطي..........ولمعلوماتك هذا المرض موجود في الرجال ايضا........يقلك تبلاتني اليوم 20 وحدة وكل هذا في مخيلته .............المرا تشد دارها والرجل يتلهى بخدمتو ...........ولي حاسة روحها فائقة الجمال فعليها بالجلباب والستار......ولي حاس روحو فائق الوسامة عليه باللحية والقشابية .........والله المستعان

[كاميلا]

متتعجبيش لا تقاس التربية بالعمر بزاف كبار ومش متربيين ومتخلعكش خاطر مرشدة راهم يدرقوا تحت الاسلام والدين وهم اسوء خلق الله عصبيتهم نابعة عن نفاقهم يعني اغلب الحالات اللي شفتها اللي حاسبين روحهم يدخلوا الجنة راهم صراولهم افات في حياتهم او عقد كبيرة وتدينهم نتاج عقد وحتميات ومش محبة في الله حتا ولو افرتضنا انك طفلة صغيرة وهي حطتك هكداك تضربك في بيت الله وتسبك سبحان الله المستوى المتدني وزيد شهادة الزور وشمن قبر يتحطوا هادو
راهي عقلية منتشرة الكبير ياكل الصغير ولازم الصغير يسمح من حقو بصح يعطيك الصحة كي شكيتي بيها الغرب علاش ترباو كبار وصغار من الشطرب والغرامة رباتهم كانوا حتا هوما همج اما حنا همجية في التصرفات همجية في التعليقات كامل يفهموا وكامل يتفلسفوا وكامل ائمة مجتمع مقرف حاشا اللي ميستاهلش وبالنسبة ليا نعدر الجاهل ومنعدرش المتعلم لانه الجاهل الله غالب عليه والمتعلم اشد جهلا من الجاهل ادا تبع الجهل ونسا نور العقل
وهاد العقليات كي تصادفك اخزيهم متهدريش معاهم عامليهم كانهم غير موجودين سبحان الله لمرا مع ولدها ولخرا تلحق فيها وتتكولف انقرضوا يا شر الارض

[زبدة ذايبة]

والله الموضوع فيه مبالغة كبيرة جدا منك

بديتي بنفسك اللي تشوف فيها صغيرة مع أنك أم وتجاوزت الثلاثين

يعني ماراكيش صغير

الصغيرة من المراهقة إلى الطفولة

والباقي كامل كبار

وهذي تاع يتبعوك الناس ويتبلاوك ويسبوك و.........

تطرح الكثير من التساؤل

علاش غير انت

وهل الناس اللي تتلاقايهم في الحياة مجانين؟؟؟؟؟؟

وعلاش المرأة الكبيرة المسنة العجوز تجري موراك وتقولك على وليدك؟؟؟؟؟؟

غريبة شوية لحكاية هذي

يبقى احتمال أنك ممكن عندك مشكلة من ناحية الأوهام والهلاوس.

أما أن التفكير في أن كل من لبست الحجاب والجلباب ذات سوابق أخلاقية

الإنسان ماعليه سوى بنفسه

واحد ماعندو سلطة القضاء وسلطة الحكم على الناس

العاقل يشوف نفسه

ولاداعي لصب البنزين على النار

لهذا شوفي نفسك وراجعيها

ناس مايعرفوكش يتهموك ويسبوك والله مشكلة كبيرة جدا

العيب راه فيك انت

وهذا بشهادتك أنت على نفسك

الناس كامل تمشي في الطريق

نادرا مايحصل الاحتكاك بالطريقة التي ذكرت

أنك مستهدفة من الناس بدون استثناء أستغرب

وزوجك راكي تخرجي معاه ولاتخرجي وحدك

وش رأيه في الأشياء اللي حكيتيها

أو أنك لم تخبريه؟؟؟؟؟؟

أو أن هذه الأمور تحدث لك بطريقة فردية وشخصية

لا إجابة واضحة من خلال الأشياء التي كتبتها

سوى أن في الموضوع "إن" لأنه بالنسبة لي غير واضح

وفيه الغموض بنسبة كبيرة

[أم رقية نسرين]

سلام ختي
والله موضوعك غريييييب و مبهم
بصح كاينة نقطة مهمة بزاااااف نولهك ليها كيفاه يا ختي تقولي لإمرأة في عمر والدتك الزمي حدك ؟؟؟ مهما تقولك قادري سنها و ردي عليها بكلام مليح

[aya.ayouya1998]

ربي يكبرنا في طاعتوا برك

[بنت الرّحّل]

الخميس 20 جمادى الآخرة 1439من الهجرة النّبويّة

وعليكم السّلام ورحمة الله وبركاته

يا أختي الفاضلة هوّني على نفسك
يقال أنه ( يسهل التّعرف على الخصوم في الرياضة فكلّ فريق له زيّه الخاص لكن في الحياة يصعب ذلك)
فما بالك بمن يمشي على الطّريق ، ومن يرتاد المتاجر ـوللأسف ـ من يأتي المساجد أيضا ، فمن الطّبيعيّ جدّا أن نلتقي بكمّ هائل من الطّوائف مختلفة الطّباع والأفكار والعادات والتّربية فمنهم: حادّ الطّباع والجادّ والمتسرّع والفضوليّ والمزاجيّ ومن لا يراعي الآخرين ، والمتهجّم والمتجهّم..... إلى غير ذلك
فمن الممكن أن يتعرض أي شخص لمواقف مزعجة وأن يسمع ما لا يرضيه فليست المسألة متعلّقة بشخصك ولا بسنك ولا بهيئتك
طالما أن النّاس يختلفون .
فليس من الغريب أن يدفعك شخص ما وأنت على مقربة من وضع قدمك لصعود الحافلة
وليس من الغريب أن يأتي شخص ما ويتجاوز كلّ من اصطف في الطابور منتظرا دوره في مركز البريد أو عند الطبيب ..

