بمناسبة شهر رمضان.... دورة طبخ للمبتدئات

[دانية لينة]

السلام عليكم كل الشكر للاخت زينب على الموضوع الجميل و نشالله نفيد فيه باسم الله
نستعمل ملعقتين زيت و راس بصلة كبير مقطع و قطع لحم غنمي او بقري قليل من الملح و نخليهم يتقلاو حتى تصير البصلة شفافة نزيد الطماطم حب نستعمل 3حبات متوسطة (انا لا استعمل طماطم مصبرة من اجل الاطفال ) و سنات ثوم ملح فلفل اسود كمون ربع ملعقة قهوة قرفة ربع ملعقة قهوة كسبر ملعقة كبيرة معمرة مليح راس الحانوت ملعقة صغيرة معمرة و فلفل احمر كرافس و دبشة مربوطين
نخلي كلش يتقلى في غرضو( انا نحب ااستعمال القدرة اكلها غير)و كل خمس دقايق نحرك و نضيف القليل من الماء حتى تمر نصف ساعة او اكثر نصفي المرق مع اضافة شوية ماء ساخن اعيد قطع اللحم و حبة بطاطا صغييييرة حبتين سنارية و حبة جريوات حبة فلفل من الافضل احمر كمشة روز مغسول و كمشة عدس احمر و كمشة حمص انا نحب نرحيه مد ذوق رايع ع للحريرة (الي تحب تصفي في الكوكوت و تكمل فيها الطياب بسرعة او تكمل في القدرة )عند نهاية الطهي انزعي اللحم و ارحي باقي المكونات (انا لا اضيف العقدة في الاخيرة لانها
تكون عاقدة و بنينة )

[mosta*limoges]

لا عليك أختي زينب رد نتاعي مالقيتوش أصلا ماكنتش كاتبة بالتفصيل نعاود نكتب طريقتي في لحريرة ماشي خسارة فيكم لأنني تعلمت منك و من لأخوات حوايج بزاف بارك الله فيكم
أساس لحريرة هي الدشيشة و أحسنها نتع لمرمز و حشايش نتع الحريرة و راس الحانوت
على نار هادئة ندير لحم يتقلى مع بصل و الثوم و حبات جزر و حبة بطاطا وقرعة و طماطم و شوية حمص ربطة قصبر و معدنوس و نعناع يابس يعطيها وحد لبنة إمممم و نضيف التوابل نتاعنا فلفل أسود كروية راس الحانوت طبعا الملح و حشايش الحريرة (زعتر فليو و النوخة) ثم نضيف طماطم نتع لقوطي و نمرق و نخليهم يطيبو من بعد ننزع اللحم و نطحن الخضر و نرجع كل شي للطنجرة و نضيف حوالي 2مغارف دشيشة و نخليها طيب مليح وعلى نار هادئة مع التحريك المستمر و مين نجي نطفي عليها نضيف قصبر مقطع و شوية راس الحانوت و حشايش الحريرة اللي ذكرتهم سابقا و شهية طيبة و هادي دشيشة اللي نستعملوها هادي راهي مخلطة مرمز مع الشعير

[دانية لينة]

