قصيدة العنقا نموذج للهجة العاصمية العربية ليس فيها و لو كلمة فرنسية واحدة

[منشار]

قصيدة سبحان الله يالطيف للمرحوم الحاج العنقى

زغلول لطيف يا عريف * نحكي لك و افهم * في سن الورد والزهر باهي الأوصاف
مغرور بريشه الظريف * ماجي متخاصم * سلسيفه قال لي عندي خلاف
أوقف إذا أنت شريف * من أهل الخاتم * وريلي وين وصلاتك قوة الأكتاف
جاوبت أنا وقلت كيف * ماجي تتكلم * بكلام الغيظ واش هذا الغضبة و زعاف
ما هيشي جابها النيف * كي جيت محزم * هذي غيرة مرزمة و حسودي بزاف
ضنيتك صاحبي حليف * بي تتزعم * و ترن هقيتلي مطامر تدي للكاف
حتى و إذا أنت سخيف * من حقك تحشم * تعرفني قاطع البحور جايل الأرياف
عساك أنت اللي قصيف * للدنيا قادم * مثل كما عاش ما زهى أش اللي شاف
اللي زغلول ما ينيف * ورشان معلم * قادريرحيه في حروف ألها لام و كاف
مرقوم الريش يا رهيف * أرجع لا تندم * عندك منقار ما يحارب و جناح ضعاف
أترك الحديث العنيف * ما هوش موالم * أترك عليك لغة الغتبة و التشناف
يا ذا الزغلول يا نحيف * أرجع للمرسم * واللي بعتوك قول لهم ما همش ظراف

سبحان الله يا لطيف * أنت اللي تعلم * كاين شي ناس من استحاهم يقولوا خاف
حاسبين كل شي خطيف * غير أجي و زدم * واللي يبقى مع التوال يقولوا زحاف

كاين اللي يجي بسيف * يبدأ يتزعم * و يقول أنا غير أنا ما كان خلاف
خصوص إذا أنت سعيف * تسكت و تسلم * ترجع في حينها حلاسة و إلا نشاف
كاين اللي يجي تقيف * يعرف يتكلم * بالكتوب و الرسول و السادات الأشراف
يخدعك غير بالحليف * يقسم و يعظم * والسبحة راه من وراها عامل زرناف
كاين اللي يجي لهيف * بنيابه يهضم * مارواته ميات صحفة و ألف غراف
يبغي كرسي من الصديف * و كنوز العالم * اللويز و الماس و الفضاضي من كل أصناف
كاين اللي يجيك ضيف * بالقش مرزم * في يوم البرد و الشتا و الريح الزفزاف
فاتت الأمطار و الخريف * ما زال مرسم * يرجع هو مول دارك و أنت جحراف
كاين اللي يجيك عفيف * ما زاله يحلم * ذقنه ما زال ما عرف موس الحفاف
يرجع ضربان لا تصيف * زقطي متشلغم * باعك و شراك في دقيقة عند الحراف

سبحان الله يا لطيف * أنت اللي تعلم * كاين شي ناس من استحاهم يقولوا خاف
حاسبين كل شي خطيف * غير أجي و زدم * واللي يبقى مع التوالى يقولوا زحاف

لحمام إذا نسى الولفة * من بعد الحب والشغاف
خلاني في الأحزان و جفى * من دون دواس لاخلاف
هذا تحقيق به شوفة * شكيت داروا لها الثقاف
الباز إذا غاب صدفة * يهجر و يروح للتلاف
خلاها خالية الغرفة * من ذاك اليوم ما أنشاف
ضنيته صاحبي و يشفا * و ترن ثعبان في الاجواف
عيب عليكم عار كشفة * يا أهل بلادي ياسخاف
درتوها مرتبة و حرفة * نكرتوا الخير والصناف
سومتكم ما سوات علفة * في سوق السبت والجياف
ما هي صحبة و لا معرفة * ما هي نسبة و لاحلاف
كيفاش القلب عاد يصفى * كي قطعتوه بالاطراف
من يتبعكم راح في الفا * و الرا المسبقة بقاف
يا ضيف الله جوز تدفى * رد سلامي لا تخاف
ياك جينا نايضين شرفا * والله ما نخيبوا الضياف
اجلس هنا بغير كلفة * انزع عليك ذا اللحاف

سبحان الله يا لطيف * أنت اللي تعلم * كاين شي ناس من استحاهم يقولوا خاف
حاسبين كل شي خطيف * غير أجي و زدم * واللي يبقى مع التوال يقولوا زحاف

