عائلة زوجي

[مشكلتي]

أنا متزوجة منذ 5أشهر,,,والله يا أخوتي راني في ضيق كبير يا ريت تفهموني وتعاونوني لأني تغميييييييييييت
أنا الحمد لله انسانة متواضعة و بسيطة لأقصى الحدود رغم أن الله من علي بالكثير من نعمه و الحمد لله
بعد العرس انتقلت إلى بيت زوجي الذي تقطنه والدته و أخته ... ما عنديش معاهم مشاكل لحد الان لكن راح يقتلوني بقلبي ..... والله صدقوني كاش نهار ننفجر منهم
هم يعاملوني معاملة في ظاهرها حسن لكن يرميولي المعاني بززاااف .. خاصة أمه راح نمدلكم أمثلة .... مثلا انا عائلتي على قد حالها فلم أحضر معي ذهبا كثيرا يعني تقدرو تقولو أقل من المتعارف عليه في منطقتنا حماتي تتخير وقت مانكون جالسة معاهم و تبدى تجبد على الذهب مع بنتها و تقوللها " لازم نزيدلك 20مليون باه تكملي المحزمة تاعك مالا راح تروحي لدار راجلك هاكاك بلا والو " و نفس الشيء على الملابس.. بنتها عرسها قريب كل مرة تخيط أفخر الملابس بأسعار كبيرة و تقيسهم قدامي و تقولي "علاه ما خيطتيش كيما هادي؟؟" و أنا نتحرج جداااا و نحس بضعف كبير أمامهم ..... نحسهم يهتمو كثيرا بالمظاهر و يحبو التكلف و التفاخر و أنا عكس هذا تماما
ممكن تحسبوهم ناس أثرياء لكنهم ناس عاديين ويحبو يتكلفو و يتفاخرو ... صراحة نحسهم تافهين جدا
مشكلتي الثانية أنو حماتي حست فيا نقص ثقة في النفس و هذا أمر نعترف بيه لأني مع دخلت عندهم و هم ينتقدوني و يحاولو يقللو من شأني .. ولات حماتي تتحكم في كل تفاصيل حياتي ..صدقوني في المطبخ راهي واقفة عند راسي و تسير في كلشي حتى طريقة خدمتي تنتقدها و في كل مرة ديري هك و ماتديريش هك ..... حتى وش نطبخ تتدخل فيه ماتخلينيش نطيب وش نحب راح تهبلني و الله راهي انسانة مزعجة لأقصى الحدود ... كيفاه ندير باه نوقفها عند حدها ؟؟؟؟؟؟؟؟؟؟
واللي افاض الكأس عندي هي البارحة عرضت أهلي للفطور ... وأمام أمي و أبي ناضت ترمي في المعاني و تقوللي" لازم تتعلمي تتعاملي مع الناس " وتحرج في أمي و أبي جالس و هي ترفع في صوتها و تقول لزوجي " جارنا توفى أنا نعرفو ملييح و كان يجيني للخدمة" و أبي محافظ يعني ماكانش داعي تقول الكلام هذا قدامو أحرجتني أمام أهلي كثيييراا ...... أنا الان راح ننفجر و مادرت لا قاطو عيد لا والو لأني علابالي راح تجي عند راسي و أنا كرهت
ساعدوني كيفاه ندير باه نفرض شخصيتي في هذه العائلة ... أنا مانيش طايحة من قيمتي الحمد لله جامعية و قررت البقاء في البيت حفاظا على ديني لكنني مهزوزة الثقة بالنفس الان
كيفاه نتعامل معاهم راني حكيتلكم كامل التفاصيل و عذرا على الاطالة قلبي راه معمر

[hodayena]