السلام عليكم
طريقتي في الجاري لحمر
في القدرة دايما
ملعقتين زيت بصلة واحدة كبيرة مقطعة مربعات صغيرة جدا هذه المرة و قطع من اللحم غنمي من الافضل او بقري و حتى دجاج نقلي جيدا مع رشة ملح تساعد البصل باه يطلق الماء نتاعو حتى تصبح البصلة شفافة و نضيف 3حبات طماطم مقطعة و سنات ثوم و نقلي جيدا جيدا و نضيف التوابل ملح فلفل اسود فلفل احمر و ملعقة كبيرةمملوءة جيدا كسبر الي يحب الحار ممكن يضيف ملعقة صغيرة هريسة او فلفل احمر حار(انا نزيد الحار في الصحن نتاعي فقط )دبشة و كرافس مربوطين للنكهة
نخليها تتقلى على مهلها مدة نصف ساعة او اكثر حتى ساعة غير ربع و كل خمس دقايق نحرك و نزيد شوية ماء و نجهز ماء ساخن و نصفي بيه المرق المتحصل عليه نعاود نرجعو للقدرة و قطع اللحم و نخلي اللحم يطيب مليح مدة ساعة غير ربع نوجد لحم مفروم و نصف بصلة صغيرة رابي في لا راب تاع ثوم و ملح و فلفل اسود و روز مرحي رقيييق (نتاع محلبي)و نجمع اللحم و نعجنو شوية و نشكل كرات نحطها في الثلاجة كي تمر النصف ساعة نضيفها للمرق و نخليها تكمل الربع ساعة مع اللحم الاول و نسوم الفريك نصف كاس صغير و نصفيه و نضيفو و نخليه على نار قليلة ايضا حتى يطيب مع قرن فلفل حار و طماطم مصبرة ملعقة كبيرة نحلها في القليل من المرق و نضيفها للجاري
للتزيين ممكن نعناع يابس مفتت فوق الصحن او في القدرة او دبشة انا نحبو بعصير القارص و الهريسة مممم )

[زينب 83]

المشاركة الأصلية كتبت بواسطة ،،ايمان،،

في ميزان حسناتك زينب اختي

انا نعرف الحريرة بما اني من الغرب و نعرف الجاري بما اني متزوجة من الشرق
مختلفين تماما ذوقا و شكلا
الجاري لازم اللحم عكس الحريرة متحتاجش اللحم بزاف يا رب جناوح لانه فيها الخضر كاملة و سر الحريرة هو راس الحانوت تع مغنية تلمسان
الحريرة تاعنا نحطو قطعة تع دجاج او لحم جزر ربع حبات مثلا طماطم حبة كبيرة بصل حبة كبيرة دبشة او القسبر بالزايد و بطاطا حبة طماطم معلبة و فقط نقلو في شوية زيت و حط التوابل ملح فلفلاكحل و راس الحانوت و زعفران و نضيف راس كامل ثوم
لما تطيب الخضر نرحيها بالبرا و نزيدلها شويا مى و ادا حبيتي ثقليها ثقليها بشوية ماء مذاب مغرف فرينة فيه
نضيف التشيشة الرقيقة و نزيد مغرف كبيرة راس الحانوت و نخليه يغلي حتى تطيب الدشيشة و نطفي
اهم سر من اسرار الحريرة هو راس الحانوت لازم
و الجاري راهم ذكروه الاخوات فقط جاريتع حماتي تقلي الفريك مع البصل و الطماطم و ديره بدون خضر بصل و طماطم و دبشة فقط

و انشاءالله نصورلكم الحريرة من مطبخ الوالدة

بارك الله فيك غاليتي
اذا ممكن تقولينا مكونات راس الحانوت تاع مغنية

[ذات النورين]