يحسبوا الشيخ ما يفيد * عدوه يخرف * مابين الصبح و العشية و الناس تشوف
يحسبوا الشيخ ما يفيد * عدوه يهترف * قالوا سيفه رشى حفى
و الشيخ أ سامع القصيد * ما زاله يهدف * سيفه براق فالثنية ديما معروف
يحسبوا الشيخ ما يفيد * كالثور الشارف * ارحاو الموس في الخقا
و الشيخ أ سامع القصيد * ما هوش مكتف * ماهوش غنيمة الضحية ما هوش خروف
يحسبوا الشيخ ما يزيد * شملاله يوقف * كيفما عملوا ما كفى
و الشيخ أ سامع القصيد * يسكت و يساعف * راهي ما خفات له خفية كل شي مخلوف
ماني محساد لا جحيد * عمري ما نسخف * نمشي و نعيش بالصفا

سبحان الله يا لطيف * أنت اللي تعلم * كاين شي ناس من استحاهم يقولوا خاف
حاسبين كل شي خطيف * غير أجي و زدم * واللي يبقى مع التوال يقولوا زحاف

غنيت شحال من قصيد * منظوم مستف * و الناس جميع عارفة
فني ما هوش مالمسيد * مانيش مثقف * قراني الجوع و الحفا
خبزي مصنوع من سميد * ماهوش مسلف * داري ماهيش تالفة
يشهد القريب و البعيد * ما نيش موالف * نهدر و نقول في القفا
عظمي ماهوش للكديد * مانيش محشلف * أرضي ماهيش ناشفة
الصيد يموت ياك صيد * و لو كي يشرف * منه الذياب خايفة
اللي مقيود ما يقيد * يشد المقذف * في وسط رياح عاصفة
مول المنظوم و القصيد * ما هوش مطرف * من أهل الصدق و الوفا
ولد باب جديد بالوكيد * ببير جباح نحلف * التومي قال مصطفى
و اللي غناها عميد * فيها يتصرف * الشيخ العنقا اذا كفى
عام السبعين لا تزيد * من بعد الالف * والتسع ميا مردفة
الجزاير عهدها جديد * سنجاق يرفرف * تميت و قلت بالشفا

سبحان الله يا لطيف * أنت اللي تعلم * كاين شي ناس من استحاهم يقولوا خاف
حاسبين كل شي خطيف * غير أجي و زدم * واللي يبقى مع التوال يقولوا زحاف

[منشار]

الملاحظ في هذه القصيدة أنّ كل كلماتها عربية أصيلة ليست مختلطة لا بالفرنسية ولا بالتركية ولا بالأمازيغية ..

[mohamed nadim]

قصيدة من أروع ما يكون

خاصة بأداء المرحوم

كلام موزون

وحكم كثيرة

للعلم فقط المرحوم العنقا قبائلي من أزفون

و أزفون معروفة بالأشراف المرابطين

وهم محافظون جدا الى يومنا هدا

كلام عربي فصيح

الشعبي كله هكذا

لا ندري كيف تسرب المسخ الينا

سومتهم ما سوات علفة * في سوق السبت والجياف
من يتبعهم راح في الفا * و الرا المسبقة بقاف

[منشار]

شكرا على اضافتك القيمة و أعرف أنّ العنقا من بلاد القبائل ..

لكن العجيب الذي اثار انتباهي هو أنّ الجزائري الأصيل قبل 40 سنة فقط كان يستطيع أن يتكلم كلاما طويلا عريضا لا توجد فيه كلمة أجنبية

على عكسنا اليوم لم نعد نفهم حتى لهجتنا الحقيقية و لا نستطيع أن نكوّن جملة بسيطة بها

[mohamed nadim]

المشاركة الأصلية كتبت بواسطة منشار

شكرا على اضافتك القيمة و أعرف أنّ العنقا من بلاد القبائل ..

لكن العجيب الذي اثار انتباهي هو أنّ الجزائري الأصيل قبل 40 سنة فقط كان يستطيع أن يتكلم كلاما طويلا عريضا لا توجد فيه كلمة أجنبية

على عكسنا اليوم لم نعد نفهم حتى لهجتنا الحقيقية و لا نستطيع أن نكوّن جملة بسيطة بها

أنا معاك يا اخي

و مازال الشيوخ الكبار الى يومنا هدا عندما يتحدثون اليك بنفس هاته اللهجة

انظر فقط الى الافالام الجزائرية القديمة

لكن لمن تقرا زابورك ياداوود

السياسة اخلطت كل شيء حتى اصبح المرء يسمح في دينه لسبب خلاف سياسي