انتي صراتلك كيما انا مي انا مخليتهاش تتحكم فيا وهذا الي زاعجهم مني وراهم يساعدو في وليدهم باه يطلقني وهو كي الحمار يتبع لانو طلبت سكن وحدي قتلو ابنيلي في الدار عندهم ليتساع والحمد لله مارتلهم والو حتى الابتلاء الي راني فيه جاني بخذعة جيت لدارنا في نية الله حتى وليت في قضية طلاق مع زوجي الي كنت دايما نعتبرو وليدي
الحل ديري واش يقولك راسك خليها تهدر وانتي اعملي واش حبيتي بلعقل تتوالف وخليهم يهدرو انا تاني كانو يهدرو كيما انتي مجبتيش حوايج مي سكت وخليتهم

[soufianebac]

الأخت الكريمة

أولا الصبر من شيم المرأة الفحلة

ثانيا حاولي تتكلمي معى الزوج لكي ينقص هذه المذايقات عليك

ثالثا فيما يخص إحراجك في المال أي سءال يطرح عليك مثل اللباس قوليلهم بلي مدرتيش كذا لأنك لم تستطيعي ماديا ... يعني بدون حشمة لأن هذا شيء عادي

مفتاحك هو الصبر لأن البنت قريبا تتزوج و الأم معى الوقت تولي عادي معاك

[الزمان 03]

في بداية الزوج تكون مشكلة إعادة توزيع السلطة في البيت لهذا لاتدخلي حرب السلطة بقدر من البحث على أن تمر السنة الاولى على الاقل والتي هي سنة لتعارف أكثر منها سنة لفرض الشخصيات او الآمور

[أناييس الربيع]

أختي مشكلتك هي مشكل تقريبا جميع المتزوجات حديثاً

لأنك في بيتك لم تتعودي ع عقلية المعاني والتي لا يخلو

بيت منها ،لازم تكبري قلبك وتلزمي الصمت وطبقي سياسة التجاهل

سمعت وماسمعتش وإياك تعاودي لزوجك أو أحد مقربين عائلة زوجك

عن المعاملة آلتي تعيشها ،ومع الوقت رايحة تندمجي وتوالفي العقلية

وتولي تمعني كيفهم ههههه ،

بالنسبة لتدخل عجوزتك في الطبخ وأمور المنزل شيء طبيعي ،فهي

تعودت ع نظام معين في بيتها ويصعب عليها تقبل أي جديد منك

حتى الطبخ وان كنت تجدين سيبقى طبخها الأفضل وعليك تقبل الامر

ومن ناحية حاولي تتعلمي نظامهم وحتى طريقة طهي نتاعهم ،حتى

يوالفك من ثم لك أن تفرضي أراك ووجودك مع الوقت

حاليا لا تحاولي تجاوز سلطة حماتك في البيت حتى لا تشعر انك

تنافسيها في حب أفراد عائلتها .

ومن ناحية تعايرك بالماديات كوني صريحة وخلاص

وربي يهنيك ويسعدك

[بنت لبحر]

السلام عليكم


اختي لازم تكون واثقة في نفسك وجامي تبيني انك حشمانة انك مجبتيش من داركم .و داركم الله غالب عليهم لكان جات بيديهم راح يبعتوك بافخر الملابس و يلبسوك الدهب مي مجاتش قي القش و الدهب المهم الهناء

مديريش على كلامهم و و جامي جامي تحسيهم بنقص

هدا هو حال المجتمع تاعنا و كيما يقول المثل المصري ديري ودن من طين و ودن من عجين و كانك مسمعتيش .

ربي يهنيك في دارك و مع راجلك هدا هو الصح

[نورسين.داية]

السلام عليكم

عزيزتي مسألة الجهاز ....و واش جبتي ...و الدهب درتي و لى لا ......خلي يحكو كيما يحبو .....و قوليها مباشرة ....كل ما زاد عن حده إنقلب الى ضده ...و لا يكلف الله نفسا إلا وسعها ............و انا هذا واش نقدر ....و لي ما عجبوش الحال يضرب راسو على الحيط ......و قومي من المجلس ...كانه لا يوجد شيئ يعني قتليهم بالبارد .......
و كنصيحة عزيزتي لو تطبقينها في حياتك سوف تتجنبين الكثير و الكثير من المشاكل ....قللي قدر ما تستطيعين ...الإجتماعات العائلية ......صقيني كلام و نقاش لا فائدة منه ......................و شخصيا النقاش الذي لا أصل منه فائدة .......و الله ما نبقى فيه ......و لي يقول متكبرة ...يدبر راسو ............