والحقيقة أن الحياة أصبحت صعبة جدّا لمن يعيشون في بيت واحد ويلتقون صبحا وعشيّا وهم صعبوا الإرضاء وصعبوا المراس
ناهيك عن الحسد والحقد والضغينة وضيق الأخلاق .. فلو كنّا نحمل همّ كلّ من نظر إلينا نظرة غريبة أو تلفّظ بما يؤذينا فكيف ستكون حال قلوبنا وصدورنا!
وكما قال الشّاعر :

وكلُّ أذى فمصبورٌ عليه..:..وليس على قرينِ السّوءِ صبر

وأخيــــــرا :
ردّات الفعل السّريعة لا تأتي بالخير غالبا، فإن اعتقدت عجوز في الطريق أنها تسدي لك النّصيحة و في أيّ مكان آخر فلا بأس بشكرها على ما قالت والمضي في طريقك فلست بحاجة لإقناعها برأيك ولا بمحاولة إرضائها.
من الإهانات التي لا تنسى أني ذات مرة كنت عند الطبيبة فقالت إحدى الحاضرات : " نعيش مع اليهود وما نعيش مع هاذوا " مشيرة إليّ تقصد الجلباب والنقاب ، وكان حديثها مليئا بالإهانات والسخرية و القذف كالاتهام بالعهر ...هل تعتقدين أن هذا النوع من الناس يمكنني أن أغيّر أخلاقه بالاندفاع أو الغضب لنفسي
وعزاؤنا ما رُوي عن الإمام الشّافعي ـ رحمه الله ـ " ليس إلى السلامة من الناس سبيل فانظر إلى ما فيه صلاحك فالزمه "
فتعوّدي على سعة الصّدر وعدم الانتصار للنّفس والتواضع مع الكبار فلن يضرك الاعتذار من المرأتين فأنت على كل حال لن تريهما مرة أخرى وإن تكرر معك مثل هذا في المستقبل فلا تجمعي بين الحوادث وتجتري ما سبق وإنما اعتبري أن ما سبق من يومك لم يكن جيدا فحسب.
وأنصحك أن تحفظي الآداب النبوية في الخروج من المنزل من الوضوء والصلاة إن أمكن ولا سيّما هذا الدعاء :
(اللَّهُمَّ أَعُوذُ بِكَ أَنْ أَضِلَّ، أَوْ أُضَلَّ، أَوْ أَزِلَّ، أَوْ أُزَلَّ، أَوْ أَظْلِمَ، أَوْ أُظْلَمَ، أَوْ أَجْهَلَ، أَوْ يُجْهَلَ عَلَيَّ) فما أحوجك إليه


أتمنّى لك التّوفيق

[*أم سجى*]

لازم توقفي كل انسان عند حدو وماتسمحي لحتى واحد باش يأذيك مام يكون كبير...حنا في منطقتنا عادة سلبية تروحي للطبيب تقعدي في غرفة الانتظار يبداو يسقسو فيك انتي وين تسكني شحال فعمرك وش جاية تداوي.....الاسبوع الماضي سقساتني عجوزة قاتلي وين تسكني قلتلها نسكن في بلاصة وخلاص...الاخريات استغربو ردي قلتلهم في قلبي ران هايلة ماقلتلهاش واش دخلك فيا ...

[mohamed nadim]

يتبلاوني كبار السن

الحمدلله ماشي كيما فهمتها

[abdellah36]

دزاير عندها واش راهي رافدة ............... بصح انا تبانلي بلي انت برانية على الحومة و لا بالاك انت عشت مغلوقة على المجتمع ...............لازم تعرفي المجتمع ميفاش يسير باش تعرفي كيفاش لازم تتصرفي في كل موقف ...... السلاح ما هوش دايمن في اللسان و في اليدين ,,,,,,,,,العينين وحدهم يخبوا سلاح نووي ,,,,, لازم تعرفي وين تخزري كي تمشي وكيفاش تخزري ....ماشي تمشي و شوفي موراك ومبعد تقولي وعلاش يتبلاوني ,,

[سيرين راجي]

هذه ليست مشكلة كلنا نتعرض لهذه المواقف ولا يمكننا التحكم بتصرفات الاخرين نفعل فقط ما يجب علينا نحن مسؤلون عن تصرفاتنا فحسب اصلحي
حالك لا يهمك رد فعل الاخرين ان كنت على صواب

[dmention]

الحجاب يساعد لكن هذه الظاهرة تمس كل الفئات في الجزائر