درت مسكوتة وماحبتش تتنحى من المول

[منال 22]

لبنات عاونوني درت مسكوتة وماحبتش تتنحى من المول رغم اني دهنت المول بالزيت والفرينة الاانها لسقت فيه

قولولي واش نديرها

[بنت غليزان]

خليها تبرد شوية

[khouloud 27]

كيما قالت الاخت لي قبلي خليها تبرد وحاولي
معاها بالسكين وعلى حسب المول لي درتي فيه
وادا ما بغاتش تبانلي قطعيها في المول
وخرجيها بالسكين والمغرف باش ماتضيعلك
وتروح خصارة وشوفي كيفاش تزوقيها والمرة
الجاية ديري الورق مخصص باش بالك يقعد مريح

[انا حبة سكر]

يكون مدهنتيهاش مليح برك
لاني ندهنها بالزبدة مليح او الزيت انا ندير الزبدة وتزيدي فيها الفارينة ممكن نسيتي لبلاصة ولا المول نتاعك لبلاصة هاذيك رشات شوية

[منال 22]

مشكورين لبنات ....

راني قلبتها على فمها وغطيتها بسربيتة وخليتها شوية ومن بعد هزيتها شوية تنحات من المول بصح لسق منها شوية في المول رغم اني دهنتو مليح بالزيت ورشيت عليه الفارينة كامل

بصح لبنات ماجاتنيش خفيفة جاتني شوية ثقيلة مانعرف لاه

ودرتها هكذا ب
4 بيضات- 8 مغارف ماكلة سكر- 8 مغارف ماكلة زيت-8 مغارف ماكلة حليب - 8 مغارف ماكلة فرينة - 1شكارة خميرة -
دربت الابيض نتاع البيض وحدو ودربت الاصفر وحدو +الزيت والحليب والسكر والفرينة والخميرة ومن بعد ضفت الابيض المدرب وخلطتو بالشوية ودرتها تطيب على 180درجة لمدة45د وماحليتش عليها لفور بعد نص ساعة


بصح راني نحوس على مسكوتة تجيني خفيفة كيفاش نديرها

بارك الله فيكم

[*أم ثازيري*]

جربي مسكوتة les charlottes راني حطيتهم في المنتدى ماتتخيليش واش خفااااااااااااااااااااااااااف تقول مشريين
ماتتقيديش بالمول تقدري تطيبيهم في مول المسكوتة العادي و بعد ما تطيب تدهني بالكونفيتير او super crème

[sisi 26]

أختي ادهني المول بالزبدة و خليها حتى تجمد ثم رشيها مليح بالفرينة ثم خليها تبرد باش تقلبيهاو إذا محبتش عاونيها بالموس

["راجية الجنة"]

ممكن المشكلة في المول لان نص الي يتباعوا نتع دركة مهمش ملاح
انت المرة الجايا فرشيها في الورق الخاص بالمطبخ ولا شععيها على ما تقدري بالزبدة ومتعمليش الفرينة
تحياتي

[sisi 26]

أختي إذا طيبتي فيه شحال من مرة و بقى يلصق لازم تعوديه على السخانة سخني الفور و ديريه فيه كلي راكي الطيبي كرري العملية مرتين أو ثلاثة حتى يولي ميلصقش

[yarasmin.26]

جاتك ثقيلة لانو مخلتيش مليح الفرينة الطريقة تقول من الاسفل الى الاعلى وخليها شوية ترتاح قبل وضعها في الفرن
ادهنى مليح القالب بالزيت +الفرينة بدون ترك اي مكان ومرة اخرى كي تخرجي الحلوى انتاعك
اتروكيها تبرد وضعي اعليها غطاء تاع طاجين حتى تعرق اقلبيها

[wafa.wafa]

هاذ+ المسكوتة اللي درتيها أنا دايما نديرها ودايما ناجحة وراني حطيتها في قسم التطبيقات أما أنها ما تنحاتلكش من المول فالسبب كيما قالو الاخوات اللي قبلي هو أنك ما لما دهنتي المول ما كثرتيش الفرينة ما تخافيش الفرينة ما تبقاش في المول نفضيها وخلي المسكوته في الفرن 30دقيقة فقط 45راهي بزاف وبعد ما تخرجيها خليها تبرد ومن بعد هزي المول مليح رايحة تخرج وحدها منو واذا ما خرجتش حاولي بالسباتول تاع حطب تخرجلك بلاما تفسد

[goumar]

مساء الانوار اختي ديري في بالك بلي المسكوتشه اذا طولت تطيب في الفرن رايحه تنشف و بالتالي تثقال لانها ناشفه و تلصق من تحت ممكن يكون هذا هو المشكل دمتي في رعاية الله و حفظه

[بشرى2008]

خليها تبرد شوية ولا ممكن المول كي يكون مشي مليح ثان راهو يلسق