لكن مسألة المطبخ ......: هل أنتي تتقنين عمل المطبخ أم لا ............يعني عزجتك .لو لم تلاحظ نقائص في عملك ....لما إنتقدتكي ....أنا لا أسس قاعدة عامة لكن ...مجرد رأي فقط ....
و إلا قولي لها مباشرة.....مانحبش لي يعوني في المطبخ ....و كوني صارمة .و لبقة في نفس الوقت ........

لأنه الصراحة خلافات مثل هذه شخصيا لا أستطيع نقلها للزوج حتى يحلها ........راح يعتبرني أنا عقليتي صغيرة ....و اخلق المشاكل ......فطبقي نفس سياسة أهل زوجك ............كلشي تحت الطاولة ..............أنا هذا رأي
أعلم أنه لن يعجب البعض أو بالأحرى الكثير ...........لكن هذا هو الواقع .................الله غالب ههههههههههه

[أم مهدي و اسلام]

صح صيامك
شوفي نقولك فقط باللي ما كانش اللي راهي متهنية 100% لابد كاين حاجة تعكر عليها صفو الحياة
مشكلتك تتحل لما تضعي حجم الثقة المناسب في نفسك
ما تخليهمش يحسو باللي راكي تشوفي روحك اقل منهم ماديا طبعا بالعكس خليهم يحسو باللي راكم مرتاحين و قانعين بالقليل اللي عطاكم ربي و كي تهدرلك مثلا على الذهب او الحوايج او ما شابه ...احتقري هده الماديات باسلوب ذكي ....نعطيلك مثال من واقع حياتي الشخصية على خاطر فتت باشياء مشابهة معك فيما يخص الذهب كانو يقولولي خواتات راجلي و حماتي امك ما علماتكش حسن التصرف و الا ما لحقوكش الدراهم كنت نرد و ببساطة انا ما نحبش الدهب و مش هو اللي راح يعطيني الصحة و الا اللي راح يبنيلي قصر في الجنة ....شحال نكره النسا اللي يضلو يجرو مور النحاس الاصفر يولو تقولشي محاربين من كثرة ما يولو لابسينو اعععععععع.... و هكدا يجو ينارفوني انارفيهم انا و ببرودة تامة
اما بالنسبة للكوزينة تماما كيما جاوباتك الاخت اناييس الربيع هدا امر عادي بصح ما تخليهاش تتجاوز حدودها و باسلوب لبق و برودة اعصاب انا لما كنت عروس عجوزتي قالتلي طيبي الشربة و خدمتها و بلا زوخ كل من يعرفني يعرف باللي نطيب مليح ..امالا هي وش دارت كبت لي الطبسي في حجري و قالتلي ارفدي عليا احنا ما نديروش البصلة في الشربة هدا حال اللي يطلق دارو في يدين البنات يلعبو بيها !! صح هديك المرة بكيت حتى شبعت بصح كي زادو انتقاداتها على حدهم وليت نقولها ارواحي انت اخدميها انا ما نعرفش ولادتك كيفاش يحبوها و الا اللي حب ياكل ياكل و اللي ما حبش يشري كاسكروط ....و الا هدا ما عندي و دايما نقولها و انا في تمام البرودة و نكملها بضحكة و ادا زعفو و الا ..نقولهم يا حي ما تقولوليش ما تعرفوش التمسخير من الصح ادا كنتو تحسبوها صح معناتها راها صح هاهاهاهاها .....و الا قوليلها ما يكون الا خاطرك اقعدي قابليني و وريلي كيفاش حتى توالفك و توالف خدمتك و في الاخير في ديك الدار يهمك راي زوجك فقط لا غير حاجة يحبها ديريها و خلاص