مساء النور
راني متاخرة كي العادةبصح ماعليش حبيت نفيدكم بطريقتي في الحريرة
انا ندير حبة بصل كبيرة مقطعت رقيق شوية ونص راس ثوم نفس التقطيع وشوية زيت زيتون ونحط فوقهم الدجاج او اللحم ونقلي مليح عاد نضيف التوابل اللي هي راس الحانوت الملح الفلفل الاسود والعكري الكبابة ووحيدة صغييييرة نجمة الارض وسكنحبير وشويييية قرفة وقصبر مرحي وكركم كي يتقلاو مليح نضيف وحبة كبيرة طماطم مقطعة صغيييرة وانا نحطها في ماء مغلي قبل ثم في ماء بارد من الحنفية باش يسهل عليا نزع القشرة تاعها ونزيد نقليها معاهم ونحبة جزر كبيرة مقطعة دوائر وحبة بطاطا متوسطة مقطعة مربعات وحبة كورجات ربيطة قصبر ومعدنوس نحطها معاهم ونحط شوية حمص في كيس غذائي معاهم ونضيفلهم كاس ماء نذوب فيه ملعقة كبيرة طماطم مصبرةونخليهم يتقلاو مليح عاد كي يحب الماء ينشف نزيد نمرق قد ما يتغطى اللحم كي يطيب اللحم ننزعو من القدر هو و ربيطة الحشيش وكيس الحمص ونرحي الخضار ونصفيها ونعاود نرجعها للقدرة مع الحمص بعد ما نكون نحيتو من الكيس
ونحط عليها مقدار من تشيشة مرمز مخلطة مع شويييية فريك تمد بنة رائعة ونخليها تغلي حتى تطيب التشيشة نحك عليها شوية نعناع يابس و نزيد دي بولات تاع اللحم المرحي متبل بالملح الفلفل وراس الحانوت وشوية قرفة وثوم مرحي وشوييييية بصلة مرحيةونطفي وبالصحة والراحة

[زينب 83]

اختي mosta سامحيني يمكن حذفتو من غير ماننتبه
حبيت نفهم برك يخي المرمز اصلا شعير كيفاش قلتي مرمز +شعير واشنو الاختلاف بيناتهم

[*آية*]

مرحبا اريد الانظمام اليكم
اريد اي وصفة تكون سهلة وبدون فرن

[آسيا 27]

مسا الخير حتى اليوم عاد شفت الموضوع رااااائع
رايحة نقولكم على الحريرة اللي نديروها احنا في الدار شهر رمضان كامل ما يقبلوش بغير الحريرة و لازم تكون بالبيض
الحريرة :
اولا نشمخو كاس تشيشة ما تكونش تاع المرمز ما نبغيش بنتها في الحريرة نديرو العادية البيضا نشمخوها باه ما تديش وقت في الطياب
و نشمخو ثاني حوالي 2 مغارف عدس نزيدوه كي نمرقو
في القدرة نحطو حبة بصل مقطعة -زوج و لا ثلاثة حبات زرودية - البطاطا ديرو حبة صغيرة ما تكثروش على خاطر هي ترجع المرقة بيضا كي تترحى - طرف صغير لحم او جاج - ورقة رند -
زيت و قلوها مليح من بعد زيدو زوج حبات طماطم رابي و مرقو قيس ما تطيب المرقة زيدو العدس المشمخ كمشة حمص مشمخ الملح زوج مغارف طماطم مصبرة مغرفة فلفل احمر غبرة مايكونش حار شوية زعفران كركم (عرق اصفر ) راس الحانوت فلفل اسود حبات كبابة ربطة كبيرة قسبر و عرف صغير كرافس و وخلوها تطيب
بعد ما تطيب المرقة تصفوها من الخضر و اللحم و نرحوها بالمكسور او الرحي اليدوية كيما تبغو و نحطو التشيشة و نخلوها تطيب من بعد شوفو اذا كانت خفيفة زيدولها مغرفة فرينة حلوها في فنجال ما بارد حلوها مليح باه ما تديرش كويرات
في الأخير جيبو حبة بيض و اخفقوها بالفرشيطة و إبداو تزيدو فيها للحريرة و هي تغلي بالشوية البيض راح يولي كيما الخيوط داخل فيها خلوها تغلي زوج و لا ثلاث دقائق من بعد طفو الناو و زيدو ربطة قسبر و رشة كمون و راس الحانوت و كاين عندنا و حد التوابل خاصة بالحريرة ما نعرفش مكوناتها بصراحة نشروهم مخلطين مع بعض مي ذوقهم امممممممممم نزيدوهم في الأخير
فتو اللحم او الجاج و زيدولها بعد ما تطيب انا ما نبغيش نزيدو
اللي ما يبغوش البيض يقدر يستغني على هاذي الخطوة
اااااه نسيت التوابل اللي قلتلكم خاصين بالحريرة اسمهم راس الغابة
يااااااي ما فقتش بروحي كتبت رواااااااااااااية
اذا لقيت عندي صور راح نحطها ان شاء الله نكون فدتكم و لو بشويه
زينب بارك الله فيك اختي على الموضوع المميز
[IMG][/IMG]

