وصفات حراير الكوزينة الجزء الثاني

[عقليةdz]

يشهيو يعطيك الصحة

[idron0]

طاجين الشواء ام مؤمن

إضغط هنا لرؤية الصورة بحجمها الطبيعي.

هذا طبق تقليدي قسنطيني نديروه في الاعراس و الطهور و المناسبات

يلزمك طرف لحم غنمي او بقري هبرة يكون مليح و معاه فخد او صدر دجاجة اذا كان اللحم مشحم حطيه في مقلة من دون اية اضافات و قليه على نار دليلة او بمعنى اشويه لهذا نسموه طاجين الشواء فقط حمريه قليلا باش ياخد طعم الشواء

في قدرة حطي اللحم و الدجاج تضيفي عليهم حبة بصل متوسطة الحجم مفرومة 2 سنينات ثوم شوية سمن او زبدة و شوية برك ملح و فلفل اسود و قطيرات ماء و قليهم مليح على نار هادئة حتى يدبال البصل مرقي ب 2 كيسان ماء و خليهم يطيبوا في عقلهم اللي تحب توابل اخرى تقدر تضيفها انا نحبو تغلب عليه رائحة اللحم و بنتو مانكثرش التوابل
و جهزي لحم مفروم دوزنيه مليح شوية بصل و ثوم و ملح و فلفل اسود و معدنوس و بيضة و شوية شابلير او غبرة تاع الفريك و ديريه بولات كبار و ارميهم يطيبو مع اللحم

كي يطيب اللحم نتاعك مليح نحي الجاج اذهنيه بشوية زبدة و ملح و حمريه في شوية زيت في مقلى او حمريه في بلاطو تحت شواية الفرن

و كي تعقد المرقة طفي النار و اعصري حبة قارص و غطي القدر

عند التقديم ستفي اللحم و الدجاج و بولات الكفتة و اسقيهم بشوية مرقة و زينيه بمعدنوس و قارص و شهية طيبة.

[idron0]

كيش بالعجينة المورقة بحشو السلق و اللحم المفروم
ام مؤمن

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.


اطرحي العجينة على قد المول نتاعك متوسطة السمك و تكوني حضرتي الحشو اللي هو

سلق طايب انا غسلتو و خليتو قطر مليح و حطيتو في قدر و ضفتلو حبة بصل مفروم صغيرة و 2 سنينات ثوم حبة طماطم رابي و ملح و فلفل و شوية زيت و نص كاس ماء و خليتو على نار خفيفة حتى طاب و تقريبا نشف او طيبيه بطريقتك

شحطي شوية لحم مفروم في ملعقة زبدة و خليه يطيب في الماء اللي يطلقو و ملح و فلفل و ثوم و ضيفيه لخليط السلق

و ضفت مع السلق و اللحم المفروم قطعة جبن شاف ذوبتها في نصف علية كرام فراش خلطي كلش و دوقي الملح اذا محتاج و احشي بيه الطورطة

شكلي بالعجينة شرائط طويلة قصيها بالجرارة و ديريها كيما الخلية او الشطرنج و زينيها بورود صغيرة من العجينة و اذهنيها بصفار البيض و طيبيها.
ملاحظة: العجينة كي طرحتها في الصينية خليت الجوانب و احشيتهم بالجبن الطري و رجعت العجينة للداخل و بعدها وضعت الحشو .

[idron0]

معجون المشماش ام سراج و ملاك

انا نطيب زوج انواع نطيب لي يجي بالمشماش هذا حنا نقولولو البيضاي
هاهي صورتو


إضغط هنا لرؤية الصورة بحجمها الطبيعي.


نطيبو كيما هكذا اول حاجة نغسلو مليح وندخل مغرف صغيرة ونحي القلب وكاين لي يطيبو بالقلب انا منحبش نطيبو بالقلب خطراه نخاف يكون مدود ندير كل زوج كيلو مشماش بكيلو سكر ونخلي المشماش يبات في سكر نتاعو وفي الغد نطيبو على نار قليلة خلاص ومنحركوش باش يبقاو الحبات مجمولين يطول في طياب خطرا هالنار ناقصة خلاص باش ميتحرقش لللاسف مطيبتوش خطراه معندي حاجة فيه بصح ضك نحطلك الصورة نتاعو اختي طيباتو كي نروحلها نصورولك ان شاء الله

اما المشماش العادي نغسلو ونحيلو لقلوب وندير كيلو سكر بكيلو مشماش باش ميفسدش المعجون ويبقى حتى لعام الجاي ومنحطوش في المجمد نديرو في بلارات عادي ونغلقهم مليح ونحطو في الثلاجة عادي وكاين حتى لي يحطو برة وميفسدش انا صراحة منحطوش نخاف دايما نخليه خاطي في الثلاجة من تحت آخر بلارة نتاع معجون من العام لي فات مديتها كي شفت المشماش وجد ومصرالها والو وخدمت حتى القاطو بيها نكملك ندير كيلو مشماش بكيلو سكر نخليهم يباتو في السكر نتاعهم في الغد نحطهم فوق النار على نار هادية ونخليهم يطيبو يطولو انا لي درتو ليامات لي فاتو دارلي في طياب نهار كامل ومنين ذاك نحرك متخافيش ميلسقش بصح النار ناقصة خلاص وزدت درت فيه فنجال ماء الزهر وفنجال ماء وخليتو حتان ولا لونو كيما لي في الصورة انا هكذاك نحبو يجي لونو كيما الكرامال وريحة ماء الزهر تجي فيه روعة والطعم اروع اذا حبيتي لونو احمر عادي كيما لي يتباع طفي عليه


إضغط هنا لرؤية الصورة بحجمها الطبيعي.