ناس كيما هاك يليقلهم سلاح من النوع الثقيل و هو البارد ...اقتليهم بالبارد فقط لا غير
و ناس بكري قالو " اللي يضحك عليك اضحك معاه" و لهي روحك بحوايج وحد اخرين تعرفي تديريهم و خاصة قراءة القرآن
اسمحيلي طولت عليك بصحك لسعتك جديدة استقواي من ضرك سينو يعفسوك
اكثري من الاستغفار و ربي معاك

[samira135]

المشاركة الأصلية كتبت بواسطة نورسين.داية

السلام عليكم

عزيزتي مسألة الجهاز ....و واش جبتي ...و الدهب درتي و لى لا ......خلي يحكو كيما يحبو .....و قوليها مباشرة ....كل ما زاد عن حده إنقلب الى ضده ...و لا يكلف الله نفسا إلا وسعها ............و انا هذا واش نقدر ....و لي ما عجبوش الحال يضرب راسو على الحيط ......و قومي من المجلس ...كانه لا يوجد شيئ يعني قتليهم بالبارد .......
و كنصيحة عزيزتي لو تطبقينها في حياتك سوف تتجنبين الكثير و الكثير من المشاكل ....قللي قدر ما تستطيعين ...الإجتماعات العائلية ......صقيني كلام و نقاش لا فائدة منه ......................و شخصيا النقاش الذي لا أصل منه فائدة .......و الله ما نبقى فيه ......و لي يقول متكبرة ...يدبر راسو ............

لكن مسألة المطبخ ......: هل أنتي تتقنين عمل المطبخ أم لا ............يعني عزجتك .لو لم تلاحظ نقائص في عملك ....لما إنتقدتكي ....أنا لا أسس قاعدة عامة لكن ...مجرد رأي فقط ....
و إلا قولي لها مباشرة.....مانحبش لي يعوني في المطبخ ....و كوني صارمة .و لبقة في نفس الوقت ........

لأنه الصراحة خلافات مثل هذه شخصيا لا أستطيع نقلها للزوج حتى يحلها ........راح يعتبرني أنا عقليتي صغيرة ....و اخلق المشاكل ......فطبقي نفس سياسة أهل زوجك ............كلشي تحت الطاولة ..............أنا هذا رأي
أعلم أنه لن يعجب البعض أو بالأحرى الكثير ...........لكن هذا هو الواقع .................الله غالب ههههههههههه

شحـــــــــــــــــــــــال تعجبيني

رأيي من رأيك خيتو

"إذا عرف السبب بطل العجب" إنتِ عارفة سبب المشكل نتاعك "الثقة بالنفس" ،، خلي شخصيتك قوية وتعاملي معاهم بحدود مدام عقليتهم كما هاك .....ربي يعييينك خيتي

[bellaluna]

بالنّسبة لجهازك و بساطة ما جلبت معك فلك حلّين إختاري بينهما:
1- أن تتغافلي عن كلّ ما يُقال لك و الكلام يدخل الأذن اليُمنى ليخرج من الأذن اليسرى.
2- أن تردّي بالمعنى كما هم يخاطبونك بالمعنى و تلمحي لحوادث مزعجة..مثال : خاطبت هي إبنتها عن الذهب و الجهاز و عليها أن تذهب لبيت زوجها بأعزّ المقتنيات فتتحدّثي أنت ببساطة عن عروس جديدة ماتت صبيحة عرسها و بقي جهازها كما هو عليه مغلّف و لم تفرح و لم تتهنّى و لا يوم به..

بالنّسبة للمطبخ حاولي أن تتغافلي عن إنتقادها و في الآن ذاته حاولي التعلّم إن كانت تنقصك المهارة و إن رغبت في المزيد عندما تدخل المطبخ إفعلي مثلها و طبّقي ما تقوم به معك، لعلّ الرّسالة تصلها.

