شكون تعرف طريقة تحضير الخبيز

[ام ايمن17]

السلام عليكم
من منكن تعرف طريقة تحضير الخبيز
جبولي زوجي و معرفش نطيبو نوروني ربي يحفظكم الان اذا امكن

[أم هبوبة]

اختي شوفي الخبيز كيما السلق تماما غسليه مليح و حطيه يقطر قطريه مليح و من بعد قطعيه رقيق و حطيه يفور
مين يفور مليح و يدخله الطياب مليح مليح . خودي مقلى عملي فيها شوية زيت و رابي التوم قليه شوية زيدي الخبيز و عمليله شوية ملح و فلفل اسود و كمون و خليه يتقلى و يتشرب النكهات من بعد طفي عليه هدا ما كان .

[ام انفال الاء لجين]

اضافة لما قالته اختي ام هبوبة لما ديريه يفور ديري معاه فصوص ثوم مقطعين يزيد النكهة .

[زنجبيل11]

انا عندي طريقة اخرى اضافة لطريقة الاخوات هي طريقة شعبية خالية من الزيوت
ناتي بالخبيز نخسله و نقطعه رقيق من بعد ناخذ قدر نضع الخبيز مع كمية من الماء و نتركه يغلي حتى يكون قريب من النضج
نضيف له الثوم مقطع والبصل و الفلفل الحار و تشيشة الشعير
و نحرك كل مرة حتى تستوي التشيشة تماما و يتبخر الماء ولا ننسى الملح ايضا
ممكن اضافة السلق مع الخبيز و كذلك نبتة يقال لها الحميضة هذا بالعامية و يمكن اضافة الكرفس
عملناه الاسبوع الماضي كنت ساصور الخطوات لكن البطارية فرغت لو اعدنا الطبخ ساضعه

الخبيز له فائدة خاصة بالنسبة للقلون الطبيب نصح قريبتي باكله

[algerianaa]

تغسليه مليح و تقطريه من بعد تقطعيه رقيق بصح من الافضل انك تطيبيه ديراكت في المقلة يعني مين تقطعيه وجدي مقلة فيها شوية زيت وثوم وتقليه من بعد حطي الخبيز زيدي الملح و الفلفل اسود و التوابل الي تحبي و خليه يطيب على نار هادية

[conductrice]

ماما تموت على الخبيز رغم ان لا بنة فيه ولا لذة

[kikimnarim2]

ما هو الخبيز

[روح مراد]

الخبيز نبتة عشبية كاين مناطق يكلوها بكثرة و مناطق أخرى ما ياكلوهاش
المهم الطريقة الللي نعرفها و اللي عمري ما جربتها على خاطر في دارنا ما ناكلوهش بالصح عجوزة أختي تاكلو
ديري مرقة بالحمص إذا عندك طرف جاج أو لحم قليهي في البصل و الثوم و الملح و الفلف الأسود و شوية قرفة كي يتقلى مليح زيدي عليه طماطم مصبرة و حمص و خلي كل شيء يطيب المرقة تكون قليلة ماشي بزاف
في هذا الوقت تنقو الخبيز و تقطعو الأوراق و تحطوهم يفورو في كسكاس كي يتفور أعصروه شوية و ضيفه للطنجرة نتاع اللحم و الحمص اللحم لازم يكون طايب و خلو الخبيز يتشرب كامل المرقة و في الأخير نديرو عليه كسبر مقطع رقيق

[SAMAH SAMAH]

الخبيز
اسفة اختي في منطقتنا ما نطببوهاش

[روح مراد]

شكرا على الصورة ناس الغرب و المغرب هوما اللي ياكلوه بكثرة
بالصح يقولو أنه جد مفيد و الله أعلم

[غزالة الصّحراء]

المشاركة الأصلية كتبت بواسطة samah samah

الخبيز
اسفة اختي في منطقتنا ما نطببوهاش

أضمّ صوتي لصوتك . أحنا ثاني مانطيبوهاش. رغم أنّها متواجدة عندنا بكثرة في الطّبيعة. ياربّ ايفيدوك الأخوات الأخريات.

[اسماء ميزان]

سلام ختي
نعطيك طريقة من مدينة تلمسان وضواحيها وهي كالتالي
حنا نديروا خليط السلق والخبيز منبعد ماتفرزيهم وتغسليهم تقطعيهم وتغليهم منبعد تنحيهم وديريهم فالماء بارد باش لون تاعهم يقعد
وتعصريهم متخليش فيهم الماء
من جهة وجدي التوم يتقلي فالزيت الزيتون والا حبيتي زيت العادية ولا خلطي
كتقلي التوم حطي هدا الي عصرتيه وزيدي فلفل اسود والملح وكمون وهو يحب الفلفل الاحمر خليه يتجمر علي نار قليلة والا حبيتي الحار ديري الهريسة وزينيه بالزيتون الاحمر وشهية طيبة