إضغط هنا لرؤية الصورة بحجمها الطبيعي.


حقا حبيت نقلك حاجة انا ساعات نطيب المشماش عادي ومنخليهش يطول في طياب كيما العصير بصح منصفيهش نحطو يبرد ونديرو في صاشيات والى المجمد وكي يكون المعجون خلاصلي نجبد صاشي نحطها حتان يروحلها التجميد ونديرلها السكر كيلة بكيلة نكيل باي حاجة نفس الكمية نتاع المشماش سكر ونحطها طيب عادي وتولي معجون خطراه ساعات تكون عندي كمية كبيرة بزاف من المشماش ومنقدرش نديرها اكل معجون ندير هاذي الطريقة هايلة ومعجون نتاعها يجي هايل.

[idron0]

المايونييز lyzzabel

نعطييك طرييقتي ندييرها من بكريي و تجي كيما leusieur
فالبوول تااع اابرا ميكسوور نديير حبة بيض كااملة بدرجة حراارة المطبخ و م ك موتاارد و م ك خل و رشة صغييييييرة ملح و رشة صغييرة سكر و كااس او اكثر تااع قاازووز زييت و نحط البرا و نمييكسي رااهي تم تم تطلع و تشد رووحهاا ،، تقدري تضييفي عصرة ليموون و تزييد تمييكسي ،، و الكثاافة كيما تبغييها تقييلة ولا شوية خفييفة زيدي الزييت ولا نقصيي ،، تتحصلي على مايونيييز من اررروع ما يكوووون.

[amoulayasmin]

يعطيكم الصحة

[idron0]

غراتان لمبطن ام سراج و ملاك
شوفي تغلي حبات بطاطا نتي واش حبيتي قشريهم وقطعيهم وغليهم وطبعا شوي ملح كي يطيبو امرسيهم بفرشيطة مع خمس حبات فرماج وشوي ثوم ومعدنوس مقطع رقيق وحطي كمية من لحم مرحي نئ يعني متقليهش خطراه يطيب في الفرن الكمية لي تحبيها ومعاهم 2 بياض بيض ادهني صينية لي رايحة طيبي فيها بشوي زبدة وشوي زيت حطي كعابر مسامين بعضاهم في صينية ودخليهم للفرن يطيبو كي يطيبو تكوني وجدي صلصة البيشامل وزيدي فيها 2 صفار بيض وزوج سنات ثوم ومعدنوس مقطع رقيق لداخل وحطيها فوق البطاطا وذري فرماج رابي من فوق ورجعيها للفرن من فوق برك يطيب .

[idron0]

طاجين المشماش او طاجين الخوخ ام سراج و ملاك

شوفي اول حاجة نديرو مرق ابيض بصل وشوي لحم او دجاج وتوابل فلفل اسود وشوي زغفران او راس الحانوت وشوي ملح وزيت وشوي حمص كي تبدا تطيب لصوص نتي تكوني وجدتي فيونداشي ديري فيه شوي ثوم مرحي وملح وفلفل اسود وبيضة انا ساعات ندير شوي بيض على حسب الكمية نتاعك قادرة بيضة تكون بزاف خطراه لفيونداشي كي تلوحيه في المرقة الحبات يكونو صغار هاذوك هوما لقلوب ههههه نكملك كي تغلي المرقة نتي ديري كعابر صغار نتاع اللحم مرحي ولوحيهم في المرقة ومن جهة تكوني غليتي البطاطا امرسيها وديريلها شوي ثوم وشوي زعفران باش يجيو حبات المشماش لونهم اصفر وفلفل اسود وبيضة نحي الفيونداشي من المرقة وشدي شوي بطاطا وحطي فيها حبة الفيونداشي ودوريها بيدك ومرمديها في الفرينة كي تكملي الحبات كامل اقليهم في الزيت يجي لونهم اصفر ذهبي وشدي زوج ورقات معدنوس يكونو صغار حطيهم فوق الحبة كيما شكل المشمش حطيهم في طبسي وكي تحبي تقدميهم فرغي فوقهم لصوص تكون خاثرة مع الحمص وشبحي الطبسي نتاعك بالقارص ومعدنوس مقطع رقيق حقا حبات البطاطا متكبريهمش صغريهم قد حبة المشمش .