بالتوفيق في حياتك الأسرية.

[first first]

يااختي.ناقصةني الخبرة باش ننصحك.....................لكني على يقين اننو السنة اولى زواج .اديها في الصبر وفي فهم العقليات...................................وبخصوص احراجك.ماعليهش .اكي بالطولة توالفي وتعودي نتي تاني تردي الصرف المحترم ولي يحفضلك كراماتك ويسمطلهم الاحراج لي يديروهولك
شوفي اختي.........الانسان يتقاس باخلاقو وافكارو..والله انا لو نلقى انسانة متربية تدخل لدارنا....ياربي ماتجيب حتى شلتوتة.
هدي كامل تفاهات.....وعدم القدرة المالية ليست عيب.
نصيحتي الثانية...........انت ماتقدريش تتحكمي في حماتك وكلامها ...مي تقدري تتحكمي في افكارك واعصابك..................خليها تحكي على الدهب....وديري روحك غير معنية........كي تسميك باسمك نتم ردي......................وعلى الخدمة تاع الدار نقولك.....النساء ربي يهديهم...والله مكان مااتفه من الطبخ والخدمة تاع الدار..وكل وحدة تحط روحها فهيمة وهو ماكاين والو.انتي ساعة ديريلها رايها وساعة افرضي رايك...........والعام يفوت................من بعد وحدك تلقاي حلول.
ماتحرقيش اعصابك.

[feuilleblanche17]

اول حاجة لفتت انتباهي انوا ابوك و حماتك يشوفوا بعض و ياكلوا مع بعض!!!!!!!!!!! ياك قلتي عائلة محافظة
بالنسبة للمشكل نتاعك متعطيهمش قيمة و ارميهم في الثقيل

[جويرية الإيمان]

أنا نظن هاذي الأمور عادية كي تصرا بين العجوز و الكنة

بصح الأهم أنو الوحدة تعرف كيفاش تتعامل مع الوضع

مرة الواحد يعقب و مرة يرجع بذكاء و مرة يدير روحو ما سمع والو و هكذا

و كاين مثل يقلك دير روحك اعور في بلاد العميان .

أنا نهار تزوجت و ساكنة وحدي ماشي معاهم

عجوزتي هدرت حتى على لون روبة نتاع الحنة قاتلي نورمالمو يكون لونها وردي مش كروفات (هوما يموتو على الون الوردي)

و علقت حتى على كيسان التاي لي حطيناهم في العرس

بصح أنا سكتت و خليتها و بشوي بشوي ولات تحترمني مع أنها ساعات تخرجلي خرجات كبار

بصح نرجعلها بكل أدب و الحمد لله أنا أخوات زوجي معاي .

انت كبري قلبك و ما دري فيه والو راها تتفر غير في صحتك

[nedjema amirazed]

كلشي يفوت ختي انتي ديري واجبك و اسكتي الصبر برك ربي يفرج ان شاء الله الدنيا تدور تغر و تمر الطفلة رايحة تتزوج و تقعدي مع عجوزك دريها كيما يماك هدا واجبك مع الوقت تشوفي كفاش تولي تعاملك خير من بنتها متخليش الشيطان يدخل بناتكم
صح فطوركم

[pomaria_aindefla]

لإكتساب الثة بالنفس شوفي روحك في مرأة و قولي أنا فلانة أحب ربي و أحب راسي معناه نفسي كريرها يوميا
بالنسبة للطبخة هذا حال العجايز يبخوا أنك تطبخي كيفهم ديري روخك ما سمعتيش و خلاص و على الحوايج سمعي و سكتي راهي طفرت دوك راكي متزوج و لي كتب راكي درتيه من ذهب أو لباس و كل واحد يلبس قد حالوا خير من الدين و مبعد يتقطع و لا يصغار و سعي بالك وديري روحك ما سمعتيش