[IMG][/IMG]

[IMG][/IMG]

[آسيا 27]

المشاركة الأصلية كتبت بواسطة زينب 83

اختي mosta سامحيني يمكن حذفتو من غير ماننتبه
حبيت نفهم برك يخي المرمز اصلا شعير كيفاش قلتي مرمز +شعير واشنو الاختلاف بيناتهم

عندنا في الغرب كاين زوج انواع تاع التشيشة المرمز لونها يميل للأصفر و العادية اللي يكون لونها ابيض وكل وحدة تختلف على الاخرى في طريقة التحضير يعني المرمز الشعير يكون اخضر ما زال ما يبس كي يخدموه تشيشة مي ما يشبهش الفريك على خاطر يطيبوه و كاين بزاف مراحل في التحضير انا ما نعرفهاش صراحة و النوع الثاني يخلو السنابل تاع الشعير حتى تيبس و يخدموه
شوفي هاذي مرمز
[IMG][/IMG]
و هاذي البيضا العادية
[IMG][/IMG]
و هنا صورتهم مع بعض باه تشوفو الفرق في اللون و كاين فرق كبيييير ثاني في البنة
[IMG][/IMG]
موستا العفو منك اختي جاوبت في بلاصتك

[*أم سجى*]

موضوع رائع شكرا لكن .....حابة برك طلب ليكن أنه لي تفيدنا بوصفة من وصفاتها ياريت تعمق الشرح جيدا مع وضع الصور ان أمكن خاصة وأن الموضوع خصيصا للمبتدئات .....انشاله تاخذو طلبي بعين الاعتبار وشكرا لكل وحدة تحط كيفية أو نصيحة وعلى رأسهم صاحبة الموضوع أشكركن جميعااااااا

[أم سدرة]

مساء النور اخت زينب من فضلك حنونة الشربة تاعي في الترتيب 11 ماحطيتيش اسمي
علابالي ماشي بالعاني مشكورة

[زينب 83]

اهلين اسيا 27
شكرا على الشرح
حبيت نسالك الحريرة قلتي نصفيها من اللحم ووالخضر و مباعد ترحيها تسمى الخضر ماترحيهمش مع المرقة؟

[آسيا 27]

المشاركة الأصلية كتبت بواسطة زينب 83

اهلين اسيا 27
شكرا على الشرح
حبيت نسالك الحريرة قلتي نصفيها من اللحم ووالخضر و مباعد ترحيها تسمى الخضر ماترحيهمش مع المرقة؟

مسا الخير زينب
الحريرة اذا كنت رايحة تحريها بالمكسور لازم تصفي الخضرة و تحريها وحدها على خاطر اذا درتي الميكسور برا في القدرة تاع المرقة و و ارحيىتي ترجع بيضا و اذا بغيتي الرحى اليدوية ما كان لاه تصفيها ما تأثرت
ميرسي حبوبة على الموضوع

[زينب 83]

المشاركة الأصلية كتبت بواسطة آسيا 27

مسا الخير زينب
الحريرة اذا كنت رايحة تحريها بالمكسور لازم تصفي الخضرة و تحريها وحدها على خاطر اذا درتي الميكسور برا في القدرة تاع المرقة و و ارحيىتي ترجع بيضا و اذا بغيتي الرحى اليدوية ما كان لاه تصفيها ما تأثرت
ميرسي حبوبة على الموضوع

بارك الله فيك حبيبتي اسيا راج نجربهاوباذن الله عجبتني امممممم

[dima 08]