[idron0]

كيكة الشيكولا والكابريس كراميل وداد ام محمد

فنجان سكر +فنجان حليب+فنجان زيت +2مغارف كبار كاكاو+بيضة+فنجان فرينة وشوية+نصف كيس خميرة +2مغارفكبار نيسلي +حبات كابريس كراميل
الطريقة تخلطي سكر وزيت ولحليب والكاكاو بالميكسار ومبعد تنقصي نصف فنجان من الخليط وتزيدي البيض والفرينة والخميرة والطيبيها
وتذوبي الكابريس في النيسلي وكي طيب تزيني الخليط نتاع الشيكولا والكراميل
ملاحظة:القطرنتاع المول 24على 24

إضغط هنا لرؤية الصورة بحجمها الطبيعي.

[idron0]

الباتسري ام سراج و ملاك

5 بيضات + كاس سكر احرش + كاس فيه نصف زيت و نصف زبدة ذائبة + 4 مغارف ماكلة عسل + 2 مغارف كبار خل + 2 مغارف كبار نيسكافي مذوب في شوي ماء + 4 مغارف كبار كاكاو اذا كان الكاكاو غامق نقسي الكمية ديري زوج مغارف برك+ كاس ونصف فرينة + 2 باكيات خميرة نتاع القاطو
الكريمة : 250غ زبدة + 2 كيسان سكر ارطب + 2 صفار بيض + فاني وتطلعيهم بالبتار مليح
او ديري كيما ندير انا وتجي بنينة
نخدم كرام بتيسيار نصف لتر حليب نفيضو ومن جهة نخلط 2حبات بيض مع 4مغارف كبار سكر عادي حسب الذوق نتاعك اذا تحبيه حلو بزاف زيدي السكر وزوج مغارف كبار نشاء ومغرف فرينة ونظيفهم للحليب الفايض ونخلط مليح ونرجع فوق النار كي يخثار نزيد لفاني ونحطو يبرد
من جهة نطلع بالبتار 100غ كرام شونتي مع كاس حليب بارد ونحطو يبرد كي يبرد الخليط نتاع كرام بتيسيار نضيفو مع كرام شونتي ونكونو نحينا شوي كرام شونتي وحدها بجهة باش نزينو بيها القاطو نتاعنا من فوق
نرجعو لطريقة تحضير المقادير :
نخلطو البيض وباقي المقادير بالبتار ونصبوه في صينية نتاع فور قتلك صينية نتاع فور خطراه المقادير لي عطيتهالك تصلح في صينية نتاع فور وادهنيه بالزبدة وذري شوي فرينة اذا كانت تلصق ديري ورق الطبخ لي يطيبو فوقو القاطو لي ميلصقش كي تطيب شدي كاس وشكلي بيه دوائر والباقي نتاع الجينواز فتيه بيدك
نرجعو لتزين
شدي دائرة لي شكلتيها بالكاس ديري فيها الكريمة لعجباتك وحضرتيها وحطي فوقها لفتات نتاع الجينواز لفتتيه بيدك ومن فوق شدي ديري كرام شونتي لخبيتيه بالبوش وحطي حبة كرز مصبر فوق لكرام شونتي وحطيها في ليكيسات متتصوريش واش مليحة مع القازوز في المناسبات
لكريمة لدرتها غيرتها حطيت غير كرام شونتي طلعتها بالبتار وذوبت الشيكولا نوار مع شوي كاكاو وسكر ارطب شوي برك وحليب وبردت شوي وزدت طلعتها مع كرام شونتي جات هايلة والتزين كيما شرحت من قبل متتصوريش واش خفيف وهايل

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

[تاجرة]

شكرا الزين

[idron0]

مشوك الكوكاو ام ياسين الزهراء

500غ مرغرين مع كاس سكر قلاصي و5 صفار البيض و 1خميرة وفاني والفرينة تلمي العجينة اللي تكون طرية وتغسي الكويرات في بياض البيض ومنبعد الكوكاو وتحطي في ليكيسات وطيبيهم ومع يخرجو عسليهم روعة وزاكي بزاف يقطع .

[idron0]

المشوك المعسل بالكوكااو lyzzabel

500 غ مارغريين طرية ،، كااس تاع قازووز سكر رطب ،، 5 صفاار البييض لاافااني ،، 4 م ك جلجلاااان محمص و مطحوووون فالرحى تااع القهوة و8 م ك كوكااو محمص و مطحوون رقييق و نلم بالفريينة و كييس خمييرة الحلويااات ،، نشكل كويراات بحجم حبة جووز و نغطسهم في بيااض البيض و نرمدهم فالكوكااو محمص و مرحي متوسط ، و بالمووس نديير من فووق علاامة × (غيير صغيييرة ) و نطيبهم و نعسلهم حامييييييييين ،، طبعااا نطيبهم في لي كيسااات و ميين يطييبو كل حبة نسقييها بملعقة كبيييرة عسل داافئ.

[تاجرة]

شكرا على الوصفات

[تاجرة]

اختي الجلجلان ميجيش مر